སྐབས་ ༡༦ པའི་མདོ་སྟོད་སྤྱི་འཐུས་འོས་མི་གསར་པ་དཀོན་མཆོག་ཡར་འཕེལ་ལགས་སུ། ཁོང་སྤྱི་འཐུས་འོས་མིར་ལངས་པའི་དགོས་དམིགས་དང་བོད་མི་མང་སྤྱི་འཐུས་ཤིག་གི་གཡོལ་དུ་མེད་པའི་འོས་འགན་སོགས་ཀྱི་ཐད་བཅར་འདྲི་བྱས་པར། བོད་མི་མང་སྤྱི་འཐུས་ཤིག་ཡིན་ན་ལྐོག་ཟ་རུལ་སུངས་དང་གཡོ་སྒྱུ་ཁྲམ་གསུམ། སྤྱི་སེམས་མེད་པར་ཆུ་ཚོད་འཕྲོ་བརླག་གཏོང་བ་བཅས་ངེས་པར་དུ་འདོར་དགོས་སྐོར་བརྗོད་བྱུང་།
དྲི་བ། ཐོག་མར་ཁྱེད་རང་གི་སློབ་སྦྱོང་གི་བརྒྱུད་རིམ་སོགས་ལོ་རྒྱུས་མདོར་བསྡུས་ཤིག་ངོ་སྤྲོད་གནོངས་དང་།
ལན། ང་ཕྱི་ལོ་ ༡༩༩༣ ལོར་བོད་ནས་རྒྱ་གར་ལ་བཙན་བྱོལ་དུ་འབྱོར་ཏེ། ༧སྐྱབས་མགོན་རིན་པོ་ཆེ་དང་དབུས་བོད་མིའི་སྒྲིག་འཛུགས། དེ་བཞིན་བོད་ཁྱིམ་སློབ་གྲྭ་བཅས་ཀྱི་ཐུགས་རྗེ་བཀའ་དྲིན་ལ་བརྟེན་ནས་སུ་ཇ་བོད་ཁྱིམ་དུ་འཛིན་རིམ་ ༡༠ བར་སློབ་སྦྱོང་བྱས་པ་དང་། དེ་ནས་དྷ་སྟེང་བོད་ཁྱིམ་དུ་ཞུགས་ཏེ་འཛིན་རིམ་ ༡༢ མཐར་ཕྱིན་རྗེས། ལྡི་ལིར་ཡོང་སྟེ་མཐོ་སློབ་ནང་ཆབ་སྲིད་ཚན་རིག་ཐོག་(B.A Political Science) ཉེ་བའི་གཙུག་ལག་རབ་འབྱམས་པ་ཐོན་པ་དང་། དེ་ནས་ཡང་བསྐྱར་ལོ་གཉིས་རིང་ཆབ་སྲིད་ཚན་རིག་ཐོག་སློབ་སྦྱོང་བྱས་ཏེ་ཕྱི་ལོ་ ༢༠༠༧ ལོར་གཙུག་ལག་རབ་འབྱམས་པ་(M.A Political Science) ཐོན་པ་རེད། གཞི་རིམ་སློབ་གྲྭ་ནང་ཡོད་སྐབས་ཤེས་རིག་ལས་ཁུངས་ནས་བུམ་སྐྱོན་གསུམ་བྲལ་གྱི་སློབ་བུ་རྩེ་ཕུད་ (best boy award)ཀྱི་གཟེངས་རྟགས་གནང་མྱོང་། མཐོ་སློབ་ཀྱི་སྐབས་སུ་ལྡི་ལི་བོད་ཁྱིམ་གྱི་རྒན་བདག་དང་སྤྱི་ཁྱབ་རྒན་བདག དེ་བཞིན་སློབ་ཕྲུག་ཚོགས་པའི་ཚོགས་གཙོ་དང་ས་གནས་གཞོན་ནུ་ལྷན་ཚོགས་ཀྱི་ཚོགས་གཙོ་སོགས་བྱས་ཏེ། སོ་སོའི་སྤྱི་ཚོགས་ནང་འགན་འཁུར་བའི་ལས་ཀ་མང་པོ་ཞིག་བྱས་པ་ཡིན། མཐོ་སློབ་ཐོན་རྗེས་ཕྱི་ལོ་ ༢༠༠༧ ལོར་དབུས་བོད་ཀྱི་གཞོན་ནུ་ལྷན་ཚོགས་ཀྱི་རྒྱུན་ལས་ནང་འོས་འདེམས་བྱུང་སྟེ་སྐབས་གཉིས་རིང་དབུས་རྒྱུན་གྱི་ལས་ཀ་བྱས་པ་ཡིན། ད་ལྟ་སྨར་ཁམས་གྲགས་པ་རིན་པོ་ཆེ་མཆོག་གིས་བོད་དང་ཧི་མ་ལ་ཡི་རི་བརྒྱུད་ཀྱི་དྭ་ཕྲུག་དང་ཕྱེད་དྭ་ཕྲུག དེ་བཞིན་ཉམ་ཐག་ཚོའི་ཆེད་དུ་བཙུགས་གནང་བའི་རྒྱལ་སྤྱི་བྱམས་བརྩེའི་བདེ་རྩ་ཚོགས་པའི་ནང་དྲུང་ཆེའི་ལས་ཁུར་ཞུ་བཞིན་ཡོད།
དྲི་བ། ཁྱེད་རང་སྐབས་ ༡༦ པའི་སྤྱི་འཐུས་འོས་མིར་ལངས་དགོས་པའི་རྒྱུ་མཚན་དང་མ་འོངས་པར་མདོ་སྟོད་རྒྱ་ཆེའི་མི་མང་གི་འཐུས་མི་ཚད་ལྡན་ཞིག་ཆགས་ཐུབ་པར་འཆར་གཞི་ག་འདྲ་ཡོད།
ལན། ང་སྤྱི་འཐུས་སུ་ལངས་པའི་རྒྱུ་མཚན་ནི། ང་ཚོས་སོ་སོའི་ལུང་པ་ཤོར་ནས་མི་ལོ་ ༦༠ ལྷག་འགྲོ་བཞིན་ཡོད་ལ། མི་རབས་གོང་མ་ཚོས་སོ་སོའི་ཤ་ཁྲག་གིས་འགྲོ་སོང་བཏང་སྟེ་བོད་མི་རིགས་དང་བསྟན་པ་ཆབ་སྲིད་ཀྱི་ཆེད་དུ་འཐབ་རྩོད་གནང་ཡོད་པ་དང་། ད་ལྟ་ང་ཚོའི་མི་ཐོག་དང་པོ་དང་གཉིས་པ་མིའི་ལུང་པ་ནས་གང་ལ་གང་འཚམ་རྫོགས་འགྲོ་བཞིན་ཡོད་སྟབས། ང་ཚོ་མི་ཐོག་གསུམ་པས་འགན་ཞིག་འཁུར་ཏེ་ཅིག་མ་བྱས་པ་ཡིན་ན། སོ་སོའི་རང་མགོ་ཐོན་ཙམ་བྱས་ནས་བསྡད་ཚེ་ལས་རྒྱུ་འབྲས་སུའང་འགྲོ་ས་མ་རེད་བསམ་པའི་ཚོར་བ་ཤུགས་ཆེན་པོ་ཡོད་པ་ལྟར། ང་ད་རེས་སྐབས་ ༡༦ པའི་བོད་མི་མང་སྤྱི་འཐུས་ཀྱི་འོས་མིར་ལངས་ཀྱི་ཡོད། གལ་སྲིད་ང་ལ་མདོ་སྟོད་སྤྱི་འཐུས་ཀྱི་རྒྱལ་ཁ་འཐོབ་པ་ཡིན་ན། ལས་ཀ་བྱེད་པར་གདེང་ཚོད་དང་སྤོབས་པ། བློ་ཁོག་བཅས་ཚང་མ་བརྒྱ་ཆ་བརྒྱ་ཐམ་པ་ཡོད།
དྲི་བ། སྤྱི་འཐུས་ཤིག་གིས་གཡོལ་དུ་མེད་པའི་འོས་འགན་གསུམ་དང་མི་འདོར་ཐབས་མེད་ཀྱི་རྩ་བའི་གནད་དོན་གསུམ་བགྲང་ན་གང་དག་བགྲང་ས་རེད།
ལན། བོད་མི་མང་སྤྱི་འཐུས་ཤིག་གིས་ངེས་པར་དུ་སྒྲུབ་དགོས་པའི་འོས་འགན་གསུམ་གྱི་ནང་ནས་དང་པོ་དེ། བོད་མི་མང་སྤྱི་འཐུས་ཤིག་ཡིན་དུས་བོད་ནང་གི་དཀའ་སྡུག་ལ་བསམ་བློ་གཏོང་དགོས་པ་དེ་ཧང་སང་བ་གལ་ཆེན་པོ་རེད། གཉིས་པ་བོད་མི་ནང་ཁུལ་དུ་ཆིག་སྒྲིལ་ཡོང་ཐབས་དགོས་པ་དེ་ཧ་ཅང་གལ་ཆེན་པོ་རེད། གསུམ་པ་ད་ལྟ་ང་ཚོའི་སྤྱི་ཚོགས་ནང་རང་བཙན་དང་དབུ་མའི་ལམ་གྱི་སྐད་ཆ་ཞིག་མང་དུ་འགྲོ་ཡི་འདུག་པས། དེ་ཚོ་མེད་པ་བཟོ་དགོས་ཀྱི་འདུག དབུ་མའི་ལམ་རྩོད་མཁན་ཡིན་ན་རེད། རང་བཙན་རྩོད་མཁན་ཡིན་ནའང་རེད། གཉིས་ཀས་ལ་ཕར་རྒྱབ་ཀྱི་རྒྱ་མི་ཚོའི་ཐོག་ཁ་ལོག་སྟེ། ཐབས་ཇུས་ཀྱི་ངོ་བོའི་ཐོག་བསྒྱུར་ཐབས་དགོས་པ་དེ་གལ་ཆེན་པོ་རེད་བསམ་གྱི་འདུག དེ་ནས་བོད་མི་མང་སྤྱི་འཐུས་ཤིག་ཡིན་ན་ལྐོག་ཟ་རུལ་སུངས་དང་གཡོ་སྒྱུ་ཁྲམ་གསུམ། སྤྱི་སེམས་མེད་པར་ཆུ་ཚོད་འཕྲོ་བརླག་གཏོང་བ་བཅས་ངེས་པར་དུ་འདོར་དགོས་པ་རེད་བསམ་གྱི་འདུག
དྲི་བ། ད་ལྟའི་བོད་མི་མང་སྤྱི་འཐུས་རྣམ་པས་སྤྱི་ཚོགས་ལ་འགན་འཁུར་སྟངས་དང་ཕྱག་ལས་གནང་ཕྱོགས་ལ་དགེ་ཕན་མང་པོ་ཡོད་ཀྱང་། སྐྱོན་གྱི་ཆ་གང་དག་མཐོང་གི་འདུག
ལན། དྲང་པོ་བཤད་ན་སྐྱོན་མེད་པའི་མི་ཞིག་ཡོད་པ་མ་རེད། ད་ལྟའི་བར་དུ་ང་རང་ཚོ་མི་རབས་གཞོན་པ་ཚོས་བཙན་བྱོལ་སྤྱི་ཚོགས་ནང་ཞབས་ཞུ་ཞུས་པ་དེ་ངས་རླབས་ཆེན་ཞིག་ཏུ་མཐོང་གི་ཡོད། ཡིན་ནའང་། སྐྱོན་རེ་ཟུང་རེ་ཟུང་དཔེར་ན་སོ་སོའི་ཆོལ་ཁ་ཆུང་ཆུང་ཞིག་དང་ཆོས་བརྒྱུད་ཆུང་ཆུང་ཞིག་གི་ཆེད་དུ་འཐེན་འཁྱེར་བྱས་ཏེ། གྲོས་ཚོགས་ར་བའི་ནང་རྩོད་རྙོག་ཆགས་བསྡད་པ་དེ་ཚོ་མ་ཡོང་བ་བྱེད་དགོས་པ་རེད་བསམ་གྱི་འདུག དེ་ནས་ད་ལྟའི་བར་དུ་གྲོས་ཚོགས་ར་བའི་ནང་གྲོས་ཆོད་དང་བཀའ་སྡུར་ཡོང་གི་ཡོད་པ་མ་རེད་ཞུ་ཡི་མེད་ཀྱང་། གྲོས་ཚོགས་ཚོགས་ཡོང་དུས་བོད་ཕྱི་ནང་གཉིས་ཀྱི་དཀའ་སྡུག་ཐོག་འགན་འཁུར་དགོས་ལ། དམིགས་བསལ་གྱིས་བོད་ནང་གི་དཀའ་སྡུག་ལ་ཐུགས་འགན་འཁུར་དགོས་པ་རེད། བོད་མི་བཙོན་ཁང་དུ་བཅུག་པ་རྣམས་དང་རང་ལུས་མེར་བསྲེགས་གནང་མཁན་ཚོའི་མངོན་འདོད་འགྲུབ་ཆེད། བོད་མི་མང་སྤྱི་འཐུས་ཀྱི་ངོས་ནས་དེ་སྔོན་ལས་འགུལ་རྒྱ་ཆེན་པོ་སྤེལ་ཡོད་ཀྱང་། དེང་སང་སྤེལ་ཐུབ་ཀྱི་མི་འདུག་པས་ལས་འགུལ་དེ་འདྲ་སྤེལ་ཐུབ་ན་ཡག་པོ་ཡོད་པ་རེད་བསམ་གྱི་འདུག
དྲི་བ། ང་ཚོའི་སྤྱི་ཚོགས་ཁྲོད་གྲོས་ཚོགས་ར་བའི་ནང་དགེ་འདུན་པ་མ་ཞུགས་ན་ཡག་པོ་ཡོད་ཚུལ་བརྗོད་མཁན་མང་པོ་ཡོད་སྟབས་དེའི་ཐད་ཁྱེད་རང་ལ་བསམ་ཚུལ་ག་རེ་ཡོད།
ལན། ང་ཚོའི་སྤྱི་ཚོགས་ནང་བསམ་ཚུལ་འདྲ་མི་འདྲ་འཁུར་མཁན་མང་པོ་ཡོད་པ་དང་། ཆོས་དང་ཆབ་སྲིད་འདྲེས་རྒྱུ་མི་འདུག་ཟེར་མཁན་ཡོད་པ་རེད། ཡིན་ནའང་། ང་རང་དེའི་ཐོག་བརྒྱ་ཆ་བརྒྱ་ཐམ་པ་གཙང་མ་གཙང་རྐྱང་ཡིན། དགེ་འདུན་པ་གྲོས་ཚོགས་ར་བའི་ནང་གཅིག་པུ་མིན་པར་བཀའ་ཤག་དང་གཞུང་གི་ལས་བྱེད་ནང་སླེབ་དགོས་ཀྱི་ཡོད་པ་རེད། གང་ཡིན་ཟེར་ན། ང་ཚོ་བོད་པ་འཛམ་གླིང་ནང་འདྲ་འདྲའི་ནང་ནས་མ་འདྲ་བ་ཞིག་ཡོད་ལབ་པ་དེའི་གཙོ་ཆེ་ཤོས་ནི། ནང་པ་སངས་རྒྱས་པའི་ཆོས་ནས་ང་ཚོའི་ཡུལ་སྲོལ་བཟང་པོ་དང་གོམས་གཤིས་བཟང་པོ། མི་རྒྱུད་བཟང་པོ་དེ་ཚོ་སླེབ་ཡོང་བ་རེད། དེ་ཚོ་མི་ཉམས་གོང་འཕེལ་དང་ཉམས་པ་སླར་གསོ་བྱེད་དགོས་པ་རེད་མ་གཏོགས་དཀྲུག་དཀྲུག་གཏོང་རྒྱུ་ཡོད་པ་མ་རེད། ལོགས་སུ་བཟོ་དགོས་པ་རེད་ཟེར་ན་ངས་སྔོན་མ་ནས་འགྲིག་གི་མ་རེད་བསམ་གྱི་ཡོད། ཆབ་སྲིད་ཟེར་བ་འདིའི་ནང་སླེབ་ཡོང་དུས་མི་ཚང་མ་ཁྲམ་པ་དང་མགོ་བདེ་བོ་ཆགས་ཡོང་གི་ཡོད་སྟབས། དགེ་འདུན་པ་རྣམས་ཆབ་སྲིད་ཀྱི་སྡིངས་ཆའི་ཐོག་བསླེབ་རོགས་བྱས་ན། ཁོང་ཚོས་རྐུན་མ་རྐུ་ཡི་མ་རེད་ལ། སྐྱག་རྫུན་བཤད་ཀི་མ་རེད། མི་གསོད་ཀྱི་མ་རེད། དེ་བཞིན་ལྐོག་ཟ་རུལ་སུངས་མི་བྱེད་སྟབས། མི་ཡག་པོ་གཙང་མ་ཞིག་ང་རང་ཚོའི་མགོ་ཁྲིད་མཁན་གྱི་ཆབ་སྲིད་ནང་སླེབ་པ་ཡིན་ན། དེ་ལ་ཐུགས་རྗེ་ཆེ་དང་ཡག་པོ་རེད་ལབ་རྒྱུ་མ་གཏོགས་འགྲིག་གི་མི་འདུག་བསམ་པ་ཞིག་ང་རང་ལ་ཁྱོན་ནས་མེད།
དྲི་བ། མདོ་སྟོད་སྤྱི་འཐུས་ལས་ཐོག་རྣམ་པས་བོད་ཕྱི་ནང་གི་མདོ་སྟོད་རྒྱ་ཆེའི་མི་མང་གི་ཚབ་བྱེད་ཐུབ་ཀྱི་འདུག་གམ། མི་འདུག་ན་ཕྱོགས་གང་དག་ནས་ཚབ་བྱེད་ཐུབ་ཀྱི་མི་འདུག ཁྱེད་རང་ལ་དེའི་ཐད་ཚབ་བྱེད་ཐུབ་པའི་ཤེས་ཡོན་དང་ནུས་འཇོན་ག་རེ་ཡོད།
ལན། ང་ཚོའི་སྤྱི་འཐུས་ཚོས་བོད་ཕྱི་ནང་གཉིས་ཀྱི་ཆོལ་ཁ་གསུམ་གྱི་མི་མང་གི་སྐུ་ཚབ་མཚོན་ཐུབ་དགོས་པ་རེད། ད་ལྟ་བར་དུ་དེ་འདྲ་མཚོན་གྱི་ཡོད་པའི་ངོས་འཛིན་བྱེད་ཀྱི་ཡོད་ལ། མཚོན་ཡང་ཐུབ་ཀྱི་ཡོད་པ་རེད་བསམ་གྱི་འདུག ང་རང་གི་ངོས་ནས་སྤྱི་འཐུས་ཚོས་ལས་ཀ་མ་འཇོན་པ་དང་མ་འགྲིག་པ་གོང་དུ་ཞུས་པ་ལྟར་མཐོང་མ་སོང་། ཡིན་ནའང་། གྲོས་ཚོགས་ནང་དེང་དུས་ཀྱི་ཤེས་ཡོན་ཡོད་པའི་ཐོག བོད་པ་རང་གི་ཆོས་དང་རིག་གཞུང་སྐད་ཡིག་བཅས་ཀྱི་ཤེས་ཡོན་ཡོད་པ་ཞིག་སླེབ་དགོས་པ་དེ་གལ་ཆེན་པོ་མཐོང་གི་འདུག ག་རེ་རེད་ཟེར་ན། འཐབ་རྩོད་བྱེད་མཁན་གྱི་སྤྱི་འཐུས་ཤིག་ཡིན་སྟབས། བོད་ནང་གི་བོད་མི་ཚོར་སྨྲ་བརྗོད་རང་དབང་མེད་པས་བོད་ནང་གི་དཀའ་ངལ་དེ་ཚོ་རྒྱལ་སྤྱིའི་ཐོག་སྐྱེལ་དགོས་ཀྱི་ཡོད་ན། དེང་དུས་ཀྱི་ཤེས་ཡོན་ཡོད་མཁན་ཚོ་སྤྱི་འཐུས་ནང་སླེབ་དགོས་པ་དེ་ཧང་སང་བ་གལ་ཆེན་པོ་རེད། དེང་དུས་ཀྱི་ཤེས་ཡོན་ཡོད་པ་ཙམ་མིན་པར་ང་རང་ཚོའི་ཆོས་དང་རིག་གཞུང་། བོད་ཡིག་བཅས་ཡག་པོ་ཡོད་པའི་ཤེས་ཡོན་གཉིས་ལྡན་ཞིག་སླེབ་དགོས་པ་དེ་ཧ་ཅང་གལ་ཆེན་པོ་མཐོང་གི་འདུག
དྲི་བ། ཉེ་སྔོན་རྒྱ་ནག་དབུས་འཐབ་ཕྱོགས་གཅིག་གྱུར་ཁང་གི་དྲ་བའི་ནང་དབུ་མའི་ལམ་གྱི་ཐོག་ནས་བོད་དོན་དཀའ་རྙོག་སེལ་རྒྱུ་ཁས་ལེན་བྱ་མི་སྲིད་སྐོར་བསྒྲགས་འདུག་པས། ང་ཚོས་མུ་མཐུད་དུ་བདེན་པའི་ཨུ་ཚུགས་བྱས་ཏེ་དབུ་མའི་ལམ་གྱི་ཐོག་ནས་གྲུབ་འབྲས་ཐོན་དགོས་ན་གང་འདྲ་གནང་དགོས་པ་རེད།
ལན། རྒྱ་ནག་གཞུང་གིས་དབུ་མའི་ལམ་ལ་ཁས་ལེན་མེད་ལབ་པ་དེར་ཞེ་དྲགས་ཧང་སང་དགོས་དོན་ཡོད་པ་མ་རེད་བསམ་གྱི་འདུག རྒྱ་གཞུང་གིས་དབུ་མའི་ལམ་ནི་ཕྱེད་རང་བཙན་དང་མངོན་པར་མི་གསལ་བའི་རང་བཙན་རེད། རྒྱ་ནག་མི་མང་སྤྱི་མཐུན་རྒྱལ་ཁབ་ཁ་བྲལ་གཏོང་བའི་ཐབས་ཇུས་རེད་ཅེས་སྔོན་མ་ནས་ལབ་ཀྱི་ཡོད་པ་རེད། ཡིན་ནའང་། ད་རེས་ཞི་ཅིན་ཕིན་གྱི་གཞུང་བསླེབས་ནས་སྐད་ཆ་དེ་འདྲ་བཤད་པ་ཐེངས་དང་པོ་འདྲ་བོ་ཡིན་རྒྱུ་རེད། གང་ལྟར་ང་ཚོས་དབུ་མའི་ལམ་གྱི་ཐོག་ནས་ཡིན་ན་རེད། རང་བཙན་གྱི་ཐོག་ནས་ཡིན་ནའང་རེད། གྲུབ་འབྲས་ཐོན་ཆེད་རང་བཙན་དང་དབུ་མ་ཟེར་ནས་ནང་ཁུལ་དུ་རྩོད་པ་བརྒྱབ་ནས་མི་འདུག་པར་ཚང་མ་མཉམ་དུ་ཕྱིར་ཐོན་ཏེ། རྒྱ་མི་ལ་ཁ་ཕར་ལོག་ནས་འཐབ་རྩོད་བྱེད་དགོས་པ་རེད། དབུ་མའི་ལམ་རྩོད་མཁན་ཡིན་ནའང་ལས་འགུལ་ཞེ་དྲགས་སྤེལ་རྒྱུ་ཡོད་པ་རེད་བསམ་གྱི་འདུག དཔེར་ན། ང་ཚོ་བོད་མི་སྟོང་ཕྲག་གཅིག་ཙམ་གྱིས་ཟས་བཅད་ངོ་རྒོལ་བྱས་ཏེ། རྒྱ་ནག་གཞུང་གིས་༧རྒྱལ་བ་རིན་པོ་ཆེའི་སྐུ་ཚབ་མཉམ་དུ་གཉིས་ཕན་དབུ་མའི་ལམ་གྱི་ཐོག་ནས་བཀའ་མོལ་གནང་དགོས་ཀྱི་ཡོད། བཀའ་མོལ་མ་གནང་ན་ང་ཚོ་ཚང་མ་ཤི་རྒྱུ་ཡིན་ལབ་ན་རྒྱ་གཞུང་གིས་ཏན་ཏན་ཁ་གྲག་དགོས་ཁེལ་གྱི་རེད་བསམ་གྱི་འདུག དཔེར་བཞག་ན་ ༢༠༠༨ ལོར་བོད་ཕྱི་ནང་གཉིས་ནས་སྒེར་ལངས་བྱེད་ཡོང་དུས། རྒྱ་ནག་གཞུང་གིས་ཡང་བསྐྱར་བོད་རྒྱ་ཞི་མོལ་མགོ་བཙུགས་དགོས་ཁེལ་བ་རེད། ཁོ་ཚོར་ཞི་མོལ་མགོ་བཙུགས་པའི་འདོད་པ་མེད་ཀྱང་། རྒྱལ་སྤྱིའི་གནོན་ཤུགས་དང་བོད་ཕྱི་ནང་གཉིས་ཀྱི་བོད་མིའི་སྐད་འབོད་ལ་བརྟེན་ནས་མགོ་བཙུགས་པ་རེད། དེར་བརྟེན་ང་ཚོར་ག་རེ་རག་དགོས་ཀྱི་ཡོད་ནའང་ཚང་མའི་ཁ་ཕར་རྒྱ་ནག་ལ་ལོག་ནས་རྩོད་དགོས་པ་རེད་མ་གཏོགས། དེང་སང་ང་ཚོའི་སྤྱི་ཚོགས་ནང་ཁྱེད་དབུ་མའི་ལམ་རྩོད་མཁན་རེད། ང་རང་བཙན་རྩོད་མཁན་ཡིན་ཟེར་ནས་རྙོག་དྲ་མང་པོ་ཞིག་འགྲོ་ཡི་འདུག་གཱ། དེ་འདྲ་བྱས་ན་རྩ་བ་ཉིད་ནས་ཕན་ཐོགས་མེད་པ་མ་ཟད། མ་འོངས་པར་འཐབ་རྩོད་རྩ་བརླག་ཏུ་འགྲོ་བའི་ལས་ཀ་ཞིག་ཆགས་བསྡད་ཡོད་པ་རེད།
གསར་འགོད་པ། པདྨ་མཚོ།
བཀྲིས་བདེ་ལེགས
༢༠༠༨་ལོར་བོད་ཕྱི་ནང་གཉིས་ནས་་་་་་ཡང་སྐྱར་བོད་རྒྱ་ཞི་མོལ་མགོ་བཙུགས་པ་རེད་་་་་ཟེར