འདོད་པའི་བསྟན་བཅོས་ཀྱི་དེབ་དབུ་འབྱེད།

དེ་རིང་མེག་གྷན་བོད་ཀྱི་གསོལ་མགྲོན་ཁང་གི་ཚོགས་ཁང་དུ་འདོད་པའི་བསྟན་བཅོས་ཀྱི་དཔེ་དེབ་ཞིག་དབུ་འབྱེད་གནང་སོང་།

དེ་རིང་མེག་གྷན་བོད་ཀྱི་གསོལ་མགྲོན་ཁང་གི་ཚོགས་ཁང་དུ་འདོད་པའི་བསྟན་བཅོས་ཀྱི་དཔེ་དེབ་ཞིག་དབུ་འབྱེད་གནང་སོང་།དེ་རིང་སྔ་དྲོའི་ཆུ་ཚོད་ ༡༠ ཐོག་མེག་གྷན་བོད་ཀྱི་གསོལ་མགྲོན་ཁང་གི་ཚོགས་ཁང་དུ། ཨ་རིའི་འཁྲིག་སྤྱོད་ལམ་སྟོན་པ་གྲགས་ཅན་ལྕམ་བྷར་བྷ་ར་ཁེ་ལེ་ལིང་གིས་བརྩམས་ཤིང་། ངག་དབང་འཕྲིན་ལས་ལགས་དང་འབོ་ར་ཤེས་རབ་ལགས་རྣམ་གཉིས་ཀྱིས་བོད་བསྒྱུར་ཞུས་པའི་འདོད་པའི་བསྟན་བཅོས་<<རོ་ཙའི་ལུས་སྦྱོང་།>>ཞེས་པ་དབུ་འབྱེད་གནང་སོང་ལ། སྐུ་མགྲོན་གཙོ་བོར་བོད་གཞུང་སྨན་རྩིས་ཁང་གི་སློབ་སྤྱི་གཞོན་པ་ཡེ་ཤེས་དགེ་ལེགས་ལགས་ཀྱི་དབུས། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་ཉམས་ཞིབ་པ་འཇུ་བསྟན་སྐྱོང་ལགས་དང་། ཧྥ་རན་སི་ཨེག་ཎོ་མཐོ་སློབ་ཀྱི་བོད་ཀྱི་རིག་གནས་སློབ་ཁྲིད་གནང་མཁན་ཧྥ་རན་སི་མི་རིགས་ལྕམ་ཆོས་ཉིད་དབང་མོ་ལགས་གཙོས། རྡ་ས་ཁུལ་གྱི་དོན་གཉེར་ཅན་དང་གསར་འགོད་པ་ཁག་ཅིག་བཅས་འདུ་འཛོམས་གནང་སོང་།

དུས་སྟོན་གྱི་ཐོག་མར་བོད་སྒྱུར་བྱེད་མཁན་ངག་དབང་འཕྲིན་ལས་ལགས་ཀྱིས་དེབ་འདི་བསྒྱུར་དགོས་དོན་གང་ཡིན་བརྗོད་དོན། ༢༠༡༣ ལོར་ལྡི་ལིར་རྒྱ་གར་ནང་གནས་སྐོར་ལ་ཡོང་མཁན་ནང་ཆེན་ནས་ཡིན་པའི་སྨན་པ་གཉིས་ཐུག་བྱུང་། སྐབས་དེར་ཁོ་གཉིས་ཀྱིས་ཕ་ཡུལ་ལ་སྨན་བཅོས་བྱེད་སྐབས་དཀའ་ངལ་ཆེན་པོ་ཞིག་འཕྲད་ཀྱི་ཡོད་པ་ངོ་སྤྲོད་གནང་བྱུང་། དེ་ག་རེ་རེད་ཟེར་ན། ནང་ཆེན་གྱི་སྨན་ཁང་མང་ཆེ་བའི་ནང་ལ་ནད་པ་མང་ཆེ་བ་ཕོ་ཙ་ཉམས་ནས་ཁུ་ཁྲག་ལམ་སེང་འདོན་མཁན་དེ་འདྲ་འདུག་བརྗོད་བྱུང་། དཀའ་ངལ་དེའི་ཚད་གཞི་འདྲ་པོ་གང་འདྲ་འདུག་ཞུས་པ་ཡིན་ན། ཁ་ཤས་བུ་མོ་ཞིག་གི་འཁྲིས་ལ་སླེབ་མ་ཐག་གམ་ཡང་ན་རྐང་པར་རེག་པ་ཙམ་གྱིས་ཁུ་བ་ཤོར་འགྲོ་བ་སོགས་ཧ་ལས་པའི་དཀའ་ངལ་ཆེན་པོ་འཕྲད་ཀྱི་ཡོད་པ་མ་ཟད། དེའི་རྐྱེན་པས་བཟའ་ཚང་ཁ་བྲལ་བ་དང་མ་འཆམ་པ་སོགས་ཡོང་གྱི་ཡོད་པ་ལབ་བྱུང་། ཁོ་ཚོས་དཀའ་ངལ་དེ་སེལ་ཆེད་བོད་ཀྱི་གསོ་བ་རིག་པའི་རྒྱུད་བཞི་གཙོས་སྨན་གཞུང་ནང་ཡོད་པའི་རྩ་སྨན་དང་། རྐང་ཁབ་སོགས་བེད་སྤྱོད་བཏང་ནས་ཐབས་ཤེས་གང་དྲག་ཅི་དྲག་བྱས་ཀྱང་། དེ་ལ་གདོང་ལེན་བྱེད་མ་ཐུབ་པའི་གནས་ཚུལ་ཡོང་གི་འདུག་སྟབས། དེའི་རྗེས་རྒྱ་ནག་གི་སྨན་ཁང་ཆེ་ཁག་ལ་ཕྱིན་ནས་སྨན་བཅོས་བྱས་པ་དང་། རྒྱ་སྨན་དང་དབྱར་རྩ་དགུན་འབུ་སོགས་ཟས་ཀྱང་ཕན་ཐོགས་གང་ཡང་མི་འདུག ཁྱེད་ཚོ་ནུབ་ཕྱོགས་ལ་འདི་ལ་ཕན་པའི་ལུས་སྦྱོང་དེ་འདྲ་ཡོད་པ་གོ་བྱུང་བས། བོད་ཡིག་ཐོག་བསྒྱུར་ན་ཕན་ཐོགས་ཆེན་པོ་ཡོད་ས་རེད་ཟེར་ནས་སྐུལ་མ་གནང་བྱུང་བས་དེབ་འདི་བོད་བསྒྱུར་བྱས་པ་ཡིན། ཞེས་སོགས་བརྗོད་སོང་།

ཡང་བོད་སྒྱུར་བྱེད་མཁན་འབོ་ར་ཤེས་རབ་ལགས་ཀྱིས་དེབ་ཀྱི་སྔོན་གླེང་ནང་། འཁྲིག་པ་སྤྱོད་སྟངས་ལ་ཞིབ་འཇུག་བྱས་པའི་གྲུབ་དོན་སྣ་ཚོགས་པ་ཞིག་ཡོད་པའི་ཁྲོད་ན་རང་ཅག་ལ་མཁོ་བ་ཧ་ཅང་མང་། དེ་དག་ལས་རོ་ཙའི་ལུས་སྦྱོང་འདིས་ནི་མཇེ་སྦྱོང་ཙམ་མིན་པར་རྒས་འཁོགས་ཀྱི་སྐབས་སུ་རྩ་ཆུ་མི་ཚགས་པའི་རྒྱུན་ལྡན་གྱི་ནད་ལྟ་བུའི་རིགས་ཧ་ཅང་ཕན་པར་བཤད། འགྲོ་འདུག་ལ་རང་དབང་ཆེ་ཞིང་ཕོ་མོ་གཉིས་འདྲ་མཉམ་ཡིན་པའི་དེང་གི་དུས་འདིར། མི་མང་པོ་ཞིག་བཟའ་འཐོར་རྒྱག་བཞིན་པ་འདི་ལ་རྩ་བའི་ཆ་ནས་བཟང་པོའི་ཡོན་ཏན་གྱིས་ཕོངས་ཏེ་བཟོད་བསྲན་མེད་པ་དང་། རྒྱུ་ལ་རྔམས་པ། ཟུར་བསྟེན་འཚོལ་བ་ལ་སོགས་པའི་རྒྱུ་རྐྱེན་གཞན་དང་གཞན་སྣ་ཚོགས་པ་ཞིག་ཡོད་མོད། འོན་ཀྱང་སྤྱི་ཚོགས་སུ་གསལ་ཁ་མི་ཐོན་པའི་རིགས་གཅིག་གསལ་པོར་ཞུ་ན། འཁྲིག་སྤྱོད་ཀྱི་སྐབས་སུ་གཅིག་གི་འདོད་པ་ཚིམས་སྐབས་གཅིག་གི་འདོད་པ་མ་ཚིམས་པ། གཅིག་ལ་མཁོ་སྐབས་གཅིག་ལ་མི་མཁོ་བ་སོགས་འཁྲིག་སྤྱོད་དང་འབྲེལ་བའི་རྒྱུན་ཤེས་ཀྱིས་དབེན་པ་ལས་འབྱུང་བར་བཤད། དེའི་ཕྱིར་ཀློག་པ་པོ་ཁྱེད་ཀྱིས་རོ་ཙའི་ལུས་སྦྱོང་འདི་ལག་ལེན་དུ་བསྟར་ཐུབ་ན། དཀའ་ངལ་རིགས་གཅིག་དེ་བདེ་བླག་ངང་བསལ་ཏེ། བཟའ་ཟླ་དང་དགའ་རོགས་བར་བརྗོད་དུ་མེད་པའི་བརྩེ་བ་དང་དུང་བ་ཟབ་མོ་ཞིག་རང་ཁྱིམ་དུ་འཛུམ་གྱིས་བསུ་འོང་བར་ཐེ་ཚོམ་མེད། དེ་འོངས་པ་ནས་ཁྱོ་ཤུག་ཕན་ཚུན་ལུས་དང་གྲིབ་མ་བཞིན་འབྲལ་དུ་མེད་པ། དེ་འོངས་པ་ནས་ཕན་ཚུན་གཉིས་འཁྲིག་སྤྱོད་ཀྱི་འདོད་བློ་རང་བཞིན་གྱིས་ཁེངས་འགྲོ་བས། ཞོར་དུ་རང་གཞན་གཉིས་དང་རང་གི་བུ་རབས་ཚ་རྒྱུད་ལ་གནོད་པ་སྟེ། གཞན་ལ་རེག་པའི་རེག་དུག་ཅེས་པའི་བཅོས་ཐབས་མེད་པའི་ནད་དེ་ཡང་གཏན་དུ་བཀག་པ་ཡིན། ཞེས་སོགས་བྲིས་འདུག

བོད་གཞུང་སྨན་རྩིས་ཁང་གི་སློབ་སྤྱི་གཞོན་པ་ཡེ་ཤེས་དགེ་ལེགས་ལགས་ཀྱིས་དེབ་ཀྱི་ནང་དོན་སྐོར་གཏམ་བཤད་གནང་དོན། ང་རང་གིས་བསམ་འཆར་འདྲ་པོ་ཞིག་བཏོན་པ་ཡིན་ན། ངས་དེབ་འདི་སྔོན་ལ་མཐོང་བ་ཡིན་ན་ཁོ་རང་ཚོར་འདིའི་ཐོག་ལ་བསམ་འཆར་འདྲ་པོ་ཏོག་ཙམ་བཏོན་ཐུབ་ས་རེད་བསམ་པ་དྲན་བྱུང་། ང་ཚོ་གསོ་བ་རིག་པའི་ནང་ལ་རྒས་པོ་གསོ་བ་བཅུད་ཀྱི་ལེན་པ་དང་། རོ་ཙ་ཁུ་བ་གསོ་དང་བུད་མེད་བཙལ་ཞེས་གསུངས་ཡོད་པ་ལྟར། ཁུ་བ་གསོ་བ་མ་གཏོགས་རྒས་པོ་གསོ་བ་དེ་དེབ་འདིའི་ནང་ལུས་བསྡད་ཡོད་པ་འདྲ་པོ་ཞིག་མཐོང་སོང་། ངས་ང་ཚོར་དེ་གཉིས་ཀ་དགོས་པ་རེད་བསམ་གྱི་འདུག ང་ཚོས་རོ་ཙ་གསོ་བའི་རྒྱུ་མཚན་ག་རེ་རེད་ཟེར་ན། རིགས་རྒྱུད་དོན་དུ་གཉེར་མཁན་གྱི་མི་དེ་ཚོར་རིགས་རྒྱུད་གཉེར་བའི་ཆེད་དུ་ཁུ་བ་གསོ་གི་ཡོད་པ་རེད། སྤྱིར་བཏང་སྨན་གཞུང་གི་རྒྱུད་ནང་རིགས་རྒྱུད་འཛིན་བར་འདི་འདྲ་ཞིག་བཤད་ཡོད་པ་རེད། རོ་ཙའི་ཕྱོགས་ནས་སྐྱེས་པ་གཙོ་བོ་ཡིན་ལ། བུད་མེད་ལོ་མ་མེད་པའི་ཤིང་དང་འདྲ་ཞེས་གསུངས་ཡོད་པ་རེད། སྤྱིར་བཏང་གང་འདྲ་ཞིག་དགོས་ཀྱི་ཡོད་རེད་ལབ་ན། སྐྱེས་པས་འདོད་པ་སྤྱོད་པར་མི་ནུས་ན། བུད་མེད་བརྒྱ་ཡིས་བསྐོར་ཡང་དོན་མི་འགྲུབ་ཅེས་གསུངས་ཡོད་སྟབས། རོ་ཙའི་གཙོ་བོ་དེ་སྐྱེས་པ་ཡིན་དུས་དབང་པོར་སྐྱོན་མེད་པ་ཞིག་དགོས་ཀྱི་ཡོད་པ་རེད། སེམས་ནང་ཞི་བདེ་དང་ལྷིང་འཇགས་སོགས་ཡོད་པ་ཡིན་ན། དབང་པོར་སྐྱོན་ཐེབས་ཀྱི་ཡོད་པ་མ་རེད། དེང་སང་འགྱུར་བ་ག་རེ་ཐེབས་ཀྱི་ཡོད་རེད་ཟེར་ན། གཅིག་ནས་ལས་ཀའི་གནོན་ཤུགས་དང་། གཉིས་ནས་ཟས་བཅུད་ལ་ལྷད་མེད་པ་གང་ཞིག་ཚུལ་དང་ལྡན་པ་མེད་པའི་རྐྱེན་གྱིས་ལུས་ཀྱི་གྲུབ་ཆ་ཡོངས་རྫོགས་ཉམས་རྒུད་དུ་ཕྱིན་ནས་དབང་པོ་མི་ལྡང་བ་ཆགས་ཀྱི་ཡོད་སྟབས། ངས་དེབ་འདིའི་ཞན་ཆ་འདྲ་པོ་དེ་རྒས་པོ་གསོ་བ་ཟེར་བ་དེ་ཆགས་འདུག་མ་གཏོགས། གཞན་འདིའི་ནང་འཐུས་སྒོ་ཇེ་ཚང་ཡོད་པ་འདྲ་པོ་ཞིག་མཐོང་བྱུང་། སྤྱིར་བཏང་འདོད་པ་ཇི་ལྟ་བ་བཞིན་བྱེད་ཐུབ་མཁན་ཞིག་ཡིན་ན་འདོད་པ་འཕེལ་གྱི་རེད་ཀྱང་། འདོད་པ་ཁྱོན་ནས་མེད་མཁན་ཞིག་ལ་འདོད་པ་སྤྱོད་རྒྱུའི་གྲ་སྒྲིག་ག་ཚོད་བྱས་ཀྱང་ཡོང་གི་མེད་སྟབས། འདོད་པ་སླེབ་ཆེད་དང་པོ་རྒས་པོ་གསོ་དགོས་ཀྱི་ཡོད་པ་མ་ཟད། འདི་ལ་རིགས་འདྲ་པོ་གཉིས་ཡོད་རེད་དྲན་གྱི་འདུག གཅིག་ན་ཚོད་ལ་བསླེབས་ནས་རྒས་པོ་ཆགས་པ་དང་། གཞན་དེ་ལོ་གཞོན་ཡིན་ཡང་ལུས་རྒུད་པའི་དབང་གིས་རྒས་པོ་ཆགས་པ་ཡོང་གི་ཡོད་སྟབས། དེ་གཉིས་གསོ་རྒྱུ་གལ་ཆེན་པོ་ཆགས་ཡོད། ཅེས་སོགས་བརྗོད་སོང་།

འཇུ་བསྟན་སྐྱོང་ལགས་ཀྱིས་བོད་ཀྱི་འདོད་པའི་བསྟན་བཅོས་སྐོར་གཏམ་བཤད་གནང་དོན། ངས་བལྟས་ན་འདོད་པ་ཟེར་བ་འདིར་ས་བཅད་འདྲ་པོ་བཞི་ཡོད་པར་ངོས་འཛིན་བྱེད་ཀྱི་ཡོད། གཅིག་དེ་ང་ཚོས་འདོད་པའི་གནས་ལུགས་ཤེས་དགོས་པ་རེད། གཉིས་པ་དེ་ང་ཚོས་འདོད་པའི་ལག་ལེན་དང་སྒྱུ་རྩལ་ཤེས་དགོས་པ་རེད། གསུམ་པ་དེ་འདོད་པ་སྤྱོད་སྟངས་ཀྱི་རྣམ་གྲངས་དེ་ཚོ་ཤེས་དགོས་པ་རེད། བཞི་པ་དེ་འདོད་པ་ག་པར་སྐྱེ་དགོས་མིན་གྱི་སྐྱེ་གཟུགས་དེ་ཤེས་དགོས་པ་བཅས་ནི་འདོད་པའི་བསྟན་བཅོས་ཀྱི་སྙིང་པོ་ཆགས་ཡོད། རྣམ་པ་ཚོས་འདོད་པའི་གནས་ལུགས་སྐོར་ལ་ཤེས་དགོས་ན་དགེ་འདུན་ཆོས་འཕེལ་གྱིས་བརྩམས་པའི་༼འདོད་པའི་བསྟན་བཅོས༽བཀླག་པ་ཡིན་ན། འདོད་པའི་གནས་ལུགས་དེ་ཚོ་ཤེས་ཀྱི་རེད། འདོད་པའི་སྒྱུ་རྩལ་དེ་ཚོ་ཕྱི་ནང་གི་འདོད་པའི་བསྟན་བཅོས་མང་ཆེ་བའི་ནང་བཤད་ཡོད་པ་རེད། འདོད་པའི་སྒྱུ་རྩལ་ལ་རིགས་ཧ་ཅང་གི་མང་པོ་ཡོད་རེད། རྩ་བའི་དྲུག་ཅུ་རྩ་བཞི་ཡིན་ཡང་དེའི་འཕྲོས་ནས་ ༡༠༨ ལ་སོགས་པ་མང་པོ་ཡོད་ཀྱང་། ང་ཚོ་བོད་ཀྱི་འདོད་པའི་བསྟན་བཅོས་ནང་སྒྱུ་རྩལ་རིགས་མི་འདྲ་བ་ ༢༠༠ ལྷག་ཙམ་ཡོད་པ་མ་ཟད་དེ་ཚོ་ཤེས་དགོས་པ་ཞིག་ཀྱང་ཆགས་ཡོད། སྒྱུ་རྩལ་དེ་ཚོ་ཤེས་པ་ཙམ་གྱི་མི་འགྲིག་པར་འདོད་པ་སྤྱོད་སྟངས་མ་ཤེས་ན་གཅིག་བྱས་ན་འདོད་པའི་སྒྱུ་རྩལ་བཀག་སྲིད་ལ་འགྱུར་བའི་ཉེན་ཁ་ཡོད་སྟབས། དེ་ཚོ་ཤེས་པར་འཇུ་མི་ཕམ་གྱིས་བརྩམས་པའི་ ༼ཕྱག་ལྷ་ཉེ་འཁོར་བཀག་རྒྱ་མ༽དང་ ༼འདོད་པའི་བསྟན་བཅོས་འཇིག་རྟེན་ཀུན་ཏུ་དགའ་བའི་གཏེར༽གཉིས་བལྟས་ན་ཤེས་ཀྱི་ཡོད་སྟབས། ངས་ང་ཚོས་བོད་ཀྱི་འདོད་པའི་བསྟན་བཅོས་ཀྱི་གཞུང་ལུགས་དག་ལ་བལྟ་རྒྱུ་གལ་ཆེན་པོ་ཆགས་ཡོད་པ་རེད་ཅེས་ཞུ་རྒྱུ་ཡིན། ང་ཚོའི་འདོད་པའི་བསྟན་བཅོས་ནི་འདོད་པའི་བསྟན་བཅོས་ནང་ནས་ཡག་ཤོས་ཤིག་རེད་བསམ་གྱི་འདུག ངས་རྒྱ་གར་གཙོས་པའི་རྒྱལ་ཁབ་ཁག་གི་འདོད་པའི་བསྟན་བཅོས་ལ་ཉམས་འགྱུར་རིགས་གཉིས་ཡོད་པ་མ་གཏོགས། ང་ཚོ་བོད་ཀྱི་འདོད་པའི་བསྟན་བཅོས་ལ་ཉམས་འགྱུར་རིགས་བཞི་དང་མཐར་ཐུག་ཐར་པའི་ལམ་ལ་འགྲོ་རྒྱུ་ཡན་ཆད་ཀྱང་བཤད་ཡོད་པ་ལྟར་གྱི་ཉམས་འགྱུར་དེ་འདྲ་ཡོད་པ་ཟུར་ཙམ་ཡང་མཐོང་མ་བྱུང་། དེ་ཡང་དགེ་འདུན་ཆོས་འཕེལ་གྱིས།  འདོད་པ་མྱོང་བ་དེ་ཡང་དོན་ཆུང་མིན།། རིགས་རྒྱུད་སྤེལ་བ་དེ་ཡང་དོན་ཆུང་མིན།། བདེ་དོན་ངང་ནས་ཆགས་ལམ་སྐྱོང་ཤེས་ན། དེ་ལས་ཀྱང་ནི་དོན་ཆུང་ག་ལ་ཡིན།། ཞེས་གསུངས་ཡོད་པ་རེད། ཅེས་སོགས་བརྗོད་སོང་།

ལྕམ་ཆོས་ཉིད་དབང་མོ་ལགས་ཀྱིས་ཡིག་སྒྱུར་སྐོར་གཏམ་བཤད་བྱས་དོན། ངས་ད་བར་བོད་ཀྱི་ལོ་རྩ་བ་མང་ཆེ་བས་བོད་ཡིག་ནང་ཡོད་པའི་གཞུང་ལུགས་དང་ནང་པའི་ལྟ་གྲུབ་དག་སྐད་ཡིག་གཞན་ནང་མང་པོ་བསྒྱུར་ཡོད་པ་མཐོང་བྱུང་ཡང་། སྐད་ཡིག་གཞན་ནང་ཡོད་པའི་གྲགས་ཅན་གྱི་དཔེ་དེབ་སོགས་བོད་ཡིག་ནང་ནང་འདྲེན་བྱས་མེད་པ་ཞིག་ཚོར་བྱུང་བས། ངས་རང་ཉིད་ཀྱི་སྐད་ཡིག་ཕྱུག་པོ་དང་མི་རིགས་ཀྱི་འཐབ་རྩོད་དང་ངོ་བོ་རྩ་བརླག་མ་ཕྱིན་པར་རྒྱུན་གནས་གནས་དགོས་ན། བོད་རིགས་ཚོས་ཕྱི་ཕྱོགས་ཀྱི་ཤེས་བྱ་དག་ནང་འདྲེན་བྱ་ཐུབ་པ་བྱ་རྒྱུ་གལ་ཆེན་པོ་རེད་བསམ་གྱི་འདུག ཅེས་སོགས་བརྗོད་སོང་།

གསར་འགོད་པ། དོན་གྲུབ།