དེ་རིང་སྲིད་སྐྱོང་བློ་བཟང་སེང་གེ་མཆོག་གིས་བོད་ཀྱི་བརྙན་འཕྲིན་མཉེན་ཆས་གསར་པ་དབུ་འབྱེད་གནང་སྐབས་ཁོང་སྲིད་སྐྱོང་འོས་མིར་བཞེངས་རྒྱུའི་གསལ་བསྒྲགས་དེ་དམངས་གཙོའི་དུས་དྲན་གྱི་རྗེས་སུ་གནང་རྒྱུ་ཡིན་སྐོར་གསུངས་སོང་།
དེ་རིང་སྔ་དྲོའི་ཆུ་ཚོད་ ༡༡ ཐོག་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། ཕྱི་དྲིལ་བོད་ཀྱི་དྲ་བརྙན་ཚན་པས་སྒྲིག་བཟོ་བྱས་པའི་དབུ་མའི་ལམ་གྱི་འོད་སྡེར་ཞིག་དང་། ལག་ཐོག་ཁ་པར་དང་དྲ་རྒྱའི་ནང་ལྟ་བདེ་བོ་ཡོད་པའི་བོད་ཀྱི་བརྙན་འཕྲིན་མཉེན་ཆས་གསར་པ་ཞིག་དབུ་འབྱེད་ཀྱི་གསར་འགོད་ལྷན་ཚོགས་ཤིག་སྐོང་ཚོགས་གནང་སོང་།
ལྷན་ཚོགས་ཐོག་སྐུ་མགྲོན་གཙོ་བོ་སྲིད་སྐྱོང་བློ་བཟང་སེང་གེ་མཆོག་གི་དབུས་ཕྱི་དྲིལ་དྲུང་ཆེ་རྣམ་པ་གཉིས་དང་། བོད་ཀྱི་དྲ་བརྙན་ཚན་པའི་ལས་བྱེད་བཅས་ལྷན་འཛོམས་ཐོག དྲིལ་བསྒྲགས་དྲུང་ཆེ་ལགས་ཀྱིས་བོད་དབྱིན་གཉིས་ཀྱི་ཐོག་ནས་གསར་འགོད་ལྷན་ཚོགས་སྐོང་བའི་དགོས་དམིགས་སྐོར་ངོ་སྤྲོད་གནང་རྗེས། སྲིད་སྐྱོང་བློ་བཟང་སེང་གེ་མཆོག་གིས་དབུ་མའི་ལམ་གྱི་གོ་རྟོགས་སྤེལ་བའི་འོད་སྡེར་གསར་པ་ཞིག་དང་། ལག་ཐོག་ཁ་པར་དང་དྲ་རྒྱའི་ནང་ལྟ་བདེ་ཡོད་པའི་བོད་ཀྱི་བརྙན་འཕྲིན་(tibet tv)ཟེར་བའི་མཉེན་ཆས་གསར་པ་ཞིག་དབུ་འབྱེད་གནང་སོང་།
སྲིད་སྐྱོང་མཆོག་གིས་དབུ་མའི་ལམ་གྱི་འོད་སྡེར་དང་བརྙན་འཕྲིན་དེ་བརྒྱུད། དབུ་མའི་ལམ་གྱི་སྐོར་དང་བོད་མིའི་སྒྲིག་འཛུགས་ཀྱི་ཕྱག་ལས་གནང་ཕྱོགས་ཐད་གོ་རྟོགས་གོང་འཕེལ་ཡོང་བའི་རེ་བ་ཡོད་སྐོར་གསུངས་དོན། ཉེ་ལམ་དབྱིན་སྐད་ཀྱི་བརྙན་འཕྲིན་ཞིག་གསར་བཟོ་བྱས་པ་བརྒྱུད། བརྒྱ་ཆའི་ ༧༠ ཡི་ཐོག་ནས་དབུ་མའི་ལམ་དེ་ག་རེ་ཡིན་མིན་དང་ཕན་ཐོགས་མིན་སྐོར་ལ་མཁས་དབང་ཚོ་དང་གནད་ཡོད་མི་སྣ་མང་པོ་ཞིག་གིས་མོས་མཐུན་དང་རྒྱབ་སྐྱོར་ཡོད་པ་ཧ་ཅང་གསལ་བོར་གསུངས་ཡོད། དེའི་རྗེས་སུ་བོད་སྐད་ཐོག་ནས་ཀྱང་བརྙན་འཕྲིན་དེ་འདྲ་ཞིག་དགོས་ཀྱི་ཡོད་པ་ཚང་མས་མཁྱེན་གྱི་ཡོད་སྟབས། ཕྱི་དྲིལ་ལས་ཁུངས་ཀྱི་དྲུང་ཆེ་རྣམ་པ་གཉིས་དང་བཀའ་བློན་རྣམ་པ་སོགས་མང་ཆེ་ཤོས་གཞིས་ཆགས་ཁག་ཡོངས་དང་སློབ་གྲྭ་ཁག་ཡོངས། དེ་བཞིན་དགོན་པ་ཁག་ཡོངས་ལ་བཅར་ནས་དབུ་མའི་ལམ་གྱི་གོ་རྟོགས་སྤེལ་ཡོད་པ་རེད། དེ་དང་མཉམ་དུ་ང་ཚོར་བརྙན་འཕྲིན་ཞིག་ཀྱང་དགོས་ཀྱི་འདུག་ཅེས་ཞུས་པ་ནང་བཞིན། དེ་རིང་འདིར་ཕྱི་དྲིལ་ལས་ཁུངས་ནས་སྐུ་ངལ་ཚད་མེད་བསྐྱོན་ནས་དབུ་མའི་ལམ་གྱི་སྐོར་ལ་འོད་སྡེར་ཞིག་འགྲེམས་སྤེལ་བྱས་པ་རེད། ཅེས་དང་།
ཁོང་གིས་མུ་མཐུད། འདིའི་ནང་དུ་བོད་ཀྱི་བླ་ཆེན་ཁག་ནས་དབུ་མའི་ལམ་གྱི་སྐོར་དང་དེ་ལ་རྒྱབ་སྐྱོར་ཡོད་པའི་རྣམ་པ། དེ་བཞིན་བོད་ནང་ནས་དབུ་མའི་ལམ་ལ་རྒྱབ་སྐྱོར་ཡོད་པའི་རྣམ་པ་དེ། འདིར་ཡོད་པའི་བོད་ཀྱི་ཆབ་སྲིད་བཙོན་ཟུར་དཔལ་ལྡན་རྒྱ་མཚོ་དང་བག་གྲོ། མགོ་ལོག་འཇིགས་མེད་སོགས་ལ་བཀའ་འདྲི་ཞུས་ནས་ཁོ་རང་ཚོའི་དགོངས་ཚུལ་ཡང་འོད་སྡེར་ནང་ཚུད་ཡོད་པ་རེད། དེ་བས་འོད་སྡེར་འདི་བརྒྱུད་ནས་བོད་མིའི་སྤྱི་ཚོགས་ནང་དབུ་མའི་ལམ་གྱི་གོ་རྟོགས་སྔར་ལས་ཇེ་མཐོར་ཡོང་བའི་རེ་བ་ཡོད་ལ། དེ་བཞིན་ཁ་པར་སྐུད་ལམ་གྱི་བོད་ཀྱི་བརྙན་འཕྲིན་ཞེས་པ་འདི་བརྒྱུད་ནས་རྒྱ་གར་དང་ཕྱི་རྒྱལ་ཡུལ་གྲུ་ཁག་ཏུ་སྡོད་པའི་བོད་མི་ཚོས་བཞུགས་སྒར་རྡ་རམ་ས་ལར་གནས་ཚུལ་ག་རེ་བྱུང་གི་ཡོད་མེད་དང་། དེ་བཞིན་༧སྤྱི་ནོར་༧གོང་ས་སྐྱབས་མགོན་རིན་པོ་ཆེ་མཆོག་གི་གཙོས། བོད་མིའི་སྒྲིག་འཛུགས་ནས་ཕྱག་ལས་ག་རེ་གནང་གི་ཡོད་མེད་སྐོར་ལ་སྟབས་བདེའི་སྒོ་ནས་ཤེས་རྟོགས་ཡོང་བར་ཕན་ཐོགས་ཀྱི་རེད་བསམ་གྱི་འདུག ཅེས་གསུངས་བྱུང་།
དེ་རྗེས་དྲི་བ་དྲིས་ལན་གྱི་སྐབས་སུ་སྲིད་སྐྱོང་མཆོག་ནས་ཁོང་ཕྱི་ལོ་ ༢༠༡༦ ལོའི་སྲིད་སྐྱོང་འོས་མིར་བཞེངས་རྒྱུའི་གསལ་བསྒྲགས་དེ་ཕྱི་ཟླ་ ༩ ཚེས་ ༢ དམངས་གཙོའི་དུས་དྲན་གྱི་རྗེས་སུ་གནང་རྒྱུ་ཡིན་སྐོར་དང་། ད་ལྟ་སྲིད་སྐྱོང་འོས་མིར་ལང་མཁན་ཚོར་འགན་ཆེན་པོ་ཡོད་སྟབས། བོད་མི་ཚང་མས་ཁོང་ཚོར་གུས་ཞབས་དང་རྗེས་སུ་ཡི་རང་ཞུ་དགོས་ལ། ཁོང་ཚོར་འོས་བསྡུའི་གྲུབ་འབྲས་ཡག་པོ་དང་སྐུ་གཟུགས་བདེ་ཐང་ཡོང་བའི་སྨོན་འདུན་ཡོད་སྐོར་སོགས་གསུངས་སོང་།
