ཨ་རིའི་ནང་རྒྱལ་རབས་སྐོར་གསུང་བཤད་གནང་།

འབྲི་གུང་ཆེ་ཚང་རིན་པོ་ཆེ་མཆོག་གིས་ཨ་རིའི་ཁ་ལི་ཧྥོ་ནི་ཡའི་ནང་ཉིན་གཉིས་རིང་མི་མང་ལ་གསུང་ཆོས་དང་བོད་ཀྱི་རྒྱལ་རབས་སྐོར་གསུང་བཤད་གནང་ཡོད་འདུག

འདི་གར་བློ་བརྟན་ལགས་ཀྱིས་གནས་ཚུལ་མཁོ་གཏོང་གནང་བ་ལྟར་ན། ཟླ་འདི་ཚེས་༡༦ ཉིན་གྱི་ཞོགས་པར་ཨ་རིའི་བྱང་ཁ་ལི་ཧྥོ་ནི་ཡའི་བོད་རིགས་ཚོགས་པའི་གོ་སྒྲིག་འོག སྒྲུབ་བརྒྱུད་བསྟན་པའི་མངའ་བདག་འབྲི་གུང་ཆེ་ཚང་རིན་པོ་ཆེས་བོད་ཀྱི་བཙན་པོའི་རྒྱལ་རབས་སྐོར་གསུང་བཤད་གནང་ཡོད་པ་དང་། གསུང་བཤད་ཀྱི་ཐོག་མར་བོད་རིགས་ཚོགས་པའི་ཚོགས་གཙོ་སྐལ་བཟང་འབྱུང་གནས་ལགས་ཀྱིས། ཚོགས་པས་གདན་འདྲེན་ཞུས་པ་ལྟར་རིན་པོ་ཆེ་ཆིབས་བསྒྱུར་བཀའ་དྲིན་བསྐྱངས་བར་ཐུགས་རྗེ་ཆེ་ཞུས་བ་དང་འབྲེལ། ཚོགས་པའི་གནས་སྟངས་དང་ལས་འཆར་སོགས་སྙན་སྒྲོན་ཞུས་ཡོད་པ་རེད།

དེ་ནས་འབྲི་གུང་ཆེ་ཚང་རིན་པོ་ཆེ་ཁོང་གིས་བརྩམས་གནང་བའི་༼བོད་ཀྱི་བཙན་པོའི་རྒྱལ་རབས༽ ཀྱི་ཕྱག་དེབ་གཞི་རྩར་བཟུང་ནས་གསུང་བཤད་གནང་ཡོད་པ་དང་། ཕྱག་དེབ་དེའི་ཡིག་ཆའི་ཁུངས་གཏུགས་ས་གཙོ་བོ་ཏུན་ཧོང་གི་ཡིག་ཆ་དང་། ཐང་ཡིག་གསར་རྙིང་། བོད་བཙན་པོའི་སྐབས་ཀྱི་རྡོ་རིང་དང་བྲག་བསྐོས་ཡི་གེ་བཅས་ཡིན་ལ། ཏུན་ཧོང་གི་ཡིག་ཆའི་སྐོར་ལ་དང་ཐོག་ཐུགས་སྣང་ཡོང་སྟངས་སྐོར་ལ་ཁོང་གིས། ང་ཡུལ་གྲུ་མང་པོ་ཞིག་ཏུ་སྐྱོད་ཀྱི་ཡོད་ལ། ཕྲན་བུ་མ་འདྲ་བར་བསམ་བློ་གཏོང་གིན་ཡོད། ཧྥ་རན་སི་དང་ནེའུ་ཡོག་སོགས་ཀྱི་དཔེ་མཛོད་ཁང་དུ་ཏུན་ཧོང་གི་ཡིག་རྙིང་སྐོར་ཧ་ཅང་མང་པོ་རེད་ལ། རྒྱ་ཡིག་སོགས་ལ་ཞིབ་འཇུག་བྱེད་མཁན་མང་པོ་རེད། བོད་ཡིག་ལ་ཞིབ་འཇུག་བྱེད་ནི་ཕྱི་རྒྱལ་བ་ཁ་ཤས་ལས་བོད་མི་ཞིག་མི་འདུག་པས། བོད་མི་ཞིག་གིས་ཅིག་མ་བྱས་ན་འགྲིག་མ་སོང་བསམས་ཏེ་བོད་ཀྱི་བཙན་པོའི་རྒྱལ་རབས་སྐོར་ལ་ཞིབ་འཇུག་བྱ་འགོ་བརྩམས་པ་ཡིན། བཙན་པོའི་རྒྱལ་རབས་ཟེར་བ་དེ་བཙན་པོ་༤༣ གྱིས་ལོ་ངོ་ ༡༢༣༢ རིང་བོད་ལ་དབང་བསྒྱུར་བའི་རིམ་པ་དེ་རེད་ལ། གདུང་རྒྱུད་གཅིག་གིས་དེ་འདྲའི་མི་ཐོགས་མང་པོ་དང་དུས་ཡུན་རིང་པོར་དབང་བསྒྱུར་བྱས་པ་རྒྱ་དཀར་ནག་གི་ལོ་རྒྱུས་སོགས་ན་ཧ་ཅང་གི་དཀོན་པོ་རེད། དེ་ཚོ་གནད་འགག་ཅིག་རེད་ལ་ཤེས་རྟོགས་དགོས་པའང་ཧ་ཅང་གི་གལ་ཆེན་རེད། ཅེས་གསུངས་ཡོད་པ་དང་། གསུང་བཤད་གནང་རྗེས་མི་མང་གི་དྲི་བར་བཀའ་ལན་གནང་ཡོད་འདུག

ཟླ་འདིའི་ཚེས་ ༡༥ ཉིན་རིན་པོ་ཆེ་མཆོག་གིས་མི་མང་ལ་འབྲི་གུང་འཕོ་བ་ཆེན་མོའི་བཀའ་ཆོས་གནང་ཡོད་པ་དང་། ཉིན་གཉིས་རིང་གི་བཀའ་ཆོས་དང་གསུང་བཤད་སྐབས་ཁྱོན་ཨ་སྒོར་ ༩༠༠༠ ལྷག་མི་མང་གིས་ཞལ་འདེབས་སུ་ཕུལ་བ་ཚང་མ་བོད་རིགས་ཚོགས་པར་གནང་ཡོད་འདུག