འཛམ་གླིང་དམག་ཆེན་གཉིས་པ་མཇུག་སྒྲིལ་ཏེ་ལོ་འཁོར་ ༧༠ ལོན་པའི་དུས་དྲན་དང་བསྟུན། རྒྱ་གཞུང་གིས་བཙོན་པ་རིགས་བཞི་ཀློད་གྲོལ་གཏང་འཆར་ཡོད་སྐོར་བསྒྲགས་འདུག
ཁ་སང་རྒྱ་ནག་གཞུང་འབྲེལ་ཤིན་ཧྭ་གསར་ཁང་གིས། ཕྱི་ཟླ་ ༩ ཚེས་ ༣ ཉིན་ཏེ་འཛམ་གླིང་དམག་ཆེན་གཉིས་པ་མཇུག་སྒྲིལ་ནས་ལོ་འཁོར་ ༧༠ ལོན་པའི་དུས་དྲན་དང་བསྟུན། འདི་ལོའི་ཕྱི་ཟླ་ ༡ ཚེས་ ༡ ཉིན་གྱི་ཡར་སྔོན་དུ་བཙོན་འཇུག་བྱས་ཤིང་། མ་འོངས་པར་སྤྱི་ཚོགས་བདེ་འཇགས་ལ་ཉེན་ཁ་མེད་པའི་བཙོན་པ་རིགས་བཞི་ཀློད་གྲོལ་གཏང་འཆར་ཡོད་པ་དང་། ཐེངས་འདིའི་ཉེས་ཅན་གུ་ཡང་གི་ལས་གཞིའི་ཁྲོད་ནས་བཙོན་པ་སྟོང་ཕྲག་འགའ་ལ་ཀློད་གྲོལ་འཐོབ་རྒྱུ་ཡིན་ལུགས་བརྗོད་འདུག
བཙོན་གྲོལ་གཏང་འཆར་གྱི་བཙོན་པ་རིགས་བཞིའི་གྲས་ཀྱི་དང་པོ་ནི་འཇར་འགོག་དམག་འཁྲུག་དང་བཅིངས་འགྲོལ་དམག་ནང་ཞུགས་མྱོང་བའི་བཙོན་པ་དང་། གཉིས་པ་རྒྱ་ནག་དམར་ཤོག་གཞུང་བཙུགས་རྗེས། རྒྱལ་ཁབ་ཀྱི་བདག་དབང་དང་བདེ་འཇགས་ཆེད། རྒྱལ་སྲུང་དམག་ནང་ཞུགས་མྱོང་ཞིང་ནག་ཉེས་ཚབས་ཆེན་བསགས་མེད་པའི་བཙོན་པ། གསུམ་པ་ལོ་བདུན་བཅུ་དོན་ལྔ་ཟིན་པ་དང་དབང་བོར་སྐྱོན་ཚབས་ཆེན་ཡོད་པའི་རང་མགོ་མི་ཐོན་པའི་བཙོན་པ། བཞི་པ་ནག་ཉེས་བཟོ་སྐབས་ལོ་བཅོ་བརྒྱད་ལ་སོན་མེད་པ་དང་། ལོ་གསུམ་མན་ཆད་ཀྱི་བཙོན་འཇུག་ཁྲིམས་ཐག་བཅད་ཡོད་ཀྱང་། ད་ལྟ་བཙོན་འཇུག་དུས་ཡུན་རྫོགས་རྒྱུར་ལོ་གཅིག་ཀྱང་ལྷག་མེད་པའི་ཉེས་ཅན་ཚབས་ཆེན་མ་ཡིན་པའི་བཙོན་པ་བཅས་ཡིན་འདུག
གཞན་ཡང་། ཁ་སང་ཝི་ཏི་ནམ་སྲིད་གཞུང་གིས་རྒྱལ་སྤྱིའི་ཉེས་ཡང་ཚོགས་པར་ཧྥ་རན་སིའི་དབང་སྒྱུར་འོག་ནས་ཝི་ཏི་ནམ་ལ་རང་བཙན་ཐོབ་སྟེ་ལོ་ངོ་ ༧༠ འཁོར་བའི་རྒྱལ་སྟོན་གྱི་ཉིན་མོ་དང་བསྟུན། ཕྱི་ཟླ་ ༩ ཚེས་ ༣༡ ཉིན་ནས་བཟུང་ཕྱི་གླིང་གི་བཙོན་པ་ ༣༤ ཚུད་པའི་རྒྱལ་ནང་གི་མི་གསོད་དང་ནག་ཚོང་སོགས་ཀྱི་ཉེས་ཆད་འཁུར་བཞིན་པའི་བཙོན་པ་ཁྲི་གཅིག་དང་སྟོང་ཕྲག་ ༨ ཀློད་གྲོལ་གཏང་རྒྱུ་ཁག་ཐེག་བྱས་ཡོད་འདུག
ཝི་ཏི་ནམ་གཞུང་གི་བཙོན་གྲོལ་ཁག་ཐེག་ནང་ཆབ་སྲིད་བཙོན་པ་ཚོ་ཀློད་གྲོལ་གཏང་རྒྱུ་ཡིན་མིན་ཐད་གསལ་ཁ་ཅི་ཡང་བཟོས་མེད་སྟབས། རྒྱལ་སྤྱིའི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་སྡེ་ཁག་དང་། ནུབ་ཕྱོགས་ཀྱི་རྒྱལ་ཁབ་ཁག་ཅིག་གིས་ཝི་ཏི་ནམ་གཞུང་གིས་རང་གི་ཁ་གཏད་ཚོགས་པའི་མི་སྣ་མང་པོ་བཙོན་འཇུག་བྱས་ཡོད་པ་མ་ཟད། རྒྱལ་ནང་གི་ཆབ་སྲིད་ལས་འགུལ་བ་བརྒྱ་ཕྲག་མང་བོ་འཛིན་བཟུང་བྱས་ཏེ་བཙོན་ཁང་དུ་བཅུག་ཡོད་ཀྱང་། དེ་ཚོ་ཀློད་གྲོལ་གཏོང་རྒྱུ་ཡིན་མིན་ཐད་ཅི་ཡང་བཤད་མེད་པའི་སྐྱོན་བརྗོད་བྱས་འདུག
