ཁྱིམ་ཚང་ ༥༨༢ ཀྱིས་སྐྱེ་ལྡན་འདེབས་ལས་བྱེད་བཞིན་ཡོད།

ནང་སྲིད་བཀའ་བློན་རྒྱ་རི་སྒྲོལ་མ་མཆོག་ནས་སྐྱེ་ལྡན་སོ་ནམ་པ་ཚོར་སྐྱེ་ལྡན་ཡོང་འབབ་བཙོང་མ་ཐུབ་པའི་དཀའ་ངལ་མེད་ཀྱང་དགོས་ངེས་ཀྱི་དངུལ་མ་རག་པའི་དཀའ་ངལ་ཡོད་པ་དངོས་ཡོད་ཡིན་སྐོར་གསུངས་སོང་།

དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༠ པའི་ལས་ཉིན་གཉིས་པའི་སྔ་དྲོར། སྐྱེ་ལྡན་སོ་ནམ་ཡར་རྒྱས་ལས་དོན་ཐད་ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས། ལོ་ལྟར་སྟོན་ཐོག་འདེབས་ལས་ཆེད་དུས་ཐུང་སྐྱེད་མེད་བུན་གཏོང་ལས་གཞི་ལག་བསྟར་གནང་བཞིན་ཡོད་པ་ལྟར། ས་གནས་ཁག་ལྔའི་ཞིང་ས་ཨེ་ཀར་ ༡༠ ཡན་འདེབས་ལས་བྱེད་མཁན་ཞིང་པ་དུད་ཁྱིམ་ ༧༤ ལ་ཟླ་བ་ ༩ རིང་སྐྱེད་མེད་སོ་ནམ་ཞིང་བུན་ཧིན་སྒོར་ ༤༡.༧༥.༠༠༠.༠༠ བཏང་བ་བཞིན་དངུལ་འབོར་ཆ་ཚང་ཕྱིར་སློག་བྱུང་ཡོད་པ་དང་། དེ་བཞིན་སོ་ནམ་སྐྱེད་ཆུང་དུས་བཀག་བུན་གཏོང་གི་ལས་གཞིའི་ཁྲོད། སོ་ནམ་གཞིས་ཆགས་ཁག་གི་ཞིང་པ་ཡར་ཐོན་དང་དོ་དབྱིངས་ཅན། དེ་བཞིན་མཉམ་འབྲེལ་ཁག་ཅིག་ལ་སོ་ནམ་ཞིང་ལས་ཡར་རྒྱས་གཏོང་ཆེད་ཞིང་ཆུ་འདྲེན་གཏོང་དང་སྒོ་ཕྱུགས་གསོ་སྐྱོང་། སོ་ནམ་ལས་དོན་ཐོག་མཁོ་གནད་ཆེ་བའི་དེང་དུས་ཀྱི་འཕྲུལ་ཆས་རིགས་ཉོ་ཆེད་ལོ་ ༣ ནས་ ༥ བར་ཁྱོན་ཧིན་སྒོར་ ༦.༢༥༠.༠༠༠.༠༠ གནང་ཡོད་སྐོར་སོགས་གསུངས་སོང་།

སྤྱི་འཐུས་ཨ་ཅཱརྱ་ཡེ་ཤེས་ཕུན་ཚོགས་ལགས་ཀྱིས་ད་ལྟའི་ཆར་སྐྱེ་ལྡན་སོ་ནམ་འདེབས་ལས་གནང་མཁན་གྱི་གཞིས་ཆགས་ག་ཚོད་ཡོད་པ་དང་། བཀའ་ཤག་སྐབས་བཅུ་བཞིའི་ལས་ཡུན་ནང་ཅི་ཙམ་མང་དུ་ཕྱིན་ཡོད་པ། གལ་སྲིད་མང་དུ་ཕྱིན་མེད་ན་རྒྱུ་མཚན་ཅི་ཡིན་སྐོར་གྱི་སྐར་རྟགས་ཅན་གྱི་དྲི་བ་ཕུལ་སྐབས་ནང་སྲིད་བཀའ་བློན་རྒྱ་རི་སྒྲོལ་མཆོག་གིས། ཕྱི་ལོ་ ༢༠༡༤ དང་ ༢༠༡༥ ནང་ཁྱོན་བསྡོམས་ཁྱིམ་ཚང་ ༥༨༣ དང་འདེབས་ལས་ཀྱི་ས་ཆ་ཨེ་ཀར་གྲངས་ ༢.༣༧༥.༣༨ ཡོད་པ་རེད། ཕྱི་ལོ་ ༢༠༡༢ ལོར་ད་ལྟའི་བཀའ་ཤག་གི་ངོས་ནས་མེའུ་གཞིས་ཆགས་ནང་ས་ཆ་ཨེ་ཀར་ ༧༩ ཐོག་མགོ་བཙུགས་ཐུབ་པ་ཙམ་མ་གཏོགས་བྱུང་མ་སོང་། སོ་ནམ་གཞིས་ཆགས་ཁག་བཅུ་གཉིས་ནང་ཁྱིམ་ཚང་ ༥༨༣ ནས་ཁྱོན་བསྡོམས་ཨེ་ཀར་གྲངས་ ༢.༣༧༥ .༣༨ སྟེང་ལོ་གཅིག་ནང་སྐྱེ་ལྡན་འབྲས་ཀོན་ཊལ་ ༧༨.༧༡༠ དང་། ཨ་ཤོམ་ཀོན་ཊལ་ ༡༢.༢༧༤.༦༠། ཞོག་ཁོག་ཀོན་ཊལ་ ༢༡༢། མོན་ཆག་ཀོན་ཊལ་ ༤༨༠། སྲན་མ་ཀོན་ཊལ་ ༥.༡༧༡། སྒ་སེར་ཀོན་ཊལ་ ༤.༧༠༠། སྒ་སྨུག་ཀོན་ཊལ་ ༧.༩༦༠། བྲའོ་ཀོན་ཊལ་ ༡༢.༠༢༥། པད་ཀང་ཀོན་ཊལ་ ༧.༧༩༠། གྲོ་ཀོན་ཊལ་ ༤༥༦ སོགས་ཁྱོན་བསྡོམས་ཀུན་ཊལ་འབུམ་ ༡ ལྷག་(༡.༥༢.༡༢༢.༦༠) ཐོན་གྱི་ཡོད་ཅེས་ཞུ་བ་ཡིན། ས་གནས་ཁག་ནས་མངའ་སྡེ་གཞུང་སོ་སོའི་སྐྱེ་ལྡན་ལས་གཞི་དེ་ཚོའི་ནང་མཉམ་ཞུགས་དང་གོ་སྐབས་ལེན་ཐུབ་པ་དགོས་པར་བརྒྱ་ཆ་བརྒྱ་ངོས་འཛིན་ཞུ་ཡི་ཡོད། ད་ལྟ་བར་དུ་མང་ཆེ་བར་ང་ཚོས་བོད་མིར་ལྟ་སྐྱོང་བྱེད་སྟངས་ཀྱི་སྲིད་བྱུས་རང་ལ་ཤུགས་བརྒྱབ་སྟེ། སྲིད་བྱུས་དེར་མངའ་སྡེ་སོ་སོའི་ཐོག་ནས་ངོས་བཞེས་གཙང་མ་ཞིག་བྱུང་བ་ཡིན་ན། རང་བཞིན་གྱིས་ཞིང་པ་དེ་ཚོར་རིམ་པ་གཉིས་པའི་ཐོག་ནས་ཆ་ཤས་ཆ་ཚང་ཞིག་ལེན་ཐུབ་པའི་རེ་བ་བྱེད་ཀྱི་ཡོད། ཅེས་གསུངས་སོང་།

ཡང་བཀའ་ཤག་སྐབས་བཅུ་བཞི་པའི་སྐབས་སུ་གཞིས་ཆགས་འཕར་མའི་ནང་སྐྱེ་ལྡན་སོ་ནམ་ལས་གཞི་འཛུགས་ཐུབ་མེད་པའི་རྒྱུ་རྐྱེན་སྐོར་བཀའ་འདྲི་ཞུས་པར་ཁོང་མོས། ད་ལྟ་བར་དུ་སྐྱེ་ལྡན་སོ་ནམ་ཀྱི་ལས་གཞིའི་གནས་སྟངས་བཟང་པོ་བྱུང་མེད་པ་ཞིག་ལ་ངོས་འཛིན་ཞུ་ཡི་མེད། བོད་མིར་འོས་པའི་སྐྱེ་ལྡན་སོ་ནམ་གྱི་སྲིད་བྱུས་ཐོག་གང་ཐུབ་ཀྱིས་གཞུང་གི་ངོས་ནས་མི་མང་ལ་ངོ་སྤྲོད་དང་མཐུན་འགྱུར་རྒྱབ་སྐྱོར་གནང་དགོས་པ་དེ། ང་ཚོ་མི་རིགས་དང་རྒྱལ་ཁབ་ཀྱི་རྩ་དོན་སྒྲུབ་པའི་སྐབས་དེར་ཧོད་རྒྱུག་དང་འབྲེལ་བའི་གནད་དོན་དང་། དེའི་ནང་ནས་ཀྱང་རྒྱ་ནག་གཞུང་གིས་བོད་ནང་བྱས་པའི་གནད་དོན་དེ་ཚོར་བལྟས་པ་ཡིན་ནའང་། སྐྱེ་ལྡན་སོ་ནམ་གྱི་སྲིད་བྱུས་དེ་ང་ཚོར་ཡོད་པའི་ཐོག་ནས་གང་ཐུབ་ཀྱིས་བྱེད་དགོས་པའི་སྲིད་བྱུས་བཟང་པོ་ཞིག་ལ་བརྒྱ་ཆ་བརྒྱ་ངོས་འཛིན་བྱེད་ཀྱི་ཡོད་ཅེས་ཞུ་རྒྱུ་གཅིག་ཡིན། གཉིས་ནས་ཁྲོམ་ར་འཛུགས་མ་ཐུབ་པའི་དཀའ་ངལ་ཞིག་ད་ལྟ་ཡིན་ནའང་གནས་ཡོད་པ་དེ་དངོས་འབྲེལ་ཆགས་བསྡད་ཡོད། ཅེས་དང་།

ཡང་ཁོང་མོས། གཞིས་ཆགས་འཕར་མའི་ནང་སྐྱེ་ལྡན་སོ་ནམ་ལས་གཞི་འཛུགས་མ་ཐུབ་པའི་རྒྱུ་མཚན་ཞུས་པ་ཡིན་ན། གཞིས་ཆགས་ཆེ་བ་ཁག་གི་ནང་ནས་མགོ་འཛུགས་མ་ཐུབ་ས་དང་མགོ་མ་བཙུགས་ས་དེ་ལ་དྭགས་དང་བྷན་ད་ར་གཉིས་ཆགས་ཀྱི་ཡོད་པ་རེད། དེ་གཉིས་ཀའི་ནང་ནས་གལ་ཏེ་ཞིང་པའི་ངོས་ནས་ང་སྐྱེ་ལྡན་ནང་འགྲོ་ཡི་ཡིན་ཞེས་ལབ་ན། བཀག་སྡོམ་གྱི་ལམ་ཀ་དེ་རྩ་བ་ཉིད་ནས་ཡོད་པ་མ་རེད། ང་ཚོས་སྤྱི་མཚུངས་ཀྱིས་བརྒྱ་ཆ་བརྒྱ་མཐུན་འགྱུར་དང་རྒྱབ་སྐྱོར་ཞུ་དང་ཞུ། ལས་གཞི་མགོ་མ་བཙུགས་པ་དེ་ག་རེ་རེད་ཟེར་ན། ལ་དྭགས་སོ་ནམ་གླིང་ལྟ་བུ་ཡིན་ན་སྐྱེ་ལྡན་ཕར་ཞོག་སོ་ནམ་ལས་གཞིའང་ས་གནས་ཀྱི་གནམ་གཤིས་སོགས་གང་ཅིའི་ཐོག་ནས་ཁག་པོ་ཆགས་འདུག་པར་བརྟེན། སྐྱེ་ལྡན་སོ་ནམ་མགོ་མ་བཙུགས་པ་རེད། དེ་བཞིན་བྷན་ད་ར་ཡིན་ན་ཁྲོམ་ར་ནས་ཐག་རིང་པོ་ཡིན་ལ། དགའ་ལྡན་ཕོ་བྲང་གི་མཐུན་འགྱུར་དང་སྦྲགས་ད་ལྟ་བྷན་ད་ར་ནང་འབྲས་འདེབས་འཛུགས་ཀྱི་ལས་གཞི་ཞིག་མགོ་བཙུགས་ཏེ་འགྲོ་མུས་ཆགས་ཡོད་སྟབས། ལས་གཞི་དེ་དང་མཉམ་དུ་སྐྱེས་ལྡན་སོ་ནམ་བར་དུ་བཅུག་པ་ཡིན་ན་གཞིས་ཆགས་ཆེན་པོ་ཞེ་དྲགས་ཤིག་མིན་པས་གནས་སྟངས་ཤིག་གིས་བྱུང་མ་སོང་། ཞེས་གསུངས་སོང་།

སྤྱི་འཐུས་འཇིགས་མེད་འབྱུང་གནས་ལགས་ཀྱིས་སྐྱེ་ལྡན་སོ་ནམ་འདེབས་ལས་བྱེད་སའི་ས་ཆ་ཨེ་ཀར་ ༢༣༧༥ ཡོད་སྐོར་གསུངས་པའི་བསྡོམས་འབོར་དེ་གཞིས་ཆགས་སོ་སོའི་ལས་བསྡོམས་ནང་འཁོད་པའི་གྲངས་ཐོ་ཡིན་ནམ། ཡང་ན་གྲངས་ཐོ་དེར་གཞི་བཅོལ་ནས་ཞིབ་འཇུག་བྱས་པའི་གྲངས་ཐོ་ཡིན་བཀའ་འདྲི་ཞུས་པར། དུས་ཡུན་རིང་པོ་ཞིག་ནས་སྐྱེ་ལྡན་ཐོག་ཕེབས་མཁན་གྱི་ཞིང་པ་དང་ས་ཆའི་ཁྱོན་བསྡོམས་དེ། ས་གནས་ནས་འཆར་ཟིན་འདྲ་བོ་ཞིག་ཡར་ཕུལ་ཏེ་བསྡོམས་བཞག་པ་ཞིག་མཚམས་མཚམས་སུ་བྱུང་འདུག དེ་འདྲ་བྱུང་འདུག་ཅེས་ཞུ་བ་ཡིན། ཡིན་ནའང་། དེའི་སྔོན་གྱི་གྲོས་ཚོགས་ཤིག་ནང་བཀུར་འོས་སྤྱི་འཐུས་ཁག་ཅིག་གིས་ཞིབ་ཚགས་པོ་ཞེ་དྲགས་བྱས་ཏེ། སྔར་ལོར་གྲངས་ཀ་ག་ཚོད་ཡོད་པ་དང་། དེའི་སྔོན་གྱི་ལོར་གྲངས་ཀ་ག་ཚོད་ཡོད་པ་རེད་ཅེས་འདྲི་རྩད་ཕེབས་སོང་། དེ་ཚོས་ང་ཚོར་ཕན་ཐོགས་ཆེན་པོ་ཞེ་དྲགས་བྱུང་། བར་མཚམས་ཞིག་ནས་ང་ཚོས་ཞིབ་འཇུག་མཐར་ཕྱིན་པ་ཞིག་བྱེད་ཐུབ་པ་བྱུང་སྟེ། ད་ལྟའི་སྐབས་འདིར་གྲངས་ཀ་ཕུལ་བཞག་པ་དེ་ས་གནས་རང་ལ་ས་ཆ་ཨེ་ཀར་དེ་འདྲ་ཞིག་ཡོད་བཞག་ཅིག་དང་། ཞིང་པ་ཡིན་ནའང་གྲངས་ཀ་དེ་རང་ཡོད་པ་བརྒྱ་ཆ་བརྒྱ་ཞུ་ཐུབ་ཀྱི་འདུག ཅེས་གསུངས་སོང་།

སྤྱི་འཐུས་ཡེ་ཤེས་སྒྲོལ་མ་ལགས་ཀྱིས་སྐྱེ་ལྡན་སོ་ནམ་གྱི་ལས་གཞིར་དཀའ་ངལ་འཕྲད་ཀྱི་ཡོད་པ་དེ་སྐྱེ་ལྡན་སོ་ནམ་གྱི་ལག་ཁྱེར་མེད་པས་ཡིན་ནམ། ཡང་ན་ཁྲོམ་ར་མེད་པས་རེད། དཀའ་ངལ་དེ་སེལ་ཐབས་ག་འདྲ་གནང་གི་ཡོད་བཀའ་འདྲི་ཞུས་པར་ནང་སྲིད་བཀའ་བློན་མཆོག་གིས། ད་ལྟ་ཡོད་བཞིན་པའི་སྐྱེ་ལྡན་གྱི་ཞིང་པ་དེ་ཚོར་ལག་འཁྱེར་མ་རག་པའི་དཀའ་ངལ་གྱི་ཐོག་ནས་མ་རེད་ཅེས་ཞུ་བ་ཡིན། གལ་ཏེ་ཚད་ལྡན་གྱི་སྐྱེ་ལྡན་སྒང་འགྲོ་ཡི་ཡོད་ན་ལག་འཁྱེར་རག་ཐབས་ཡོང་གི་འདུག ཡིན་ནའང་། ལག་འཁྱེར་དེ་སྐྱེ་ལྡན་རེད་ཟེར་བའི་དཔང་རྟགས་འདྲ་བོ་ཆགས་ཀྱི་འདུག ཁྲོམ་ར་འཚོལ་རྒྱུ་དེ་ལོགས་ག་ཞིག་རང་བཞིན་གྱིས་ཆགས་འདུག སྐྱེ་ལྡན་ཡོང་འབབ་དེ་ཚོ་བཙོང་མ་ཐུབ་པའི་དཀའ་ངལ་མེད་ཀྱང་དགོས་ངེས་ཀྱི་དངུལ་རག་མ་ཐུབ་པ་དེ་དངོས་ཡོད་རེད། དེར་བརྟེན་ཁ་སང་ཚོང་པའི་ལྷན་ཚོགས་ནང་ཡོད་པའི་ཚོང་པ་ཁག་ཅིག་དང་བཀའ་མོལ་བྱུང་། ཞིང་པ་དང་བོད་པའི་སྤྱི་ཚོགས་ནང་ཡོད་པའི་ཚོང་པ་ཕན་ཚུན་བར་འབྲེལ་བ་གནང་སྟེ། གཅིག་ཕན་གཉིས་ཕན་ཡོད་པ་དེ་འདྲ་གནང་རྒྱུ་མེད་འགྲོ་ཟེར་ནས་ཐབས་ཤེས་ཨེ་འདུག་ལྟ་ཡི་ཡོད། ཅེས་གསུངས་སོང་།

གསར་འགོད་པ། པདྨ་མཚོ།