དམག་མི་ཁྲི་ ༣༠ ཉུང་དུ་གཏོང་འཆར།

ཁ་སང་འཇར་འགོག་དུས་སྟོན་ཐོག་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་རྒྱ་ནག་གི་དམག་ཁྲི་ ༣༠ ཉུང་དུ་གཏོང་རྒྱུ་ཡིན་ལུགས་བསྒྲགས་འདུག

ཁ་སང་རྒྱ་ནག་གཞུང་གིས་འཛམ་གླིང་དམག་ཆེན་གཉིས་པ་མཇུག་སྒྲིལ་པ་དང་འཇར་འགོག་དམག་འཁྲུག་ལ་རྒྱལ་ཁ་ཐོབ་ནས་ལོ་ངོ་ ༧༠ འཁོར་བའི་དུས་སྟོན་སྲུང་གཙི་བྱས་ཡོད་པ་དང་། མཛད་སྒོའི་ཐོག་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་བྷན་ཁེ་མོན་ (Ban Ki-moon) ལགས་དང་ཨུ་རུ་སུའི་སྲིད་འཛིན་པུ་ཌིན། ལྷོ་ཀོ་རི་ཡའི་སྲིད་འཛིན་ལྕམ་པག་གྷེན་ཧེ་ (Park Geun-hye) སོགས་འཛམ་གླིང་རྒྱལ་ཁབ་ཁག་གི་དཔོན་རིགས་ ༣༠ ཙམ་མཉམ་ཞུགས་བྱས་ཡོད་པ་དང་། པེ་ཅིན་གནམ་བདེ་སྒོ་མོ་ཆེའི་ཐང་ཆེན་དུ་མཁའ་དམག་དང་མཚོ་དམག རྐང་དམག་སོགས་ཀྱི་དམག་དཔུང་རུ་སྒྲིག་གིས་རྔམ་སྟོན་བྱས་ཡོད་པ་མ་ཟད། མེ་ཤུགས་འཕུར་མདེལ་སོགས་གོ་མཚོན་གསར་པ་འགའ་ཞིག་གི་ཟིལ་ཤུགས་ངོམ་ཡོད་འདུག

མཛད་སྒོའི་ཐོག་སྲིད་འཛིན་ཞི་ཅིན་ཕིན་གྱིས་གཏམ་བཤད་བྱེད་སྐབས། རྒྱ་ནག་མི་མང་གིས་འཇར་འགོག་དམག་འཁྲུག་དང་འཛམ་གླིང་གི་ཧྥ་སི་ཛེམ་ (Fascism) ལ་རྒོལ་རྡུང་གཏོང་བའི་དམག་འཁྲུག་ནི་བདེན་དོན་དང་གདུག་རྩུབ་སོགས་ལོག་སྤྱོད་ཀྱི་ཡ་ང་བའི་འཐབ་འཁྲུག་ཁྲོད། རྒྱ་ནག་མི་མང་གི་འཇར་འགོག་དམག་འཁྲུག་ནི་དུས་ཚོད་སྔ་ཤོས་ཡིན་ལ། འཐབ་འཁྲུག་གི་དུས་ཡུན་རིང་ཤོས་ཡིན་ཡང་། ཀྲུང་ཧྭའི་བུ་རྒྱུད་ཡོངས་ཀྱིས་བཙན་འཛུལ་པའི་མདུན་ནས་དཔའ་ངར་ཞུམ་པ་མེད་པའི་འཐབ་འཛིང་བྱས་ཏེ་ཉི་ཧོང་བཙན་རྒྱལ་རིང་ལུགས་རྩ་བ་ནས་ཕམ་པར་བཏང་པ་དེས། ཀྲུང་ཧྭ་མི་མང་གི་ལོ་ངོ་ ༥༠༠༠ ལྷག་གི་དཔལ་ཡོན་ལ་སྲུང་འཛིན་བྱས་པ་དང་། མིའི་རིགས་ཀྱི་ཞི་བདེའི་ལས་དོན་ལ་སྲུང་སྐྱོབ་བྱས་པ་མ་ཟད། ཀྲུང་ཧྭ་མི་རིགས་ཀྱིས་དཔའ་ཉམས་ལྡན་པའི་ཟིན་ཐོ་བསྐྲུན་པ་རེད། རྒྱ་ནག་མི་མང་གི་འཇར་འགོག་དམག་འཁྲུག་ལ་རྒྱལ་ཁ་ཐོབ་པ་ནི། ཉེ་རབས་ལོ་རྒྱུས་ཁྲོད་ཕྱིའི་བཙན་འཛུལ་ཕམ་པར་བྱས་པའི་རྒྱལ་ཁ་དང་པོ་དེ་ཡིན་ལ། རླབས་ཆེན་གྱི་རྒྱལ་ཁ་འདི་ཡིས་ཉི་ཧོང་བཙན་རྒྱལ་རིང་ལུགས་ཀྱིས་རྒྱ་ནག་མི་སེར་སྤེལ་ཡུལ་བྱས་ཏེ་ངན་ཇུས་རྩ་བ་ནས་གཏོར་བ་དང་། ཉེ་རབས་ལོ་རྒྱུས་ཁྲོད་རྒྱ་ནག་གིས་ཕྱིའི་བཙན་འཛུལ་ཁྲོད་ཕམ་ཁ་ཐེངས་མང་ཉོས་པའི་མི་རིགས་ཀྱི་ངོ་ཚ་དེ་གཙང་དག་བྱས་པ་རེད་ཅེས་སོགས་བརྗོད་པ་དང་། ཁོས་མུ་མཐུད་དུ། འཛམ་གླིང་འཁྲུག་ཆེན་གཉིས་པའི་སྐབས་སུ་དམག་མི་དུང་ཕྱུར་ ༡ ཙམ་ཤི་རྨས་བྱུང་ཡོད་པ་དང་དེའི་ནང་རྒྱ་ནག་གི་མི་འབུམ་ ༣༥༠ ཙམ་ཤི་རྨས་བྱུང་ཡོད། སུའུ་ལེན་གྱི་མི་འབུམ་ ༢༧༠ ཙམ་ཤི་ཡོད། ཅེས་སོགས་བརྗོད་འདུག

ཡང་ཁོ་བོས་ཞི་བདེ་སྲུང་སྐྱོབ་དང་དམག་མི་ཇེ་ཉུང་དུ་གཏོང་རྒྱུའི་ཐད། ང་ཚོས་མིའི་རིགས་ཀྱི་སྐྱིད་སྡུག་མཉམ་གནས་ཀྱི་འདུ་ཤེས་བརྟན་པོ་བྱེད་དགོས། ཕྱོགས་ཞེན་དང་མཐོང་ཆུང་། ཞེ་འཁོན་དང་དམག་འཁྲུག་གིས་གོད་ཆག་དང་སྡུག་བསྔལ་སློང་བ་ལས་ཅི་ཡང་མེད་སྟབས། ང་ཚོས་ཕན་ཚུན་བརྩི་བཀུར་དང་འདྲ་མཉམ། ཞི་བདེ་འཕེལ་རྒྱས་ཡོང་རྒྱུ་ནི་ད་གཟོད་མིའི་རིགས་ཀྱི་འགྲོ་ལུགས་རེད། འཛམ་གླིང་གི་རྒྱལ་ཁབ་སོ་སོས་མཉམ་འབྲེལ་རྒྱལ་ཚོགས་ཀྱི་བཅའ་ཁྲིམས་དང་རྩ་དོན་གཞིར་བཟུང་བའི་རྒྱལ་སྤྱིའི་སྒྲིག་སྲོལ་དང་རྒྱལ་སྤྱིའི་མ་ལག་ལ་སྲུང་གཙི་བྱེད་དགོས། རང་འགུལ་གྱིས་མཉམ་ལས་མཉམ་དར་གྱི་རྒྱལ་སྤྱིའི་འབྲེལ་བ་གསར་བ་འཛུགས་བསྐྲུན་བྱེད་པར་ཧུར་བརྩོན་བྱེད་དགོས་པ་མ་ཟད། མཉམ་དུ་འཛམ་གླིང་ཞི་བདེ་དང་འཕེལ་རྒྱས་གཏོང་བའི་བྱ་གཞག་ལ་སྐུལ་འདེད་བྱེད་དགོས་ཡོད། ཅེས་དང་། འཛམ་གླིང་ཞི་བདེ་སྲུང་འཛིན་བྱེད་རྒྱུའི་རླབས་ཆེའི་འགན་འཁྲི་ལག་བསྟར་བྱེད་དགོས་པས་ངས་ཡོངས་བསྒྲགས་བྱེད་རྒྱུར། རྒྱ་ནག་གི་དམག་མི་ཁྲི ༣༠ ཉུང་དུ་གཏོང་རྒྱུ་ཡིན། ཞེས་སོགས་བརྗོད་འདུག

རོའུ་ཊར་གསར་ལས་ཁང་གིས་སྐབས་དེའི་གནས་ཚུལ་སྤེལ་བའི་ནང་། ད་རེས་ནུབ་ཕྱོགས་རྒྱལ་ཁབ་ཀྱི་མགོ་ཁྲིད་མང་ཆེ་བ་དུས་སྟོན་བྱེད་སྒོ་དེའི་ཐོག་ཞུགས་མེད་པའི་གནས་སྟངས་འོག ཞི་ཅིན་ཕིན་གྱིས་དམག་མི་འབུམ་གསུམ་ཉུང་འཕྲི་བྱེད་རྒྱུ་ཁྱབ་བསྒྲགས་བྱས་པ་དེའི་ཐོག་ནས། ད་ཡོད་རྒྱ་ནག་དམག་མིའི་གྲངས་འབོར་ས་ཡ་གཉིས་དང་འབུམ་གསུམ་གྱི་བརྒྱ་ཆ་ ༡༣ ཉུང་དུ་བཏང་བ་ཞིག་ཆགས་ཀྱི་ཡོད་པ་རེད། ཡིན་ན་ཡང་། ཉུང་འཕྲི་ག་དུས་བྱེད་མིན་གསལ་ཁ་བཏོན་མེད་ལུགས་བརྗོད་འདུག

ཐའེ་ཝན་མིན་པའོ་ཚགས་པར་གྱིས་རྒྱ་ནག་གི་དམག་དཔུང་རུ་སྒྲིག་བྱེད་པ་ནི་ཕྱི་རྫིག་ནང་སྟོང་གི་འཁྲབ་སྟོན་ཙམ་ཡིན་པ་དང་། དམག་ཆེན་གཉིས་པའི་སྐབས་ཉི་ཧོང་གི་དམག་དཔུང་གོ་མིན་ཏང་དང་། གུང་ཁྲན་ཏང་གིས་ཕམ་ཉེས་བཏང་བ་ཞིག་མིན་པར་གཙོ་བོ་ཨ་རིས་ཕམ་ཉེས་བཏང་བ་དང་། དེའི་རྗེས་སུའུ་ལེན་དམག་གི་རོགས་སྐྱོར་འོག་ཉི་ཧོང་ཕམ་ཉེས་བཏང་བ་ཞིག་ཡིན་སྐོར་བཀོད་འདུག

ཉི་ཧོང་གཞུང་འབྲེལ་ཆེས་མཐོའི་མགྲིན་ཚབ་པ་ཡོ་ཤེ་ཧེ་དྷི་སོ་ཀཱ་ (Yoshihide Suga ) ཡིས་བརྒྱུད་ལམ་ཁག་ལ། འཛམ་གླིང་འཁྲུག་ཆེན་གཉིས་པའི་སྐབས་རྒྱ་ནག་གིས་ཀྲོག་ཁྱོག་ (Tokyo) ཕམ་ཉེས་བཏང་བའི་ལོ་འཁོར་ ༧༠ ཡི་དུས་སྟོན་ཐོག སྲིད་འཛིན་ཞི་ཅིན་ཕིན་གྱིས་གཏམ་བཤད་ནང་རྒྱལ་ཁབ་གཉིས་ཀྱི་མཛའ་འབྲེལ་གོང་འཕེལ་གཏོང་རྒྱུའི་ཐད་ཟུར་ཙམ་ཡང་བརྗོད་མེད་པ་དེ་ཧ་ཅང་བློ་ཕམ་དགོས་པ་ཞིག་རེད། ཅེས་དང་། འཛམ་གླིང་མཉམ་འབྲེལ་རྒྱལ་ཚོགས་ཀྱི་དྲུང་ཆེ་བྷན་ཁེ་མོན་རྒྱ་ནག་གི་དམག་དཔུང་རྔམ་སྟོན་གྱི་དུས་སྟོན་ཐོག་ཞུགས་པ་དེར་སྐྱོན་བརྗོད་དང་། མཉམ་འབྲེལ་རྒྱལ་ཚོགས་དུས་ནམ་ཡང་ཕྱོགས་སུ་མ་ལྷུང་བ་བྱ་དགོས་སྐོར་སོགས་བརྗོད་ཡོད་འདུག

དེ་རིང་ཐའེ་ཝན་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཐའེ་ཝན་གོ་མིན་ཏང་ཚོགས་པའི་ཚོགས་གཙོ་ཟུར་བ་ལིན་ཁྲན་(Lien Chan)རྒྱ་གཞུང་གི་དུས་སྟོན་ཐོག་ཞུགས་ཏེ། མདང་དགོང་ཆུ་ཚོད་ ༡༡ སྟེང་ཐའེ་ཝན་གནམ་ཐང་དུ་ཕྱིར་འབྱོར་སྐབས། ཐའེ་ཝན་གྱི་གཞོན་སྐྱེས་ཁག་ཅིག་གིས་ཁོ་ལ་ལྷམ་གྱིས་གཞུས་པ་སོགས་ངོ་རྒོལ་ཤུགས་ཆེན་བྱས་ཡོད་འདུག

གསར་འགོད་པ། འཇིགས་མེད་རྒྱ་མཚོ།