ཤེས་ཡོན་སྲིད་བྱུས་ནད་པ་རེད།

ཞང་བློན་གྱིས་སྤེལ།

       ངའི་ལས་ཀའི་དུས་བཀག་ཕལ་ཆེ་བ་མཚན་མོར་ཡིན་སྟབས། དེ་ནི་རྒྱ་གར་གྱི་ཉིན་མོའི་དུས་ཚོད་ལ་ཁེལ་ཡོད་པས། དུས་རྒྱུན་གྲོས་ཚོགས་ཀྱི་ཐད་བསྲིང་བརྙན་འཕྲིན་ལྟ་ཐུབ་རྒྱུ་ཧ་ཅང་ཁག་པོ་ཡིན། འོན་ཀྱང་ཐེངས་འདིར་བོད་མི་མང་སྤྱི་འཐུས་ལྷན་ཚོགས་ཤེས་ཡོན་ཚོགས་ཆུང་གིས་ཤེས་ཡོན་སྲིད་བྱུས་ལག་བསྟར་བྱ་ཕྱོགས་ཐད་ཞིབ་འཇུག་བྱས་པའི་གྲུབ་དོན་སྙན་ཐོ་གྲོས་ཚོགས་སུ་སྙན་སྒྲོན་ཞུ་རྒྱུ་དང། དེའི་ཐད་སྤྱི་འཐུས་རྣམ་པས་བགྲོ་གླེང་གནང་རྒྱུ་ཡིན་པས། ངས་ཆེད་མངགས་ཉིན་གཉིས་རིང་ལས་ཀ་ནས་དགོངས་པ་ཞུས་ཏེ་གྲོས་ཚོགས་ཀྱི་ཐད་བསྲིང་བརྙན་འཕྲིན་ལ་བལྟས་པ་ཡིན། དེ་ནི་ང་ཇུས་གཏོགས་ཚ་དྲགས་པ་དང་ལས་རྒྱུ་ཟད་ནས་མ་ཡིན་པར། ཡང་སྙིང་སྙན་ཐོའི་ནང་གནད་དོན་ཅི་ཞིག་འཁོད་ཡོད་མེད་ཤེས་རྟོགས་ཐུབ་རྒྱུའི་ཆེད་དུ་ཡིན། རྒྱུ་མཚན་ནི་འདས་པའི་ལོ་ཤས་ནང་བློ་མཐུན་མང་པོ་ཞིག་གིས་བརྒྱུད་ལམ་སྣ་ཚོགས་ནས་ཤེས་ཡོན་སྲིད་བྱུས་ལག་བསྟར་བྱ་ཕྱོགས་ཐད་བསམ་ཚུལ་གང་མང་སྤེལ་སོང་ཞིང། ཁོ་བོ་རང་ཉིད་ཀྱིས་ཀྱང་གྲོས་ཚོགས་ཚོགས་དུས་བརྒྱད་པའི་སྐབས་ཤེས་ཡོན་སྲིད་བྱུས་ལག་བསྟར་བྱ་ཕྱོགས་ཐད་<<མ་གླེང་ཐབས་མེད་ཀྱི་ཤེས་ཡོན་སྲིད་བྱུས།>> ( https://tibettimes.net/%E0%BD%98%E0%BC%8B%E0%BD%82%E0%BE%B3%E0%BD%BA%E0%BD%84%E0%BC%8B%E0%BD%90%E0%BD%96%E0%BD%A6%E0%BC%8B%E0%BD%98%E0%BD%BA%E0%BD%91%E0%BC%8B%E0%BD%80%E0%BE%B1%E0%BD%B2%E0%BC%8B%E0%BD%A4%E0%BD%BA%E0%BD%A6/ )ཞེས་པའི་རྩོམ་ཡིག་ཅིག་བྲིས་ཤིང། རྩོམ་ཡིག་འདིའི་ནང་འཁོད་པའི་དོན་གནད་མང་དག་ཅིག་ཐོག་གྲོས་ཚོགས་འཐུས་མི་མང་པོས་གླེང་སློང་བྱས་ཡོད་སྟབས། ད་ལྟ་དངོས་སུ་ཤེས་ཡོན་ཚོགས་ཆུང་གིས་ཞིབ་འཇུག་བྱས་པའི་གྲུབ་དོན་སྙན་ཐོ་ཐོན་ཡོང་དུས། དེར་ཤེས་རྟོགས་དང། རྒྱུས་ལོན། མཇུག་སྣོན་བཅས་བྱ་རྒྱུ་ནི་སྤྱི་ཚོགས་དཔྱད་ཞིབ་པ་ཞིག་གི་གཡོལ་དུ་མེད་པའི་འགན་འཁྲི་རེད།

དེའང་བོད་མི་མང་སྤྱི་འཐུས་སྐབས་༡༥ པའི་གྲོས་ཚོགས་ཚོགས་དུས་བརྒྱད་པའི་ཐོག་སྤྱི་འཐུས་རྒྱུན་ལས་ཀྱིས་གཞུང་འབྲེལ་གྲོས་འཆར་ཞིག་བསྣམས་ནས། ཤེས་ཡོན་སྲིད་བྱུས་ལག་བསྟར་བྱ་ཕྱོགས་ཐོག་ཞིབ་འཇུག་ཚོགས་ཆུང་ཆེད་འཛུགས་དགོས་སྐོར་གསུངས་པ་དང། དེར་སྲིད་སྐྱོང་དང་ཤེས་རིག་བཀའ་བློན་ནས་ཚོགས་ཆུང་ཟུར་འཛུགས་མི་དགོས་པའི་ཐབས་ཤེས་གང་དྲགས་བྱས་ཀྱང། སྤྱི་ཚོགས་ནང་གླེང་སློང་ཤུགས་ཆེར་ཁྱབ་ཡོད་པ་དང། སྲིད་བྱུས་དེ་གྲོས་ཚོགས་ནས་མཐའ་མའི་གཏན་འབེབས་གནང་བ་ཡིན་སྟབས། སྤྱི་འཐུས་མང་པོ་ཞིག་གིས་འགན་འཁུར་ཆེ་བཞེས་ཀྱིས་ཞིབ་འཇུག་ཚོགས་ཆུང་དེ་བཙུགས་པ་རེད། ཚོགས་ཆུང་དེ་བཙུགས་ནས་ད་ལྟ་ལོ་གཅིག་ཏག་ཏག་འཁོར་གྱི་ཡོད་ཅིང། ལོ་གཅིག་ནང་ཞིབ་འཇུག་བྱས་པའི་གྲུབ་དོན་སྙན་ཐོ་དེ་ཐེངས་འདིའི་གྲོས་ཚོགས་ནང་བསྣམས་ཡོད། ཞིབ་འཇུག་གི་སྙན་ཐོ་དེ་ད་ལྟ་ངས་དངོས་སུ་མཇལ་རྒྱུ་མ་བྱུང། འོན་ཀྱང་བརྙན་འཕྲིན་ནང་ལྟ་སྐབས་དེབ་ལྗང་ཁུ་ཆེན་པོ་ཞིག་འདུག་ཅིང། དེ་དང་མཉམ་དུ་ཟུར་འཛར་ཡིག་ཆ་མཐུག་ཐག་ཆོད་འགའ་ཤས་ཀྱང་འདུག སྙན་ཐོ་དེ་དངོས་སུ་མཇལ་མེད་ཀྱང་ཚོགས་ཆུང་གི་ཚོགས་གཙོས་གྲོས་ཚོགས་སུ་ཡིག་འབྲུ་རེ་རེ་བཞིན་ལྗགས་ཀློག་གནང་སོང་བས། འདི་ལྟར་བལྟས་ཚེ་ཞིབ་འཇུག་གི་བརྒྱུད་རིམ་རྒྱས་ཙམ་སོང་འདུག་སྙམ་པའི་ཚོར་བ་ཡོང་བས། ལེགས་ཉེས་གང་ལྟར་ཡང། ཤེས་ཡོན་གྱི་ལས་དོན་ཐོག་ཞིབ་འཇུག་བྱས་པ་ཙམ་གྱིས་དེར་ཆེ་བསྟོད་བྱ་དགོས་ངེས་ཤིག་ཡིན་པས། ཐོག་མར་འབྲེལ་ཡོད་རྣམས་ལ་ངོ་སོ་བསྟོད་རྒྱུ་ཡིན། འོན་ཀྱང་ང་ཚོས་ངེས་པར་དུ་ཤེས་དགོས་པ་ནི་གྲུབ་དོན་གྱི་ནང་དོན་ཡིན་པ་ལས་ཞིབ་འཇུག་གི་བརྒྱུད་རིམ་མིན་སྟབས། གཤམ་ནས་ཞིབ་འཇུག་གི་ནང་དོན་གཙོ་བཟུང་གིས་གླེང་རྒྱུ་ཡིན།

ཐེངས་འདིར་ཆེད་འཛུགས་བྱས་པའི་ཤེས་ཡོན་ཚོགས་ཆུང་གི་མི་སྣ་ཕལ་ཆེ་བ་ལོ་མང་རིང་དགེ་རྒན་གྱི་ལས་སྣེར་ཞུགས་མྱོང་མཁན་དང།མང་དག་ཅིག་ཤེས་ཡོན་སྲིད་བྱུས་གཏན་འབེབས་བྱེད་སྐབས་ནས་ཀྱང་གྲོས་ལ་དབང་བ་ཡིན་སྟབས། ཤེས་ཡོན་སྲིད་བྱུས་ལག་བསྟར་བྱས་ཡོད་མེད་ཞིབ་འཇུག་གནང་སྐབས། གཞི་རྩ་གཙོ་བོ་སྲིད་བྱུས་ཀྱི་འབྲུ་དོན་གཞི་ལ་བཞག་ནས་ལྟ་གྲུབ་དང་ལག་ལེན་གཉིས་དངོས་སུ་མཚུངས་ཀྱི་ཡོད་མེད་གཤིབ་བསྡུར་བྱ་རྒྱུར་རེ་བ་ནན་པོ་བཅངས་པ་ཡིན། འོན་ཀྱང་ཤེས་ཡོན་སྲིད་བྱུས་ཀྱི་ལྟ་གྲུབ་འདི་འདྲ་ཡིན་པ་དང། ལག་ལེན་ཐོག་འདི་འདྲ་འགྲོ་གི་འདུག་ཅེས་སྙན་ཐོའི་ཚིག་ཟུར་ཙམ་ལའང་གསལ་མི་འདུག་པས། ཞིབ་འཇུག་གི་དགོས་པ་ཆེ་ཤོས་དེ་ངོས་ཟིན་ཐུབ་མི་འདུག་སྙམ་པའི་ཚོར་སྣང་ཤུགས་ཆེ་བྱུང། ཤེས་ཡོན་ཚོགས་ཆུང་གིས་ཤེས་རིག་ལས་ཁུངས་ལ་སྔ་ཕྱིར་དྲི་བ་བརྒྱ་དང་སུམ་ཅུ་ལྷག་བཏང་ཡོད་ཅིང།དྲི་བ་དེ་དག་ཕལ་ཆེ་བ་ནི་གྲངས་ཐོ་བསྡུ་རུབ་དང། གྲོས་ཆོད་མཇུག་སྣོན་ཙམ་ཡིན་སྟབས། ཤེས་རིག་ལས་ཁུངས་ལ་མཚོན་ན་ཡིག་ཆ་རྙིང་པ་མང་པོ་ཞིག་ཨ་སློག་རྒྱག་རྒྱུ་མ་གཏོགས། ལྟ་གྲུབ་དང་སྲིད་བྱུས་ཀྱི་དགོངས་པ་འགྲེལ་སྟངས་སོགས་ལ་བསམ་གཞིག་བྱ་དགོས་མེད་པས་ལན་འདེབས་བྱ་རྒྱུ་ཧ་ཅང་སྟབས་བདེ་བྱུང་ཡོད། གཞན་ཡང་ཤེས་ཡོན་ཚོགས་ཆུང་གི་དྲི་བའི་ཁྱབ་རྒྱ་ནི་ཤེས་ཡོན་སྲིད་བྱུས་ལས་བརྒལ་ཏེ། ཤེས་རིག་ལས་ཁུངས་ཀྱི་རྒྱུན་ལྡན་གྱི་ལས་དོན་སྤྱིའི་ཐོག་དྲི་བརྩད་བྱས་ཡོད་སྟབས། ཤེས་རིག་ལས་ཁུངས་ནས་ཀྱང་དེ་བཞིན་དུ་ལོ་ངོ་བཅུའི་རིང་ལས་དོན་ཇི་བྱས་ལན་འདེབས་ཀྱི་ཚུལ་དུ་ལས་བསྡོམས་ཕུལ་བས། ཚོགས་ཆུང་གི་གྲུབ་དོན་སྙན་ཐོ་དེ་ནི་ཤེས་རིག་ལས་ཁུངས་ཀྱི་ལས་དོན་སྤྱིར་ཞིབ་འཇུག་བྱས་པའི་སྙན་ཐོ་ལྟ་བུ་ཞིག་ལས་ཁྱད་པར་བ་གང་ཡང་བྱུང་མེད།

ཤེས་རིག་ལས་ཁུངས་ཀྱིས་དགེ་རྒན་འོས་སྦྱོང་དང་ཟབ་སྦྱོང་སྤྲོད་རྒྱུ། སློབ་ཡོན་ཐབས་འཚོལ་བྱ་རྒྱུ། སློབ་དེབ་བཟོ་སྒྲིག་བྱ་རྒྱུ་སོགས་ནི་ཚོགས་ཆུང་མ་བཙུགས་གོང་དུའང་ཤེས་རིག་ལས་ཁུངས་ནས་བརྒྱུད་བསྒྲགས་བྱེད་མུས་ཡིན་ཞིང། ཞིབ་འཇུག་ཚོགས་ཆུང་བཙུགས་རྗེས་ཞིབ་འཇུག་གནང་སའང་ལས་འཆར་འདི་དག་གཙོ་བོར་བཞག་ཡོད་པ་དང། ལས་འཆར་འདི་དག་གི་ལས་བསྡོམས་བསྐྱར་ཟློས་བྱ་རྒྱུ་ཙམ་ཡིན་སྟབས། ཐེངས་འདིའི་ཞིབ་འཇུག་ལ་ཤེས་རིག་ལས་ཁུངས་ཀྱིས་མཐའ་བསྡོམས་བྱས་པ་ནི་“ཤེས་ཡོན་སྲིད་བྱུས་གསོན་པོར་གནས་ཡོད་”ཅེས་པ་དེ་རེད། འོན་ཀྱང་། བརྒྱ་བཤད་སྟོང་ལ་བསྐོར་ཡང། ཡོས་ལ་འབབ་རྒྱུ་རྩམ་པ། ཟེར་བ་ལྟར། ཤེས་ཡོན་སྲིད་བྱུས་ལག་བསྟར་དོན་དང་ལྡན་པ་ཞིག་བྱེད་ཀྱི་ཡོད་དམ། ལག་བསྟར་གང་འདྲ་བྱེད་ཀྱི་ཡོད་ཅེ་ན། ང་ཚོས་སྲིད་བྱུས་ཀྱི་དགོངས་དོན་གསལ་འགྲེལ་མ་བྱེད་ཐབས་མེད་ཆགས་ཡོད། དེའང་ཤེས་ཡོན་སྲིད་བྱུས་ཀྱི་དོན་ཚན་དགུ་པར། “གཞི་རིམ་གོང་མ་བར་གྱི་སློབ་ཚན་དང་ལས་རིམ་གྱི་ནང་དོན་རྣམས་ཤེས་ཡོན་གྱི་སྲིད་བྱུས་གཞིར་བཟུང་གོ་རིམ་དང་འབྲེལ་བ་མཐར་ཆགས་སུ་འགོད་སྒྲིག་དགོས་རྒྱུ།” ཞེས་གསལ་ཡོད། འོན་ཀྱང་ཤེས་རིག་ལས་ཁུངས་ནས་བོད་ཡིག་སློབ་དེབ་ཕུད་པའི་འཛིན་རིམ་དྲུག་པ་ཡན་གྱི་སློབ་དེབ་ཁག་རང་སྐད་ཐོག་གྲ་སྒྲིག་བྱས་ཡོད་དམ། བོད་ཁྱིམ་སློབ་ཁག་ནས་“གལ་ཏེ་སློབ་དེབ་དང་དགེ་རྒན་གྲ་སྒྲིག་ཡོད་ན་ང་ཚོས་ཤེས་ཡོན་སྲིད་བྱུས་ལག་བསྟར་བྱེད་ཀྱི་ཡིན་” ཞེས་ཤོད་ཀྱི་ཡོད་སྟབས། ཤེས་རིག་ལས་ཁུངས་ལ་སློབ་དེབ་གྲ་སྒྲིག་མེད་པའི་རྣམ་པ་གསལ་པོར་མངོན་པས། ཤེས་རིག་ལས་ཁུངས་ལ་དེ་ལྟའི་གྲ་སྒྲིག་ཅིག་ཡོད་དམ། གལ་ཏེ་མེད་ན་ད་ལྟ་དེ་དག་གྲ་སྒྲིག་བྱེད་མཁན་ཤེས་རིག་ལས་ཁུངས་ལ་སློབ་དེབ་རྩོམ་སྒྲིག་བྱེད་མཁན་ཁྱད་ལས་མི་སྣ་ག་ཚོད་ཡོད་དམ། ཁོང་ཚོའི་ཤེས་ཚད་གང་འདྲ་ཡོད། ངས་གོ་ཚོད་བྱས་ན་ཤེས་རིག་ལས་ཁུངས་ནང་སློབ་དེབ་རྩོམ་སྒྱུར་བྱེད་མཁན་གཞུང་བསྐོས་ལས་བྱེད་རྐང་གཅིག་ལས་མེད་ཚོད་འདུག དེ་ལྟར་ཡིན་ཚེ་འཕྲལ་སེལ་གྱི་ལས་འཆར་ལྟ་བུའི་ངོ་བོའི་ཐོག་ནས་སློབ་ཕྲུག་ཁྲི་སྟོང་མང་པོའི་བསླབ་གཞི་ཇི་ལྟར་གྲ་སྒྲིག་བྱེད་ཀྱི་ཡོད་དམ། བོད་མི་མང་སྤྱི་འཐུས་ལྷན་ཚོགས་ཤེས་ཡོན་ཚོགས་ཆུང་གིས་སློབ་དེབ་རྩོམ་སྒྲིག་པའི་གནས་སྟངས་དང། ཤེས་ཡོན་ལྷན་ཚོགས་ཀྱི་ལས་བྱེད་བསྐོ་བཞག་བྱ་སྟངས་སོགས་ཀྱི་ཐད་ཞིབ་འཇུག་བྱས་པའི་གནད་དོན་ཚིག་ཟུར་ཙམ་ལའང་མཇལ་རྒྱུ་མི་འདུག་པས། ཁོང་རྣམས་ཀྱིས་ཀྱང་དེ་ཚོ་གལ་གནད་མེད་པ་ཞིག་ལ་ངོས་འཛིན་གནང་བ་ཡིན་ནམ།

ཤེས་ཡོན་སྲིད་བྱུས་ཀྱི་དོན་ཚན་བཅུ་པར། “ཆུ་ཚོད་གཉིས་གསུམ་གྱི་དུས་ཡུན་ནང་སློབ་ཕྲུག་གི་ཤེས་ཚད་ཚད་འཇལ་བྱེད་པའི་ད་ལྟའི་རྒྱུགས་སྤྲོད་ཀྱི་ལམ་སྲོལ་བཞག་སྟེ་འཛིན་རིམ་བརྒྱད་པའི་བར་དེང་ལུགས་ཀྱི་རྒྱུགས་སྤྲོད་ཟུར་དུ་མ་དགོས་པར་ཕྲུ་གུའི་རྒྱུན་སྤྱོད་དང་འཛིན་གྲྭའི་ནང་གི་དྲི་བ་དྲིས་ལན། ཁྱོན་ཡོངས་ཀྱི་གོ་རྟོགས་དང་ལག་བསྟར་གྱི་ནུས་པ་ལ་ཉམས་ཞིབ་རྒྱུན་སྲིང་གི་ལམ་ནས་འཛིན་གྲྭ་གོང་མར་འཕོ་འོས་མིན་དགེ་རྒན་རྣམས་གོ་བསྡུར་གྱིས་ཐག་གཅོད་བྱ་རྒྱུ།”ཞེས་གསལ་ཡོད། འོན་ཀྱང་ཤེས་ཡོན་སྲིད་བྱུས་ལག་བསྟར་བྱེད་ཀྱི་ཡོད་ཟེར་མཁན་སློབ་གྲྭ་ཡོངས་རྫོགས་ཀྱིས་དེང་ལུགས་ཀྱི་ཡིག་རྒྱུགས་སྤྲོད་ལེན་བྱེད་ཀྱི་ཡོད་པས། ཤེས་ཡོན་སྲིད་བྱུས་ཀྱི་འབྲུ་དོན་ལག་ལེན་ལ་ཁེལ་ཡོད་དམ། གཞན་ཡང་ཤེས་ཡོན་སྲིད་བྱུས་ལག་བསྟར་བྱ་མཁན་གྱི་སློབ་གྲྭ་དང་སློབ་གྲྭ་གཞན་དག་དབར་ཡིག་རྒྱུགས་ཀྱི་སྐར་གྲངས་ཐོག་ནས་གྲུབ་འབྲས་གཤིབ་བསྡུར་བྱེད་ཀྱི་ཡོད་པས། དེ་སྲིད་བྱུས་ཀྱི་དགོངས་དོན་དང་མཚུངས་པ་ཡིན་ནམ།

ཤེས་ཡོན་སྲིད་བྱུས་ཀྱི་དོན་ཚན་བཅུ་གཅིག་པར། “དགེ་རྒན་ནི་སྤྱི་ཚོགས་ནང་གལ་གནད་ཆེ་ཤོས་ཡིན་སྟབས། མི་གཤིས་དང་སྤྱོད་ལམ་ལེགས་ཤོས། ཤེས་ཡོན་གནས་ཚད་བཟང་ཤོས་རྣམས་དགེ་རྒན་གྱི་ལས་སྒོར་འཇུག་ཐབས་བྱ་རྒྱུ་དང། དགེ་རྒན་གྱི་ཆེ་མཐོང་དང་མཐུན་རྐྱེན་བཟང་པོ་ཡོངས་ཐབས་སུ་ཁྲིམས་ལུགས་ཀྱི་ཆ་རྐྱེན་བསྐྲུན་དགོས།” ཞེས་གསལ་བ་ལྟར། བོད་མི་མང་སྤྱི་འཐུས་ལྷན་ཚོགས་དང། ཤེས་རིག་ལས་ཁུངས་ཀྱིས་དེ་ལྟའི་ཁྲིམས་ལུགས་ཤིག་བསྐྲུན་ཡོད་དམ། ཤེས་ཡོན་ཚོགས་ཆུང་གི་གྲུབ་དོན་སྙན་ཐོའི་ནང་སྲི་ཞུ་བ་ཡིག་གད་ཅིག་གི་གླ་ཆ་དང་གཞི་རིམ་གོང་མའི་དགེ་རྒན་ (PGT) ཞིག་གི་གླ་ཆ་གཉིས་འདྲ་པོ་ཡོད་སྐོར་འཁོད་ཡོད་པས། སྲིད་བྱུས་ཀྱི་དགོངས་དོན་ལག་བསྟར་དོན་འཁྱོལ་འབྱུང་གི་ཡོད་དམ། ལས་བྱ་ཡིག་གད་ཅིག་ལ་ཤེས་ཚད་ཀྱི་ཆ་ནས་འཛིན་རིམ་བརྒྱད་པ་ཙམ་གྱིས་འགྲིག་གི་ཡོད་པ་དང། གཞི་རིམ་གོང་མའི་དགེ་རྒན་ཞིག་ལ་མ་མཐར་ཡང་གཙུག་ལག་རབ་འབྱམས་པ་དང་དགེ་རྒན་འོས་སྦྱོང་གི་ལག་ཁྱེར་དགོས་ཀྱི་ཡོད་པས། ཤེས་རིག་ལས་ཁུངས་ཀྱིས་ཤེས་ཡོན་ཅན་ལ་ངོས་འཛིན་བྱེད་སྟངས་གང་འདྲ་ཡིན་ནམ།

ཡང་ཤེས་ཡོན་སྲིད་བྱུས་ཀྱི་དོན་ཚན་བཅུ་གཉིས་པར་ “བཙན་བྱོལ་བོད་མིའི་ཤེས་ཡོན་སློབ་སྦྱོང་གི་དགོས་དམིགས་དང་། སྒྲོམ་གཞི། སློབ་ཚན། རྒྱུགས་སྤྲོད། དགེ་རྒན། འཛིན་སྐྱོང་བཅས་ཀྱི་སྐོར་སྲིད་བྱུས་དང་། དེ་དག་ལག་བསྟར་བྱེད་ཕྱོགས་ཀྱི་ལམ་སྟོན་བཅས་བོད་མིའི་སྒྲིག་འཛུགས་ཀྱིས་དུས་ནས་དུས་སུ་གཏན་ལ་ཕབ་པ་ལྟར། བོད་མིའི་སྒྲིག་འཛུགས་ཀྱིས་ངོས་འཛིན་ཡོད་པའི་བོད་མིའི་སློབ་གྲྭ་ཡོངས་ཀྱིས་གཅིག་གྱུར་དུ་ལག་བསྟར་དགོས་པ་ཡིན།” ཞེས་གསལ་ཡོད། འོན་ཀྱང་སཾ་བྷོ་ཊ་སློབ་ཁག་མ་གཏོགས་སློབ་གྲྭ་གཞན་གྱིས་ཤེས་ཡོན་སྲིད་བྱུས་ལག་བསྟར་བྱེད་ཀྱི་མེད་པ་ནི་ཀུན་གྱིས་ཤེས་གསལ་ཡིན་ལ། ཤེས་རིག་ལས་ཁུངས་ནས་ཀྱང་དེ་ལྟར་ངོས་འཛིན་གནང་གི་ཡོད། འོན་ཀྱང་སློབ་གྲྭའི་སྡེ་ཁག་གཞན་གྱི་ལས་སྣེ་རེ་ཟུང་གིས་བོད་མིའི་སྒྲིག་འཛུགས་ཀྱི་བཀོད་ཁྱབ་ལ་བཀའ་བརྩི་དང་ལེན་མི་བྱེད་པར་ངོ་གནོང་བྱ་རྒྱུའི་ཚབ་ཏུ། འགྲེལ་བཤད་སྣ་ཚོགས་ཀྱི་ཐོག་ནས་བཀའ་ཤག་དང་གྲོས་ཚོགས་ལ་ཚུར་རྫིག་རྫིག་གཏོང་བ་ལྟ་བུ་བྱེད་པ་ནི་ཤིན་ཏུ་མི་འོས་པ་ཡིན་ཞིང། ལྷག་པར་བོད་མི་མང་སྤྱི་འཐུས་ཀྱི་མཚན་གནས་བཞེས་པའི་གྲོས་སུ་གཏོགས་པ་རེ་ཟུང་གིས་ཀྱང་དེ་ལ་དེ་འབྲེལ་གྱིས་གྲོས་ཚོགས་ནང་འགྲེལ་ལོག་བྱས་པ་ནི། སྤྱི་འཐུས་ཀྱི་འོས་འགན་མི་འཁུར་བ་ཡིན་ལ་མི་རིགས་ཤིག་གི་སློབ་གསོའི་ཕུགས་དམིགས་ལ་རྡོག་རོལ་གཏོང་བ་རང་ཡིན། སཾ་བྷོ་ཊའི་ཁྱབ་ཁོངས་སུ་ཡོད་པའི་སློབ་ཕྲུག་གི་གྲངས་འབོར་གྱིས་སློབ་ཕྲུག་སྤྱིའི་བརྒྱ་ཆ་སུམ་ཅུ་ཡང་ཟིན་གྱི་མེད་པས། དོན་དངོས་ཐོག་ཤེས་ཡོན་སྲིད་བྱུས་ལག་བསྟར་མི་བྱེད་མཁན་གྱི་སློབ་གྲྭ་དང་སློབ་ཕྲུག་བརྒྱ་ཆ་༧༠ ལྷག་ཡོད་སྟབས། ཤེས་ཡོན་སྲིད་བྱུས་གསོན་པོར་གནས་ཡོད་ཞེས་པ་དེ་དོན་དངོས་ཡིན་ནམ། ལར་ནས་ཤེས་རིག་གིས་ངོས་འཛིན་ཡོད་པའི་སློབ་གྲྭའི་སྡེ་ཁག་ནས་སཾ་བྷོ་ཊ་ནི་གསར་ཤོས་ཡིན་ཡང། དེས་ཤེས་ཡོན་སྲིད་བྱུས་ལག་བསྟར་བྱེད་ཐུབ་སར། ཉམས་མྱོང་མང་པོ་ཡོད་པ་དང་མཐུན་རྐྱེན་འཛོམས་པོ་ཡོད་པའི་སྡེ་ཁག་གཞན་ཚོས་ད་དུང་ཡང་གྲ་སྒྲིག་དགོས་འདུག་ཅེས་པ་ནི་ཉི་མ་ཕུད་ཐབས་དམ་དང་ཁ་གཡར་ས་ཞིག་འཚོལ་བ་མིན་ནམ།

       གཞན་ཡང་དོན་ཚན་བཅུ་གཉིས་པར་ “ཤེས་ཡོན་ཐོག་བཙན་བྱོལ་བོད་གཞུང་ལ་སློབ་སྟོན་འབུལ་རྒྱུ་དང། སྲིད་བྱུས་ལག་བསྟར་སྐབས་བཏང་འཛིན་ལྟ་རྟོག་་་སོགས། གཞི་རིམ་ཤེས་ཡོན་དང་འབྲེལ་བའི་ལས་དོན་ཡོངས་ལ་ལྟ་རྟོག་དང་བཏང་འཛིན་བྱེད་པོའི་བཙན་བྱོལ་བོད་མིའི་ཤེས་ཡོན་ལྷན་ཚོགས་ཤིག་གཏན་འཇགས་བསྐོ་འཛུགས་བྱ་རྒྱུ།” ཞེས་གསལ་ཡོད། དེ་ལ་དེར་བརྟེན་གྱིས་བཀའ་ཤག་སྐབས་གོང་མས་ཤེས་ཡོན་ལྷན་ཚོགས་བསྐོ་འཛུགས་བྱས་པ་རེད། འོན་ཀྱང་བཀའ་ཤག་སྐབས་འདི་པས་ཤེས་ཡོན་ལྷན་ཚོགས་དེ་བཞིན་ཤེས་རིག་ལས་ཁུངས་ཀྱི་ཚན་པ་ཞིག་ཏུ་བསྒྱུར་བ་ལས། བཙན་བྱོལ་སྒྲིག་འཛུགས་ལ་སློབ་སྟོན་འབུལ་མཁན་གྱི་རང་དབང་ཅན་གྱི་སྡེ་ཚན་ཞིག་ལ་ངོས་ལེན་བྱས་མེད། དེ་ལྟར་ན་ཤེས་རིག་ལས་ཁུངས་ཀྱི་ཚན་པ་ཞིག་གིས་ཤེས་རིག་ལས་ཁུངས་དང་བཀའ་ཤག་ལ་ལམ་སྟོན་གང་འདྲ་བྱེད་ཀྱི་ཡོད་དམ། ཤེས་རིག་ལས་ཁུངས་ཀྱི་ཚན་པ་ཞིག་ལ་“གཞི་རིམ་ཤེས་ཡོན་དང་འབྲེལ་བའི་ལས་དོན་ཡོངས་ལ་ལྟ་རྟོག་བཏང་འཛིན་བྱེད་”པའི་དབང་ཚད་ཡོད་དམ།

       ཡང་སློབ་ཁྲིད་ཀྱི་བརྒྱུད་ལམ་སྐད་ཡིག་ཐོག་ཤེས་རིག་ལས་ཁུངས་ནས་སྐབས་རེ་བོད་ཡིག་གཙོ་བཟུང་བྱེད་ཟེར་བ་དང། སྐབས་རེ་ཨིན་ཡིག་གཙོ་བཟུང་བྱེད་ཟེར་བ། ཡང་ལན་རེར་སྐད་གཉིས་ཟུང་འབྲེལ་བྱེད་ཟེར་བ་སོགས་བཀའ་རྒྱ་འདྲ་མིན་སྣ་ཚོགས་བཏང་ཡོད་པས། ཤེས་ཡོན་ཚོགས་ཆུང་གིས་བཀའ་རྒྱ་འདི་དག་ལ་ཞིབ་འཇུག་བྱས་པའི་གྲུབ་དོན་གང་ཡང་སྟོན་མི་འདུག་སྟབས། ཡང་སྙིང་སློབ་ཁྲིད་ཀྱི་བརྒྱུད་ལམ་སྐད་ཡིག་གང་ཞིག་ལ་ངོས་འཛིན་བྱས་ཡོད་དམ། དེ་བཞིན་བྷུན་ཏར་གྱི་དགེ་འོས་པ་དེ་དག་བོད་སྐད་བརྒྱུད་ལམ་ནས་སློབ་ཁྲིད་བྱ་རྒྱུར་གསོ་སྐྱོང་བྱེད་ཀྱི་ཡོད་ཟེར་ཡང། ཁོང་ཚོར་བོད་སྐད་བརྒྱུད་ལམ་ནས་སློབ་ཁྲིད་བྱ་རྒྱུའི་སྦྱོང་བརྡར་ཉིན་གཅིག་ཀྱང་སྤྲད་ཡོད་ཚོད་མི་འདུག་ལ། དེ་འབྲེལ་གྱི་དགེ་རྒན་གཅིག་ཀྱང་ཡོད་ཚོད་མི་འདུག་པས། དགེ་རྒན་གྲ་སྒྲིག་གང་འདྲ་བྱས་ཡོད་དམ།

དེ་ལྟར་ང་ཚོས་གཏིང་ཟབ་ས་ནས་སྲིད་བྱུས་ཀྱི་འབྲུ་དོན་དང་དོན་དངོས་ཀྱི་གནས་སྟངས་གཉིས་གཤིབ་བསྡུར་བྱེད་སྐབས། ཤེས་ཡོན་སྲིད་བྱུས་གསོན་པོར་གནས་ཡོད་ཟེར་རུང། དེ་ནི་འཆི་བདག་གིས་མཐའ་ནས་བསྐོར་བའི་ནད་པ་ཅིག་ཡིན་པ་རྟོགས་ཐུབ་ལ། ཞིབ་འཇུག་གནང་མཁན་བཀུར་འོས་སྤྱི་འཐུས་ཤིག་གིས་གྲོས་ཚོགས་ནང་ཤེས་ཡོན་སྲིད་བྱུས་ནད་པ་རེད་འདུག་ཅེས་གསུངས་པ་དེ་དོན་ལ་གནས་འདུག

གང་ལྟར་ཡང་ད་ནི་ཚོགས་ཆུང་གིས་གྲོས་ཚོགས་ལ་གསལ་བཤད་འཕར་མ་འདྲ་གནང་དགོས་ཡོད་ན་མ་གཏོགས་ཚོགས་ཆུང་གི་ལས་དོན་ཕལ་ཆེ་བ་གྲུབ་ནས། གྲོས་ཚོགས་ཀྱིས་བགྲོ་གླེང་གནང་རྗེས་གཞུང་འབྲེལ་གྲོས་ཆོད་འཇོག་རྒྱུའི་དུས་ལ་སླེབས་ཡོད་པས། ང་ཚོས་འཆི་ལ་ཉེ་བའི་སྲིད་བྱུས་དེའི་མིག་འཚུམ་སྟངས་ལ་བལྟས་ནས་མི་སྡོད་པར། ངེས་པར་དུ་མི་རིགས་ཤིག་གི་སློབ་གསོའི་གལ་གནད་ངོས་འཛིན་ཐུབ་པའི་སྒོ་ནས། དེ་དང་མཐུན་པའི་གྲོས་ཆོད་འཇོག་རྒྱུར་བཀུར་འོས་སྤྱི་འཐུས་རྣམ་པས་དགོངས་པ་ཆེ་བཞེས་གནང་གལ།

དེ་ཡང་ཚོགས་ཆུང་གི་རྒྱབ་གཉེར་བསམ་འཆར་ཁག་ནི་ཐེངས་འདིའི་གྲུབ་དོན་སྙན་ཐོའི་ཆ་ཤས་གལ་ཆེ་ཤོས་ཡིན་པས། རྒྱབ་གཉེར་བསམ་འཆར་དེ་དག་ལ་ངོས་ལེན་བྱེད་དགོས་པ་མ་ཟད། ལྷག་པར་དུ་ཤེས་རིག་ལས་ཁུངས་ཀྱི་ཁྱབ་ཁོངས་སུ་ཡོད་པའི་སློབ་གྲྭ་ཡོངས་རྫོགས་ཀྱིས་ཤེས་ཡོན་སྲིད་བྱུས་གཅིག་མཚུངས་སུ་ལག་བསྟར་བྱ་རྒྱུར་གྲོས་ཆོད་ངེས་པར་འཇོག་དགོས་མཐོང། རྒྱུ་མཚན་ནི་ཤེས་ཡོན་སྲིད་བྱུས་ལག་བསྟར་མི་བྱེད་མཁན་གྱི་འོག་ཏུ་སློབ་ཕྲུག་བརྒྱ་ཆ་༧༠ ལྷག་ཡོད་པས། དེ་དག་ཟམ་པ་ཅིག་གི་འོག་ཏུ་འགྲོ་བའི་ཆུ་བཞིན་བསྡུས་མ་ཐུབ་ཚེ། དཀའ་ངལ་ཆེ་ས་དེ་དེ་མུར་ལྷག་ཉེན་ཡོད། གཞན་ཡང་བོད་སྐད་བརྒྱུད་ལམ་ནས་སློབ་ཁྲིད་བྱ་ཐུབ་མཁན་གྱི་དགེ་རྒན་གསོ་སྐྱོང་བྱ་དགོས་པ་དང། སློབ་དེབ་རྩོམ་སྒྲིག་བྱེད་མཁན་གྱི་ཁྱད་མཁས་པ་འདང་ངེས་བསྐོ་གཞག་བྱ་དགོས་པ། དུས་ཚོད་རྒྱས་བཅད་ནང་སློབ་དེབ་ཡོངས་རྫོགས་གྲ་སྒྲིག་དགོས་པ་བཅས་ཀྱི་གྲོས་ཆོད་ཀྱང་ངེས་པར་འཇོག་གལ། དེ་བཞིན་ཤེས་ཡོན་ལྷན་ཚོགས་ཟུར་འཛུགས་བྱས་པའི་ཐོག་མའི་དམིགས་ཡུལ་ལྟར། ཤེས་རིག་ལས་ཁུངས་ཀྱི་ཚན་པའི་ངོ་བོར་མ་ཡིན་པར། རང་དབང་ཅན་གྱི་སྡེ་ཚན་དུ་དབྱེ་སྟེ། དེའི་ནང་ཤེས་ཡོན་ཅན་གྱི་མི་སྣ་བསྐོ་གཞག་བྱ་རྒྱུ་སོགས་ཀྱི་གྲོས་ཆོད་འཇོག་གལ་མཐོང། བོད་མི་མང་སྤྱི་འཐུས་ལྷན་ཚོགས་ནས་དེ་ལྟའི་གྲོས་ཆོད་ཅིག་འཇོག་ཐུབ་ཚེ་སྲིད་སྐྱོང་དང་བཀའ་བློན་སུ་འདྲ་ཞིག་སླེབས་ཀྱང། ཤེས་ཡོན་སྲིད་བྱུས་ལག་བསྟར་བྱ་རྒྱུར་འགྱུར་བ་ཆེན་པོ་འགྲོ་ངེས་མིན། དེ་མིན་ཕུགས་རེ་ཆེན་པོ་ཡོད་པའི་སྲིད་བྱུས་དེ་ང་ཚོ་དང་གཏན་དུ་གྱེས་ངེས་ཤིང། ཤེས་རིག་བཀའ་བློན་ཙམ་མིན་པར་ང་རང་ཚོ་ཚང་མ་སྲིད་བྱུས་དེ་གསོད་མཁན་གྱི་གཤེད་མར་འགྱུར་ངེས་སོ། །