བོད་ཀྱི་བུད་མེད་ལྷན་ཚོགས་ཀྱི་སྒྲིག་འཛུགས་བཞུགས་སྒར་དྷ་རམ་སར་སླར་གསོ་གནང་སྟེ་ལོ་ངོ་ ༣༡ འཁོར་བའི་དུས་དྲན་སྲུང་གཙི་གནང་སོང་།
དེ་རིང་ཕྱི་དྲོའི་ཆུ་ཚོད་ ༣ ཐོག་མེག་གྷན་དབུས་བུད་མེད་ལྷན་ཚོགས་ཀྱི་ཚོགས་ཁང་གསར་བའི་ནང་། བོད་ཀྱི་བུད་མེད་ལྷན་ཚོགས་སླར་གསོ་བྱུང་སྟེ་ལོ་ངོ་ ༣༡ འཁོར་བའི་དུས་དྲན་སྲུང་གཙི་གནང་སོང་བ་དང་། སྐུ་མགྲོན་གཙོ་བོ་བཀའ་ཟུར་རིན་ཆེན་མཁའ་འགྲོ་མཆོག་གི་གཙོས་བོད་མི་མང་སྤྱི་འཐུས་ཡེ་ཤེས་སྒྲོལ་མ་ལགས་དང་ས་གནས་འགོ་འཛིན་ལས་ཁུངས་ཀྱི་ལས་དྲུང་ཚེ་རིང་ལྷ་མོ་ལགས། དེ་བཞིན་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྐྱིད་ཁག་གི་སྐུ་ཚབ་དང་དྷ་སའི་སེར་སྐྱ་མི་མང་བཅས་མི་གྲངས་ ༡༠༠ ལྷག་མཉམ་འཛོམས་འདུག
དུས་དྲན་གྱི་མཛད་སྒོའི་ཐོག་དབུས་བུད་མེད་ལྷན་ཚོགས་ཀྱི་ཚོགས་གཞོན་ཚེ་རིང་སྒྲོལ་མ་ལགས་ཀྱིས། ཆོལ་གསུམ་བོད་ཀྱི་བུད་མེད་ལྷན་ཚོགས་ཕྱི་ལོ་ ༡༩༨༤ ཟླ་ ༩ ཚེས་ ༡༠ ཉིན་༧གོང་ས་སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་འོག བཙན་བྱོལ་བོད་མིའི་ལོ་རྒྱུས་ནང་ཐོག་མར་བསྐྱར་འཛུགས་གནང་བ་དང་། དེང་སྐབས་ཨེ་ཤ་ཡ་དང་ཡུ་རོབ། ཨ་རི། ཨོ་སི་ཊི་ལེ་ཡ་སོགས་ད་ལྟའི་བར་སྐྱབས་བཅོལ་བོད་མིའི་གནས་སྡོད་ཡུལ་དུ་བུད་མེད་ལྷན་ཚོགས་ཀྱི་ས་གནས་ཡན་ལག་ ༥༦ དང་ཚོགས་མི་ ༡༧༠༠༠ ཙམ་ཡོད་པ། དེ་བཞིན་བོད་ཀྱི་སྐད་ཡིག་རིག་གཞུང་སྲུང་སྐྱོབ་དང་སྤྱི་ཚོགས་ཆབ་སྲིད་འཛིན་སྐྱོང་། ལྷག་དོན་བཙན་བྱོལ་བོད་མིའི་སྤྱི་ཚོགས་སྲ་བརྟན་དང་ནུས་སྟོབས་གོང་འཕེལ་ཡོང་ཐབས་ཀྱི་ལས་རིམ་ཁག་དང་བུད་མེད་ཀྱི་འགན་འཁྲི། ཐོབ་ཐང་དང་འདྲ་མཉམ། མ་འོངས་ལས་འཆར་སོགས་ཀྱི་ཐོག་ཕྱག་ལས་མང་པོ་གནང་དང་གནང་མུས་ཡིན་སྐོར་ངོ་སྤྲོད་གནང་སོང་།
དེའི་རྗེས་བཀའ་ཟུར་རིན་ཆེན་མཁའ་འགྲོ་མཆོག་གིས་བོད་ཀྱི་བུད་མེད་ཚོས་སྤྱི་ཚོགས་ལ་འགན་ཆེན་པོ་ལེན་དགོས་སྐོར་གསུངས་དོན། བོད་ཀྱི་བུད་མེད་ལྷན་ཚོགས་ཞེས་པ་འདི་༧གོང་ས་སྐྱབས་མགོན་མཆོག་གི་བཀའ་སློབ་ལམ་སྟོན་གྱི་གཙོས། ཡང་དག་པའི་དམངས་གཙོའི་ལམ་ནས་ཆོལ་གསུམ་ཆོས་ལུགས་རིས་མེད་ཀྱི་ཐོག་ནས་བཙུགས་པ་ཞིག་ཡིན་སྟབས། ང་ཚོ་བོད་ཀྱི་རྩ་དོན་འཐབ་རྩོད་འདིའི་མཐའ་མ་གསལ་བར་དུ། ལོ་ཆུང་ཚོས་མུ་མཐུད་དཀའ་ལས་རྒྱག་པ་དང་རྒན་པ་ཚོས་མཉམ་རུབ་བྱེད་དགོས་པ་གལ་ཆེན་པོར་མཐོང་གི་ཡོད་ལ། ལས་དོན་ཆེ་ཆུང་གང་ཡིན་ཡང་ཁ་ནས་བཤད་པ་ཙམ་མིན་པར་ལག་ལེན་དངོས་ཀྱི་ཐོག་ནས་འགྲོ་དགོས་པ་ཧ་ཅང་གལ་ཆེན་པོ་རེད། ང་ཚོ་བཙན་བྱོལ་དུ་ཕེབས་དོན་ང་ཚོའི་ལུང་པའི་ནང་ཟ་བཏུང་སྡོད་ཡུལ་མེད་པ་དང་ནང་འགལ་ནང་འཁྲུག་བྱུང་ནས་ཡོང་བ་མིན་པར། ང་ཚོ་སོ་སོར་བདག་པའི་རྒྱལ་ཁབ་ནང་གཞན་མིས་བཙན་འཛུལ་བྱས་ཏེ་ཐབས་ཟད་འུ་ཐུག་གིས་རང་དབང་ཅན་གྱི་རྒྱལ་ཁབ་གཞན་ནང་ཡོང་སྟེ། སོ་སོའི་རྒྱལ་ཁབ་ཀྱི་རྩ་དོན་ཐོག་ལས་ཀ་ཕྲན་བུ་རེ་བསྒྲུབ་ཐུབ་ན་སྙམ་ནས་ཡོང་བ་རེད། དེར་བརྟེན་ང་ཚོ་བུད་མེད་ཚང་མ་ནང་གི་ཨ་མ་ཡིན་སྟབས། ནང་གི་ཨ་མས་འགན་ཁུར་བའི་ཐོག་ནས་སོ་སོའི་བུ་ཕྲུག་དང་བུ་སྤུན། གསར་འབྱོར་ཚང་མར་གསོ་སྐྱོང་གནང་རྒྱུ་དེ་ཧ་ཅང་གལ་ཆེན་པོ་རེད། ཅེས་བརྗོད་སོང་།
དུས་དྲན་དང་འབྲེལ་བའི་གསར་འགོད་གསལ་བསྒྲགས་ཤིག་སྤེལ་བའི་ནང་། ང་ཚོ་བོད་ཀྱི་བུད་མེད་ལྷན་ཚོགས་ནས་འཛམ་གླིང་རྒྱལ་ཁབ་ཁག་གི་དབུ་འཁྲིད་རྣམས་པ་དང་བོད་དོན་རྒྱབ་སྐྱོར་ཚོགས་སྡེ་ཁག་ལ། ད་ལྟའི་ཛ་དྲག་གི་གནད་དོན་འགའ་ཞིག རྒྱ་ནག་གཞུང་དང་ལྷན་དུ་སེལ་ཐབས་ཡོང་བའི་དྲན་སྐུལ་དང་འབོད་སྐུལ་ཞུ་རྒྱུར། གཅིག རྒྱ་ནག་གཞུང་ལ་ནན་སྐུལ་དང་གནོན་ཤུགས་ཐོག་༧གོང་ས་ཏཱ་ལའི་བླ་མ་སྐུ་ཕྲེང་བཅུ་བཞི་བ་མཆོག་གིས་གྲོས་མཐུན་བཏོན་གནང་བའི་དབུ་མའི་ལམ་ནས། བཙན་བྱོལ་དབུས་བོད་མིའི་སྒྲིག་འཛུགས་དང་ལྷན་ཅིག བསྐྱར་དུ་བོད་རྒྱ་འབྲེལ་མོལ་འགོ་འཛུགས་ཡོང་བ་ཞུ་རྒྱུ། གཉིས། ང་ཚོས་རྒྱ་ནག་གི་བཙོན་འོག་ཏུ་ལོ་ངོ་ ༢༠ རིང་ལྷག་པའི་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་ད་ལྟ་གར་ཡོད་མི་ཤེས་པ་དེ་གང་མྱུར་ཀློད་གྲོལ་ཡོང་ཐབས་སུ། མཉམ་འབྲེལ་རྒྱལ་ཚོགས་ཀྱི་ཚོགས་ཆུང་ནས་རྒྱ་ནག་གཞུང་ལ་གནོན་ཤུགས་སྤྲོད་དགོས་པའི་འབོད་སྐུལ་ཞུ་རྒྱུ་ཡིན་ལ། ད་ལྟའི་བར་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་མང་པོས་ཞི་འབོད་དང་གནོན་ཤུགས་ཐེངས་མང་སྤྲད་ཀྱང་། རྒྱ་ནག་གི་དབང་འཛིན་པ་ཚོས་དེ་དོན་ལ་ཡ་ལན་སྤྲད་མེད་སྟབས། བོད་ཀྱི་བུད་མེད་ལྷན་ཚོགས་ཀྱིས་བསྐྱར་དུ་རྒྱ་ནག་གི་དབང་འཛིན་པ་ཚོར་ནན་སྐུལ་ཞུ་རྒྱུར། གནད་དོན་དེ་འགྲོ་བ་མིའི་ཐོབ་ཐང་གི་གནད་དོན་ཡིན་པའི་ཆ་ནས། ཁོང་ཚོར་དྲག་གནོན་མི་བྱེད་པར་ཞི་དུལ་དུ་འགྱུར་བ་གཏོང་རོགས་ཞུ་རྒྱུ་ཡིན། གསུམ། ཕྱི་ལོ་ ༢༠༡༥ ལོའི་ཟླ་ ༧ ཚེས་ ༡༢ ཉིན་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱ་ནག་གི་བཙོན་ཁང་ནང་འདས་གྲོངས་སུ་གྱུར་བའི་གནད་དོན་དེ་ལ་རྒྱ་ནག་གི་དབང་འཛིན་པ་ཚོས་རྩད་གཅོད་དང་ཞིབ་འཇུག་མཐར་ཕྱིན་བྱས་ཏེ། ཁོང་གྲོངས་རྐྱེན་གནས་སྟངས་ཁོར་ཡུག་གང་ཡིན་མི་མང་ལ་གསལ་བཤད་བྱེད་དགོས་པར། བོད་ཀྱི་བུད་མེད་ལྷན་ཚོགས་ཀྱི་ངོས་ནས་དགོས་འདུན་འདོན་གྱི་ཡོད། བཞི། མཉམ་འབྲེལ་རྒྱལ་ཚོགས་ལ་ནན་སྐུལ་ཞུ་རྒྱུར། རྒྱ་ནག་གཞུང་གིས་བོད་ཀྱི་ཆབ་སྲིད་བཙོན་པ་ཡོངས་རྫོགས་གང་མགྱོགས་སྒོས་ཀློད་གྲོལ་ཡོང་བ་ཞུ་རྒྱུ་ཡིན། ཞེས་བཀོད་འདུག
