བྱང་ཀོ་རི་ཡས་ལྷོ་ཀོ་རི་ཡ་གཞུང་ལ་དགོངས་དག་མ་ཞུས་ན་མཐའ་ཁུལ་དམག་འཁྲུག་སྐོར་གྱི་དྲིལ་བསྒྲགས་མཚམས་འཇོག་རྒྱུ་མིན་སྐོར་བརྗོད་འདུག
ཕྱི་ཚེས་ ༢༣ ཉིན་ལྷོ་བྱང་ཀོ་རི་ཡ་རྒྱལ་ཁབ་གཉིས་ཀྱི་ས་མཚམས་སུ་ཡོད་པའི་ཕན་མུན་ཇོམ་(Panmunjom)གྲོང་གསེབ་ཏུ། ཕྱོགས་གཉིས་ཀྱི་མངའ་ཁོངས་རྩོད་གླེང་འདུམ་འགྲིག་ཡོང་ཐབས་ཀྱི་གྲོས་མོལ་ཚོགས་ཆེན་ཐེངས་གཉིས་པ་བསྡུས་ཡོད་པ་དང་། ཚོགས་ཐོག་ཏུ་བྱང་ཀོ་རི་ཡའི་དམག་དཔོན་ཧ་ཝང་ཕ་ཡོང་སོ་ (Hwang Pyong-so)་དང་། ལྷོ་ཀོ་རི་ཡའི་བདེ་སྲུང་ལྷན་ཁང་གི་འགན་འཛིན་ཁེམ་ཁ་ཝན་ཅེན་ (Kim Kwan-jin) གཉིས་མཉམ་ཞུགས་བྱས་ཡོད་འདུག
ཟླ་འདིའི་ཕྱི་ཚེས་ ༢༢ ཉིན་རྒྱལ་ཁབ་གཉིས་ཀྱི་མཐའ་མཚམས་སུ་འཁེལ་བའི་ཕན་མུན་ཇོམ་གྲོང་གསེབ་ཏུ་འགད་རྫས་ཀྱི་དོན་རྐྱེན་ཞིག་བྱུང་བའི་ཁྲོད། ལྷོ་ཀོ་རི་ཡའི་མཐའ་སྲུང་དམག་མི་གཉིས་ལྷག་གི་ཚེ་སྲོག་ཤོར་ཡོད་པར་བརྟེན། ལྷོ་ཀོ་རི་ཡ་གཞུང་གིས་བྱང་ཀོ་རི་ཡས་དགོངས་དག་མ་ཞུས་ཚེ། མུ་མཐུད་དུ་བྱང་ཀོ་རི་ཡའི་མཐའ་མཚམས་དམག་འཁྲུག་གི་སྐོར་དྲིལ་བསྒྲགས་དང་རྒྱང་སྲིང་བྱེད་རྒྱུ་མཚམས་འཇོག་གི་མིན་སྐོར་བསྒྲགས་འདུག ཡིན་ནའང་། བྱང་ཀོ་རི་ཡའི་ཕྱོགས་ནས་ད་རེས་ཀྱི་འགད་རྫས་དོན་རྐྱེན་དེ་ཁོ་ཚོར་འབྲེལ་བ་གཏན་ནས་མེད་སྐོར་བརྗོད་འདུག
ཕྱི་ལོ་ ༡༩༥༠ ལོ་ནས་ ༡༩༥༣ ལོའི་བར་ཕན་མུན་ཇོམ་ས་ཁུལ་གྱི་བདེ་འཇགས་དང་དེའི་བདག་དབང་ཐད་ལ་སྔར་རྗེས་སུ་གྲོས་ཆོད་ཐེངས་མང་བཞག་ཡོད་ཀྱང་། མངའ་ཁུལ་རྩོད་གླེང་གི་གནས་བབ་ཧ་ཅང་ཛ་དྲག་ཆགས་ཀྱི་ཡོད་པ་དང་། རྒྱལ་སྤྱིའི་སྲིད་དོན་དབྱེ་ཞིབ་པ་ཚོས། ལྷོ་བྱང་རྒྱལ་ཁབ་གཉིས་བར་གྱི་མངའ་ཁོངས་རྩོད་གླེང་དང་ལྷག་པར་དུ་མཐའ་མཚམས་ཁག་གི་རང་བྱུང་ཐོན་ཁུངས་འཕྲོག་རྩོད་བྱེད་པའི་གནད་དོན་དེ་དུས་ནམ་ཡང་སེལ་ཐབས་མེད་སྐོར་བརྗོད་འདུག
འདས་པའི་མི་ལོ་ ༦༥ རིང་ལྷོ་བྱང་ཀོ་རི་ཡ་རྒྱལ་ཁབ་གཉིས་བར་གྱི་དམག་འཁྲུག་ཞི་མཐུན་གྲོས་ཆོད་ཀྱི་སྟེང་ནས་མཇུག་བསྡུས་པ་ཞིག་མ་ཡིན་པར། དྲག་པོའི་འཐབ་འཁྲུག་གི་ཀློང་ནས་རང་དགར་མཚམས་ཆད་པ་ཞིག་ཡིན་པར་བརྟེན། རྒྱལ་ཁབ་གཉིས་བར་སླར་ཡང་ཛ་དྲག་གི་གནས་སྟངས་བྱུང་རྗེས། འཛམ་གླིང་མཉམ་འབྲེལ་རྒྱལ་ཚོགས་ཀྱི་དྲུང་ཆེ་བྷན་ཁེ་མོན་ (Ban Ki-moon) ལགས་ཀྱིས་ལྷོ་བྱང་རྒྱལ་ཁབ་གཉིས་འགྲིག་མཐུན་ཡོང་ཐབས་དགོས་པའི་འབོད་སྐུལ་ཞུས་ཡོད་ལ། དེ་བཞིན་ལྷོ་ཀོ་རི་ཡའི་ནང་གཏན་སྡོད་བྱས་ཡོད་པའི་ཨ་རིའི་དམག་མི་ཁྲི་ ༣ ལྷག་གི་ཆེས་མཐོའི་དམག་དཔོན་གྱིས། ཨ་རིའི་གཞུང་ལ་མནའ་འབྲེལ་རྒྱལ་ཁབ་ལྷོ་ཀོ་རི་ཡའི་རྒྱལ་དོན་བདེ་འཇགས་ལ་འགན་སྲུང་དགོས་པའི་འབོད་སྐུལ་ཡང་ཞུས་འདུག
