དེ་རིང་དབུ་མའི་ལམ་གྱི་སྲིད་བྱུས་གཏན་འབེབས་གནང་བའི་ཉིན་མོ་སྲུང་གཙི་སྐབས་སྤྱི་སྒེར་སུ་ཡིན་རུང་རྒྱ་ནག་ལ་ཁ་ཕྱོགས་ཏེ་གཅིག་སྒྲིལ་གྱིས་འཐབ་རྩོད་གནང་རྒྱུ་གལ་ཆེན་ཡིན་སྐོར་བརྗོད་སོང་།
དེ་རིང་སྔ་དྲོའི་ཆུ་ཚོད་ ༡༠ པའི་ཐོག་དྷ་ས་དབུས་གཙང་ཆོས་ཁའི་ཚོགས་ཁང་དུ། དབུ་མའི་ལམ་གྱི་དབུས་མི་མང་ལས་འགུལ་ཁང་གི་གོ་སྒྲིག་འོག ཕྱི་ལོ་ ༡༩༩༧ ཟླ་ ༩ ཚེས་ ༡༨ ཉིན་བོད་མི་མང་སྤྱི་འཐུས་ལྷན་ཚོགས་ནས་དབུ་མའི་ལམ་གྱི་སྲིད་བྱུས་གཏན་འབེབས་གནང་བའི་ཉིན་མོ་སྲུང་གཙི་གནང་སོང་བ་དང་། མཛད་སྒོའི་ཐོག་སྤྱི་འཐུས་ལས་ཐོག་དང་ལས་ཟུར་ཁག་ཅིག དེ་བཞིན་ལས་འགུལ་ཁང་གི་རྒྱུན་ལས་ཚོགས་མི་བཅས་མི་གྲངས་ ༤༠ མ་ཟིན་ཙམ་འཛོམས་འདུག
མཛད་སྒོའི་ཐོག་དབུ་མའི་ལམ་གྱི་སློབ་སྟོན་པ་དམ་ཆོས་དཔལ་བཟང་ལགས་ཀྱིས་ཡིག་ཐོག་གཏམ་བཤད་གནང་སྐབས། དེ་རིང་གི་གལ་ཆེའི་ཉིན་མོ་འདིའི་གོ་སྐབས་བཟུང་ནས་ས་གནས་ཁག་ཏུ་ཡོད་པའི་མི་མང་དང་ས་གནས་འབྲེལ་མཐུད་པ་བཅས་ནས། ད་ལྟའི་བར་ལྷག་བསམ་དང་རྒྱལ་ཞེན་ཆེན་པོའི་འགན་འཁུར་དང་ཆོད་སེམས་བརྟན་པོས་ལངས་ཕྱོགས་བཟུང་སྟེ། ༧གོང་ས་མཆོག་གི་དགོངས་གཞི་དང་ལྷག་དོན་བོད་མིའི་སྒྲིག་འཛུགས་ཀྱིས་གཏན་ལ་ཕབ་པའི་སྲིད་བྱུས་ལ་རྒྱབ་སྐྱོར་ཀྱི་རང་འཁྲིའི་ལས་འགན་ཧུར་འབད་བྱས་དང་བྱེད་བཞིན་པར་ཡི་རངས་བསྔགས་བརྗོད་དང་། འབྱུང་འགྱུར་ཡང་ཚོགས་ཆེན་སྐབས་བཞི་པ་དང་འགན་འཛིན་ལྷན་ཚོགས་བཅས་ཀྱི་གྲོས་ཆོད་ཁག་དང་། དེ་བཞིན་སྲིད་བྱུས་ལ་སྨན་པའི་དམིགས་བསལ་གྱི་ལས་འཆར་ཁག་སྐབས་མཚམས་སོ་སོར་ལམ་སྟོན་ཞུས་པ་ལྟར་ལག་བསྟར་དོན་འཁྱོལ་ཡོང་བའི་འབོད་བསྐུལ་ཡང་ཞུ་བཞིན་ཡོད། ཅེས་བརྗོད་སོང་།
ཡང་སྤྱི་ཚོགས་ནང་དབུ་མའི་ལམ་གྱི་ཐོག་གླེང་སློང་སྣ་ཚོགས་བྱེད་བཞིན་པའི་སྐོར་ལ་ཁོང་གིས། དབུ་མའི་ལམ་ནི་བོད་རྒྱ་གཉིས་ཀྱི་རྩོད་རྙོག་འདུམ་སྒྲིག་བྱེད་པའི་རང་གཞན་གཉིས་ཕན་གྱི་རྨང་གཞིར་བཏིང་པའི་ཆབ་སྲིད་ཀྱི་སྲིད་བྱུས་ཤིག་ཡིན་ལ། ༧གོང་ས་མཆོག་གི་དབུ་འཁྲིད་པའི་དབུས་བོད་མིའི་སྒྲིག་འཛུགས་ཀྱི་སྲིད་བྱུས་དང་ཆབ་སྲིད་ཀྱི་ལང་ཕྱོགས་དེ་ཡིན། སྲིད་བྱུས་དེའི་སྙིང་པོ་ནི་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་ནང་བོད་རིགས་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་གི་གནས་བབ་འཐོབ་རྒྱུ་ཡིན་པ་མ་ཟད། བོད་རང་བཙན་བསྐྱར་གསོ་བྱས་ཏེ་རྒྱ་ནག་ནས་ཁ་བྲལ་ཏུ་འགྲོ་རྒྱུའི་མཐའ་དང་། ད་ལྟའི་རྒྱ་གཞུང་གིས་བོད་ལ་འཛིན་པའི་གཉའ་གནོན་དང་བཤུ་བཞོག བཙན་གནོན་བཅས་ཀྱི་སྲིད་བྱུས་གནས་བབ་རང་འཇགས་བསྡད་རྒྱུའི་མཐའ་དང་བྲལ་ཏེ། བོད་རྒྱ་ཞི་འགྲིག་གི་ཐབས་ལམ་གཉིས་ཕན་གྱི་རང་བཞིན་ཡིན་ཁར། དེའི་སྒྲུབ་ཐབས་ཀྱི་སྲིད་བྱུས་གང་ཞིག་ཡིན་རུང་འཚེ་མེད་ཞི་བའི་ངོ་བོ་ལས་འདའ་རུ་མེད་པ་ནི་སྲིད་བྱུས་འདིས་འདོར་ཐབས་མེད་པའི་སྙིང་པོ་ཁོ་ན་ཡིན། དབུ་མའི་ལམ་གྱི་སྲིད་བྱུས་ནི་ཐོག་མར་༧གོང་ས་མཆོག་གི་དགོངས་འཆར་གནང་བ་ལས་དེའི་གཏན་འབེབས་ནི། བོད་གཞུང་མང་གཉིས་ཀྱིས་བརྟག་དཔྱད་ཞིབ་འཇུག་དང་དེང་རབས་ཀྱི་མང་གཙོའི་ལམ་སྲོལ་དང་མཐུན་པའི་བོད་རྒྱ་ཆེའི་མི་མང་གི་སྤྱི་མོས་ཐོག་ནས་བོད་རྒྱ་ཞི་འགྲིག་གི་སྲིད་བྱུས་སུ་གཏན་འབེབས་བྱས་པ་ཞིག་ཀྱང་ཡིན། འོན་ཀྱང་། དབུ་མའི་ལམ་གྱི་སྲིད་བྱུས་ནི་དབུས་བོད་མིའི་སྒྲིག་འཛུགས་ཀྱི་ཆབ་སྲིད་ལངས་ཕྱོགས་སུ་གཏན་འབེབས་བྱས་ཏེ་བགྲང་བྱ་གང་མང་ཞིག་འགོར་ཟིན་ནའང་། བོད་རྒྱ་ཆེའི་མི་མང་གིས་སྲིད་བྱུས་དེར་དོ་སྣང་མེད་པ་དང་། གཞུང་སྒེར་གྱི་མི་སྣ་རེ་འགས་སྲིད་བྱུས་དེར་བསམ་བཞིན་འགྲེལ་ལོག་གིས་དཀྲོགས་གཏམ་སྣ་ཚོགས་བྱས་རྐྱེན་མི་མང་ལ་རང་རྐྱ་ཐུབ་པའི་ཆབ་སྲིད་ཀྱི་ལངས་ཕྱོགས་མེད་པས་བོད་མི་ནང་ཁུལ་གྱི་གཅིག་སྒྲིལ་དང་མཉམ་ལས། མཐུན་སྒྲིལ་གྱི་སྟོབས་ཤུགས་སྤུངས་མ་ཐུབ་པའི་ཉེར་ལེན་གྱིས་ད་བར་དཀའ་ངལ་སྣེ་མང་གི་རང་བཞིན་ཏུ་གྱུར་ཡོད། ཅེས་སོགས་བརྗོད་སོང་།
སྐུ་མགྲོན་གཙོ་བོ་སྨོན་ལམ་བརྡ་འཕྲིན་ཞིབ་འཇུག་ཁང་གི་བློ་བཟང་ཆོས་འཕེལ་ལགས་ཀྱིས། ང་ཚོས་རྩ་དོན་ལ་ལས་ཀ་དང་སྐད་ཆ་ག་རེ་བཤད་པ་ཡིན་ནའང་རྡོག་རྩ་གཅིག་ཏུ་སྒྲིལ་ནས་ཁ་གཏད་གཅོག་ས་དེ་རྒྱ་ནག་ཡིན་སྟབས། ང་ཚོའི་ཕྱག་ལས་དང་ཐབས་ལམ་ག་རེ་ཡིན་ནའང་ཁྱད་པར་ཡོད་པ་མ་རེད། དེ་བཞིན་སྤྱི་དང་སྒེར་ག་རེ་ཡིན་ནའང་ཁྱད་པར་ཡོད་པ་མ་རེད། རྒྱ་ནག་སྲིད་གཞུང་ཁོ་རང་ཚོའི་ཐོག་ལ་ཁ་ཕྱོགས་ནས་ཐབས་ལམ་ཞིག་ལ་འགྲོ་རྒྱུ་དེ་གལ་ཆེ་ཤོས་མཐོང་གི་ཡོད། སྤྱིར་བཏང་བསམ་བློ་གཏང་བ་ཡིན་ན་དབུ་མའི་ལམ་བོད་དོན་དཀའ་ངལ་སེལ་ཆེད་གཅིག་པུ་མ་རེད། འཛམ་གླིང་ཞི་བདེ་མཚོན་པའི་ཐབས་ལམ་བླ་ན་མེད་པའི་ལྟ་གྲུབ་ཞིག་རེད། དེ་འདྲའི་ལྟ་གྲུབ་གནང་མཁན་དེ་༧རྒྱལ་བ་རིན་པོ་ཆེ་སྐུ་འཁྲུངས་ ༡༤ པ་འདི་རེད། ཅེས་དང་།
ཡང་ཁོང་གིས། དབུ་མའི་ལམ་ང་ཚོའི་རང་དབང་འཐབ་རྩོད་བྱེད་པའི་ཐབས་ལམ་ཡག་ཤོས་དང་ཕུལ་ཏུ་བྱུང་བ་ཞིག་ཡིན་པར་ངོས་འཛིན་གནང་ཐུབ་དང་མ་ཐུབ་མང་པོ་ཞིག་བསླེབ་ཀྱི་ཡོད་སྟབས། སྤྱིར་བཏང་བསམ་བློ་གཏང་བ་ཡིན་ན་དེ་བློ་ཕམ་བྱེད་དགོས་པའི་གནས་ཚུལ་ཞིག་རེད་བསམ་གྱི་ཡོད། དེ་འདྲའི་ཐོག་ནས་དབུ་མའི་ལམ་ལས་འགུལ་ཁང་བཙུགས་ནས་ལོ་བདུན་བརྒྱད་ཅིག་ཕེབས་ཀྱི་ཡོད་པས། ཚོགས་པ་ཞིག་དང་སྒྲིག་འཛུགས་ཤིག་གི་ཐོག་ནས་མར་དེ་འདྲ་གནང་པ་དེ་ཧ་ལས་པའི་ཡག་པོ་དང་རླབས་ཆེན་ཞིག་བྱུང་འདུག་ལ། དབུ་མའི་ལམ་ལས་འགུལ་ཚོགས་པའི་ངོས་ནས་ང་རང་ཚོའི་སྤྱི་ཚོགས་ནང་གི་མི་མང་དང་སློབ་གྲྭ་ཁག་མང་པོ་ཞིག་ལ་ཟབ་སྦྱོང་དང་བརྒྱུད་སྐུལ་མང་པོ་ཞིག་གནང་བསྡད་ཡོད་པ་དང་། དེ་བཞིན་གལ་ཆེ་ཤོས་དེ་ལས་འགུལ་རྒྱ་ཆེ་རུ་གཏང་ནས་ག་རེ་གནང་དགོས་ཀྱི་རེད་ལབ་ན། དབུ་མའི་ལམ་ལས་འགུལ་ཚོགས་པའི་ཐོག་ནས་ཤུགས་ཆེ་རུ་གཏང་ནས་ཚོགས་པ་ཁག་མང་པོར་འབྲེལ་བ་བྱས་ཏེ། རྒྱ་ནག་ཕྱོགས་ལ་ཁ་ཕྱོགས་པ་དང་རྒྱ་ནག་གཞུང་དང་མི་མང་། ལྷག་པར་དུ་རྒྱ་ནག་གི་ཤེས་ཡོན་པའི་སྡེ་ལ་དབུ་མའི་ལམ་གྱི་ལྟ་གྲུབ་ཤུགས་ཆེན་པོ་ཞིག་གི་ཐོག་ཁ་ཕྱོགས་ཐུབ་པ་ཡིན་ན། ༧རྒྱལ་བ་རིན་པོ་ཆེའི་དགོངས་གཞི་བླ་ན་མེད་པ་ཞིག་བསྒྲུབ་ཐུབ་ཀྱི་རེད་བསམ་པའི་རེ་བ་ཆེན་པོ་ཡོད། ཞེས་སོགས་བརྗོད་སོང་།
གསར་འགོད་པ། འཇིགས་མེད་རྒྱ་མཚོ།
