རྒྱ་ནག་ནང་དང་ཕྱི་རྒྱལ་ཁག་ཏུ་ཡོད་པའི་ཆོས་འཁོར་རྩ་རླུང་སྒོམ་སྒྲུབ་པ་ཁྲི་ ༡༠ ལྷག་གིས་ཅང་ཙི་མེན་གྱི་ཁྲིམས་འགལ་ནག་ཉེས་ཞུ་གཏུག་བྱས་ཡོད་འདུག
ཆོས་འཁོར་རྩ་རླུང་སྒོམ་སྒྲུབ་པའི་ཆེད་གཉེར་དྲ་བ་མིན་ཧེ་ཐོག་གནས་ཚུལ་སྤེལ་བ་ལྟར་ན། དྲ་བ་དེ་བརྒྱུད་ལོ་གཅིག་གི་ཡར་སྔོན་ནས་བཟུང་ཅང་ཙི་མེན་གྱི་ནག་ཉེས་ཞུ་གཏུག་བྱེད་པའི་ལས་འགུལ་སྤེལ་བཞིན་ཡོད་པ་ལྟར། འདི་ལོའི་ཕྱི་ཟླ་ ༥ པ་ནས་ཟླ་འདིའི་ཕྱི་ཚེས་ ༢༣ ཉིན་བར་དུ། རྒྱ་ནག་སྐམ་སའི་ནང་དང་ཕྱི་རྒྱལ་ཁག་ཏུ་ཡོད་པའི་ཆོས་འཁོར་རྩ་རླུང་སྒོམ་སྒྲུབ་པ་དང་འབྲེལ་ཡོད་ཁྱིམ་མི་བཅས་མི་གྲངས་འབུམ་གཅིག་(༡༠༣,༦༠༥) ལྷག་གིས། ཅང་ཙི་མེན་གྱི་གཙོས་འབྲེལ་ཡོད་མཐོ་རིམ་དཔོན་རིགས་ ༡༠ ཡི་ཁྲིམས་འགལ་ནག་ཉེས་ཁྲི་ ༨ (༨༤,༨༣༥)ལྷག་རྒྱ་ནག་ཆེས་མཐོའི་ཞིབ་བཤེར་ཁང་དང་ཁྲིམས་ཁང་། ཉེན་རྟོག་ཁང་སོགས་འབྲེལ་ཡོད་ལས་ཁུངས་ཚང་མར་གཏུག་བཤེར་ཡི་གེ་སྤྲད་ཡོད་པ་དང་། དེའི་ནང་ཕྱིའི་རྒྱལ་ཁབ་དང་ས་ཁུལ་ཁག་ ༢༤ ནས་གནོད་འཚེ་ཐེབས་པའི་ཆོས་འཁོར་རྩ་རླུང་སྒོམ་སྒྲུབ་པ་ ༡༠༧༨ མཉམ་ཞུགས་བྱས་ཡོད་འདུག
དེ་ཡང་ཟླ་འདིའི་ཕྱི་ཚེས་ ༢༥ ཉིན་ཁེ་ན་ཌའི་གྲོང་ཁྱེར་ཨེ་ཌི་མོན་ཊོན (Edmonton)དུ། ས་གནས་ཆོས་འཁོར་རྩ་རླུང་སྒོམ་སྒྲུབ་ཚོགས་པས་རྒྱ་གཞུང་གིས་ཆོས་འཁོར་རྩ་རླུང་སྒོམ་སྒྲུབ་པ་ཚོར་གནོད་འཚེ་གཏོང་བའི་གནད་དོན་ཐད་རྒྱལ་སྤྱིའི་ཐོག་ནས་དོ་ཁུར་དགོས་པ་མ་ཟད། རྒྱ་ནག་གི་སྲིད་འཛིན་ཟུར་པ་ཅང་ཙི་མེན་གྱིས་སྣེ་ཁྲིད་དེ་རྩ་རླུང་སྒོམ་སྒྲུབ་པ་ཚོར། འགྲོ་བ་མིའི་ཐོབ་ཐང་དང་འགལ་བའི་དྲག་སྤྱོད་སྤེལ་བ་ཁྲིམས་གཏུག་བྱེད་པར་རོགས་རམ་དགོས་པའི་འབོད་སྐུལ་ལས་འགུལ་སྤེལ་ཡོད་པ་དང་། སྐབས་དེར་རྩ་རླུང་སྒོམ་སྒྲུབ་པ་ཀྲི་ཌི་ཟེར་བ་ཞིག་གིས་གསར་འགོད་པར། རྒྱ་གཞུང་གིས་ཆོས་འཁོར་རྩ་རླུང་སྒོམ་སྒྲུབ་པ་ཚོར་གནོད་འཚེ་བཏང་བའི་དྲག་སྤྱོད་ནང་མི་གྲངས་ས་ཡ་ལོངས་བ་བཙོན་འཇུག་བྱས་ཡོད་པ་དང་། དེའི་ཁྲོད་ནས་མི་གྲངས་སྟོང་ཕྲག་མང་པོར་ཚད་ལས་བརྒལ་བའི་མནར་གཅོད་དང་བཙན་གཡེམ་སོགས་བྱས་ཡོད་པ་མ་ཟད། མི་ཁྲི་ ༦ ལྷག་ལྐོག་གསོད་བྱས་ཡོད་པ་དང་། ཁྱིམ་ཚང་ས་ཡ་མང་པོར་གནོད་སྐྱོན་བཟོས་ཡོད་སྐོར་སོགས་བརྗོད་འདུག
དེ་བཞིན་རྒྱ་ནག་ནང་ཡོད་པའི་ཆོས་འཁོར་རྩ་རླུང་སྒོམ་སྒྲུབ་པ་ཞིག་གིས་ཅང་ཙི་མེན་གྱི་ནག་ཉེས་ཡོངས་ཁྱབ་ཀྱིས་ཐེར་འདོན་བྱས་ཡོད་པ་མ་ཟད། ཅང་ཙི་མེན་ལ་ཁྲིམས་ཐག་གཅོད་རྒྱུ་ག་ཚོད་མགྱོགས་ན་དེ་ཚོད་ཀྱིས་ཡག་པོ་འདུག མི་སུ་ཞིག་ཡིན་ནའང་མི་ངན་དེར་སྡང་སེམས་འཛིན་ངེས་རེད། མི་མང་གི་ཆེད་དུ་བྱ་བ་ལེགས་པོ་ཅུང་ཙམ་ཡང་མ་བསྒྲུབས་པར་མི་མང་དེ་འདྲ་མང་པོ་བསད་པ་རེད། ཆོས་ལུགས་དད་ལྡན་པ་ཚོ་འཛིན་བཟུང་བྱས་ཏེ་གནོད་འཚེ་བཏང་བ་མ་ཟད། མི་གསོན་པོའི་དབང་པོ་བཀོག་ཏེ་དངུལ་ལ་བརྗེ་མཁན་གྱི་ཅང་ཙི་མེན་ལྟ་བུའི་མགོ་ཁྲིད་ཅིག་ཁྱོན་ནས་བྱུང་མྱོང་ཡོད་པ་མ་རེད། ཅེས་བརྗོད་འདུག
ཆོས་འཁོར་རྩ་རླུང་གི་ལོ་རྒྱུས་ནང་བཀོད་པ་ལྟར་ན། ཕྱི་ལོ་ ༡༩༨༠ པའི་མཇུག་དང་༡༩༩༠ པའི་ལོ་སྟོད་དུ། རྒྱ་ནག་ནང་སླར་ཡང་དྲག་རྩལ་གྱི་བྱ་འགུལ་ཚ་ཚ་འུར་འུར་གྱིས་སྤེལ་བའི་སྐབས་དང་བསྟུན་ཏེ། རྒྱ་ནག་ཅི་ལིན་ཞིང་ཆེན་ཁྲང་ཁྲིན་གྲོང་ཁྱེར་གྱི་ཟས་རིགས་བཟོ་གྲྭ་ཞིག་གི་ལས་བྱེད་ལི་ཧོང་ཀྲི་ཟེར་བ་ཞིག་གིས། ཕྱི་ལོ་ ༡༩༩༢ ལོར་རྒྱ་ནག་ནང་ཆོས་འཁོར་རྩ་རླུང་ཐོག་མར་དར་སྤེལ་བཏང་བ་ནས་བཟུང་སྟེ། ཕྱི་ལོ་ ༡༩༩༤ བར་དུ་རྒྱ་ནག་རྒྱལ་ཡོངས་ནང་དར་ཁྱབ་ཆེན་པོ་ཕྱིན་ཡོད་པ་མ་ཟད། ཕྱི་ལོ་ ༡༩༩༥ ལོར་ཧྥ་རན་སིར་ཡོད་པའི་རྒྱ་ནག་གཞུང་ཚབ་ཁང་གིས་ལི་ཧོང་ཀྲི་རྒྱལ་ས་ཕ་རི་སིར་མགྲོན་འབོད་བྱས་པ་ནས་བཟུང་ཕྱིའི་རྒྱལ་ཁབ་ཁག་གི་ནང་དུའང་དར་ཁྱབ་ཏུ་ཕྱིན་ཡོད་འདུག འོན་ཀྱང་། ཕྱི་ལོ་ ༡༩༩༩ ལོར་སྐབས་དེའི་རྒྱ་ནག་གི་སྲིད་འཛིན་ཅང་ཙི་མེན་གྱི་བཀའ་བཀོད་འོག རྒྱ་ནག་ཉེན་རྟོག་ཁང་གིས་རྒྱལ་ཡོངས་ནང་ཆོས་འཁོར་རྩ་རླུང་ནི་ལོག་ཆོས་ཤིག་ཡིན་ལ། དེས་སྲིད་གཞུང་ལ་འཇིགས་སྐུལ་བྱེད་ཀྱི་ཡོད་པའི་ཉེས་མིང་བསྒྲགས་ཏེ། ཆོས་འཁོར་རྩ་རླུང་ཉམས་ལེན་པ་ཚོ་དམར་གསོད་དང་བཙན་གནོན་ཡ་ང་བ་བྱས་ཡོད་པར་བརྟེན། ཆོས་འཁོར་རྩ་རླུང་གསར་གཏོད་པ་ལི་ཧོང་ཀྲི་ལགས་དང་ཁོང་གི་རྗེས་འཇུག་པ་སྟོང་ཕྲག་མང་པོ་ཨ་རི་དང་ཡུ་རོབ། ཨེ་ཤ་ཡའི་རྒྱལ་ཁབ་ཁག་གི་ནང་སྐྱབས་བཅོལ་དུ་འགྲོ་དགོས་བྱུང་བ་དང་། རྒྱ་ནག་ནང་གི་ཆོས་འཁོར་རྩ་རླུང་སྒོམ་སྒྲུབ་ཀྱི་ཚོགས་པ་ཁག་འཐོར་ཞིག་ཏུ་ཕྱིན་ཏེ། ཕྱི་ཚུལ་ནས་བལྟས་ན་ཆོས་འཁོར་རྩ་རླུང་སྒོམ་སྒྲུབ་པ་རྩ་མེད་དུ་གྱུར་བ་ལྟ་བུ་བཟོས་ཡོད་ཀྱང་། གནད་ཡོད་མི་སྣ་ཚོས་ད་ལྟའི་ཆར་འཛམ་གླིང་གི་རྒྱལ་ཁབ་ཁག་ ༧༠ ནང་ཆོས་འཁོར་རྩ་རླུང་སྒོམ་སྒྲུབ་པ་ས་ཡ་བརྒལ་བ་ཡོད་པ་མ་ཟད། རྒྱལ་ཁབ་ ༡༠༠ ལྷག་གིས་ཆོས་འཁོར་རྩ་རླུང་ཉམས་ལེན་བྱེད་པར་རྒྱབ་སྐྱོར་བྱེད་ཀྱི་ཡོད་སྐོར་བརྗོད་ཡོད་པ་རེད།
གསར་འགོད་པ། པདྨ་མཚོ།
