ཆིག་སྒྲིལ་གད་སྙིཊ་སུ་གཡུཊ་པའི་མྱི་དེ་ཚོ།

རྩོམ་པ་པོ། ཨ་འདུས་མིག་ཆུ།

ངས་འབྱུང་འགྱུར་དབུ་ཁྲིད་སུ་འདེམས་མིན་ནི། རང་གི་སེམས་ལ་གསལ་པོ་ཡོད་མོད། རང་གི་བདམས་པའི་དབུ་ཁྲིད་དེ་མ་འོངས་མི་རིགས་ཀྱི་དབུ་ཁྲིད་ཆགས་མིན་ནི་ང་ལ་ཡང་ཐེ་ཚོམ་ཡོད། ཡིན་ཡང་ད་ལྟའི་འོས་མིའི་ཁྲོད་ནས་སུ་ཞིག་སྲིད་སྐྱོང་གི་འོས་མིར་གྱུར་ཚེ། དེ་ནི་བོད་མི་མང་གིས་བདམས་ཏེ་ཐོབ་པ་ཡིན་པས་ང་ལ་བརྩི་བཀུར་བྱེད་ཐུབ་པའི་སྤོབས་པ་ཡོད། རྒྱུ་མཚན་དེའི་ཕྱིར་ན། ད་ལྟའི་འོས་མི་སུ་ལ་ཡང་སྐྱོན་འདོགས་དང་ཉེས་འཛུགས་བྱ་རྒྱུར་དགའ་པོ་ངོ་མ་མེད། ཐམས་ཆད་ཀྱིས་མཐུན་སྒྲིལ་དགོས་ཞེས་ཨག་རིང་འཐེན་མོད། དོན་དངོས་མཐུན་སྒྲིལ་ནི་བཟའ་རྒྱུ་ཞིག་ཡིན་ནམ་འཆའ་རྒྱུ་གང་ཡིན་གྱི་གནས་ལུགས་ལ་ངེས་ཤེས་འདྲོང་གི་མེད་པ་འདྲ། དེའི་སྟབས་ཀྱིས་བོད་པའི་མཐུན་སྒྲིལ་ཁ་ན་ཡོད་པ་ལས་སེམས་ལ་ཡོད་པ་མ་རེད།

གནའ་མྱི་རྒན་པོ་དག་ལ་མཐུན་སྒྲིལ་གྱི་སྟོབས་ཤིག་ཡོད་མྱོང་བས། བཙན་པོའི་རྒྱལ་རབས་ཞེས་པའི་ངོམ་ཆོག་ཆོག་གི་རྒྱལ་ཁབ་ཅིག་བཙུགས་པའི་ལོ་རྒྱུས་ཡོད་པ་རེད། སྐབས་དེ་ཤེད་ནས་རྒྱ་ནག་རྒྱལ་པོ་ཁྲི་འཕང་ལས་བྲོས་ཤིང་། རྒྱ་གར་རྒྱལ་པོས་བོད་བཙན་པོའི་ཞབས་ལྷམ་ལྷ་བཞིན་བཀུར་བ་རེད། དེ་ནི་བཙན་པོ་དག་ངར་དྲགས་པས་མ་རེད། བཙན་པོ་དང་འབངས་ཀྱི་བར་ན་མཐུན་སྒྲིལ་གྱི་སྟོབས་ཤིག་ཡོད་པས་རེད། མཉམ་ལས་ཀྱི་འདུ་ཤེས་ཡོད་པས་རེད།

བཙན་པོའི་རུ་དམག་གིས་རྒྱལ་ཁབ་སྟོབས་ཀྱིས་བཙུགས་ཤིང་། མཐའ་བཞི་དབང་དུ་བསྡུས་པ་རེད། མ་ཟད་རིག་གནས་ཀྱི་དཔལ་ཡོན་བསྐྲུན་ཞིང་། འབྱོར་ཕྱུག་གི་ནོམ་པ་བསགས་པ་རེད། སྐབས་དེ་དུས་འུ་ཚང་སུ་ལ་ཡང་ངོ་གནོང་མི་དགོས། རྒྱ་ནག་གི་ལོ་རྒྱུས་དེབ་ཐེར་ནང་ལྟོས་དང་། ཐུ་བྷོད་མི་མང་གི་རུ་དམག་གིས་ས་གཞིའི་བྲང་གཞུང་དམག་རྟའི་རྨིག་པས་བརྡུངས་ཤིང་། རྨིག་རྩེ་ལས་མཆེད་པའི་ས་རྡུལ་གྱིས་བར་སྣང་གི་ཉི་འོད་བསྒྲིབས། ཀུ་སྒྲས་དགྱ་ནག་གི་སྙིང་རྩ་འདར་བ་བྱས་པ་རེད། དེ་དག་ཀྱང་སྐབས་དེ་དང་དུས་དེའི་བོད་མྱིའི་སེམས་ཁམས་འདུ་ཤེས་ཁྲོད་མཐུན་སྒྲིལ་གྱི་སྟོབས་ཤིག་ཡོད་པས་རེད། མཉམ་ལས་ཀྱི་འགུལ་ཤུགས་ཡོད་པས་རེད། འོན་ཀྱང་ནང་འཁྲུག་གི་གཡུལ་ལ་ཆས་ཤིང་། མཐུན་སྒྲིལ་གྱི་སྟོབས་ཤུགས་བག་ལ་ཉལ་ནས། མཉམ་རུབ་ཀྱི་སྒུལ་ཤུགས་ཉམ་ཆུང་བ་གྱུར་པའི་འགོ་བརྩམས་པ་ནས། ཕྱི་ཡི་བཙན་འཛུལ་ཇེ་རྒོད་དང་། ནང་གི་སྡར་མ་དག་མགོ་ལ་ཤོར། ནང་འཁྲུགས་བྱེད་པའི་ཡ་ང་ཞིང་ཡིད་སྐྱོ་བའི་ཐུ་བྷོད་མི་རིགས་ཀྱི་གཟི་འོད་ཉམས་པ་རེད།

ད་ནི་དེང་གི་དུས་སུ་འུ་ཚོ་གཞིས་བྱེས་གཉེས་ལ་གྱེས་ཤིང་། སྤྱི་དོན་དང་མི་རིགས་ལ་དགའ་བ་གང་མང་ཞིག་གིས་མི་རིགས་ཀྱི་སླད་དུ་དང་། རིག་གཞུང་དེའི་ཕྱིར་དུ་རང་གི་ཚེ་སྲོག་ཚུན་ཆུད་མེ་ལ་བསྒྲོན་ཅིང་། ཆུ་ལ་མཆོང་བའི་གནས་ཚུལ་ཛ་དྲག་གི་གནས་སུ་གྱུར་ཡོད་པ་རེད། དེ་ནི་མིག་ལྡན་ཞིག་གིས་མཐོང་ན། མིག་ཆུ་བཞུར་བ་དང་། བསམ་ཤེས་ཤིག་གིས་མཐོང་ན། ཡ་ང་བའི་འུ་ཚང་གི་གཏམ་རྒྱུད་ཅིག་ཡིན་པ་གཞལ་ངེས།འོན་ཀྱང་ཡིད་སྐྱོ་ལ་སེམས་ཕམ་པ་ནི། མཐུན་སྒྲིལ་ཁ་ལ་ཁྱེར་ཞིང་། མི་རིགས་ལ་ཤ་ཚ་སྐད་པའི་ཨག་རིང་འཐེན་མཁན་དག་ཡིན་ཏེ། བོད་ཀྱི་དབུ་ཁྲིད་དུ་གྱུར་པའི་མི་བུ་འཇོན་ཐང་ཅན་རྣམས་ལ་ཉེས་ཞྭ་བཟོས་ཤིང་། རྐང་པ་ནས་འཐེན་ཏེ་མི་རིགས་ཀྱི་མཐུན་སྒྲིལ་གཏོར་བཅོམ་བྱས་དང་བྱེད་བཞིན་པ་དེ་དག་ཡིན་ལ། དེ་ནི་ནམ་ཡང་མཐུན་སྒྲིལ་སེམས་ལ་ཡོད་ཅིང་། མི་རིགས་ལ་ཞེན་སྙིང་ལ་མངའ་བ་དག་གིས་གཟབ་ནན་གྱིས་འགོག་རྒོལ་བྱ་དགོས་པའི་གནས་ཤིག་ཏུ་མཐོང་།

བོད་པ་མང་ཆེ་བ་ནི། མི་རིགས་ལ་དགའ་ཞིང་། རང་གི་སྤུན་ཟླ་ཕན་ཚུན་ལ་དབྱེ་འབྱེད་ཀྱི་འདུ་ཤེས་ཡོད་པ་མ་རེད་དེ། བོད་པའི་བླ་བཙོང་ཞིང་། བོད་པའི་མཐུན་སྒྲིལ་གཏོར་བར་དགའ་བའི་མྱི་ངན་འགའ་ཞིག་གི་སྐད་ཆ་བཤད་ཕྱོགས་དང་། བསམ་བློ་གཏོང་ཕྱོགས་སྐོར་ལ་བསམ་མནོ་ཞིབ་ནན་མ་བཏང་བར། ཆུ་སྣེ་གང་ཁྲིད་ཀྱི་དཔེ་ཡི་ཟླ་རུ་འགྲོ་བཞིན་པ་ནི། ཡ་ང་ཞིང་ཡིད་སྐྱོ་བའི་སྐྱོ་གར་འབའ་ཞིག་རེད་འདོད། བོད་ཀྱི་དབུ་ཁྲིད་བརྗེ་བསྒྱུར་གྱི་སྐབས་སུ་སྐབས་འཚོལ་བ་དང་། ཡང་ན་བོད་པའི་ནང་ཕན་ཚུན་ཁྲག་བཞིན་དཀྲུག་མཁན་དག་གིས་གོ་སྐབས་དམ་འཛིན་གྱིས་ཆོལ་ཁ་དང་ཆོས་ལུགས་ཀྱི་དབྱེ་བ་ཕྱེས་ཏེ། འོས་མིར་གྱུར་པའི་མྱི་དག་གི་སེམས་ཤུགས་རྒུད་པ་དང་། མི་མང་དང་དབུ་ཁྲིད་ཀྱི་བར་ལ་དབྱེན་དཀྲུགས་ཀྱི་སྦྱོར་བ་ཅིས་ཀྱང་བརྩོན་བཞིན་པ་ངེས་པར་ཤེས་དགོས་ཀྱི་འདུག དེ་ནི་དོན་དངོས་ཀྱིས་དགྲ་དགའ་གཉེན་སྡུག་གི་བགྱི་བ་ཞིག་ཡིན་ངེས་ན། འདིའི་རིགས་འུ་ཚོས་ཀྱང་མཐུན་སྒྲིལ་དང་མཉམ་རུབ་ཀྱིས་རྡུང་འདེགས་ཚ་ནན་བྱ་དགོས།

བཀུར་བར་འོས་པའི་འབྱུང་འགྱུར་གྱི་དབུ་ཁྲིད་དག་གིས་རང་གི་ཐབས་བྱུས་དང་སེམས་ཤུགས་ཡོད་རྒུས་འོས་མིར་བཞེངས་སྐབས་རང་མི་དང་རང་རིགས་སུ་ཁས་འཆེ་བ་རེ་རེས་མིང་ངན་སྣ་ཚོགས་དང་། ཉེས་ཞྭ་རེ་རེ་བཀབ་ཏེ། འུ་ཅག་གི་དབུ་ཁྲིད་དག་སྲིད་སྟེགས་སུ་འབུད་དུས་བྱ་ཐབས་བྱེད་ཐབས་མེད་པའི་གནས་སུ་འདེད་ཀྱིན་པ་འདི་སུ་ཞིག་གི་ཆོ་འཕྲུལ་ཡིན་པ་ཤེས་དགོས། ད་ནི་སེམས་རྣལ་ལ་ཕབ་ཏེ། བློ་མིག་གིས་དཔྱོད་ཀྱང་སྟོབས་ཤུགས་ཀྱི་རྡོག་རྩ་གཅིག་ཏུ་སྒྲིལ་མ་ཐུབ་ན། མཐོ་བ་དབུ་ཁྲིད་ལ་བརྙས་ཤིང་། ཆུང་བ་བྱིས་པ་ཚུན་ཆད་ནས་རྐུ་བཞིན་པའི་སྣང་ཚུལ་ཡིད་དུ་མི་རུང་བ་འདིས་འུ་ཅག་གི་མ་འོངས་པའི་ལམ་ཁ་གང་འདྲ་ཞིག་ཡིན་པ་གསལ་གསལ་ཐིང་ཐིང་རེད།

འུ་ཅག་གི་སྲིད་སྐྱོང་འོས་མི་དག་ལས་གཅིག་ནི། བོད་མིའི་དབུ་ཁྲིད་དུ་ཅིས་ཀྱང་ཡོང་ངེས་པས། དེ་དག་ལ་བརྙས་ཤིང་རྒོལ་ཐབས་བགྱི་བ་ཡུན་གྱིས་སོང་ན། འུ་ཅག་ལ་ནམ་དུ་ཡང་དབུ་ཁྲིད་ཡང་དག་པ་ཞིག་སྤྱི་ཚོགས་ནས་འཚོལ་ཐབས་མེད་ལ། དབུ་ཁྲིད་དུ་བཞེངས་ཆོག་པའི་འོས་མི་སུ་ཡང་དང་བླངས་ཀྱིས་ཞུགས་མི་སྲིད། སྐབས་དེ་འདྲ་ཞིག་ལ་འོས་མི་དག་ལ་བརྙས་ཞྭ་བཟོ་བའི་འཚེམ་པོ་བ་དག་གིས་འདོད་པ་ཚིམ་ཞིང་། བོད་རིགས་མང་ཚོགས་ཅི་བྱ་གཏོལ་མེད་ངང་ལྷག་ངེས་པ་རེད། དེའི་ཕྱིར་ན། ང་ཚོ་ལ་དགོས་པ་ནི་ནང་མི་ཕན་ཚུན་དབྱེ་སྟེ་རྩོད་རྒྱུ་མ་ཡིན་པར་མཐུན་སྒྲིལ་དང་མཉམ་རུབ་ཀྱིས་འོས་མི་དག་གི་སེམས་ཤུགས་དང་ཆོད་སེམས་ལ་ཡར་བསྐུལ་དང་རྒྱབ་སྐྱོར་བྱ་དགོས་པ་ནི་ཁ་ཚ་དགོས་གཏུགས་ཤིག་ཏུ་མཐོང་།

དོན་དངོས་བྱས་ན། ངོ་དེབ་དང་སྐད་འཕྲིན་ན་ཡོད་པའི་པར་བཟོ་བ་དག་དང་། ཉེས་ཞྭ་བཟོ་མཁན་དག་གི་མིང་ཡིག་རེ་རེ་ནས་བཏུས་ཏེ། ཞིབ་གཤེར་དང་། ཚ་འདྲི་གཏང་དགོས་ཀྱི་འདུག་ལ། འདི་དག་གི་ལག་པ་དང་འདི་དག་ཁ་ཡོད་ཚོད་བཅད་ཅིང་འཚེམ་དགོས་ཀྱི་འདུག དེ་ལྟར་མ་བྱས་ན། ནམ་དུ་ཡང་འུ་ཅག་གི་དབུ་ཁྲིད་ལ་ཞྭ་མོ་བཟོ་ཞིང་པར་ངན་འགྲེམ་པར་བྱ་ངེས། དོན་དངོས་མི་རིགས་ལ་དགའ་བ་བདེན་ན། མི་རིགས་ཀྱི་མཐུན་སྒྲིལ་རྩ་བ་ཡིན། མཐུན་སྒྲིལ་མེད་པའི་མི་རིགས་ལ་སྟོབས་ཤུགས་མེད་ལ། སྟོབས་ཤུགས་མེད་པའི་མི་རིགས་ཤིག་ལ་འབྱུང་འགྱུར་གྱི་ལམ་ཁ་ཡང་དག་པ་ཞིག་ཡོད་མི་སྲིད་པ་ནི། འུ་ཚོའི་འདས་སོང་གི་ལོ་རྒྱུས་ལས་ཉམས་སུ་བླངས་ན་ཆོག་ངེས། མང་གཙོ་ནི་འོས་མི་དག་གི་འཇོན་ཐང་ངོམ་ས་ཡིན་པ་ལས། འོས་མི་དག་ལ་དོན་མེད་ཉེས་ཞྭ་བཟོ་ས་མིན་ངེས།

མང་གཙོ་ནི་སྒེར་དབང་མི་བཙན་པར་སྤྱི་ཚོགས་ཁྱོན་ཡོངས་ལ་སེམས་ཁུར་དང་། ཡང་ན་དྲང་བདེན་དང་གནས་ལུགས་ཀྱི་སྐད་ཆ་འཆད་ས་ཞིག་ཡིན་ངེས། གང་ལྟར་བོད་མི་ལ་ལ་ཞིག་གིས་མང་གཙོ་ཤེས་ཀྱི་མི་འདུག་ལ། ལྷག་ཏུ་བྱིས་པའི་སེམས་ཁམས་དང་ཡང་ན་བྱོལ་སོང་གི་འདུ་ཤེས་ལས་ད་དུང་བརྒལ་མི་འདུག