བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༧༢ སྟེང་གི་རྩོམ་སྒྲིག་པའི་གཏམ།
ཉེ་སྔོན་ཤེས་རིག་ལས་ཁུངས་ཀྱི་བཀོད་སྒྲིག་འོག་དྷ་ཤོད་བོད་ཁྱིམ་དུ་ཧིན་སྒོར་འབུམ་ ༣༠ ཡི་འགྲོ་སོང་བཏང་སྟེ། བོད་མིའི་སློབ་གྲྭ་ཁག་གི་ཕ་མའི་ཚོགས་ཆེན་ཐེངས་དང་པོ་སྐོང་ཚོགས་གནང་སོང་བ་དང་། ཚོགས་ཐོག་ཏུ་ཕ་མ་རང་ངོས་ནས་བསྒྲུབ་དགོས་པའི་དགོངས་འཆར་དོན་ཚན་ ༡༤ བཞག་པ་མ་ཟད། ཤེས་རིག་ལས་ཁུངས་དང་སྤྱི་ཁྱབ་ཡིག་ཚང་། དེ་བཞིན་སློབ་གྲྭ་ཁག་དང་འབྲེལ་བའི་དགོངས་འཆར་དོན་ཚན་ ༢༡ བཞག་ཡོད་འདུག
ད་རེས་ས་གནས་ཁག་གི་ཕ་མ་དང་འབྲེལ་ཡོད་མི་མང་གི་རེ་འབོད་ཤུགས་ཆེ་ཤོས་དེ། རྒྱ་གར་གཞུང་གི་འཛིན་སྐྱོང་འོག་ཡོད་པའི་བོད་སློབ་ཁག་རྩིས་ལེན་རྩིས་སྤྲོད་ཀྱི་དུས་ཚོད་ནར་འགྱངས་ཁྲོད་དུ། དགེ་ལས་མང་པོ་ཞིག་ལས་གནས་སྤར་བ་དང་རྒན་ཡོལ་དུ་ཕྱིན་པ་ལ་དུས་ཐོག་ཁ་གསབ་མ་ཐུབ་པ་སོགས་ཀྱིས། སློབ་ཕྲུག་ཚོའི་ཤེས་ཡོན་སློབ་སྦྱོང་འཐུས་ཤོར་དུ་ཕྱིན་དང་འགྲོ་བཞིན་པའི་གནད་དོན་དག་འཕྲལ་དུ་སེལ་ཐབས་དགོས་པ་དང་། ཤེས་ཡོན་སྲིད་བྱུས་ལག་བསྟར་ཚུལ་བཞིན་དུ་བྱེད་དགོས་པ། དེ་བཞིན་སྔར་ནས་གཏན་འབེབས་གསལ་བསྒྲགས་ཟིན་པ་ལྟར། ཕྲུ་གུ་གསུམ་ཡན་གྱི་ཕ་མར་དམིགས་བསལ་གཟིགས་སྐྱོང་འཕྲལ་དུ་ལག་བསྟར་དགོས་པའི་རེ་སྐུལ་སོགས་ཞུས་འདུག
སྤྱིར་བྱིས་པ་ཚོ་ནི་རྒྱལ་ཁབ་དང་མི་རིགས་ཤིག་གི་མ་འོངས་པ་ཡིན་ལ། ལྷག་པར་དུ་ཀུན་སྤྱོད་ལེགས་ཤིང་ཤེས་ཡོན་ལྡན་པའི་ན་གཞོན་རེ་སྐྱེད་སྲིང་བྱ་རྒྱུ་ནི། མི་རིགས་ཤིག་འགྱེལ་ས་ནས་ཡར་སློང་བའི་གནམ་འདེགས་ཀྱི་ཀ་བ་ལྟ་བུ་ཞིག་ལ་ངོས་འཛིན་གྱི་ཡོད་པ་ལྟར། བཙན་བྱོལ་བོད་མིའི་སྤྱི་ཚོགས་ནང་མི་ལོ་ ༥༦ ཙམ་འགོར་རྗེས་གཞི་ནས་སློབ་གྲྭ་ཁག་གི་ཕ་མའི་ཚོགས་ཆེན་འདི་སྐོང་ཚོགས་གནང་ཐུབ་པ་དང་། རང་ངོས་དང་གཞན་ངོས་གཉིས་ལ་དགོངས་འཆར་ཧ་ཅང་མང་པོ་བཏོན་ཡོད་པ་དེ་ཚོ་དོན་ཐོག་ཏུ་ཅི་ཙམ་འཁྱོལ་མིན་གང་ལྟར་ཡང་ལེགས་པོ་བྱུང་འདུག་སྙམ།
དེ་བཞིན་ཉེ་ཆར་ནས་བཟུང་དྷ་ས་ཁུལ་གྱི་ཕ་མ་ཚོ་གཙོ་བོར་གྱུར་བའི་ཕ་མ་མང་པོ་ཞིག་ལ་སོ་སོའི་བུ་ཕྲུག་གཅེས་སྐྱོང་བྱེད་སྟངས་དང་། ལྷག་པར་དུ་བྱིས་པ་འཚར་ལོངས་འབྱུང་བའི་བརྒྱུད་རིམ་དང་བསྟུན་ཏེ་སློབ་གསོ་སྤྲོད་སྟངས་སྐོར་ལ་ཟབ་སྦྱོང་ཐེངས་འགར་ཚོགས་སོང་། ཟབ་སྦྱོང་འདི་རིགས་ཀྱིས་ང་ཚོ་བོད་པའི་ཁ་དཔེར། བྱིས་པའི་ཡོན་ཏན་དབྱུག་པའི་རྩེ་ན་ཡོད་ཟེར་བ་ལྟར། ཁ་མ་ཐོན་སྔོན་ལ་ལག་རྐྱོང་རྒྱུར་གོམས་པའི་ཕ་མ་དང་ཕ་ཚབ་མ་ཚབ་མང་པོ་ཞིག་ལ་ཆེས་མ་མཐའ་ཡང་བྱིས་པ་གཅེས་སྐྱོང་ཐད་འདི་བྱེད་དེ་བྱེད་ཀྱི་བསམ་བློའི་འཆར་སྒོ་གསར་པ་མང་པོ་ཞིག་བསྐྲུན་ཐུབ་ཡོད་པ་རེད།
ཕ་མའི་ཚོགས་ཆེན་གྱི་མཇུག་བསྡོམས་སྟེང་། ཤེས་རིག་བཀའ་བློན་མཆོག་ནས་ཐེངས་འདིའི་ཚོགས་ཆེན་འདི་ཟ་མ་ལྟ་བུ་ཞིག་ཡིན་ན་ཁ་ལ་རོ་བཅུད་མྱོང་ཙམ་བྱ་རྒྱུ་དེ་ཡིན་ལ། ཐེངས་རྗེས་མར་ཟ་མ་དེ་རང་བཞིན་གྱིས་ཟ་འདོད་པ་ཞིག་ཏུ་འགྱུར་བར་ངོས་འཛིན་གནང་གི་ཡོད་ལ་འགྲོ་སོང་ལ་མ་ལྟོས་་པར་ཕ་མའི་ཚོགས་ཆེན་ལོ་གཉིས་གསུམ་གྱི་ནང་ཐེངས་ཤིག་ཚོགས་ཐབས་གནང་རྒྱུ་ཡིན་སྐོར་གསུངས་པ་བཞིན། ཕ་མ་དང་ཕ་ཚབ་མ་ཚབ་ཚོས་རང་གི་བུ་ཕྲུག་ལ་གཅེས་སྐྱོང་མ་ནོར་བ་བྱེད་སྟངས་དང་། ལྷག་པར་དུ་ཕ་མའི་བྱམས་སྐྱོང་མཁོ་བའི་དྭ་ཕྲུག་དང་། དྲན་པའི་ཡུལ་ན་ཕ་མ་གཉིས་ཀྱི་ཞལ་རས་གསལ་ལ་མི་གསལ་ལར་གྱུར་བའི་བྱིས་པ་རྣམས་ཇི་ལྟར་བརྩེ་བས་སྐྱོང་ཞིང་། ཕན་པའི་སེམས་ཀྱིས་ལམ་སྟོན་དགོས་པའི་ཐད་བློ་གསར་ཞིག་ཕུད་ཡོད་པ་རེད།
ཁ་ཤས་ཀྱིས་ཚོགས་འདུ་དང་ཟབ་སྦྱོང་སྤྲོད་པ་ནི་དོན་མེད་ཀྱི་འགྲོ་སོང་ཡིན་ལུགས་བསྙད་ཀྱི་ཡོད་ནའང་། རང་དབང་རང་བཙན་གྱི་རྒྱལ་ཁབ་ཅིག་ཡིན་ན་འདྲ། གཞན་བརྟེན་འཁོས་ཆུང་གི་སྐྱབས་བཅོལ་སྤྱི་ཚོགས་ཤིག་ཡིན་ནའང་ཆོག་གི། སྤྱི་ཚོགས་ཤིག་རྨང་ནས་སྐྱོབ་པའི་སྟ་གོན་དེ་བྱ་འགུལ་འདི་རིགས་ང་ཚོས་སྤེལ་མགོ་བརྩམས་པ་ཧ་ཅང་ཕྱི་དྲགས་པའི་འཐུས་ཤོར་མ་གཏོགས། སྔ་དྲགས་པའི་ཀླན་ཀ་ཞིག་འཚོལ་ཐབས་གཏན་ནས་མི་འདུག་སྙམ་མོ།།
