ཚེ་དབང་ནོར་བུ།
ང་རང་གི་གཞི་རྩའི་ལངས་ཕྱོགས་དེ་སྤྱི་ཚོགས་ནང་བྱེད་སྒོ་ག་རེད་བྱེད་ཀྱང་ཕྱི་གསལ་ནང་གསལ་བྱ་རྒྱུ་ཡིན་པ་ལྟར་འདི་ལོ་ ༢༠༡༥ ཟླ་༡༠ ཚེས་༡༨་ཉིན་སྔོན་འགྲོའི་འོས་བསྡུའི་སྐབས་ང་རང་གི་སྲིད་སྐྱོང་ས་དམིགས་ཀྱི་འོས་ཤོག་དེ་ཨ་ཚོགས་ཀླུ་མཁར་བྱམས་ལ་འཕེན་གྱི་ཡིན་ཞེས་དང་པོ་ནས་གསལ་པོ་བཤད་ཀྱི་ཡིན།
ངས་ཀླུ་མཁར་བྱམས་ནི་ལོ་ཤས་གོང་ནས་ངོ་ཤེས་ཀྱི་ཡོད་པས། ང་རང་རྒྱ་གར་ལ་ནམ་འགྲོ་སྐབས་ཁོང་ཐུག་ཡག་དང་ཁོང་མཉམ་དུ་སྐད་ཆ་ཤོད་རྒྱུའི་ཐབས་ཤེས་བྱེད་ཀྱི་ཡོད། ཁོང་ཐུག་འཕྲད་དང་ཁོང་མཉམ་དུ་སྐད་ཆ་བཤད་རྒྱུ་ཇི་ཙམ་བྱུང་བར་དེ་ཙམ་ཁོང་གི་བློ་གྲོས་ཀྱི་ནུས་མཐུ་གཏིང་ཟབ་པ་དང་། ཆབ་སྲིད་དང་སྤྱི་ཚོགས་ཀྱི་གོ་རྟོགས། གལ་ཆེན་ཞིག་ལ་ཁོང་དྲང་ཚུགས་ཅན་གྱི་མི་ཞིག་ཡིན་པར་ཤེས་ནས་ཁོང་ང་རང་གི་སེམས་ལ་འཇུག་ནས་འཇུག་ཏུ་ཕྱིན་སོང་།
དེའི་སྟེང་རང་བཙན་སོགས་རྩ་འཛིན་དང་བོད་སྐད་ནང་དབུས་བོད་མིའི་སྒྲིག་འཛུགས་བྱ་བ་དེ་བཙན་བྱོལ་བོད་གཞུང་ཞེས་པར་ཕྱིར་བསྒྱུར་བྱེད་རྒྱུར་ང་རང་གཉིས་ཀས་གཙིགས་ཆེར་བརྩི་བ་གཅིག་མཚུངས་རེད། དེ་འདྲ་སོང་ཙང་༼Tibetan Bulletin, འདོན་ཐེངས་༡༩ ཕྱི་ལོ་༢༠༡༥ ཟླ་༥ དང་༦ ཤོག་གྲངས་༡༧་ནང་ཧི་མ་ཅལ་མངའ་སྡེའི་བློན་ཆེན་མཆོག་གིས༽”༧གོང་ས་མཆོག་དང་ཁོང་གི་བཙན་བྱོལ་གཞུང་༼ཡིག་གཟུགས་ཟུར་འདོན་དེ་ཚེ་དབང་ནོར་བུས་བཟོས༽གཉིས་ང་རང་གི་མངའ་སྡེ་ཧི་མ་ཅལ་གྱི་རྡ་རམ་ས་ལར་ཡོད་པར་ང་ཚོ་སྤྲོ་བ་ཤིན་ཏུ་ཆེ” ཞེས་ཀློག་རྒྱུ་བྱུང་བར་བདེ་ཚོར་ཆེན་པོ་ཐོབ་སོང་།
འདས་པའི་གཟའ་འཁོར་གཉིས་ཙམ་ནང་ངས་ཡུ་རོབ་ནང་དབུ་མའི་ལམ་གྱི་ལངས་ཕྱོགས་འཛིན་མཁན་བོད་མི་དྲག་ཅན་མང་པོ་དངོས་ཐུག་གམ། ཁ་པར་ཐོག་འབྲེལ་ལམ་བྱས་པས། ཁོང་ཚོ་མང་པོ་ཞིག་གིས་སྲིད་སྤྱིའི་འོས་བསྡུའི་ལས་འགུལ་སྤེལ་བཞིན་པ་དེར་ཐུགས་སྣང་ཆེན་པོ་གནང་བཞིན་པ་རེད། ཁོང་རྣམ་པ་ཨ་ཚོགས་ཀླུ་མཁར་བྱམས་ཀྱི་བློ་གྲོས་ཀྱི་ནུས་མཐུ་ཟབ་ཅིང་ཁ་གསལ་བ་། ཁོང་གིས་གསལ་བཤད་གནང་པའི་དོན་མཚན་དེ་ཚོ་སེམས་ལ་ཧ་ཅང་འཇུག་པོ་བྱུང་པ་དང་། ང་རང་རང་བཙན་ལངས་ཕྱོགས་འཛིན་མཁན་ཞིག་ཡིན་པ་ཁོང་རྣམ་པས་མཁྱེན་གྱི་ཡོད་སྟབས་། ཁོང་ཚོ་འགའ་ཤས་ཀྱིས་ངས་ཀླུ་མཁར་བྱམས་ལ་ཡོངས་གྲགས་ཐོག་རྒྱབ་སྐྱོར་བྱེད་ན་ཡག་པོ་ཡོད་རེད་ཅེས་སྐུལ་མ་ཡང་གཏོང་མཁན་བྱུང་། དེ་གང་ལགས་ཞུས་ན་ད་བར་སྲིད་སྐྱོང་འོས་མིའི་ཁོངས་ནས་ཀླུ་མཁར་བྱམས་ཀྱི་དོན་མཚན་དང་དགག་སྒྲུབ་འབྲེལ་བརྗོད་དེ་ཚོ་སེམས་འཇུག་ཆེ་ཤོས་བྱུང་འདུག།
དེ་འདྲའི་དགོངས་ཚུལ་བཟང་པོ་གནང་དུས་ཀླུ་མཁར་བྱམས་སོགས་སྒྲིག་འཛུགས་ཀྱི་ཁྱབ་བསྒྲགས་ཀྱི་ཆ་རྐྱེན་འདྲ་མཉམ་མི་ཐོབ་པའི་འོས་མིར་རྒྱབ་སྐྱོར་བྱེད་རྒྱུ་དེ་གལ་ཆེན་མཐོང་སོང་། ང་ཚོ་ཚང་མས་མཁྱེན་གསལ་ལྟར་ལས་སྲིད་སྐྱོང་དང།་བཀའ་བློན། སྤྱི་འཐུས་ལས་ཐོག་པ་ཡིན་པའི་ཆ་ནས་ཁོང་རྣམས་ལ་སྒྲིག་འཛུགས་ཀྱི་ཁྱབ་བསྒྲགས་ཆ་རྐྱེན་ནམ། སྒྲིག་འཛུགས་ཀྱི་གླེང་སྟེགས་གཞན་པ་ཐོབ་སླ་བ་ཡོད་རེད། དེ་འདྲའི་གནས་ཚུལ་ཡོད་བཞིན་པའི་འོག་ལ ༼ཀ༽དབུས་འོས་བསྡུ་ལས་ཁང་གི་འོས་བསྡུའི་སྒྲིག་གཞི་དོན་ཚན་ ༢༤ ཅན་གསལ་བསྒྲགས་གནང་བ་དང་། ༼ཁ༽ ༢༠༡༦ལོའི་དུས་འཁོར་དབང་ཆེན་ཕར་འགྱངས་བྱུང་བས་འོས་མི་ནང་ཁུལ་གོ་སྐབས་ཕྲན་བུ་འདྲ་མཉམ་གྱི་ཆ་རྐྱེན་དུ་འགྱུར་བའི་རེ་བ་བརྟེན་གནས་ཚུལ་དེ་གཉིས་ལ་ངས་དགའ་བསུ་ཞུ་གི་ཡོད།
ད་རེས་སྲིད་སྤྱིའི་འོས་བསྡུ་འདི་གནད་འགག་ཆེན་པོ་ཞེ་དྲག་ཆགས་ཀྱི་ཡོད། གཞིས་བྱེས་བོད་མི་ཚོས་གསལ་པོ་མཁྱེན་རྟོགས་ཡོད་པར། ད་ཡོད་བོད་ནང་དྲག་གནོན་ཅན་གྱི་གནས་བབས་དེ་ངེས་པར་དུ་འགྱུར་བ་འགྲོ་དགོས། བོད་མི་མང་ཆེ་བས་དབུ་མའི་ལམ་གྱི་ཐོག་རྒྱ་ནག་གི་སྒྲོམ་གཞིའི་ནང་མིང་དོན་མཚུངས་པའི་རང་སྲིད་རང་སྐྱོང་འཐོབ་ཐབས་བྱེད་ཀྱི་ཡོད། དབུ་མའི་ལངས་ཕྱོགས་པ་ཚོས་སྲིད་འཛིན་ཤི་ཅིན་པིང་གི་དབུ་འཁྲིད་འོག་བར་ལམ་མཚམས་ཆད་པའི་བོད་རྒྱ་གྲོས་མོལ་དེ་བསྐྱར་གསོ་དང་། བོད་ལ་འཛིན་པའི་མཁྲེགས་སྲིད་དེ་བསྐྱར་བཅོས་ཡོང་བའི་རེ་བ་ཆེན་པོ་བཅངས་ཀྱང་། དེང་སང་བོད་ནང་གནས་བབས་དེ་ཤི་ཅིན་པིང་སྲིད་འཛིན་གྱི་གོ་གནས་མ་བཞེས་གོང་ལས་སྡུག་པ་ཆགས་ཡོད།
ཉེ་ཆར་ཁོང་གིས་གྲོས་མོལ་ཡོང་རྒྱུའི་རེ་བ་དེ་རྩ་གཏོར་བཏང་པར་གཞིགས་ན། རྒྱ་ནག་གི་ངོས་ནས་བོད་མིས་དང་བླངས་ཀྱི་སྒོ་ནས་མགོ་བཏགས་གཙང་མ་ཞུས་པ་མ་གཏོགས་གཞན་པ་གང་ཡང་སྤྲོད་རྩིས་མེད་པ་དེ་གསལ་པོ་བཏོན་གྱི་ཡོད་རེད། དགོས་འདུན་ཅི་ཞིག་མཐའ་མ་ཁས་ལེན་བྱེད་པའི་གྲུབ་འབྲས་དེ་ལས་མཐོ་བ་བཞག་དགོས་རེད་ཅེས་རྟག་པར་ངས་བཤད་ཀྱི་ཡོད། དབུ་མའི་ལངས་ཕྱོགས་འཛིན་མཁན་ཚོས་རྒྱ་གཞུང་དེ་དོ་གལ་ཆེན་པོའི་གྲོས་མོལ་ལ་ཞུགས་བཅུག་འདོད་ཡོད་ན་ཐབས་ལམ་གྱི་ཆ་ནས་རང་ཐག་རང་གཅོད་དང་། དམིགས་ཡུལ་གྱི་ཆ་ནས་རང་བཙན་ལངས་ཕྱོགས་ཤོག་ཁག་ཤུགས་ཆེ་ཞིག་ངེས་པར་དགོས་རེད། བོད་མི་ག་ཚོད་མང་བས་འོས་བསྡུའི་སྐབས་རང་བཙན་ལངས་ཕྱོགས་ཅན་གྱི་འོས་མིར་འོས་ཤོག་འཕེན་པ་ཡིན་ན། དེ་ཙམ་གྱིས་དབུ་མའི་ལངས་ཕྱོགས་འཛིན་མཁན་ཚོས་པེ་ཅིང་གྲོས་མོལ་ནང་ཞུགས་བཅུག་རྒྱུར་ཕན་རླབས་ཡོད་རེད། ཐག་གཅོད་དེ་ང་རང་ཚོའི་ལག་ཐོག་ལ་ཡོད་པས་བོད་མི་ཚོས་འོས་བསྡུའི་ཐོབ་ཐང་དེ་ད་རེས་བེད་སྤྱོད་ཡག་པོ་གཏང་བའི་རེ་བ་ཡོད།
དེར་བརྟེན་ཁྱེད་རང་གི་སྲིད་སྐྱོང་འོས་ཤོག་དེ་ཨ་ཚོགས་ཀླུ་མཁར་བྱམས་དང་། རང་བཙན་དང་རང་ཐག་རང་གཅོད་ལངས་ཕྱོགས་འཛིན་མཁན་གྱི་སྤྱི་འཐུས་འོས་མི་ཚོར་བླུགས་རྒྱུ་དེ་གལ་ཆེན་ཆགས་ཡོད། དབང་ཆ་དེ་ནི་ཁྱེད་རང་གི་ལག་ཏུ་ཡོད། དེ་གཅིག་པུ་པེ་ཅིང་གིས་འཕྲོག་མི་ཐུབ་པའི་དབང་ཆ་ཞིག་རེད། པེ་ཅིང་ལ་ལན་བརྡ་གསལ་པོ་ཞིག་གཏོང་རྒྱུའི་དུས་ལ་བབས་ཡོད། བོད་རྒྱལ་ལོ།
རེད། སོ་སོའི་བསམ་ཚུལ་སྤེལ་བར་དགའ་བསུ་ཞུ། འོན་ཀྱང་ཁྱེད་ཀྱིས་རིག་པ་ཆོ་མེད་དེ་འདྲ་བཀོལ་ནས་ཀླུ་འབྱམས་ལ་འོས་རག་ཐབས་བྱེད་ཀྱི་འདུག་པ་ནི་ཐབས་སྐྱོ་བོ་རེད།
ཀླུ་མཁར་བྱམས་ལ་རྒྱབ་སྐྱོར་བྱེད་པ་དེ་ཁོ་བ་སྒེར་ལ་བྱས་པ་ཞིག་མིན་པར་ཁོའི་འབོད་ཚིགས་དང་། ལྟ་གྲུབ། སྙིང་སྟོབས་བཅས་ལ་རྒྱབ་སྐྱོར་བྱས་པ་རེད།
ཚེ་དབང་ནོར་བུའི་བསམ་ཚུལ་རང་ཡིན་གྱི་རེད་དེ། བྱིས་པར་བློ་ཁྲིད་གཏོང་ཐུབ་ཀྱང་། ད་ཐེངས་ཀྱི་འོས་བླུགས་པ་པོ་ནི་བྱིས་པ་མིན་པར་ལོ་བཅོ་བརྒྱད་ཡན་གྱི་དར་མ་མི་བསམ་ཤེས་ཡོད་མཁན་ཚོ་ཡིན་པས། དགོངས་པ་མ་འཚོམས་ཞུ་རྒྱུ་ཡིན། གལ་སྲིད་ཁྱེད་སྨྱུག་ཐོག་པ་དངོས་ཞིག་ཡིན་ན། སྨྱུག་རྩལ་ཐབས་སྐྱོ་བོ་དེ་འདྲར་སྤྱད་པ་ནི་བློ་ཕམ་རང་རེད།
དོན་དངོས་སུ་ད་ལྟའི་ང་ཚོའི་སྨྱུག་ཐོག་པ་ནི་བདེ་དོན་ལ་བསམ་ཐུབ་པ་དང་། བསམས་པ་དེ་སྤྱིར་ཕན་པའི་འདེང་ཚོད་ཡོད་པ། འདེང་ཚོད་ཡོད་པའི་དམངས་ཕན་དེ་སྤྱིར་བཤད་ཕོད་པ་ཞིག་ཡིན་དགོས། དེ་ལྟར་བྱུང་ན། དམངས་ལ་ཁོ་ཚོའི་ཚོུད་འགའི་བྱས་བྱ་བྱེད་ཀྱི་གཏམ་བཤད་ཙམ་མིན་པར་རྒྱབ་ལྗོངས་ཀྱི་ཤེས་འཇོན་དང་། ལས་དོན། དམངས་སེམས། ཕུགས་བསམ་སོགས་ལྷམ་མེར་སྤུང་ཐུབ་པས་སོ།།
ངས་དུས་བབ་ཐོག་དཔྱད་གཏམ་སྤེལ་སྐབས་མཆན་འགོད་རྒྱུ་བཀག་ཟིན་པ་ཡིན་ནམ། དུས་བབ་དྲ་རྒྱའི་སྒྲིག་ཁྲིམས་དང་འགལ་གྱི་ཡོད་པ་ཇི་ཡིན་མ་ཤེས། གང་ལྟར་ངའི་མཆན་མང་ཆེ་བ་སླེབས་ཀྱི་མི་འདུག། འོན་ཀྱང་ད་རེས་བསམ་ཚུལ་ཞིག་ཞུ་འདོད་བྱུང་། བཀའ་ཁྲི་མང་ཚོགས་ནས་ཐད་ཀར་འོས་འདེམས་ཐེང་གསུམ་བྱས་ཟིན་པ་རེད། ལུང་ཚན་ཕྱོགས་རིས་སོགས་ཀྱི་ཞན་ཆ་སྤུ་ཙམ་མེད་པར་ཁ་ཡོད་ལག་ཡོད་ཀྱི་སྤྱི་དོན་ཐུགས་འགན་བཞེད་ཐུབ་མཁན་གྱི་མཁས་དབང་གཉིས་འདེམས་བསྐོ་བྱས་སོང་བས་ང་ཚོ་མང་ཚོགས་ཀྱི་དམངས་གཙོའི་ཤེས་ཡོན་གནས་སྟངས་གང་ལ་གང་འཚམས་ཀྱི་ཡར་རྒྱས་ཡོད་པའི་རྣམ་པ་བསྟན་སོང་། མ་འོངས་པར་ཡང་འདེམས་སྟངས་ནོར་གྱི་རེདབསམ་གྱི་མེད།
རེད། སོ་སོའི་བསམ་ཚུལ་སྤེལ་བར་དགའ་བསུ་ཞུ། འོན་ཀྱང་ཁྱེད་ཀྱིས་རིག་པ་ཆོ་མེད་དེ་འདྲ་བཀོལ་ནས་ཀླུ་འབྱམས་ལ་འོས་རག་ཐབས་བྱེད་ཀྱི་འདུག་པ་ནི་ཐབས་སྐྱོ་བོ་རེད། དེང་སང་བོད་མི་རྣམས་སྔར་དང་མི་འདྲ་བར་ཤེས་ཡོན་དང་བསམ་བློའི་རང་དབང་ལྡན་པ་ཤ་སྟག་ཡིན་དུས། ཁྱེད་ཀྱི་རིག་པ་རྫུན་མ་དེ་འདྲ་ལ་ཡིད་ཆེས་གཏན་ནས་བྱེད་མི་སྲིད། བྱེད་ཀྱང་བྱེད་མཁན་རྣམས་དང་ཁྱེད་དང་འདྲ་བར་མིག་ཡོད་ཀྱང་གཡང་སར་མཆོང་མཁན་རང་རེད། །