འདི་ལོའི་པེ་ཏེ་ཧི་གསང་བའི་ཚོགས་འདུ་དེ་ཞི་ཅིན་ཕིན་དང་ཝང་ཆི་ཧྲན་གཉིས་ཀྱི་ཐབས་ཇུས་དོན་འཁྱོལ་ཡོང་བའི་གོ་སྐབས་ལེགས་ཤོས་ཤིག་ཏུ་ངོས་འཛིན་བྱེད་ཀྱི་འདུག
ལོ་རེའི་ཕྱི་ཟླ་ ༨ པའི་ཟླ་མགོ་རུ་རྒྱ་ནག་དམར་ཤོག་ཚོགས་པས་པེ་ཏེ་ཧི་གསང་བའི་ཚོགས་འདུ་སྐོང་སྲོལ་ཡོད་པ་ལྟར། རྒྱལ་ཕྱི་ནང་ནས་དོ་སྣང་ཆེན་པོས་འདི་ལོའི་ཚོགས་འདུ་ཚོགས་ཚར་བ་དང་། ཡང་ཁ་ཤས་ཀྱིས་ད་ལྟ་འཚོགས་བཞིན་པའི་སྒང་ཡིན་སྐོར་རྗོད་ཀྱིན་འདུག ཡང་རེ་ཟུང་གིས་ད་ལོའི་དབྱར་དུས་སུ་གཏན་ནས་འཚོགས་རྒྱུ་མིན་སྐོར་ཡང་རྗོད་ཀྱི་ཡོད་པ་མ་ཟད། གནད་དོན་དཔྱད་ཞིབ་པ་མང་པོས་ད་ལོའི་ཚོགས་འདུ་དེ་སྔར་དང་མི་འདྲ་བར་ཆབ་སྲིད་ཀྱི་ཁ་སྐོང་དྲི་གཞི་ཙམ་དུ་གྱུར་ཏེ། གདམ་ག་དང་བསམ་ཚུལ་འདོན་ས་མེད་པར་ཞི་ཅིན་ཕིན་གྱི་དབང་ཆ་སྔར་ལས་སྲ་བརྟན་དུ་གཏོང་བའི་གོ་སྐབས་ལེགས་ཤོས་ཤིག་ཏུ་གྱུར་ཡོད་སྐོར་རྗོད་ཀྱི་འདུག
སྤྱིར་བཏང་པེ་ཏེ་ཧི་གསང་བའི་ཚོགས་འདུའི་ཐོག རྒྱ་ནག་དམར་ཤོག་ཚོགས་པའི་ཆེས་མཐོའི་དཔོན་རིགས་ལས་ཐོག་དང་ལས་ཟུར་རྒན་རབས་པ་བཅས་མཉམ་དུ་འཛོམས་ཏེ། ཆབ་སྲིད་བཅོས་སྒྲིག་གཙོ་བོར་བཟུང་ནས་གལ་ཆེའི་གནད་དོན་མང་པོ་ཐག་གཅོད་བྱེད་ཀྱི་ཡོད་པ་དང་། སྐབས་དེར་དམར་ཤོག་ཚོགས་པའི་རྒན་རབས་པ་མང་པོས་ཀྱང་གོ་སྐབས་དམ་འཛིན་གྱིས་དབང་ཤུགས་བཀོལ་ཏེ་ཆབ་སྲིད་ནང་ཐེ་གཏོགས་བྱེད་ཀྱི་ཡོད་སྟབས། མི་རྒན་ཚོས་ཆབ་སྲིད་གཉེར་བའི་མཚོན་རྟགས་ལྟ་བུ་ཞིག་ཏུ་ངོས་འཛིན་བྱེད་ཀྱི་ཡོད། ཡིན་ནའང་། ད་ལོར་པེ་ཧེ་ཧི་ཚོགས་འདུ་མ་བསྡུས་གོང་ནས་ཞི་ཅིན་ཕིན་དང་རྒྱ་ནག་དབུས་སྒྲིག་ཁྲིམས་ཞིབ་བཤེར་ཁང་གི་མགོ་ཁྲིད་ཝང་ཆི་ཧྲན་གཉིས་ཀྱིས། ལྐོག་ཟ་རུལ་སུངས་དང་དབང་ཆ་སྒེར་གཅོད་ཀྱི་རྒྱལ་པོ་ཀྲུའུ་ཡོང་ཁཱང་ལ་ཚེ་བཙོན་གྱི་ཁྲིམས་ཐག་བཅད་ཚར་བ་མ་ཟད། ཉེ་སྔོན་ཕྱི་ཟླ་ ༧ པའི་ཟླ་མཇུག་ཏུ། ཁོ་བོའི་དྲུང་ཡིག་ཀྲུའུ་པིན་ཧྲིན་དང་ལག་རོགས་གཙོ་བོ་ལིན་ཅི་ཧྭ་གཉིས་ཀྱི་ཆབ་སྲིད་དབང་ཆ་ཡོངས་སུ་མཇུག་བསྡུས་པ་སྔ་གཞུག་ཏུ་ཕྱིར་བསྒྲགས་བྱས་ཡོད་པ་རེད། ལྷག་པར་དུ་བརྒྱད་གཅིག་བཅིངས་གྲོལ་དམག་བཙུགས་པའི་དུས་དྲན་གྱི་སྔོན་རང་ལ། དམར་ཤོག་གཞུང་གིས་ལག་པ་འཆང་དཀའ་བའི་དབུས་དམག་དོན་ལྷན་ཁང་གི་མགོ་ཁྲིད་གཞོན་པ་ཀོ་པའོ་ཞོན་གྱི་གནད་དོན་དེའང་གང་འཚམ་ཐག་བཅད་ཚར་བ་ཕྱིར་བསྒྲགས་བྱས་ཟིན་པ་རེད། ལྐོག་ཟ་རུལ་སུངས་ལ་རྒོལ་རྡུང་གཏོང་བའི་འགུལ་སྐྱོད་ཁྲོད་དབང་ཤུགས་ཆེ་བའི་ཀྲུའུ་ཡོང་ཁྰང་དང་ཁོ་བོའི་ཕྱོགས་གཏོགས་ཚང་མ་ཉམས་དམས་སུ་བཏང་ཚར་པ་དང་། སྟག་རྒན་ཤི་བོ་ཞིག་ཏུ་ངོས་འཛིན་བྱེད་བཞིན་པའི་སྲིད་འཛིན་ཟུར་པ་ཅང་ཙེ་མེན་ཡང་ཞི་ཅིན་ཕིན་གྱི་སྟག་དང་སྦྲང་ནག་མཉམ་རྡུང་གི་རྙི་རུ་དོན་གྱིས་ཚུད་ཟིན་པ་རེད།
སྟབས་རང་འགྲིག་གིས་འདས་པའི་ཟླ་གཅིག་ཙམ་གྱི་ནང་། རྒྱ་ནག་དམག་ཤོག་ཚོགས་པའི་མགོ་ཁྲིད་རྒན་རབས་པ་ཆོ་ཧྲི་དང་ཝན་ལི་གཉིས་སྔ་རྗེས་སུ་འདས་གྲོངས་ཏུ་ཕྱིན་ཏེ། ད་ལྟ་ནུས་པ་ཉམས་པའི་ཆབ་སྲིད་ལྷན་ཁང་གི་མགོ་ཁྲིད་ཟུར་པ་རྒན་རྒོན་ ༡༦ ཙམ་ཤུལ་དུ་ལྷག་ཡོད་པ་རེད། འོན་ཀྱང་། ཁོ་ཚོར་ཞི་ཅིན་ཕིན་གྱི་དབང་ཤུགས་ལ་ཁ་ལོ་བསྒྱུར་བའི་ནུས་ཤུགས་དེ་ཙམ་མེད་སྟབས། རྒྱལ་ཁབ་ཕྱི་ནང་གི་གནད་དོན་དཔྱད་ཞིབ་པ་མང་པོས། ཕྱི་ལོ་ ༢༠༡༥ ལོའི་པེ་ཏེ་ཧི་ཚོགས་འདུའི་གླེང་གཞི་དང་རྗེས་འབྲས་ལ་སྔར་ལས་དོ་སྣང་ཆེན་པོས་གླེང་སློང་སྣ་ཚོགས་བྱེད་ཀྱི་ཡོད་པ་མ་ཟད། ཞི་ཅིན་ཕིན་དང་ཝང་ཆི་ཧྲན་གཉིས་ཀྱི་ཐབས་ཇུས་མང་པོ་དོན་འཁྱོལ་ཡོང་བའི་གོ་སྐབས་ལེགས་ཤོས་ཤིག་དང་། ཞི་ཅིན་ཕིན་གྱི་དབང་ཆ་སྔར་ལས་སྲ་བརྟན་དུ་གཏོང་བའི་གོ་སྐབས་ཆེས་ལེགས་ཤོས་ཤིག་ཏུ་གྱུར་ཡོད་སྐོར་རྗོད་ཀྱི་འདུག
ལོན་ཊོན་གྱི་དཔལ་འབྱོར་རིག་པ་བའི་དུས་དེབ་ཐོག་ཆེད་བརྗོད་སྤེལ་བ་ལྟར་ན། འདི་ལོའི་པེ་ཏེ་ཧི་ཚོགས་འདུའི་ཐོག་ངེས་པར་དུ་གྲོས་བསྡུར་བྱེད་དགོས་པའི་གནད་དོན་མང་པོ་ཡོད་པ་དཔེར་ན། ད་ལོའི་ལོ་སྟོད་ཀྱི་དཔལ་འབྱོར་འཕེལ་རྒྱས་ཀྱི་ཚད་གཞི་ལོན་པ་གསལ་སྟོན་བྱས་པ་མ་གཏོགས་ཉམས་དམས་རང་བཞིན་གྱི་གྲངས་འབོར་སྦེད་གསང་བྱས་ཡོད་པ་དང་། དེ་བཞིན། དབུས་གཞུང་གིས་དཔལ་འབྱོར་འཁོར་རྒྱུག་ལམ་ལུགས་ལ་བཅོས་བསྒྱུར་བྱེད་ཐབས་ཀྱི་ཤུགས་རྐྱེན་འོག་ས་ཁུལ་ཁ་ཤས་ཀྱི་དཔལ་འབྱོར་ལ་གྱོང་གུན་ཆེན་པོ་བཟོ་ཡི་ཡོད་པ་སོགས་ཀྱིས། དབུས་གཞུང་ལ་གནོན་ཤུགས་ཆེན་པོ་ཐེབས་བཞིན་ཡོད་པས་ངེས་པར་དུ་སྔར་ལས་མང་བའི་བྱེད་ཐབས་སྤྱད་དེ་དཔལ་འབྱོར་འཕེལ་རྒྱས་ཡོང་ཐབས་བྱེད་དགོས་ཀྱི་ཡོད། ཕྱི་ཕྱོགས་ནས་པེ་ཏེ་ཧི་ཚོགས་འདུའི་སྔོན་དུ་རྒྱ་གཞུང་གིས་དེའི་ཐད་གཞི་རྒྱ་ཆེ་ཞིང་ཕོག་ཐུག་གཏོང་བའི་དཔལ་འབྱོར་གྱི་འཆར་གཞི་གསར་པ་ཞིག་གྲ་སྒྲིག་བྱེད་བཞིན་ཡོད་སྐོར་བརྗོད་ཡོད་སྟབས། དཔལ་འབྱོར་རིག་པ་བ་ཚོས་ཕོག་ཐུག་གཏོང་གཏོང་བའི་དཔལ་འབྱོར་འཆར་གཞི་མུ་མཐུད་ལག་བསྟར་བྱེད་པ་ནི་ཧ་ཅང་ཉེན་ཁ་ཅན་ཞིག་ཡིན་ལུགས་བརྗོད་འདུག
པེ་ཏེ་ཧི་ཚོགས་འདུའི་ཐོག་དཔལ་འབྱོར་འཕེལ་རྒྱས་སྙོམ་སྒྲིག་དང་དཔལ་འབྱོར་བསྒྱུར་བཅོས་ངེས་པར་དུ་བྱེད་དགོས་པ་ལས་གཞན། ཧ་ཅང་ཚོར་ཤུགས་རྣོ་བའི་ཐེངས་ ༡༣ པའི་ལོ་ལྔའི་དཔལ་འབྱོར་འཆར་གཞིའི་ཐོག་རྣོ་བསམ་གཏོང་དགོས་པ་དང་། འཆར་གཞི་དེ་འདི་ལོའི་ཕྱི་ཟླ་ ༡༠ པའི་ཚོགས་འཆར་ཡོད་པའི་སྐབས་བཅོ་བརྒྱད་པའི་ཚང་འཛོམས་གྲོས་ཚོགས་ཐེངས་ ༥ པའི་ཐོག་ཡོང་བསྒྲགས་བྱེད་དགོས་ཀྱི་ཡོད་པ་རེད། གཞན་ཡང་། པེ་ཏེ་ཧི་ཚོགས་འདུའི་གོ་སྐབས་དང་བསྟུན་ཏེ་ཧི་པེ་ཡི་ཞི་ཅིན་ཕིན་གྱི་ལས་གྲོགས་རྙིང་པ་མང་པོ་ཞིག་གི་གོ་གནས་འཕར་རྒྱུ་ཡིན་ལུགས་རྗོད་ཀྱི་འདུག
གསར་འགོད་པ། པདྨ་མཚོ།
