ཕྱོགས་གཞན་ཞིག་ནས་སྐྱབས་བཅོལ་དུ་ཕེབས་པའི་༸གོང་ས༸ཡིད་བཞིན་ནོར་བུ་གཙོས་བོད་མི་བཙན་བྱོལ་བ་རྣམས་ཀྱིས་གཞིས་བཞུགས་བོད་མིའི་རང་དབང་གི་མགྲིན་ཚབ་པར་ལངས་ཏེ། ནུས་པ་ཅི་ཡོད་ཀྱིས་བོད་དོན་བདེན་མཐའ་གསལ་བའི་ལས་དོན་སྒྲུབ་བཞིན་ཡོད་ལ། འདས་པའི་ཀྱག་ཀྱོག་གི་བྱུང་རབས་ནང་དཀའ་སྡུག་གི་འགག་འཕྲང་གྲངས་ལས་འདས་པ་ཞིག་བརྒལ་ཏེ་ད་ལྟའི་ཆར་འཛམ་གླིང་ཧྲིལ་བོར་བོད་པའི་རང་དབང་གི་འབོད་སྒྲ་གསེང་མཐོར་སྒྲོག་བཞིན་པ་མ་ཟད། མི་རིགས་འདིའི་སྙིང་སྟོབས་དང་རང་དབང་གི་ཆེད་དུ་བཏང་བའི་བློས་གཏོང་ནི་འཛམ་གླིང་རང་དབང་རྩོད་ལེན་གྱི་ཟིན་ཐོའི་ནང་འོད་དུ་འཚེར་བ་ཞིག་བྲིས་དང་འབྲི་བཞིན་ཡོད། ཡིན་ན་ཡང་། སྐབས་འདིར་བོད་པའི་ལུས་ལས་ཆད་པའི་སྲིན་འབུ་སྐོར་ཞིག་གིས་ཁྱི་སྤྱང་གི་ཐོ་ཅོ་བཞིན་བོད་ཀྱི་ཆོས་དང་རིག་གཞུང་གི་སྲོག་ཤིང་ལྟ་བུའི་༸གོང་ས༸ཡིད་བཞིན་ནོར་བུ་མཆོག་ལ་ངོ་རྒོལ་སྐད་འབོད་བྱེད་བཞིན་ཡོད།
བོད་ནང་དུ་༸གོང་ས་མཆོག་གི་སྐུ་པར་ཉར་བ་ཙམ་ཡང་ཁྲིམས་འགལ་དུ་བརྩིས་ཏེ་ཉམ་ཆུང་བོད་མི་ཚོར་མཐོང་ཆུང་དང་། ཁྱད་གསོད། རྡུང་བརྡེག བཙོན་འཇུག་བཅས་ཀྱི་མནར་གཅོད་མྱོང་གི་ཡོད་ལ། སྟབས་ཉེས་ན་སྐུ་པར་ཉར་བ་ཙམ་གྱིས ཚེ་སྲོག་འཆོར་ཡང་མི་སྲིད་པ་མིན། འོན་ཀྱང་། རང་རིགས་ཀྱི་ལར་ཞེན་ཅན་གྱི་བོད་མི་ཚོས་མུ་མཐུད་སྐུ་པར་བཤམས་ཀྱི་ཡོད་ལ། མུ་མཐུད་༸གོང་ས་མཆོག་གི་སྐུ་ཚེ་བརྟན་ཕྱིར་གསོལ་འདེབས་དང་བསྟོད་དབྱངས་རྒྱུན་ཆད་མེད་པར་ཐོན་བཞིན་ཡོད། འོན་ཀྱང་ཕྱི་ཡུལ་དུ་དེ་ལས་ལྡོག་པའི་སྣང་ཚུལ་སྐྱུག་བྲོ་བོ་ཞིག་མཐོང་རྒྱུ་ཡོད་པ་ནི། ལོ་མང་རིང་༸གོང་ས་མཆོག་གིས་སྐུ་ངལ་ལས་བསྐྲུན་པའི་སྤྱི་ཚོགས་ཁྲོད། སློབ་སྦྱོང་བྱས། བསམ་བློ་སྨིན། རྒྱབ་སྐྱོར་ཐོབ་པའི་མི་སྐོར་ཞིག་གིས་ད་གཟོད་སླ་ང་ནང་ཟོས་ཏེ། ཁ་བཅད་ཐོག་སྐྱག་པ་གཏོང་གི་ཡོད་དེ། དེ་ཚོའི་མིང་ལ་དོལ་རྒྱལ་ཚོགས་པ་ཟེར།
དོལ་ཚོགས་ཀྱིས་རྒྱ་གཞུང་གི་ལྐོག་དངུལ་ལེན་གྱིན་ཡོད་ཚུལ་སྤྱི་ཚོགས་ཐོག་བཤད་ཚུལ་ཧ་ཅང་མང་། དོལ་ཚོགས་ཀྱི་ཚོགས་གཙོ་བྱེད་མྱོང་བའི་ཚེ་བཀྲ་བླ་མས་ད་ལོ་དངོས་སུ་དྲ་ལམ་ནས་ཕྱིར་བསྒྲགས་གནང་བ་དེས་སྤྱི་ཚོགས་ཐོག་གི་བཤད་ཚུལ་ལ་ཧ་ཅང་ཁ་གསལ་བའི་བདེན་རྟགས་བྱིན་ཡོད། ཚེ་བཀྲ་བླ་མས་གསུངས་པ་ལྟར། འཐབ་ཕྱོགས་གཅིག་གྱུར་ལས་ཁུངས་དང་དོལ་ཚོགས་མཉམ་འབྲེལ་གྱིས་བཙན་བྱོལ་ནང་དུ་མི་གསོད་ཁྲག་སྦྱོར་བྱས་པ་དང་། མཐུན་སྒྲིལ་གཏོར་བཤིག་བཏང་བ། ༸གོང་ས་༸ཡིད་བཞིན་ནོར་བུ་མཆོག་གི་སྐུ་སྲོག་ལ་ཡང་རྒོལ་འདོད་ཡོད་པ་ཧ་ཅང་གསལ་བས། བོད་གཞིས་བྱེས་གཉིས་ཀྱི་བོད་རིགས་ཡོངས་ཀྱིས་བསམ་བློ་གཏོང་དགོས་པ་ལས། བོད་ཀྱི་གཏམ་དཔེར། མགོ་རུལ་སྣ་བས་མ་ཚོར་ཞེས་པ་ལྟར་སོང་ན་ཉེན་ཁ་ཆེ།
བཙན་བྱོལ་བོད་མིའི་བཅའ་ཁྲིམས་གཞི་རྩའི་ལམ་སྟོན་གྱི་ནང་ཚན། བོད་མིའི་མགོན་སྐྱབས་དང་མཚོན་རྟགས་ཞེས་པར་” བོད་ཀྱི་ལྷ་སྐལ་སྤྱན་རས་གཟིགས་དབང་མིའི་གཟུགས་སུ་བྱོན་པའི་ཁམས་གསུམ་ཆོས་ཀྱི་རྒྱལ་པོ་ྋགོང་ས་ྋསྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་ནི་འཇིག་རྟེན་ཞི་བདེའི་དེད་དཔོན་དང༌། ས་སྟེང་ྋརྒྱལ་བསྟན་ཡོངས་རྫོགས་ཀྱི་མངའ་བདག བོད་མི་ཡོངས་ཀྱི་མགོན་སྐྱབས། བླ་ན་མེད་པའི་དབུ་འཁྲིད། བླང་དོར་ལམ་སྟོན་པ། བོད་མིའི་ངོ་བོ་དང༌། དེའི་ཆིག་སྒྲིལ་གྱི་མཚོན་རྟགས། བོད་མི་ཡོངས་ཀྱི་རང་དབང་ལྡན་པའི་མགྲིན་ཚབ་པ་བཅས་ཡིན།
གནས་བབ་འདི་དག་ནི་ལོ་གྲངས་བརྒྱ་ཕྲག་མང་པོའི་བྱུང་རབས་དང༌རིག་གཞུང༌། མངའ་དབང་ལྡན་པའི་བོད་མིའི་མངོན་འདོད་བཅས་ལས་གྲུབ་པ་ཡིན། དེའི་ཕྱིར་གཤམ་གསལ་གྱི་མཛད་འགན་དང་སྐུ་དབང་རྣམས་རང་ཆས་སུ་ཡོད་”ཅེས་འཁོད་ཡོད་པ་བཞིན། ༸གོང་ས་ཡིད་བཞིན་ནོར་བུ་མཆོག་ནི་དེང་སྐབས་འཛམ་གླིང་ཐོག་བོད་མི་རིགས་ཀྱི་མཚོན་རྟགས་དང་རང་དབང་གི་མགྲིན་ཚབ་པ། བོད་ཀྱི་བསམ་བློའི་དབུ་འཁྲིད་དང་ཆིག་སྒྲིལ་གྱི་སྲོག་ཤིང་བཅས་ཡིན་ཏེ། སྤྱིར་བཏང་༸གོང་ས་༧མཆོག་བོད་ཡུལ་དང་བྲལ་ནས་ལོ་ངོ་འདི་སྙེད་ཅིག་འགོར་ན་ཡང་། བོད་ཀྱི་བསམ་བློའི་ནང་གོང་ས་༧སྐྱབས་མགོན་ཆེན་པོ་མཆོག་གི་གནས་བབ་ནི། རྒྱ་གཞུང་གིས་ལོ་ནས་ལོ་བསྟུད་དཔལ་འབྱོར་གྱི་བསླུ་བྲིད་དང་། དྲག་དཔུང་གི་འཇིགས་ངོམས་སོགས་ཐབས་བརྒྱ་ཇུས་སྟོང་འགོད་ཀྱིན་ཡོད་ན་ཡང་། བོད་མི་རིགས་ཀྱི་བསམ་བློའི་ཁྲོད་དོན་དམ་པའི་ཚོད་འཛིན་རྡུལ་ཙམ་ཐུབ་ཀྱི་མེད་པ་ནི། སྐུ་པར་ཙམ་གྱི་ཆེད་སྲོག་ལ་བབས་ཀྱང་གནོང་འགྱོད་མེད་པ་དང་། ༸གོང་ས་མཆོག་བོད་ལ་ཕྱིར་ཕེབས་དགོས་པའི་འབོད་སྒྲའི་ཁྲོད་རང་ལུས་མེར་མཆོད་ཕུལ་བའི་དོན་དངོས་གྲངས་མང་བྱུང་བ་འདིས་གསལ་བོར་མཚོན་གྱི་ཡོད།
ད་དུང་སྤྱི་ལོ་ ༢༠༠༦ ལོའི་རི་དྭགས་པགས་རིགས་ཀྱི་གྱོན་པ་དོར་དགོས་པའི་གསུང་བསྐུར་ཐེངས་གཅིག་གིས་བོད་ཡུལ་ཆོལ་ཁ་གསུམ་ཡོམ་ཡོམ་བརྒུལ་ཅིང་། ད་ལྟའི་ཆར་རི་དྭགས་པགས་རིགས་ཀྱི་གྱོན་པ་ཅན་གདོན་དུ་ལྟ་བའི་འདུ་ཤེས་ཆགས་སོང་བ་འདི་གཅིག་པུས་ཀྱང་། བོད་མི་རིགས་ཀྱི་བསམ་བློའི་ཁྲོད་ཀྱི་༸གོང་ས་བཅུ་བཞི་བ་ཆེན་པོའི་གནས་བབ་དང་། དོན་དམ་དུ་བོད་ཀྱི་བསམ་བློའི་མཛུབ་སྟོན་པ་སུ་ཞིག་ཡིན་པ་གསལ་གསལ་རྗེན་རྗེན་དུ་མཐོང་ཐུབ། འདི་ལས་ཤེས་པ་ནི། ༸གོང་ས་མཆོག་ནི་དོན་དངོས་ཐོག་བོད་མི་རིགས་ཀྱི་བླ་ན་མེད་པའི་དབུ་ཁྲིད་དང་། བོད་ཀྱི་ཆོས་དང་རིག་གཞུང་གི་ཚབ་མཚོན། བོད་མིའི་རང་དབང་གི་མགྲིན་ཚབ་པ་ཁོ་ན་དེ་ཡིན་པ་སུས་ཀྱང་བསྙོན་དུ་མེད་ལ། རྒྱུ་མཚན་དེའི་ཕྱིར་ན་༸གོང་ས་མཆོག་ལ་རྒོལ་བ་ནི། བོད་མི་རིགས་ལ་རྒོལ་བ་ཡིན། ༸གོང་ས་མཆོག་རྫུན་དུ་སྒྲོག་པ་ནི་བོད་མི་རིགས་རྫུན་དུ་སྒྲོག་པ་ཡིན། དེ་བཞིན་༸གོང་ས་མཆོག་ཕམ་པར་འདོད་པ་ཡང་བོད་མི་རིགས་ཕམ་པར་འདོད་པ་ཡིན། རྒྱུ་མཚན་མང་པོ་སྨོས་ག་ལ་དགོས་ཏེ། འཛམ་གླིང་གི་རྒྱལ་ཁབ་ཕལ་མོ་ཆེས་དམངས་ཁྲོད་དུ་བོད་མི་ལ་ “ཏཱ་ལའི་བླ་མའི་མི” ཞེས་འབོད་ཀྱི་ཡོད་པ་འདི་ཙམ་གྱིས་ཀྱང་དུས་རབས་འདིའི་ནང་བོད་དང་ཏཱ་ལའི་བླ་མའི་འབྲེལ་བ་གསལ་སྟོན་བྱ་ཐུབ་པ་ཡིན།
ཆོས་ལུགས་དང་དད་མོས་ཀྱི་ཆ་ནས་སྨོས་ཀྱང་ཅི་དགོས་ཏེ། བོད་མི་རྣམས་ཀྱིས་༸གོང་ས་མཆོག་ནི་སྤྱན་རས་གཟིགས་མིའི་ཤ་ཚུགས་སུ་བྱོན་པ་དང་། བོད་ཡུལ་ནི་ཁོང་གི་གདུལ་ཞིང་ཡིན་པ་ལུང་དང་རིགས་པ་དཔག་ཏུ་མེད་པས་བསྒྲུབ་ཏུ་ཡོད་པ་ཞིག་རེད། ཐ་ན་ད་སྐབས་༸གོང་ས་མཆོག་ལ་ངོ་རྒོལ་གྱི་ཐོ་ཅོ་གནམ་ལ་འཕྱར་བའི་དམ་ཉམས་དེ་ཚོ་ཡང་ཕལ་ཆེ་བས་༸གོང་ས་མཆོག་གི་མདུན་ནས་ཆོས་ཞུ་མྱོང་བ་དང་། མང་པོ་ཞིག་གི་དགེ་ཚུལ་སློང་གི་སྡོམ་པ་ལེན་སའི་མཁན་པོ་ཆགས་ཡོད། དམ་ཉམས་འདི་འདྲ་བ་དག་གིས་ད་དུང་རི་བོ་དགེ་ལུགས་པའི་བསྟན་པ་བསྲུང་བར་ཁས་འཆེ་བ་ནི་ས་སྟེང་གླེན་པར་མཐོང་བ་མིན་ན་ཅི། དམ་ཚིག་ཉམས། གྲྭ་བ་ལོག བླ་མ་སྨོད། འདྲེ་གདོན་བཀུར། རྫུན་གྱི་འཁོར་ལོ་བསྐོར། ཐ་ན་ཆེས་སྤྱིར་བཏང་གི་མི་གཤིས་ཙམ་ཡང་འཚོལ་དུ་མེད་པ་འདི་ཚོས་ད་དུང་ཡང་ཇོ་བོ་བཀའ་གདམས་པའི་བསྟན་པའི་ལ་རྒྱ་འཛིན་པར་སྒྲོག་པ་ནི་ཆེས་སྐྱུག་བྲོ་བ་ཞིག་མིན་ནམ།
གཞན་ཡང་། ཆོས་འབྱུང་རྣམ་ཐར་དང་ཆོས་ལུགས་དད་མོས་ཀྱི་ཆ་ནས་བཤད་ན། སྤྱི་སྒེར་སུ་ཞིག་གིས་ཀྱང་དོལ་རྒྱལ་བརྟེན་ན་ཕན་ལས་གནོད་ཆེ་བ་དང་། དགེ་ལས་སྐྱོན་ཆེ་བ། ཁེ་ལས་གྱོང་ཆེ་ཚུལ་མི་ལོ་བཞི་བརྒྱ་ལྷག་གི་ལོ་རྒྱུས་དཔང་དུ་བཞག་སྟེ། ༸གོང་ས་མཆོག་སྐུ་ཉིད་ཀྱིས་ཉམས་མྱོང་གཞི་བྱས་ནས་མང་ཚོགས་ལ་བླང་དོར་བཀའ་སློབ་ལམ་སྟོན་གནང་ཡོད་ལ། དེ་འདྲའི་ལམ་སྟོན་བཀའ་སློབ་ནི་༸གོང་ས་མཆོག་སྐུ་སྒེར་གྱི་ཐོབ་ཐང་དང་འགན་འཁྲི་ཡང་རེད། བོད་ཀྱི་ཆོས་ལུགས་ཀྱི་དབུ་ཁྲིད་ཅིག་ལ་མཚོན་ན་མགོ་སྐྱབས་འགྲོའི་བསླབ་སྡོམ་ནས་མཇུག་རྡོ་རྗེ་ཐེག་པའི་ཟབ་ལམ་བར་གྱི་བླང་དོར་གྱི་རིམ་པ་མཐའ་དག་པ་མ་ནོར་བ་སྟོན་རྒྱུ་དེ་ནི་འགན་འཁྲི་ལྡོག་མེད་ཅིག་ཡིན་ལ། སློབ་མ་བསླབ་སྡོམ་གྱི་རྒྱ་ལས་བརྒལ་མི་རུང་བར་བསྟན་པ་དེ་དད་མོས་ཀྱི་རང་དབང་ཕྲོགས་པར་སྒྲོག་ན། འཇིག་རྟེན་འདིར་ཆོས་ལུགས་པར་འབོད་པའི་གདགས་གཞི་གང་དུ་འཚོལ་དགོས། ལྷག་པར་དུ་ནང་པ་དང་དེའི་ནང་ནས་ཀྱང་གསང་སྔགས་རྡོ་རྗེ་ཐེག་པའི་བསྲུང་བྱ་ལྕི་ཡེར་བ་དེ་དག་ཇི་ལྟར་རྒྱུན་འཛིན་བྱེད་དགོས།
རྒྱལ་དབང་ཐམས་ཅད་མཁྱེན་པས་དུས་ཐོག་མ་ཉིད་ནས་ཉེས་སྐྱོན་ཡོད་པ་མཐོང་ནས་ངས་མ་བཤད་ན་ངའི་སྐྱོན་རེད། ལབ་ནས་མ་ཉན་ན་ཁྱེད་རང་ཚོའི་འདོད་པ་རེད་ “ཁ་ཆེ་ཕ་ལུའི་སྙིང་གཏམ་བཤད་ཡོད་དོ།། ཉན་དང་མི་ཉན་སོ་སོའི་བསམ་བློ་རེད།།” ཅེས་ལུང་དྲང་ནས་གསུངས་ཡོད། དོལ་རྒྱལ་ནི་ “ང་དགེ་ལུགས་པའི་དམ་སྲི་ཁོ་ཡིན་” ཞེས་རང་ཉིད་ཀྱིས་རང་ཉིད་ངོ་སྤྲོད་བྱེད་མཁན་དེ་ཡིན་པ་དང་། རྒྱུ་སྨོན་ལམ་ལོག་པ་དང་། ངོ་བོ་དམ་སྲི་འབྱུང་པོ། བྱེད་ལས་བསྟན་པ་དང་འགྲོ་བར་གནོད་འཚེ་བྱེད་པ་བཅས་ཡིན་པ་༸གོང་༸ས་ལྔ་བ་ཆེན་པོས་ངོས་འཛིན་གསལ་བར་གནང་ཡོད་དེ། རི་བོ་དགེ་ལུགས་པའི་ཆོས་རྒྱུན་ལ་དད་མོས་ཡོད་མཁན་ཞིག་ཡིན་ཚེ། དམ་མིན་དམ་བརྫུ་གྲགས་པ་རྒྱལ་མཚན་ཞེས།། སྨོན་ལམ་ལོག་པའི་དམ་སྲི་འབྱུང་བོ་འདིས།། བསྟན་དང་འགྲོ་བ་ཀུན་ལ་འཚེ་བྱེད་ན།། མགོན་སྐྱབས་དཔུང་གཉེན་མ་མཛད་ཐལ་བར་རློགས།། ཞེས་མཆོག་གསུམ་ལ་བདེན་པ་བདར་ནས་གསུངས་ཡོད་པ་འདི་ལས་ལྷག་པ་ཅི་ཡང་མི་དགོས་པ་ཡིན།
གང་ལྟར་དེ་འདྲའི་རྩོད་པ་ཅན་གྱི་འདྲེ་ཞིག་ཁ་ལ་ཁྱེར་ཀྱང་རུང་། དེ་མིན་གྱི་གནས་ཚུལ་ཅི་ཞིག་གླེང་ནས་ངོ་རྒོལ་བྱས་ཀྱང་༸གོང་ས་༸སྐྱབས་མགོན་ཆེན་པོ་མཆོག་ནི་བོད་མི་རིགས་ཀྱི་བསམ་པའི་དབུ་ཁྲིད་དང་བླང་དོར་ལམ་སྟོན་པ་ཡིན་པས། ཁོང་ལ་མཚན་སྨོད་དང་། ཟུར་ཟ། མཐོང་ཆུང་བཅས་བྱས་པ་ནི་བོད་མི་རིགས་ལ་མཐོང་ཆུང་ཁྱད་གསོད་བྱས་པ་ཡིན། རྒྱ་གཞུང་གིས་གནས་ཚུལ་འདི་གསལ་བོར་ཤེས་ཡོད་སྟབས། ཐོག་མཐའ་བར་གསུམ་དུ་བོད་མི་རིགས་ལ་རྡུང་བརྡེག་གཏོང་བ་དང་། བོད་མི་རིགས་ཀྱི་ལས་དོན་དང་འབྲེལ་བའི་དཀའ་རྙོག་གང་འཕྲད་དང་། ཐ་ན་བོད་སྐད་བོད་ཡིག་འཕེལ་རྒྱས་གཏོང་དགོས་པའི་མང་ཚོགས་ཀྱི་ཞུ་འབོད་ཁྲོམ་སྐོར་ལ་ཡང་། ཐད་ཀར་ཏཱ་ལའི་བླ་མ་ལོག་སྤྱོད་པ་དང་། ཏཱ་ལའི་བླ་མ་ཁ་བྲལ་བ། ཏཱ་ལའི་བླ་མ་འཇིགས་སྐུལ་བ་སོགས་༸གོང་ས་མཆོག་གི་མཚན་རང་སྤྱད་ནས་སྡིགས་ར་སྐུལ་གྱི་ཡོད་ལ། འདི་ལྟར་སྡིགས་ར་བསྐུལ་ན་བོད་མི་རེ་རེ་བཞིན་གྱི་སེམས་ལ་ན་ཟུག་འཇོག་གི་ཡོད་པ་ཁོང་ཚོས་གསལ་བོར་ཤེས་ཀྱི་ཡོད།
མདོར་ན་རྒྱ་གཞུང་གིས་ཐོག་མཐའ་བར་གསུམ་དུ་ཏཱ་ལའི་བླ་མ་ཞེས་སྡིགས་ར་དང་འཇིགས་སྐུལ་བྱེད་བཞིན་པ་འདིས་ཐད་ཀར་བོད་ཀྱི་ས་གནས་ཁག་དམ་དྲག་བྱེད་ཀྱི་ཡོད་ལ། ཁོང་ཚོས་བརྒྱུད་ལམ་ནང་སྤྱད་པའི་ཏཱ་ལའི་བླ་མ་ཞེས་པ་འདིས་བོད་མི་རིགས་མཚོན་ཐབས་བྱེད་ཀྱི་ཡོད། གང་ལྟར་འདི་འདྲའི་བསམ་སྦྱོར་ངན་པ་འཆང་བའི་མི་རིགས་སུ་ཞིག་དང་སྐྱ་སེར་གང་འདྲ་ཞིག་ཡིན་ནའང་དེ་ནི་བོད་མི་རིགས་སྤྱི་ལ་གནོད་པའི་གཏེ་བོ་ཞིག་ལ་མི་བརྩི་ཐབས་མེད་ཡིན།
བྱེ་བྲག་ཏུ་དགར་ནས་གསལ་བོར་བཤད་ན། དོལ་ཚོགས་ཀྱི་བྱེད་གཏེ་རེ་ཟུང་དང་། རྒྱ་དམར་གཞུང་གི་འཐབ་ཕྱོགས་གཅིག་གྱུར་ཟེར་བའི་ལག་དམར་བ་དེ་ཚོ་ཡིན། འཐབ་ཕྱོགས་གཅིག་གྱུར་ཟེར་བའི་ལག་དམར་པའི་ཁྱི་ཚོགས་འདིས། ང་ཚོའི་མི་རིགས་ཀྱི་དཔའ་བོ་ག་ཚོད་ཀྱི་སྐུ་སྲོག་ལ་འདྲེ་ལག་བསྲིངས་ཡོད་པ་དང་། ཐོག་མཐའ་བར་གསུམ་དུ་༸གོང་ས་མཆོག་གི་ལམ་དབུ་མའི་དགོངས་གཞི་ལ་ལོག་འགྲེལ་བྱས་ཏེ་དྲིལ་བསྒྲགས་རྫུན་མས་ས་སྟེང་བཀང་བ་དང་། བོད་ཀྱི་ལས་རིགས་སྣ་ཚོགས་ཀྱི་འཕེལ་རྒྱས་ལ་ཚོད་འཛིན་དང་། མགོ་གནོན། འབུར་འཇོམས་བྱས་ཏེ་བོད་ཀྱི་སྲིད་འབྱོར་རིག་གསུམ་རྨང་ནས་བརླག་པའི་སྦྱོར་བ་རྩོམ་གྱི་ཡོད། དཔེར་ན། དོལ་ཚོགས་དང་ངན་པ་ལག་འབྲེལ་བྱས་ནས་ལས་དོན་སྒྲུབ་སྟངས་ལ་ལྟོས་དང་། ཁོ་ཚོས་རྣམ་པ་ཐམས་ཅད་དུ་བོད་མི་རིགས་ཀྱི་གཉོམ་ས་ཕྲ་ས་ཁོ་ནར་འཇུས་ཏེ་མི་རིགས་འདི་གཏན་ནས་སྒྱེལ་ཐབས་ཁོ་ནར་བརྩོན་གྱི་ཡོད།
དེའི་ཆ་ནས་ཀྱང་དོལ་ཚོགས་ཀྱི་ཕྱི་པགས་གྱོན་པའི་རྒྱ་དམར་གསང་ཉུལ་བ་ཚོར་ཇུས་ལན་ཇུས་འཇལ་ངེས་པར་དགོས་པ་ལས་དེ་མུར་འཇོག་ཐབས་གཏན་ནས་མེད་དེ། ལྟོས་འཇོག་གིས་བཤད་ན། ས་ཁོངས་དང་མི་རིགས་ཀྱི་བདག་དབང་ཐད་ཀྱི་རྩོད་ཉོག་ལ་ཐུག་པའི་རྒྱ་གཞུང་གིས་དེ་འདྲ་ལོས་བྱེད་མོད། བོད་ཀྱི་རིགས་ལས་ཆད་ཅིང་ཁྲག་གི་བཞུར་རྒྱུན་འདྲེས་པའི་ཁྲེལ་མེད་ནང་རུལ་བ་འདི་ཚོས་འདི་འདྲ་བྱེད་པའི་འོས་བབ་ག་ན་ཡོད་དེ། རང་གི་མི་རིགས་འདི་ལོ་རྒྱུས་ཀྱི་ཤི་གསོན་ལ་ཐུག་པའི་ཚོད་བགམས་ཁྲོད་གནས་ཡོད་པས་སོ།།
དོལ་རྒྱལ་ཞེས་པའི་གཟུགས་མེད་དེ་བསྟེན་པ་ཙམ་ནི་རྣམ་པ་ཐམས་ཅད་དུ་རང་དབང་ཡིན་པས་སུས་ཀྱང་ཐེ་གཏོགས་མི་བྱེད་མོད། བོད་མི་ཁག་ཅིག་གིས་གཟུར་གནས་ཡིན་མདོག་གིས་༸གོང་ས་མཆོག་དང་བོད་མིའི་སྒྲིག་འཛུགས་ལ་གཞི་མེད་སྐྱོན་བརྗོད་ཅི་བྱས་ལ་གསེད་བཀྲོལ་མི་གནང་བར། མདུང་རྩེ་ནང་དུ་སྐོར་མི་རུང་བར་ཕྱི་ལ་སྐོར་དགོས་པའི་ཁག་འཇོག་ས་འཚོལ་མཁན་རྣམས་ལ་བཤད་འདོད་པ་ནི། ནང་བཀྲ་མ་ཤིས་ན་ཕྱིའི་དོན་མི་འགྲུབ་ཟེར་བའི་བོད་མིའི་ཁ་དཔེ་འདི་ཡིན།
མདོར་ན་༸གོང་ས་མཆོག་དང་བོད་མིའི་སྒྲིག་འཛུགས་ལ་གཞི་མེད་སྐྱོན་བརྗོད་དང་མཐོང་ཆུང་ཁྱད་གསོད་ཀྱི་ཅ་ཅོས་གནམ་ས་བཀང་ཡང་། སེམས་ཀྱི་ཚོར་སྣང་དང་ངག་གི་རྣམ་འགྱུར་རང་མལ་དུ་གནས་པ་རྣམས་ནི། ལུས་བོད་མིར་ཐོབ་ཀྱང་སེམས་དམར་གཞུང་ལ་ཤོར་བའི་དོལ་ཚོགས་དང་ཁྱད་པར་མེད་ཁར། ཅོལ་ཆུང་གཡམ་ལ་རྒྱུགས་མཁན་ཚོའི་བློ་བྲིད་དགོས་ན་ཁོ་ཚོ་ལས་ལྷག་པ་མི་འདུག
སྤྱིར་ན་སྔོན་གྱི་བཙན་པོ་སྲོང་བཙན་སྒམ་པོའི་སྐབས་ཕོ་རབ་ཀྱི་དགེ་ཁྱད་དགུ་ཡོད་པའི་ནང་གི་དཀར་ནག་གི་དགེ་ཐོན་པ། དགྲ་གཉེན་གྱི་རིས་གསལ་བ་ཞེས་པ་ལྟར། སྐབས་འདི་འདྲའི་ནང་། ཕ་བརླ་དགྲ་བོར་བཙོང་། སྟག་ཤ་ཁྱི་ལ་འཕེན་པའི་དོལ་ཚོགས་ཀྱི་བྱེད་བབ་འདི་ལྟ་བུ་ལ་ཡང་དཀར་ནག་གི་དབྱེ་གསེས་མེད་པར། འཛུམ་དམུལ་ལེར་བགད་ལྷང་ངེར་འགྲོ་ཐབས་བྱེད་པ་ནི། ལོ་རྒྱུས་ཀྱི་འགན་འཁྲི་རྡོ་ལྟར་དོར་བའི་ཁྲེལ་མེད་ཡིན་ལ། གལ་ཏེ་མི་རིགས་འདི་ལ་མ་འོངས་པར་རྒྱལ་ཁ་ཞིག་ཐོབ་པ་ཡིན་ན། དོལ་ཚོགས་དང་དོལ་ཚོགས་ལྟ་བུའི་རྒྱུགས་ཁྱི་འདི་ཚོར་མི་རབས་ནས་མི་རབས་བར་ནང་རུལ་བའི་གཏམ་རྒྱུད་སྒྲིག་པར་ཐེ་ཚོམ་མེད།
དེང་སང་བོད་ཁྱིམ་སློབ་ཟུར་ཡིན་ཟེར་མཁན་ན་གཞོན་ཁ་ཤས་ཤིག་ནས་དོལ་རྒྱ་གཉིས་ཀྱི་རྐུབ་གཡོག་རྒྱུགས་ནས་༸གོང་ས་མཆོག་ལ་སྐུར་འདེབས་ཞུ་བའི་སྐད་ཆ་འདྲ་མིན་ཤོད་མཁན་དེ་འདྲ་འདུག ཉེ་ཆར་ཧྥ་རན་སི་ནས་བོད་ཁྱིམ་སློབ་ཟུར་ཡིན་ཟེར་མཁན་དོལ་རྒྱའི་རྒྱུགས་ཁྱི་ཞིག་གིས་སྐད་ཆ་རྣ་བས་ཉན་མ་བཟོད་པ་དེ་འདྲ་བཤད་དེ་སྐད་འཕྲིན་དང་ངོ་དེབ་གང་སར་ཁྱབ་འདུག་ཀྱང་དེ་ཚོར་བོད་ཁྱིམ་དང་སློབ་ཟུར་ཚོགས་པ་ཟེར་བ་དེ་ཚོས་གཅིག་གནང་ཡག་འདྲ་མེད་པ་ཡིན་ནམ། འདི་ལོ་བོད་ཁྱིམ་ནང་མི་གཅིག་ཅེས་པའི་མིང་ཐོག་ནས་༸རྒྱལ་བར་བརྟན་བཞུགས་དང་ཁས་བླངས་དམ་འབུལ་འདྲ་བྱས་སོང་ཡང་། འདི་ཚོའི་ཐོག་གོ་རྒྱུ་ཚོར་རྒྱུ་མི་འདུག ངས་ད་རེས་འདི་ནས་ཟུར་ཙམ་ཞུས་པ་ཡིན་སྤྱི་ཁྱབ་ཡིག་ཚང་ནས་གོ་ཐུབ་པའི་རེ་བ་ཡོད། ད་དུང་འདི་མུར་གོ་མེད་ཚོར་མེད་དུ་བཞུགས་ན་སྤྱི་ཚོགས་དྲ་བའི་ནང་སྐད་ཆེ་ཙམ་རྒྱག་གི་ཡིན་ཏ།
རྒན་ཁྱེད་ཀྱི་མི་གཞི་དང་སྒེར་ཚུགས། བཤད་ཕོད་པའི་གཤིས་ཀ་དེར་ང་རང་རྒྱུན་དུ་ཡིད་སྨོན་དང་དགའ་པོ་བྱེད་མཁན་ཞིག་ཡིན། ད་རེས་འདི་ནས་དོན་དག་གཏིང་ཟབ་ལ་ངེས་པར་བཤད་དགོས་པའི་སྐད་ཆ་ཞིག་ནན་གཏན་ཐོག་བཤད་པར་བཀའ་དྲིན་ཆེ་ཞུ། རྩོམ་ཡིག་ལ་བལྟས་པ་ཙམ་གྱིས་རྩོམ་པ་པོ་དེ་ཕ་ཡུལ་གང་ནས་ཡིན་ཤེས་ཡོང་བའི་དེང་གི་རྩོམ་ཡིག་དེ་དག་དང་མི་འདྲ་བར་སྙན་ཞིང་དོོན་འདུས་པ་ཞིག་བྲིས་འདུག་པ་ངོ་མ་དགའ་སོང་།