ཁ་སང་ཐའེ་ཝན་ནང་གཏན་སྡོད་ཡིག་ཆ་མ་རག་པའི་བོད་མི་ ༡༥ ཡིས་ཐའེ་ཝན་རྒྱལ་ཡོངས་ཕྱི་མི་གནས་སྤོར་ལས་ཁུངས་ཀྱི་མདུན་དུ་རེ་སྐུལ་ལས་འགུལ་སྤེལ་ཡོད་འདུག
དེ་རིང་ཐའེ་པེ་དུས་བབ་ཀྱིས་གནས་ཚུལ་སྤེལ་བ་ལྟར་ན། ཁ་སང་ཐའེ་ཝན་གྱི་རྒྱལ་ས་ཐའེ་པེ་ཡི་རྒྱལ་ཡོངས་ཕྱི་མི་གནས་སྤོར་ལས་ཁུངས་ཀྱི་མདུན་དུ། ཐའེ་ཝན་འགྲོ་བ་མིའི་ཐོབ་ཐང་རྒྱབ་སྐྱོར་ཚོགས་པའི་རོགས་སྐྱོབ་འོག ཐའེ་ཝན་ནང་ཡོད་པའི་བོད་མི་ ༡༥ ལ་ཁྲིམས་མཐུན་གྱི་ཡིག་ཆ་བཟོ་ཐུབ་ཀྱི་མེད་པར་བརྟེན། ཉི་ནུབ་ཀྱི་སྲིད་ཇུས་ཀྱིས་བོད་མི་སྐྱབས་བཅོལ་བ་རྣམས་རྒྱལ་སྤྱིའི་དྭ་ཕྲུག་ཏུ་བཟོ་བཞིན་འདུག ཅེས་རེ་འབོད་ཀྱི་འཕྲེད་དར་སྣ་ཚོགས་བཟུང་སྟེ་འབོད་སྐུལ་བྱས་ཡོད་འདུག
ཐའེ་ཝན་འགྲོ་བ་མིའི་ཐོབ་ཐང་རྒྱབ་སྐྱོར་ཚོགས་པའི་དྲུང་ཆེ་ལྕམ་ཆའི་ཨེ་ལིན་ (Chiu Ee-ling) གྱིས། ཕྱི་ལོ་ ༢༠༠༠ ལོ་ནས་བོད་མི་སྐྱབས་བཅོལ་བ་ཐའེ་ཝན་ནང་ཡོང་ཡོད་པ་དང་། ཐའེ་ཝན་གཞུང་གིས་ཀྱང་གནས་སྤོར་སྒྲིག་གཞི་ལ་ལེགས་བཅོས་བཏང་སྟེ། གལ་སྲིད་སོག་པོ་དང་བོད་མིའི་སྒྲིག་འཛུགས་ཀྱིས་ངོས་ལེན་ཡོད་པའི་སྐྱབས་བཅོལ་བ་རྒྱ་གར་དང་བལ་ཡུལ་ནས་ཕྱི་ལོ་ ༢༠༠༨ ཟླ་ ༡༢ ཚེས་ ༣༡ སྔོན་ལ་ཐའེ་ཝན་ནང་འབྱོར་ཡོད་ན། ཕྱིར་ལོག་མི་དགོས་པར་ཁྲིམས་མཐུན་གྱིས་གཏན་སྡོད་བྱེད་ཆོག་པ་བཟོས་ཡོད། ཡིན་ན་ཡང་། “ཉི་ནུབ་ཀྱི་སྲིད་ཇུས་ཞེས་པ་དེས་ ༢༠༠༨ ལོའི་རྗེས་སུ་ཐའེ་ཝན་ནང་ཡོང་བའི་བོད་པ་རྣམས་ཡང་བསྐྱར་རྒྱལ་སྤྱིའི་དྭ་ཕྲུག་ཏུ་འགྱུར་རྒྱུ་བཟོས་ཡོད་པ་རེད།” ཅེས་བརྗོད་འདུག
ཁོ་མོས་མུ་མཐུད་དུ། བོད་མི་སྐྱབས་བཅོལ་བ་ཚང་མ་རྒྱུ་མཚན་འདྲ་མིན་གྱིས་ཐའེ་ཝན་ལ་ཡོང་ཡོད་ཀྱང་། ཚང་མས་ཁྲིམས་འགལ་གྱི་གནས་སྟངས་འོག་ལས་ཀ་རག་གྱིན་མེད་པ་མ་ཟད། སྨན་བཅོས་ཀྱི་རོགས་སྐྱོར་ཅི་ཡང་ཐོབ་ཀྱི་མི་འདུག གནས་སྤོར་སྒྲིག་གཞིའི་སྲིད་ཇུས་ལེགས་བཅོས་བྱེད་པ་དེས། རྒྱབ་ལྗོངས་གཅིག་པའི་བོད་པ་ཚོར་དམིགས་བསལ་གྱི་གནས་སྟངས་ལ་རོགས་སྐྱོར་བྱ་རྒྱུ་བྱས་ཡོད་ཀྱང་། ༢༠༠༨ ལོ་ནས་འགྲོ་བ་མིའི་རིགས་ཀྱི་བདེ་སྡུག་ལ་སེམས་ཁུར་བྱ་རྒྱུའི་རོགས་སྐྱོར་དེ་མཚམས་འཇོག་བྱས་འདུག སྐྱབས་བཅོལ་བའི་ལས་དོན་ད་དུང་ཐའེ་ཝན་ནང་དུ་མཐོང་རྒྱུ་མེད་པ་དེ། ཐའེ་ཝན་དང་རྒྱ་ནག་བར་གྱི་འབྲེལ་ལམ་རྩོད་རྙོག་གི་རྐྱེན་པས་ཡིན་པ་དང་། རྒྱལ་ཡོངས་ཕྱི་མི་གནས་སྤོར་ལས་ཁུངས་ཀྱིས་དཀའ་ངལ་འདི་དག་ནི་དམིགས་བསལ་གྱི་གནས་སྟངས་ཤིག་ཏུ་རྩིས་ཏེ་ཐག་གཅོད་བྱ་རྒྱུའི་རེ་འབོད་ཞུ་བཞིན་ཡོད། ཅེས་བརྗོད་འདུག་ལ། རྒྱལ་ཡོངས་ཕྱི་མི་གནས་སྤོར་ལས་ཁུངས་ཀྱི་མི་སྣ་ཞིག་གིས། གནས་སྟངས་རེ་རེ་བཞིན་མ་འདྲ་བ་ཡིན་སྟབས། རོགས་སྐྱོར་བྱེད་ཕྱོགས་ཀྱི་སྲིད་ཇུས་ལ་མ་འོངས་པར་གཏན་འབེབས་བྱ་རྒྱུ་ཡིན་འདུག ཅེས་བརྗོད་འདུག
འདི་གའི་གསར་འགོད་པས་ཁ་པར་བརྒྱུད་ཐའེ་ཝན་ས་གནས་བོད་ཕྲུག་ཚོགས་པའི་ཚོགས་གཙོ་བཀྲ་ཤིས་ལགས་སུ། ད་ལྟའི་ཆར་ཐའེ་ཝན་ནང་གི་བོད་མི་ཚོའི་གནས་སྟངས་ག་འདྲ་ཡོད་དྲིས་པར་ཁོང་གིས། ཁ་སང་ཐའེ་ཝན་འགྲོ་བ་མིའི་ཐོབ་ཐང་ཚོགས་པ་སོགས་ཀྱི་རྒྱབ་སྐྱོར་འོག ཐའེ་ཝན་ནང་ཡིག་ཆའི་དཀའ་ངལ་འཕྲད་པའི་བོད་མི་ ༡༥ ཡོད་པ་རྣམས་མཉམ་དུ་འཛོམས་ནས་གསར་འགོད་གསལ་བསྒྲགས་ཤིག་སྤེལ་ཏེ། ཕྱི་མི་གནས་སྤོར་ལས་ཁུངས་ལ་དཀའ་ངལ་ཡོད་པའི་བོད་མི་རྣམས་ཁྲིམས་མཐུན་གྱིས་གནས་སྡོད་བྱེད་ཆོག་པའི་རེ་འདུན་ཞུས་ཡོད་ལ། དེ་ནི་བོད་མི་རྣམས་མཉམ་གཅིག་ཏུ་འཛོམས་ནས་རེ་འདུན་ཞུས་པ་ཐོག་མ་དེ་ཆགས་ཡོད་པ་རེད། སྐབས་དེར་ཕྱི་མི་གནས་སྤོར་ལས་ཁུངས་ཀྱི་མི་སྣ་ཞིག་ཕེབས་ཏེ། གནས་སྟངས་འདིའི་སྐོར་ང་གཅིག་པུས་ཐག་གཅོད་བྱེད་ཐུབ་ཀྱི་མ་རེད། འགན་འཛིན་ལྷན་ཚོགས་ཀྱི་ཚོགས་འདུ་བསྐོང་རྗེས་ང་ཚོས་ཐག་གཅོད་བྱས་ནས་གསལ་བསྒྲགས་བྱ་རྒྱུ་ཡིན་ཟེར། ཞེས་བརྗོད་བྱུང་།
གསར་འགོད་པ། འཇིགས་མེད་རྒྱ་མཚོ།
