༤།༢༥ མང་ཡུལ་སླར་གསོའི་ས་འགུལ་གནོད་སྐྱོན་ཕོགས་པ་ཡོངས་ཀྱི་ཆེད་དུ་མཆོད་འབུལ་དང་སློབ་ཡོན།

      འདི་ལོ་ ༢༠༡༥ ཟླ་བཞི་པའི་ཚེས་ཉེར་ལྔ་ཉིན། ཧི་མ་ལ་ཡའི་རི་རྒྱུད་བལ་ཡུལ་དང་བོད། དེ་བཞིན་རྒྱ་གར་བཅས་ཀྱི་ས་ཁུལ་ཁག་ཅིག་གི་ནང་། ས་ཡོམ་གོད་ཆག་གིས་བར་ཆད་ཆེན་པོ་བྱུང་ཡོད་པ་ལྟར། ས་ཁུལ་དེ་དག་གི་མི་རྒྱུ་ཟོག་གསུམ་ལ་གནོད་འཚབ་ཆེན་པོ་བྱུང་ཡོད་པའི་ཁོངས་སུ། རང་རིགས་ཁ་བ་གངས་ཅན་པའི་ས་ཁོངས་མང་ཡུལ་སྐྱིད་གྲོང་རྫོང་གི་གྲོང་ཚོ་མང་པོའི་སྡོད་ཁྱིམ་ཞིག་རལ་ཏུ་བཏང་ཞིང་། མི་མང་རྣམས་སྡོད་གུར་ནང་གནས་སྤོས་བྱེད་དགོས་ཀྱིས་ད་ཆའང་དེ་མུར་གནས་དགོས་འཁེལ་བཞིན་པ་མ་ཟད། ས་འགུལ་ཡང་ནས་ཡང་དུ་ཡོང་བཞིན་པའི་དངངས་འཚབ་ཀྱི་འཇིགས་སྣང་འོག ས་ཐོག་མི་མང་གི་ལུས་སེམས་གཉིས་ཀར་བདེ་སྐྱིད་ཀྱི་གོ་སྐབས་རག་གི་མེད་པའི་གནས་སྟངས་ཆགས་ཡོད་སྟབས། ང་ཚོ་མང་ཡུལ་སྐྱིད་གྲོང་ཡུལ་གྱར་བ་ཁག་ཅིག་ནས་སྐབས་བསྟུན་ཁ་པར་གྱི་སྐད་འཕྲིན་བརྒྱུད་ལམ་ཐོག་ནས་སྐྱིད་སྡུག་མཉམ་མྱོང་སྤེལ་ཆེད་ཀྱི་གླེང་སྟེགས་ཤིག་གསར་བཟོ་བྱས་ཏེ། ཚོགས་མི་ཚོས་རང་ཐག་རང་གཅོད་ཀྱི་ཐོག་ནས་ཞལ་འདེབས་བསྡུ་རུབ་བྱས་ནས་ཚེ་སྲོག་ཤོར་བ་ཡོངས་དང་ཡང་སྒོས། མང་ཡུལ་སྐྱིད་གྲོང་ས་ཁུལ་རང་ནས་མི་བཅུ་ལྷག་རྐྱེན་འདས་སུ་ཤོར་བ་སོགས་མདོར་ན། ད་ལྟའང་གོད་ཆག་དེ་འབྲེལ་གྱི་དངངས་འཚབ་འོག་གནས་བཞིན་པའི་འགྲོ་བ་འདས་གསོན་ཡོངས་ཀྱི་ཆེད་དུ། བསྔོ་སྨོན་སྐྱབས་འཇུག་ཞུ་སླད་དང་། ལྷག་པར་སླད་ཕྱིན་འདི་ལྟ་བུའི་འབྱུང་བའི་འགེགས་བར་ཞི་བ་དང་བཟློག་པའི་རིམས་མཆོད་སྒྲུབ་ཆེད་དུ་འདི་ལོའི་ས་ག་ཟླ་བ་དུས་བཟང་གི་ཚེས་གཅིག་ནས་བཟུང་གཤམ་གསལ་མཆོད་འབུལ་ལས་གྲྭ་རྒྱ་མི་ཆུང་བ་ཞིག་སྤེལ་ཡོད་པ་དང་། མང་ཡུལ་སླར་གསོའི་མིང་བྱང་གི་དམིགས་འདུན་ལྟར་མང་ཡུལ་གྲོང་ཚོ་ཁག་གི་ཕྱིའི་འཛུགས་སྐྲུན་དང་དཔལ་འབྱོར་གྱི་ཐོག་ཏུ་རོགས་སྐྱོར་གང་ཡང་ཞུ་མ་ཐུབ་ཀྱང་། ས་ཐོག་མི་མང་གི་བློ་སྤོབས་ཡིད་ཆེས་དང་རེ་བ་སླར་གསོ་ཡོང་ཆེད་མཆོད་འབུལ་ལས་གྲྭ་དེ་འབྲེལ་གྱི་སྦྱིན་རྫས་སྒྲུབ་རྫས་རྣམས་མི་མང་ཚོར་སྐུར་ཐབས་བྱས་ཡོད་པ་སོགས་བློ་སྒོ་བཟང་པོའི་ཐོག་ནས། ༤།༢༥ མང་ཡུལ་སླར་གསོ་མཆོད་འབུལ་ཚོགས་མི་ཐུན་མོང་ནས་སྤྱི་བསྒྲགས་འདི་སྤེལ་བ་ལས། བྱ་གཞག་གྲུབ་པའི་ངོམ་སོ་དང་བྱས་ཡོད་ཟེར་བའི་མཚན་སྙན་གསོག་ཆེད་ཀྱི་རྣམ་པ་གང་ཡང་མིན་པར། དེ་བས་མི་མང་བྱིངས་ཀྱི་ངོས་ནས་དེ་ལྟར་ཐུགས་སྨོན་སྐྱབས་འཇུག་གནང་སྐྱོང་ཡོང་བའི་རེ་སྐུལ་ཞུ་རྒྱུ་ཡིན།

ལྷག་པར་དུ། དེ་སྔ་དུས་འགྱུར་མ་བྱུང་བའི་སྔོན་དུ་མང་ཡུལ་སྐྱིད་གྲོང་དུ་རྫོང་ཤར་ནུབ་གཉིས་ཀྱི་ཁྱབ་ཁོངས་སྐྱིད་གྲོང་བརྒྱ་ཚོ་དགུར་ལྡིང་ཁག་དང་འཐུས་ཁག་སོགས་ཀྱིས་གཞུང་འཛིན་འགྲོ་ལུགས་ལོ་རྒྱུས་ཡོད་ཀྱང་། དུས་འགྱུར་རྗེས་སུ་མང་ཡུལ་སྐྱིད་གྲོང་གི་གྲོང་ཚོ་ཁག་རྫོང་རིམ་འོག་གི་གྲོང་བརྡལ་དང་ཚོན་སོགས་སུ་ཕྱེ་ཡོད་སྟབས། ང་ཚོ་མཆོད་འབུལ་ཚོགས་མི་ཐུན་མོང་གིས་ཞུ་འདོད་པའི་རེ་འདུན་གཙོ་བོ་གཅིག་ནི། སྲིད་གཞུང་ནས་འཛུགས་སྐྲུན་སླར་གསོ་གནང་སྐབས་ས་གནས་གྲོང་ཚོ་མི་མང་གི་བློ་འདོད་དང་ས་གཞིའི་བདག་དབང་ཐོབ་ཆ་ཁག་ལ་དོ་ཁུར་གཙོར་བཞེས་གནང་དགོས་པ་ལས་དེ་སྔོན་སྒ་སྐྱེ་རྒུ་མདོའི་ས་ཡོམ་འཇུག་སྦྲེལ་གྱི་ས་གནས་མི་མང་ཚོའི་གནས་སྟངས་བཞིན་རྙོག་གླེང་དཀའ་ངལ་ཅན་དུ་མི་འགྱུར་བའི་རེ་འདུན་ཤུགས་དྲག་ཞུ་རྒྱུ་ཡིན།

དེ་བཞིན། ༼༤།༢༥ མང་ཡུལ་སླར་གསོའི་སློབ་ཡོན།༽ ཞེས་པའི་བཙན་བྱོལ་རྒྱ་བལ་འབྲུག་གསུམ་ནང་གི་མང་ཡུལ་སྐྱིད་གྲོང་བ་ཉམ་ཐག་སློབ་མ་གཅིག་ལ་གཞི་རིམ་འཛིན་གྲྭ་བཅུ་གཉིས་བར་གྱི་སློབ་ཡོན་མཐུན་སྦྱོར་གནང་རྒྱུའི་གོ་སྐབས་ཤིག་གི་གསལ་བསྒྲགས་ཀྱང་དེ་མུར་སྤེལ་བཞིན་ཡོད་སྟབས། ཐུགས་སྣང་དགོས་མཁོ་ཅན་ཚོས་གཤམ་འཁོད་ཁ་པར་ཐོག་འབྲེལ་བ་གནང་རོགས་ཞུ་རྒྱུ་ཡིན།

སློབ་ཡོན་འབྲེལ་མཐུད་པ།   +91 9882 349 115 སྐྱིད་གྲོང་ཟླ་བ། ༼མཆོད་འབུལ་ལས་གྲྭའི་འགན་ཁུར་གཙོ་གཉེར་བ།༽

     དངུལ་ལྷག་བསྡད་ཧིན་སྒོར། ༡,༢༥,༨༡༡ ནང་ནས་ཁྲི་གཅིག་རྙིང་མའི་སྨོན་ལམ་ཆེད་འབུལ་རྒྱུ་དང་། དེ་འཕྲོས་ཀྱི་ལྷག་བསྡད་ཧིན་སྒོར། ༡,༡༥,༨༡༡ དང་ཡུ་སྒོར། ༢༠ ཐམ་པའི་ལས་འཆར་དུ། ༢༠༡༦ ལོའི་དཔལ་དུས་འཁོར་དབང་ཆེན་སྐབས་མཆོད་འབུལ་དགེ་སྦྱོར་གྱི་ལས་སྣ་ཁག་ཅིག་བསྒྲུབ་རྒྱུ་མ་ཟད། མི་མང་གིས་དོ་ཁུར་གནང་རིམ་བཞིན་མ་འོངས་པར་༤།༢༥ འི་དུས་དྲན་སྲུང་བརྩི་དང་འབྲེལ་བའི་སྐྱིད་གྲོང་ཇོ་བོ་ཝ་ཏི་བཟང་པོ་དང་བྱམས་སྤྲིན་སྐུ་རྟེན་༸རྒྱལ་བ་བྱམས་པ་གཉིས་ལ་ཞལ་གསེར་ན་བཟའ་བསྒྲོན་རྒྱུ་སོགས་ཆོས་ཕྱོགས་ཀྱི་བྱེད་སྒོ་ཁག་ཅིག་སྤེལ་རྒྱུ།

ཟུར་བརྗོད། གོང་གི་བྱུང་སོང་ལྷག་གསུམ་གྱི་སྙན་ཐོའི་ནང་ལས་དོན་སྐབས་ཀྱི་འགྲོ་གྲོན་ཆུང་ཙག་རིགས་འགན་ཁུར་གཙོ་གཉེར་བས་གཙོས་པས་ས་གནས་ཚོགས་མི་ཁག་ཅིག་གིས་སྤྱི་ཁུར་དང་ལེན་གནང་སྟེ་རྩིས་ཞིབ་སྙན་ཐོའི་ནང་ཟུར་གྲོན་སྟོན་མི་དགོས་པར་དེ་ལྟར་སྟབས་བདེ་པོ་ཆགས་ཡོད་པར་ཡིད་རངས་དགོངས་འཇགས་འཚལ།