ཕྱི་ཕྱོགས་ཀྱི་ཁ་བྲལ་བ་དང་འཇིགས་སྐུལ་དྲག་སྤྱོད་པར་འབྲེལ་བ་ཡོད་པའི་ཉེས་འཛུགས་འོག་མི་ ༤༥ ལ་ཁྲིམས་ཐག་བཅད་ཡོད་འདུག
མདང་དགོང་རྒྱ་ནག་གཞུང་འབྲེལ་ཞིན་ཧྭ་གསར་ལམ་དུ་གནས་ཚུལ་སྤེལ་བ་ལྟར་ན། ཤིན་ཅང་ཡུ་གུར་མི་རིགས་རང་སྐྱོང་ལྗོངས་ནང་ཡོད་པའི་རྒྱ་གཞུང་གི་ཁྲིམས་ཁང་ཁག་ཅིག་གིས། རྒྱལ་ཁབ་ཕྱི་ནང་གི་དྲག་སྤྱོད་རིང་ལུགས་པ་དང་ཁྲིམས་འགལ་གྱི་སྒྲིག་འཛུགས་ཁག་ལ་འབྲེལ་བ་དམ་ཟབ་ཡོད་པའི་ཉེས་འཛུགས་འོག ཡུ་གུར་བ་དང་རྒྱ་རིགས་མི་གྲངས་ ༤༥ ལ་ཁྲིམས་ཐག་བཅད་ཡོད་པ་དང་། ཉེས་ཆད་ཕོག་མཁན་ཚོའི་ནང་ནས་མི་གཉིས་ལ་ཚེ་བཙོན་དང་། མི་ ༤༣ ལ་ལོ་བཞི་ནས་ལོ་ ༡༥ བར་གྱི་ཁྲིམས་ཐག་བཅད་ཡོད་འདུག
འདི་ལོའི་ཕྱི་ཟླ་ ༧ ཚེས་ ༩ ཉིན་ཐའེ་ལན་ཌི་གཞུང་གིས་ཡུ་གུར་སྐྱབས་བཅོལ་བ་ ༡༠༩ དྲག་ཆས་ཉེན་རྟོག་པའི་ལྟ་སྲུང་ནན་མོའི་འོག་རྐང་ལག་ལ་ལྕགས་སྒྲོག་བརྒྱབ་ཅིང་། མགོ་ལ་རས་ཁུག་ནག་པོ་བསྐོན་ནས་ཕྱིར་རྒྱ་ནག་ལ་རྩིས་སྤྲོད་བྱས་ཡོད་པ་གསར་འགྱུར་བརྒྱུད་ལམ་དུ་ཐོན་ཡོད་པ་མ་ཟད། རྒྱ་ནག་དབུས་བརྙན་འཕྲིན་ཁང་གིས་ཁོང་ཚོ་གནམ་གྲུ་ནས་མར་འབབ་སྐབས་ཀྱི་ཡུལ་དངོས་ཐད་གཏོང་བྱས་ཏེ། ཁོ་ཚོ་བྲོས་བྱོལ་དུ་འགྲོ་དོན་ནི་ཕྱི་ཕྱོགས་ཀྱི་ལོག་ཆོས་སྤེལ་མཁན་ཚོས་བརྒྱུད་སྐུལ་བྱས་ནས་འཇིགས་སྐུལ་དྲག་སྤྱོད་པའི་ནང་མཉམ་ཞུགས་བྱེད་པའི་ལྐོག་ཇུས་འཐེན་ཡོད་སྐོར་སོགས་བསྒྲགས་ཡོད་པ་རེད།
ཡིན་ནའང་། ཡུ་གུར་བ་དེ་ཚོའི་ཁྲིམས་རྩོད་པ་དང་ལྷག་པར་དུ་རྒྱལ་ཁབ་ཕྱི་ནང་གི་འགྲོ་བ་མིའི་ཐོབ་ཐང་སྲུང་སྐྱོབ་བྱེད་མཁན་གྱི་ཚོགས་སྡེ་ཁག་ནས། ཤིན་ཅང་ཡུ་གུར་མི་རིགས་རང་སྐྱོང་ལྗོངས་ཀྱི་ཉེས་མེད་མི་མང་གིས་རྒྱ་ནག་གི་དྲག་གནོན་མ་བཟོད་པར་ཕྱི་ཕྱོགས་སུ་བྲོས་བྱོལ་ལ་འགྲོ་གི་ཡོད་པ་འགྲེལ་བརྗོད་བྱས་ཡོད་པ་རེད།
