བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༧༣ སྟེང་གི་རྩོམ་སྒྲིག་པའི་གཏམ།
ཐིན་ཅིན་གྱི་ཡ་ང་བའི་འབར་གས་དོན་རྐྱེན་དེ་ཧ་ཅང་ཚབས་ཆེན་པོ་ཞིག་ནས་སྤྱིར་བཏང་ཙམ་གྱི་ཐོག་ནས་རྒྱ་ནག་གཞུང་འབྲེལ་གསར་ལམ་ཁག་གིས་བསྒྲགས་སོང་བ་མ་ཟད། ཞི་ཅིན་ཕིན་གྱིས་དམར་པོ་ཁྲག་གི་བསླབ་བྱ་དང་ལེན་བྱེད་དགོས་པའི་སྐད་ཆ་ཞིག་ཐེངས་འགར་བཤད་པ་གོ་རྒྱུ་འདུག་ལ། དོན་རྐྱེན་བྱུང་ནས་ཉིན་ལྔ་འགོར་རྗེས་སྲིད་བློན་ལི་ཁེ་ཆང་གིས་ཡུལ་དངོས་སུ་རྒྱང་ལྟ་ཞིག་བྱས་ཏེ། མི་མང་ལ་ཡིད་ཚིམ་པའི་གསལ་བཤད་ཅིག་བྱ་རྒྱུ་ཁས་བླངས་སོང་། དེ་བཞིན། ཐིན་ཅིན་གྲོང་ཁྱེར་གྱི་སྤྱི་ཁྱབ་ཧང་ཤིན་ཀོ་ཡང་ཉིན་ ༧ འགོར་རྗེས་ཡུལ་དངོས་སུ་ཡོང་སྟེ། རང་ཉིད་ལ་གཡོལ་དུ་མེད་པའི་འོས་འགན་ཡོད་སྐོར་གྱི་གཏམ་བཤད་བྱས་པ་སོགས་ཕྱི་ཚུལ་ནས་བལྟས་ན་འདྲ་ཆགས་པའི་སྐད་ཆ་འགས་མི་མང་གི་ཁ་མིག་འགེབ་ཐབས་བྱས་སོང་།
སྔ་རྗེས་ཐེངས་གཉིས་སུ་བྱུང་བའི་འབར་གས་དེས་རྒྱ་ཁྱོན་རྨིད་གྲུ་བཞི་མ་ལྔ་སྟོང་ཙམ་གྱི་སར་ཡོད་པའི་མི་རྒྱུ་གཉིས་ཀར་ལྟ་མི་བཟོད་པའི་གནོད་སྐྱོན་བཟོས་ཏེ། མི་གྲངས་བརྒྱ་ཕྲག་འགའི་ཚེ་སྲོག་འཕྲོག་པ་དང་། དཔལ་འབྱོར་ཐད་རྒྱ་སྒོར་དུང་ཕྱུར་ ༤༠༠ ནས་ ༥༠༠ ཙམ་གྱི་གྱོང་གུད་བཟོས་ཡོད་པ་མ་ཟད། འབར་གས་བྱུང་ནས་ཉིན་ ༡༡ འགོར་རྗེས་ཀྱང་ད་དུང་ཕྱོགས་གང་ས་ན་མེ་ལྕེ་དམར་པོ་ལྷམ་ལྷམ་དུ་འབར་བཞིན་ཡོད་པའི་གནས་ཚུལ་ཐོན་སོང་། ཟླ་འདིའི་ཕྱི་ཚེས་ ༢༢ ཉིན་ཡང་བསྐྱར་ཐིན་ཅིན་གྱི་རྫས་འགྱུར་བཟོ་གྲྭ་ཞིག་ལ་འབར་གས་བྱུང་ནས་མི་གྲངས་ ༡༠ ལྷག་ལ་ཤི་རྨས་བྱུང་བ་མ་ཟད། ཞིབ་བཤེར་བྱས་པ་བརྒྱུད་རྒྱ་ནག་རྒྱལ་ཡོངས་ཀྱི་རྫས་འགྱུར་བཟོ་གྲྭ་ཁག་ལས་བརྒྱ་ཆ་ ༧༠ ལ་འབར་གས་ཀྱི་ཉེན་ཁ་ཡོད་ལུགས་བསྒྲགས་པ་དེ་ཇི་འདྲའི་ཡ་ང་བ་ཞིག་རེད།
ཡུལ་དངོས་དཔྱད་ཞིབ་པས་རི་ཧེ་ཡི་ཉེན་ཆས་གསོག་ཉར་ཁང་དུ་འབར་རྫས་ཏུན་ ༧༠༠ ཙམ་གསོག་ཉར་བྱས་ཡོད་པའི་གནས་ཚུལ་བརྒྱུད་ལམ་ཁག་ཏུ་བསྒྲགས་མ་ཐག ཉེན་ཆས་མཛོད་ཁང་དེ་སྤྱིར་བཏང་གི་མཛོད་ཁང་ཞིག་མིན་པ་དབང་ཤུགས་ཀྱི་རྒྱབ་རྟེན་ཧ་ཅང་མཐུག་པོ་ཡོད་པའི་དོགས་འདྲོག་བྱུང་བ་མ་ཟད། ཚོང་གཉེར་ཁང་དེ་ཐིན་ཅིན་གྲོང་ཁྱེར་ནང་བཙུགས་ནས་ལོ་ངོ་ ༥ ཙམ་འགྲོ་བཞིན་ཡོད་ཀྱང་། དེའི་སྦྱིན་བདག་སུ་ཡིན་ད་དུང་ཡང་རྩད་ཆོད་ཀྱི་མེད་པ་དེ་ཧང་སང་དགོས་པའི་དྲི་གཞི་ཆེན་པོ་ཞིག་མ་ཡིན་ནམ།
འབར་གས་དོན་རྐྱེན་བྱུང་རྗེས། རྒྱ་ནག་ཆེས་མཐོའི་ཞིབ་བཤེར་ཁང་གིས་དངོས་སུ་རི་ཧེ་ཚོང་གཉེར་ཁང་གི་སྤྱི་གཉེར་བ་གཞོན་པ་སོགས་འབྲེལ་ཡོད་མི་སྣ་ ༡༠ གྲངས་ཤིག་བཀག་ཉར་བྱས་པ་མ་ཟད། ལོ་མང་ནས་ཐིན་ཅིན་རྒྱལ་ཁབ་བདེ་འཇགས་རྟོག་ཞིབ་ལྷན་ཁང་གི་མགོ་ཁྲིད་ཀྱི་འགན་འཁུར་བའི་ཡཱང་ཏུང་ཉིང་ལ་ཞིབ་བཤེར་བྱེད་མགོ་བརྩམས་ཏེ། ཁོ་བོ་དེ་སྔོན་ཐིན་ཅིན་གྲོང་ཁྱེར་གྱི་སྤྱི་ཁྱབ་གཞོན་པ་ཡིན་སྐབས། ལྐོག་ཟ་རུལ་སུངས་ཀྱི་དོགས་གཞིའི་འོག་ཞིབ་བཤེར་བྱེད་བཞིན་པའི་ཏི་ཤང་ལུང་ཐིན་ཅིན་གྲོང་ཁྱེར་གྱི་སྤྱི་ཁྱབ་ཡིན་པའང་གཞུང་འབྲེལ་གསར་ལམ་ནས་བསྒྲགས་ཡོད་སྟབས། ཐེངས་འདིའི་འབར་གས་དོན་རྐྱེན་གྱིས་གཅིག་བྱས་ན། ད་ལྟའི་རྒྱ་ནག་དབུས་ཆབ་སྲིད་ལྷན་ཁང་གི་རྒྱུན་ལས་ཀྲང་གོ་ལི་སོཊ་ཡུན་རིང་ནས་ཐིན་ཅིན་གྲོང་ཁྱེར་ནང་དབང་ཤུགས་བཀོལ་བསྡད་པའི་ཅང་ཙེ་མིན་གྱི་ཕྱོགས་གཏོགས་དཔོན་རིགས་ཚོར་ས་ཡོམ་ཆེན་པོ་ཞིག་སློང་སྲིད་པ་རེད།
དོན་རྐྱེན་འདི་མ་བྱུང་གོང་སྟེ་ཕྱི་ཟླ་ ༧ ནང་ཕྱི་ཕྱོགས་ཀྱི་བརྒྱུད་ལམ་རེ་འགའ་ཞིག་གིས། ཕྱི་ཟླ་ ༨ པའི་ནང་འཚོགས་འཆར་ཡོད་པའི་པི་ཏེ་ཧི་གསང་བའི་ཚོགས་འདུ་ཐིན་ཅིན་པིན་ཧེ་རུ་འཚོགས་རྒྱུ་ཡིན་སྐོར་བརྗོད་ཡོད་ལ། ཏག་ཏག་འབར་གས་ཆེན་མོ་དེ་ཡང་ཕྱི་ཟླ་ ༨ པའི་ཚེས་ ༡༢ ཉིན་གྱི་དགོང་མོར་ཐིན་ཅིན་པིན་ཧེ་རུ་བྱུང་སོང་། འོ་ན་དོན་རྐྱེན་དེའི་ཐོག་མའི་འབྱུང་རྐྱེན་ཅི་ཞིག་ཡིན་ནམ། རྒྱ་ནག་གཞུང་ཕྱོགས་ནས་བསྒྲགས་པ་ལྟར་དངོས་གནས་རླངས་འཁོར་ཞིག་ལ་གློ་བུར་དུ་མེ་འབར་ནས་བྱུང་བ་ཡིན་ནམ། གལ་སྲིད་ཡིན་པའི་དབང་དུ་བཏང་ན། དེ་གློ་བུར་དུ་བྱུང་བའི་རྐྱེན་ངན་ཞིག་ཡིན་ནམ་ཡང་ན་ལྐོག་ནས་བརྐྱངས་ཡོང་བའི་འདྲེ་ལག་གསུམ་པ་ཞིག་གི་གཡབ་མོ་ཡིན་ནམ། ཞི་ཅིན་ཕིན་གྱིས་ཅང་ཙེ་མིན་དང་ཙིན་ཆིན་ཧུང་ཚོགས་པར་ཕྱོགས་ཡོངས་ནས་མེ་བཙའ་ཤ་ལ་ཟིན་པ་ལྟར་ཚར་གཅོད་བྱེད་བཞིན་པའི་སྒང་འདིར། འབར་གས་དོན་རྐྱེན་དེ་ཅང་ཙེ་མིན་ཚོགས་པས་ཞི་ཅིན་ཕིན་ལ་འཕངས་བའི་ལྐོག་མདའ་ཞིག་ཡིན་སྲིད་དམ།
