ཡིད་སྐྱོའི་གནས་ཚུལ།

མཁས་གྲུབ་བྱེ་བའི་འབྱུང་གནས་གདན་ས་ཆེན་པོ་དཔལ་ལྡན་འབྲས་སྤུངས་བློ་གསལ་གླིང་གྲྭ་ཚང་གི་ཡོངས་ཀྱི་དགེ་བའི་བཤེས་གཉེན་ཆེན་པོ་དགེ་སློང་རྣམ་རྒྱལ་དབང་ཆེན་མཆོག་ལ་ཉེ་ལམ་ནས་སྙུང་གཞི་ལྕི་མོ་ཕོག་པའི་ཚུལ་གང་ཡང་མ་མངོན་ཡང་མགུལ་གློ་ཅུང་བཞེས་ཤིང་སྐུ་གཟུགས་ཕྲན་བུ་མི་བདེ་བའི་ཚུལ་བསྟན་ཅིང་། དེ་ནས་སྐུའི་སྙུང་གཞིའི་སྐོར་༸གོང་ས་༸སྐྱབས་མགོན་ཆེན་པོར་སྙན་གསེང་ཞུས་པར་མགོན་པོ་གང་ཉིད་ཀྱིས་མི་ཚེ་གང་པོར་བསྟན་པ་དང་འགྲོ་བའི་དོན་དུ་སྐུ་ངལ་བསྐྱོན་ཡོད་པས་ཐུགས་བློ་བདེ་པོ་གནང་ནས་བཞུགས་དགོས་ཞེས་དགོངས་པ་བཞེས་ཕྱོགས་བཀའ་སློབ་རྒྱ་ཆེར་ཕེབས་པ་སོགས་ཐུགས་བརྩེས་གཟིགས་པའི་བཀའ་དྲིན་བསྐྱངས། ཉིན་དེའི་དགོང་མོ་ཕྱི་ལོ་ ༢༠༡༥ ཟླ་ ༨ ཚེས་ ༡༨ ཉིན་གྱི་ཕྱག་ཚོད་ ༧: ༠༥ ཐོག་གང་ཉིད་ཀྱི་གཟིམ་ཤག་ནས་སྐུ་ཞི་བར་གཤེགས་པའི་ཚུལ་བསྟན་པར་མཛད་དེ་ད་ལྟ་ཐུགས་དམ་དུ་བཞུགས་མུས་ལགས། ཕྱི་ཚེས་ ༡༩ ཉིན་གྱི་ཞོགས་པར་འབྲས་བློ་གླིང་གྲྭ་ཚང་ནས་དམ་པ་གང་ཉིད་ཀྱི་དགོངས་རྫོགས་མཆོད་འབུལ་སྨོན་ལམ་དང་གཞན་ཡང་ཉིན་འདིར་གདན་ས་འབྲས་སྤུངས་གྲྭ་ཚང་ཤར་ནུབ་གཉིས་ཀྱི་ཚོང་ཁང་དང་ཟ་ཁང་། ལས་རིགས་སྡེ་ཚན་ཁག་ཡོངས་སུ་ལས་མཚམས་བཞག་སྟེ་མྱ་ངན་གུས་བརྩི་ཞུས་ཡོད། ཉིན་འདི་དག་རིང་བློ་གླིང་གྲྭ་ཚང་ཁོངས་ཀྱི་བླ་སྤྲུལ་དགེ་བཤེས་རྣམས་ཀྱིས་དབུས་མཛོད་དང་འདུལ་བ། དབུ་མ། ཕར་ཕྱིན། རྟགས་རིགས། བསྡུས་གྲྭ་འཛིན་གྲྭ་བཅས་ཀྱི་སློབ་གཉེར་ཚོས་དམ་པ་གང་ཉིད་ཀྱི་ཁང་ཚན་དུ་གཞུང་ཆེན་བཀའ་པོད་ལྔའི་རྩ་བ་དང་ལེགས་བཤད་སྙིང་པོ། དབུ་མ་རིགས་ཚོགས་དྲུག བྱམས་ཆོས་སྡེ་ལྔ་སོགས་ཀྱི་གཞུང་ཆེན་ཁག་ཉིན་མཚན་བསྟུད་མར་རེས་མོས་སུ་སྐྱོར་འདོན་གནང་སྟེ་དགོངས་རྫོགས་མཆོད་འབུལ་རྒྱ་ཆེར་སྒྲུབ་བཞིན་ཡོད།

དམ་པ་གང་ཉིད་མཆོག་ནི་ཕྱི་ལོ་ ༡༩༣༥ ལོར་ལྷ་ལྡན་ཕ་ར་སྤྱི་སོའི་གཟིམ་ཤག་བསམ་ལྡིང་དུ་སྐུ་འཁྲུངས། སྐུ་ན་སོན་པ་ན་འབྲས་སྤུངས་བློ་གསལ་གླིང་གྲྭ་ཚང་གི་ཆོས་སྒོར་ཞུགས། དགེ་བའི་བཤེས་གཉེན་ཆེན་པོ་མཁན་ཆེན་པདྨ་རྒྱལ་མཚན་མཆོག་དང་ཤག་སྐོར་མཁན་རིན་པོ་ཆེ་ཉི་མ་རྒྱལ་མཚན་སོགས་ཀྱི་ཞབས་ལ་གཏུགས་ཏེ་གཞུང་ཆེན་ཁག་ལ་གསན་བསམ་ལྷོད་མེད་གནང་། ད་དུང་ཐུན་མོང་གི་རིག་གནས་དང་བོད་ཀྱི་གསོ་བ་རིག་པ་བཅས་ལ་སྦྱངས་པ་མཐར་ཕྱིན་མཛད། ཕྱི་ལོ་ ༡༩༥༩ ལོར་དུས་འགྱུར་བྱུང་སྐབས་རྒྱ་གར་ལ་སྐྱབས་བཅོལ་དུ་ཕེབས་ཏེ་ཌལ་ཧོར་དང་སྦག་ས་ཆོས་སྒར་སོགས་སུ་གསན་བསམ་འཕྲོ་སྐྱོང་མཛད། ཕྱི་ལོ་ ༡༩༨༡ ནས་ ༡༩༨༧ བར་ཨིང་ལེན་གཙུག་ལག་སློབ་ཆེན་ཞིག་ཏུ་ཨིན་ཡིག་ཆེད་སྦྱོང་གནང་། དེ་རྗེས་༸གོང་ས་མཆོག་གི་བཀའ་དགོངས་བཞིན་གདན་ས་འབྲས་སྤུངས་སུ་ཕྱིར་ཕེབས་གནང་སྟེ་ད་བར་སློབ་མ་བརྒྱ་ཕྲག་བརྒལ་བར་གཞུང་ཆེན་བཀའ་པོད་ལྔའི་ཕྱག་དཔེ་སློབ་ཁྲིད་མཛད། དམ་པ་ཁོང་ནི་མདོ་སྔགས་རིག་གནས་དང་བཅས་པར་གཞན་དྲིང་མི་འཇོག་པའི་མཁྱེན་སྤྱན་མཆོག་ཏུ་ཡངས་ཤིང་གསུང་རྩོམ་ཡང་ཕར་ཕྱིན་དང་། དབུ་མ། འདུལ་བ། མཛོད། སྔགས། ཚན་རིག རྣམ་ཐར་བཅས་བོད་ཡིག་ཐོག་ཕྱག་དེབ་བཅུ་ཕྲག་བརྒལ་བ་དང་། ཨིན་ཡིག་ཐོག་ལམ་རིམ་བློ་སྦྱོང་སྐོར་དང་དབུ་མ་འཇུག་པ་ཨིང་འགྱུར་མ་བཅས་ཡོད། གཞན་ཡང་༸གོང་ས་མཆོག་གི་བཀའ་འབྲེལ་བཞིན་༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་གང་ཉིད་ཀྱི་ཡོངས་འཛིན་མཚན་གནས་བཞེས་ཐོག་མཆོག་སྤྲུལ་རིན་པོ་ཆེས་གསན་བསམ་མཐར་མ་ཕྱིན་བར་ཕྱག་དཔེ་སློབ་ཁྲིད་སོགས་མཛད། མཐར་དགུང་ལོ་ ༨༡ ཕྱི་ལོ་ ༢༠༡༥ ཟླ་ ༨ ཚེས་ ༡༨ ཉིན་གྱི་དགོང་དྲོ་ཕྱག་ཚོད་ ༧:༠༥ ཐོག་འབྲས་སྤུངས་ཕ་ར་ཁམས་ཚན་སྐུ་ཉིད་ཀྱི་གཟིམ་ཤག་ནས་དགོངས་པ་གཞན་དུ་གཏད་པ་བཅས་ཀྱི་ཡིད་སྐྱོའི་གནས་ཚུལ་དུ།