རྒྱ་ནག་ཀོང་ཏོན་ཞིང་ཆེན་སྒྲིག་ཁྲིམས་ཞིབ་བཤེར་ལྷན་ཁང་གི་མགོ་གཙོ་གཞོན་པ་དང་རྒྱལ་ཡོངས་ལྟ་ཞིབ་ཁང་གི་འགན་འཛིན་ཀྲོན་ཧྲི་ཅེན་ཏང་དང་རྒྱལ་ཁབ་ཀྱི་ལས་གནས་ནས་གནས་དབྱུང་བཏང་ཡོད་འདུག
ཁ་སང་ཕྱི་ཚེས་ ༢༢ ཉིན་རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གི་དྲ་བའི་སྟེང་། ཀོང་ཏོན་ཞིང་ཆེན་སྒྲིག་ཁྲིམས་ཞིབ་བཤེར་ལྷན་ཁང་གི་མགོ་གཙོ་གཞོན་པ་ཟུར་པ་དང་ཞིང་ཆེན་རྒྱལ་ཡོངས་ལྟ་ཞིབ་ཁང་གི་འགན་འཛིན་ཀྲོན་ཧྲི་ཅེན་ (Zhong Shijian) གྱིས་ཁྲིམས་འགལ་ཚབས་ཆེན་བྱས་པའི་གྱོད་དོན་ལ་ཞིབ་བཤེར་བྱས་ཏེ་ཏང་དང་རྒྱལ་ཁབ་ཀྱི་གོ་གནས་ནས་གནས་དབྱུང་བཏང་ཡོད་པ་གསལ་བསྒྲགས་བྱས་འདུག
གོང་གི་གནས་ཚུལ་དེའི་ནང་ཀྲོན་ཧྲི་ཅེན་གྱིས་ཆེས་མཐའ་མཇུག་གི་ལས་གནས་ནི། ཀོང་ཏོན་ཞིང་ཆེན་རུལ་སུངས་རྒོལ་རྡུང་ལས་འགུལ་ཁང་གི་འགན་འཛིན་ཡིན་འདུག ཁོས་ཆབ་སྲིད་ཀྱི་སྒྲིག་ལམ་དང་ཞིབ་བཤེར་གྱི་སྒྲིག་ཁྲིམས་སོགས་ལ་ཁྲིམས་འགལ་ཚབས་ཆེན་བྱས་ཏེ། གཞན་གྱི་གྱོད་དོན་ཐག་གཅོད་ལ་ཐེ་གཏོགས་བྱས་པ་དང་གསང་བའི་གནས་ཚུལ་ཉེས་ཅན་ལ་སྤྲད་པ། དབང་ཆ་སྒེར་སྤྱོད་བྱས་ཏེ་ལྐོག་རྔན་བླངས་པ། དབུས་གཞུང་གི་ཐག་གཅོད་དོན་ཚན་བརྒྱད་དང་ཁྲིམས་འགལ་ཚབས་ཆེན་བྱས་ཏེ། གཞན་གྱི་གདན་ཞུ་ལ་འཛུལ་བཞུགས་བྱས་པ་དང་། དཔོན་རིགས་འདེམས་བསྐོ་དང་ཚོང་འབྲེལ་མི་སྣའི་ཁེ་དབང་ཆེད་དངུལ་འབོར་ཆེན་བླངས་པ། རང་ཉིད་ཀྱི་གོ་གནས་འཕར་ཆེད་གཞན་ལ་ལྐོག་རྔན་སྤྲད་པ་སོགས་ཀྱི་ནག་ཉེས་ཡོད་སྐོར་བཀོད་འདུག
གཞན། ཀྲོན་ཧྲི་ཅེན་གྱིས་ཞིབ་བཤེར་རུ་ཁག་གི་བྱ་འགུལ་ལ་ཐེ་གཏོགས་བཀག་འགོག་བྱས་པ་དང་། ལྐོང་རྔན་སྤྲད་པའི་མི་དང་མཉམ་འབྲེལ་གྱིས་དངུལ་སྒོར་དང་རྩ་ཆེའི་རྒྱུ་ནོར་གནས་སྤོར་སྦེད་སྐོང་བྱས་པའི་དོགས་གཞི་ཡོད་སྟབས། གནད་དོན་དེ་ཁྲིམས་འཛིན་ལྷན་ཁང་ལ་རྩིས་སྤྲོད་བྱས་ཡོད་པ་དང་ཁྲིམས་ལུགས་ལྟར་ཐག་གཅོད་བྱ་རྒྱུ་ཡིན་ཚུལ་ཡང་བསྒྲགས་འདུག
རྒྱ་ནག་ཚད་ཞིན་དྲ་བས་གནས་ཚུལ་སྤེལ་བ་ལྟར་ན། ཕྱི་ཟླ་ ༣ ཚེས་ ༣༠ ཉིན་ཀྲོན་ཧྲི་ཅེན་བཀག་གཉར་བྱས་ཡོད་པ་དང་། ཟླ་ ༤ ཚེས་ ༡ ཉིན་དབུས་སྒྲིག་ཁྲིམས་ཞིབ་བཤེར་དྲ་བའི་སྟེང་ཀྲོན་ཧྲི་ཅེན་གོ་གནས་ནས་ཕབ་སྟེ་ཞིབ་བཤེར་བྱེད་བཞིན་ཡོད་པ་ཁྱབ་བསྒྲགས་བྱས་ཡོད། ཕྱི་ཟླ་ ༦ ཚེས་ ༢༥ ཉིན་ཁོ་ཀོང་ཏོན་ཞིང་ཆེན་སྲིད་གྲོས་ཚོགས་མིའི་གོ་གནས་ནས་ཕབ་ཡོད་འདུག ཁོ་བཀག་གཉེར་བྱེད་པའི་རྒྱུ་རྐྱེན་ཡང་ཉེ་སྔོན་ཀོང་ཏོན་ཞིང་ཆེན་སྲིད་གྲོས་མགོ་གཙོ་ཀྲའུ་མིན་གོ་ (Zhu Mingguo)ཡི་གྱོད་དོན་དང་འབྲེལ་བ་ཡོད་པ་སོགས་བཀོད་འདུག
ཕྱི་ཟླ་ ༤ ཚེས་ ༣ ཉིན་ཞཱིན་ཐང་རིན་དྲ་བའི་སྟེང་དཔྱད་གླེང་པ་ཐཱང་ཅིན་ཡོན་ (Tang Jingyuan) གྱིས། ཝང་ཆེ་ཧྲན་གྱིས་ཁོ་རང་གི་ལག་འོག་གི་དཔོན་རིགས་ཚོར་རྒོལ་རྡུང་བཏང་པ་དེ་ཕྱིའི་ངོ་བོར་བལྟས་ན་ཡ་ང་སྙིང་རྗེ་མེད་པ་ཞིག་མཚོན་གྱི་ཡོད་ཀྱང་། དོན་དངོས་སུ་རྒྱ་ནག་གི་སྒྲིག་འཛུགས་ཡོངས་རྫོགས་ནང་ལྐོག་ཟ་རུལ་སུངས་ཀྱིས་ཁེངས་ཡོད་པ་ཞིག་མཚོན་གྱི་ཡོད། དེ་དང་མཉམ་དུ་ཝང་ཆེ་ཧྲན་ལ་ད་དུང་རྒོལ་རྡུང་གཏང་དགོས་པའི་འཐབ་རྩོད་ཆེན་པོ་ཞིག་ལྷག་ཡོད་པ་སྟོན་གྱི་ཡོད། ཅེས་བརྗོད་འདུག
ཀྲོན་ཧྲི་ཅེན་ནི་ཕྱི་ལོ་ ༡༩༥༦ ལོའི་ཟླ་ ༥ བའི་ནང་ཧྲན་ཏོན་ཞིང་ཆེན་ཏེན་པེ་ནས་སྐྱེས་ཤིང་། ༡༩༧༥ ལོའི་ཟླ་ ༡༢ པར་གུང་ཁྲན་ཏང་ནང་ཞུགས་ཡོད་པ་དང་། ཧེ་ནན་དགེ་མཐོན་སློབ་ཆེན་ནས་མཐར་ཕྱིན་རྗེས་ཀོང་ཏོན་ཞིང་ཆེན་ཏང་གི་སློབ་ཆེན་ནས་དཔལ་འབྱོར་ཆེད་སྦྱོང་བྱས་ཡོད་འདུག ཁོང་གི་ལོ་རྒྱུས་ཁྲོད་ཀྲུའུ་ཧེ་གྲོང་ཁྱེར་མི་དམངས་སྲིད་གཞུང་གི་མགོ་གཙོ་གཞོན་པ་དང་གྲོང་ཁྱེར་ཏང་གི་རྩ་འཛུགས་ཚོགས་པའི་མགོ་གཙོ་སོགས་ཀྱི་ལས་ཀ་བྱས་ཡོད་འདུག ༢༠༡༣ ལོའི་ཟླ་ ༣ པའི་ནང་ཀོང་ཏོན་ཞིང་ཆེན་སྒྲིག་ཁྲིམས་ཞིབ་བཤེར་ལྷན་ཁང་གི་འགན་འཛིན་གཞོན་པར་བསྐོས་ཡོད་འདུག
