༧གོང་ས་མཆོག་གིས་གཞོན་སྐྱེས་ཚོ་རེ་བའི་འབྱུང་ཁུངས་ཡིན་པས་ཕན་ཚུན་བར་རང་དང་གཞན་གྱི་བར་ཐག་དོར་ཏེ་འགྲོ་བ་མིའི་རིགས་ཡོངས་རྫོཊ་ཁྱིམ་ཚང་གཅིག་ནང་གནས་ཐུབ་པར་བསམ་བློ་གཏོང་དགོས་སྐོར་གསུངས་འདུག
ཟླ་འདིའི་ཕྱི་ཚེས་ ༡༣ ཉིན་༧གོང་ས་མཆོག་དབྱིན་ཡུལ་དུ་ཞབས་སོར་བདེ་བར་འཁོད་དེ་ཁུལ་དེའི་ནང་ཉིན་གྲངས་ ༡༠ རིང་མཛད་འཕྲིན་སྐྱོང་བཞིན་ཡོད་པ་ལྟར། ཕྱི་ཚེས་ ༡༤ ཉིན་གྱི་སྔ་དྲོར་ཨོག་སི་ཧྥོར་ཌི་གྲོང་ཁྱེར་ནང་ཡོད་པའི་མག་དཱ་ལིན་མཐོ་སློབ་ (Magdalen College)ཀྱི་ཐང་ཆེན་དུ། ༧གོང་ས་མཆོག་གིས་གཟིགས་ཞིབ་མཛད་རྗེས། མཐོ་སློབ་དེའི་ཚོགས་ཁང་ནང་དུ་གསར་འགོད་པ་རྣམས་ལ་མཇལ་འཕྲད་ཀྱིས་འགྲོ་བ་མིའི་རིགས་ཀྱི་བྱམས་བརྩེ་དང་ཆོས་ལུགས་མཐུན་སྒྲིལ་སོགས་ཀྱི་ཐོག་ཆུ་ཚོད་ཕྱེད་ལྷག་རིང་བཀའ་སློབ་ལམ་སྟོན་གནང་བ་དང་འབྲེལ། གསར་འགོད་པའི་དྲི་བར་བཀའ་ལན་གནང་འདུག
སྐབས་དེར་༧གོང་ས་མཆོག་གིས་ཡུ་རོབ་ནང་སྐྱབས་བཅོལ་དུ་ཡོང་མཁན་ཚོར་ཁ་ཚ་དགོས་གཏུག་གིས་སེམས་འཁུར་ཆེན་པོས་རོགས་རམ་གནང་བར་བསྔགས་བརྗོད་ཞུ་རྒྱུ་དང་། སྐྱབས་བཅོལ་འགྲོ་འཇུག་པའི་མི་གསོད་དང་འཐབ་འཛིང་སོགས་མཚམས་འཇོག་བྱ་རྒྱུར་ང་ཚོས་ཞི་བའི་ཐོག་ནས་འབད་བརྩོད་བྱ་དགོས་ཀྱི་འདུག དམག་ཤུགས་ཀྱིས་དུས་ནམ་ཡང་དཀའ་ངལ་སེལ་ཐུབ་ཀྱི་མེད་པ་མ་ཟད། བསམ་ཡུལ་ལས་འདས་པའི་མཇུག་འབྲས་བཟོ་ཡི་ཡོད། ནུབ་ཕྱོགས་ཀྱི་དཔལ་ཡོན་དང་ཨི་སི་ལམ་ (Islam) གྱི་ནོར་འཁྲུལ་ལས་འཁྲུག་འཛིང་ཤོར་གྱི་ཡོད། ཅེས་དང་། ངའི་ཁ་ཆེ་གྲོགས་པོ་ཚོས་ཁ་ཆེའི་ཆོས་པ་ཡང་དག་པ་ཞིག་ཡིན་ན་མི་གསོད་ཁྲག་སྦྱོར་གྱི་བྱ་བ་དེ་འདྲ་རིགས་ནམ་ཡང་བཟོ་ཡི་མེད་པ་དང་། སེམས་ཅན་ཀུན་ལ་ཨ་ལཱ་ (Allah) ཡིས་གུས་བརྩི་ཞུ་གི་ཡོད་ཅེས་གསུང་གི་འདུག གཙོ་བོ་ཤེས་ཡོན་གྱི་ཐོག་ནས་ཁ་ཆེ་རྒྱལ་ཁབ་ཚོ་ཡར་རྒྱས་གཏོང་དགོས་ཀྱི་ཡོད་སྐོར་སོགས་གསུངས་ཡོད་འདུག
ཕྱི་ཚེས་ ༡༤ ཉིན་བྷི་བྷི་སི་རྒྱ་ཡིག་དྲ་རྒྱས་གནས་ཚུལ་སྤེལ་བ་ལྟར་ན། གསར་འགོད་པས་༧གོང་ས་མཆོག་ལ་ཉེ་ཆར་རྒྱ་ནག་གཞུང་གིས་བོད་རང་སྐྱོང་ལྗོངས་དབུ་བརྙེས་ནས་ལོ་འཁོར་དྲུག་ཅུའི་དུས་སྟོན་སྲུང་གཙི་གཞི་རྒྱ་ཆེན་པོ་ཞིག་བྱས་ཡོད་པ་མ་ཟད། ད་ལྟའི་བོད་ནི་ལོ་རྒྱུས་ནང་ཆེས་འོད་སྟོང་ལྡན་པའི་དུས་སྐབས་ཤིག་ཡིན་ཚུལ་བརྗོད་ཡོད་པ་དེའི་ཐད་དགོངས་ཚུལ་ཅི་ཡོད་བཀའ་འདྲི་ཞུ་སྐབས། ༧གོང་ས་མཆོག་གིས་ངོས་རང་བོད་ལ་དངོས་སུ་འགྲོ་ཐུབ་མེད་པ་དང་མཐོང་ཐུབ་ཀྱི་མི་འདུག ཡིན་ན་ཡང་། གལ་སྲིད་བོད་རྒྱ་ནག་གིས་བཤད་པ་གནང་བཞིན་དེ་འདྲའི་བསྔགས་བརྗོད་བྱེད་དགོས་པ་ཞིག་ཡོད་པ་ཡིན་ན། ག་རེ་བྱས་ནས་བོད་པ་རང་དང་རྒྱ་ནག་གི་གྲོགས་པོ་ཚོས་ད་ལྟའི་བོད་ལ་དཀའ་སྡུག་ཆེན་པོ་འདུག་ཅེས་བརྗོད་ཀྱི་ཡོད་པ་རེད། སྤྱིར་བཏང་རྒྱ་ནག་སྲིད་གཞུང་གིས་བོད་ནང་ལ་ཁང་པ་གསར་བ་དང་མི་མང་ལ་སྡོད་ཁང་བརྒྱབ་ཡོད་པ་རེད། འོན་ཀྱང་། བོད་མི་ཚོས་བདེ་སྐྱིད་ཅིག་ཚོར་གྱི་མི་འདུག གལ་སྲིད་ཁོ་ཚོར་སྐད་ཆ་དྲིས་ན་ཕལ་ཆེར་མི་ཚང་མས་ཡག་པོ་འདུག་གསུང་གི་རེད། ཡིན་ན་ཡང་། སྒེར་གཅོད་སྲིད་དབང་འོག་གི་མི་མང་ཚོས་སྐད་ཆ་དྲང་པོ་གསུང་ཐུབ་ཀྱི་མ་རེད། སྒེར་སྤྱོད་རྒྱལ་ཁབ་ཡོངས་རྫོགས་གཅིག་པ་རེད། མི་མང་གིས་རང་ཉིད་ཀྱི་འདོད་པ་དང་བསམ་འཆར་གསུང་ཐུབ་ཀྱི་ཡོད་པ་མ་རེད། སྐད་ཆ་ཡོད་ཚད་སྲིད་གཞུང་གིས་བཤད་ཀྱི་ཡོད་པ་རེད། ཅེས་གསུངས་བ་དང་འབྲེལ། ཁྱེད་རང་ཚོ་བརྒྱུད་ལམ་ཁག་གི་མི་སྣ་ཚོ་བོད་ནང་སོང་ནས་ལྟ་དགོས་ཀྱི་འདུག འགྲོ་དུས་ཀྱང་འཆམ་འཆམ་ཙམ་མ་ཡིན་པར་དུས་ཚོད་མང་པོ་ཞིག་གཏང་ནས་རྒྱུས་ལོན་བྱས་པ་ཡིན་ན་གཞི་ནས་དངོས་ཡོད་གནས་ཚུལ་དེ་ཧ་གོ་ཡོང་གི་རེད། ཅེས་སོགས་གསུངས་འདུག
དེ་རྗེས་༧གོང་ས་མཆོག་གྲོང་ཁྱེར་དེའི་ནང་ཡོད་པའི་རོ་ཋེ་སི་ཁང་ཁྱིམ་(Rhodes House)དུ་ཆིབས་བསྒྱུར་བཀའ་དྲིན་བསྐྱངས་ཏེ། སློབ་གྲྭ་ཁག་གསུམ་གྱི་སློབ་ཕྲུག་ཁྱོན་བསྡོམས་ ༢༠༠ ཙམ་ལ་བཀའ་སློབ་བསྩལ་དོན། ལོ་ཆུང་སྤུན་གྲོགས་ཕོ་མོ་ཚོ་དུས་ཚོད་ནི་ག་དུས་ཡིན་ནའང་མུ་མཐུད་ནས་འགྲོ་བཞིན་ཡོད། ང་ཚོས་འདས་པ་བཅོས་བསྒྱུར་བྱ་མི་ཐུབ་ཀྱང་འབྱུང་འགྱུར་ད་དུང་ཡོང་རྒྱུ་ཡིན་སྟབས་དེ་གང་འདྲ་ཞིག་བཟོ་མིན་ང་ཚོའི་ལག་ཏུ་ཡོད། ང་ཚོས་འབྱུང་འགྱུར་ལ་འགྱུར་བ་གཏོང་ཐུབ་ཀྱི་རེད། དུས་རབས་ ༢༠ བའི་ནང་ངའི་མི་ཐོག་གིས་དཀའ་ངལ་མང་པོ་ཞིག་བཟོས་ཡོད་པ་དེ་སེལ་མིན་ཁྱེད་རང་ཚོར་རག་ལས་ཡོད་པ་རེད། ཁྱེད་རང་ཚོ་ང་ཚོའི་རེ་བའི་འབྱུང་ཁུངས་དེ་རེད། གཅིག་ཅེས་ན་དུས་རབས་ ༢༡ པའི་མཇུག་ལ་སྔར་ལས་ཞི་བདེ་དང་བདེ་སྐྱིད་ཡོང་སྲིད། ང་ཚོའི་ཕན་ཚུན་བར་རང་དང་གཞན་གྱི་བར་མཚམས་དེ་དོར་དགོས་པ་དང་། ང་ཚོས་ག་འདྲ་བྱས་ནས་ཕན་ཚུན་ལ་རྟེན་དགོས་པ་དང་འགྲོ་བ་མིའི་རིགས་ཡོངས་ཁྱིམ་ཚང་གཅིག་གི་འོག་གནས་པའི་བསམ་བློ་གཏོང་དགོས་ཀྱི་འདུག ཅེས་སོགས་གསུངས་ཡོད་འདུག
ཡང་ཟླ་འདིའི་ཕྱི་ཚེས་ ༡༤ ཉིན་བརྡ་འཕྲིན་ (The Telegragh)གསར་ཁང་གིས་གནས་ཚུལ་སྤེལ་བ་ལྟར་ན། ལོ་ངོ་ ༥༦ ལ་སྐྱབས་བཅོལ་དུ་བཞུགས་པའི་བོད་མིའི་འདི་ཕྱི་གཉིས་ཀྱི་༧སྐྱབས་གནས་ཏཱ་ལའི་བླ་མ་མཆོག་གིས། ཨོག་སི་ཧྥོར་ཌི་གྲོང་ཁྱེར་ནང་གི་ཏཱ་ལའི་བླ་མ་བྱམས་བརྩེ་བསྟི་གནས་ཁང་ (Dalai Lama Centre for Compassion) དབུ་འབྱེད་གནང་ཡོད་པ་དང་། བསྟི་གནས་ཁང་དེ་ནི་བཟང་སྤྱོད་ཀྱི་ཆེད་སྦྱོང་བྱ་ཡུལ་ཞིག་ཡིན་པ་སོགས་བཀོད་འདུག གཞན་ཡང་། ཉིན་དེའི་ཉིན་རྒྱབ་ཏུ་༧གོང་ས་མཆོག་དབྱིན་ཡུལ་ཨོག་སི་ཧྥོར་ཌི་གཙུག་ལག་སློབ་གཉེར་ཁང་གི་བོད་ཡིག་སྡེ་ཚན་ (Oxford Tibetan Studies Department) ནང་ཆིབས་བསྒྱུར་བསྐྱངས་ཏེ། བོད་ཡིག་ཚན་པའི་དགེ་སློབ་ཚོར་མཇལ་འཕྲད་ཀྱིས་བཀའ་སློབ་གནང་ཡོད་འདུག
གསར་འགོད་པ། འཇིགས་མེད་རྒྱ་མཚོ།
