ང་ཚོས་ཆོས་ལ་རྨོངས་དད་བྱས་ནས་ཡོང་བ་རླུང་རྟ་རྒྱུག་འདུག

དེ་རིང་སྔ་དྲོར་དགེ་འདུན་པའི་དེང་དུས་ཚན་རིག་ངོ་སྤྲོད་ཟབ་སྦྱོང་ཐེངས་གཉིས་པ་དབུ་འཛུཊ་ཐོག བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས་དགེ་འདུན་པ་ཚོས་ཚན་རིག་ལ་སློབ་སྦྱོང་བྱས་ཏེ་སྤྱི་ཚོགས་ཞབས་ཞུའི་བྱ་བར་ཞུཊ་དགོས་སྐོར་གསུངས་ཡོད་པ་རེད།

དེ་རིང་སྔ་དྲོའི་ཆུ་ཚོད་ ༩།༣༠ ཙམ་ལ་ཤེས་རབ་དགའ་ཚལ་སློབ་གླིང་གི་ཉེ་འཁྲིས་སུ་ཡོད་པའི་དབུས་སྣེ་ལེན་ཁང་དུ། བོད་མིའི་སྒྲིག་འཛུགས་ཆོས་རིག་ལས་ཁུངས་དང་བོད་ཀྱི་དཔེ་མཛོད་ཁང་གཉིས་ཀྱི་མཉམ་འབྲེལ་གོ་སྒྲིག་འོག དགེ་འདུན་པའི་དེང་དུས་ཚན་རིག་ངོ་སྤྲོད་ཟབ་སྦྱོང་ཐེངས་གཉིས་པ་དབུ་འཛུགས་གནང་ཡོད་པ་དང་། ཟབ་སྦྱོང་དབུ་འབྱེད་ཀྱི་མཛད་སྒོའི་ཐོག་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས་དབུས་ཚན་རིག་དགེ་རྒན་བསྟན་འཛིན་དཔལ་སྒྲོན་ལགས་དང་ཀརྨ་བརྩོན་འགྲུས་ལགས་བཅས་འབྲེལ་ཡོད་ལས་བྱེད་རྣམ་པ་དང་། ཆོས་སྡེ་ཁག་ནས་ཕེབས་པའི་དགེ་འདུན་པ་ ༢༨ བཅས་མི་གྲངས་ ༣༠ ལྷག་འཛོམས་ཡོད་པ་རེད།

མཛད་སྒོའི་ཐོག་ཆོས་རིག་ལས་ཁུངས་ཀྱི་ཟུང་དྲུང་ཐུབ་བསྟན་ལགས་ཀྱིས་ཚན་རིག་ཟབ་སྦྱོང་གི་དགོས་དམིགས་སྐོར་ངོ་སྤྲོད་གནང་དོན། ང་ཚོས་ཟབ་སྦྱོང་འདི་མགོ་བཙུགས་པའི་རྐྱེན་འདྲ་བོ་དེ། ཕྱི་ལོ་ ༢༠༡༣ ལོར་རྒྱུད་སྟོད་གྲྭ་ཚང་དུ་བཤད་སྒྲུབ་བསྟན་པ་གོང་འཕེལ་གྱི་ལྷན་ཚོགས་ཚོགས་ཡོད་པ་དང་། སྐབས་དེར་ཚན་རིག་སློབ་ཚན་དེ་གྲྭ་བ་ཚོའི་རྒྱུན་ལྡན་སློབ་གཞིའི་ནང་དུ་འཇུག་དགོས་ཀྱི་འདུག་ཅེས་བཀའ་སྡུར་བྱུང་སྟེ། གནས་སྐབས་རིང་རྒྱུན་ལྡན་སློབ་གཞིའི་ནང་འཇུག་ཐུབ་པ་དེ་ཚོ་འཇུག་རྒྱུ་དང་། བཞག་པ་དེ་ཚོ་མུ་མཐུད་དུ་ལག་བསྟར་གནང་རྒྱུ་ཡིན། དེ་མིན་པ་ཚོ་ཁོང་ཚོར་སེམས་ཤུགས་སྤར་བའི་ཆེད་དུ་དཔེ་མཛོད་ཁང་དང་ཟུང་འབྲེལ་གྱིས་ཟབ་སྦྱོང་དེ་འདྲ་གོ་སྒྲིག་གནང་བ་ཡིན་ན། དེ་ལ་འཛུལ་ཞུགས་གནང་རྒྱུ་ཡིན་པའི་གྲོས་ཆོད་ཅིག་བཞག་ཡོད་པ་དང་། གྲོས་ཆོད་བཞག་པ་གཞིར་བཟུང་གིས་ང་ཚོས་དཔེ་མཛོད་ཁང་ལ་སློབ་སྟོན་དང་རོགས་མགོན་ཞུས་ཏེ། ན་ནིང་ལོ་ནས་བཟུང་ཟབ་སྦྱོང་མགོ་འཛུགས་ཐུབ་པ་ཞིག་ཆགས་སོང་། ཞེས་དང་།

ཡང་ཁོང་གིས། བོད་ཀྱི་དཔེ་མཛོད་ཁང་གི་ངོས་ནས་འདས་པའི་ལོ་ ༡༠ ལྷག་ནས་བཟུང་ཚན་རིག་ཐོག་ཕྱག་ལས་གནང་གི་ཡོད་པ་དང་། དུས་རྒྱུན་དགེ་འདུན་པའི་ཆེད་དུ་ཚན་རིག་ཟབ་སྦྱོང་གོ་སྒྲིག་གནང་གི་ཡོད་སྟབས། ཆོས་རིག་ལས་ཁུངས་ཀྱི་ངོས་ནས་ཚན་རིག་ཟབ་སྦྱོང་གོ་སྒྲིག་གནང་མི་དགོས་པ་ལྟ་བུ་ཡོད་ཀྱང་། ད་ལྟ་འཛིན་གྲྭ་མེད་པ་དང་ནམ་རྒྱུན་ཚན་རིག་ཟབ་སྦྱོང་ནང་ཞུགས་པའི་གོ་སྐབས་ཉུང་བའི་ཆོས་སྡེ་ཁག་ལ་ཆེད་དུ་དམིགས་ཏེ། གདན་ས་གསུམ་དང་གྲྭ་ཚང་དྲུག་ལ་ཟབ་སྦྱོང་གསལ་བསྒྲགས་བཏང་མེད་ལ། དགེ་ལུགས་ཀྱི་ཆོས་བརྒྱུད་མིན་པའི་ཆོས་སྡེ་ཆེ་ཁག་ལ་གསལ་བསྒྲགས་གཏོང་གི་ཡོད་པ་ལྟར། ད་ལོ་ལྟ་བུ་ཡིན་ན་སྒྲིག་འཛུགས་ ༩༦ ཙམ་ལ་གསལ་བསྒྲགས་བཏང་ཡོད་པའི་ནང་ནས་ལན་འབྱོར་མཁན་ ༡༨ བྱུང་སྟེ། ཟབ་སྦྱོང་ནང་དགེ་འདུན་པ་ ༢༨ མཉམ་ཞུགས་གནང་ཡོད་སྐོར་བརྗོད་ཡོད་པ་རེད།

དེ་རྗེས་དགེ་བཤེས་ལྷག་རྡོར་ལགས་ཀྱིས་འཛམ་གླིང་སྤྱི་ཡོངས་ནས་ཚན་རིག་ལ་ངོས་ལེན་དགའ་མོས་བྱེད་ཀྱི་ཡོད་པ་ལྟར། ང་ཚོ་བོད་པས་ཀྱང་ཚན་རིག་ལ་སློབ་སྦྱོང་བྱེད་དགོས་པ་གལ་ཆེན་ཆགས་ཡོད་སྐོར་གསུང་བཤད་གནང་དོན། སྤྱིར་བཏང་འཛམ་བུ་གླིང་ནང་ཚན་རིག་ཟེར་དུས་གནོད་སྐྱོན་ག་རེ་བྱུང་གི་ཡོད་མེད་ལ་མ་ལྟོས་པར་ཧ་ལམ་ཆ་འཇོག་བྱེད་ས་ཞིག་ཆགས་བསྡད་ཡོད་པ་རེད། ག་རེ་རེད་ཟེར་ན། ཚན་རིག་གིས་སྐྱེ་བ་སྔ་ཕྱི་དང་ཆོས། མི་རིགས་དབྱེ་འབྱེད་ཟེར་བ་དེ་ཚོ་བྱེད་ཀྱི་མེད་པར་དངོས་ཡོད་གནས་ཚུལ་དང་། བདེན་དོན་ག་རེ་འདུག་དེར་དཔྱད་པ་བྱས་ཏེ་འགྲོ་བཞིན་ཡོད་པའི་ཐབས་ལམ་ཡག་པོ་ཞིག་ཆགས་བསྡད་ཡོད་སྟབས། མི་མང་པོ་ཞིག་དེའི་རྗེས་སུ་འགྲོ་དགོས་པ་ཞིག་ཆགས་བསྡད་ཡོད་དུས། ང་ཚོ་བོད་པའི་ནང་ཆ་བཞག་པ་ཡིན་ནའང་། བོད་པའི་ཆོས་དང་རིག་གཞུང་། བསམ་བློའི་ལྟ་གྲུབ་བམ་གནས་ཚད་ཀྱི་ཐོག་ནས་འཛམ་བུ་གླིང་སུ་གང་ལའང་ང་ཚོ་རྗེས་ལུས་ཐེབས་ཡོད་པ་མ་རེད། ནང་ཆོས་ཡག་པོ་ཤེས་མཁན་ཞིག་ཡིན་ན་དབུ་འཕང་མཐོན་པོ་བྱས་ནས་མིས་ངོས་ལེན་བྱེད་ཀྱི་ཡོད་ན་མེད་ན། སོ་སོ་ཞུམ་མི་དགོས་པར་འཛམ་གླིང་ནང་ཨང་ཀི་དང་པོའི་ནང་སླེབ་པའི་ཆོས་ཤིག་ཆགས་བསྡད་ཡོད་པ་རེད། ངས་མཚམས་རེར་བརྟན་བཤིག་བསླངས་ཏེ། ང་ཚོས་ཆོས་སོགས་མང་པོ་ཞིག་ལ་རྨོངས་དད་བྱེད་པའི་ཉེན་ཁ་ཞེ་དྲགས་ཤིག་རེད་ཅེས་ལབ་ཀྱི་ཡོད་པ་རེད། ང་ཚོ་བོད་པ་མང་ཆེ་བ་ཞིག་གིས་རྨོངས་དད་བྱས་ནས་ཡོང་བ་རེད་དེ་ང་ཚོ་རླུང་རྟག་རྒྱུག་འདུག་ལབ་ཀྱི་ཡོད། རྨོངས་དད་བྱེད་ས་དེ་ཡག་པོ་ཞེ་དྲགས་ཤིག་ཡིན་པས་ནོར་ཡོད་པ་མ་རེད། མིག་བཙུམ་བཞག་ན་འགྲིག་བསྡད་ཡོད་པ་ཞིག་ཆགས་ཡོད་པ་རེད། ཅེས་དང་།

ཡང་ཁོང་གིས། ང་ཚོ་རྗེས་ལུས་ཐེབས་ས་དེ་དེང་དུས་ཀྱི་ཤེས་ཡོན་ཟེར་ན་འདྲ་གཙོ་བོ་ཚན་རིག་ཐོག་ང་ཚོ་རྗེས་ལུས་ཐེབས་བསྡད་ཡོད་པ་རེད། དེའི་ཐོག་ནས་རྗེས་ལུས་ཐེབས་བསྡད་ཡོད་དུས་རྒྱ་མིས་མཐོང་ཆུང་གཏོང་ཁུལ་བྱེད་ཀྱི་ཡོད་པ་རེད། བོད་རྗེས་ལུས་རེད་ཆེས་མུན་ནག་རེད། ཀླ་ཀློ་རེད་ཅེས་ལབ་ཁུལ་བྱེད་ཀྱི་ཡོད་པ་རེད། གང་ཡིན་ཟེར་ན། ཁོ་རང་ཚོས་ཚན་རིག་ཁྱར་རེ་འཁྱོར་རེ་ཞིག་ཤེས་ཀྱི་ཡོད་པ་རེད། ཡིན་ནའང་། དེང་སང་ཏོག་ཙམ་དྲག་ཏུ་ཕྱིན་པ་རེད་མ་གཏོགས་སྔོན་མ་ང་ཚོར་དེ་འདྲ་ལབ་བསྡད་པའི་སྐབས་དེར། ཨ་རི་དང་ནུབ་ཕྱོགས་ཀྱི་རྒྱལ་ཁབ་ཚོར་བལྟས་པ་ཡིན་ན། རྒྱ་མི་ཁོ་རང་ཚོ་ཆེས་མུན་ནག་དང་ཆེས་ཀླ་ཀློ། ཆེས་རྗེས་ལུས་རེད་གང་ཡང་ཡོད་པ་མ་རེད། ཅེས་དང་། ནང་ལ་རྟོགས་པ་དང་ཡོན་ཏན་ཅི་ཙམ་ཡོད་ཀྱང་ཕྱི་ལ་ཏོག་ཙམ་སྟོན་མ་ཐུབ་ན་དེང་སང་ཁག་པོ་ཡོད་སྟབས། ཚན་རིག་སྦྱངས་བའི་ཐོག་ནས་སྤྱི་ཚོགས་ནང་འཕྲོད་བསྟེན་ཞབས་ཞུ་སོགས་ལས་ཀ་མང་པོ་ཡོད་པ་དང་། དེ་བཞིན། འཁྲུག་ཆ་དོད་པའི་འཛམ་བུ་གླིང་འདིའི་ནང་ནང་ཆོས་དགོས་ཀྱི་འདུག་དང་མི་འདུག་བསམ་བློ་ཡག་པོ་གཏོང་དགོས་ལ། གལ་ཏེ་དགོས་ཀྱི་ཡོད་ན་ཡོད་སྟངས་དང་ཕན་སྟངས་ག་འདྲ་རེད། ཕན་ནུས་ཡོད་པ་ཙམ་མིན་པར་ཕན་དང་ནུས་པ་དེ་ག་འདྲ་སྟོན་དགོས་ཀྱི་འདུག་དེ་ཚོར་བསམ་བློ་གཏོང་རྒྱུ་དཔེ་མི་སྲིད་པའི་གལ་ཆེན་པོ་ཡིན་སྐོར་སོགས་གསུངས་ཡོད་པ་རེད།

ཐེངས་འདིའི་ཉིན་གྲངས་ ༡༥ རིང་གི་ཟབ་སྦྱོང་ཐོག་ཚན་རིག་དགེ་རྒན་བསྟན་འཛིན་དཔལ་སྒྲོན་ལགས་དང་ཀརྨ་བརྩོན་འགྲུས་ལགས་གཉིས་རེས་མོས་ཀྱིས་དབང་རྩའི་ཚན་རིག་དང་སྐྱེ་དངོས་ཚན་རིག་ངོ་སྤྲོད་དང་། དེ་བཞིན་དགེ་རྒན་རྣམ་གཉིས་ཟུང་འབྲེལ་གྱི་ཐོག་ནས་ཚན་རིག་ལག་བསྟར་གྱི་བྱེད་སྒོ་དང་དངོས་ཁམས་ཚན་རིག་ངོ་སྤྲོད་གནང་བཞིན་ཡོད་པ་དང་སྦྲགས། ཟབ་སྦྱོང་ནང་ཞུགས་པའི་དགེ་འདུན་པ་ཚོ་དང་ལྷན་དུ་དྲི་བ་དྲིས་ལན་བཅས་གནང་བཞིན་ཡོད་ལ། དགེ་འདུན་པའི་དེང་དུས་ཚན་རིག་ཟབ་སྦྱོང་འདི་༧གོང་ས་མཆོག་གི་བཀའ་དགོངས་གཞིར་བཟུང་ཕྱི་ལོ་ ༢༠༡༤ ལོར་སྤིར་ཤེས་རབ་གླིང་དུ་ཐེངས་དང་པོ་སྐོང་ཚོགས་གནང་ཡོད་པ་རེད།

གསར་འགོད་པ། པདྨ་མཚོ།