“སྤྱི་པའི་འགན་འཁུར་བའི་དམ་བཅའ་ཞིག་བཞག་ཚར་རྗེས་སྤྱི་པའི་ལས་དོན་ག་འདྲ་ཞིག་ཡིན་ནའང་དེའི་ནང་མཉམ་ཞུགས་བྱེད་ཐུབ་པའི་ནུས་པ་དང་འཇོན་ཐང་། དུས་ཚོད་གཏོང་ཐུབ་དགོས་པ་རེད།”
དེ་རིང་ཉིན་རྒྱབ་ཆུ་ཚོད་ ༢།༣༠ མ་ཟིན་ཙམ་ལ། སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༠ པ་མཇུག་སྒྲིལ་སོང་བ་དང་། སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་ཚོགས་དུས་འདིའི་ལས་རིམ་ཁག་གི་ཐོག་ཕྱོགས་སྡོམ་གནང་སྐབས། བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་མ་ལག་དང་བཅས་པའི་ལས་སྡོམ་ཐོག་སྤྱི་འཐུས་རྒྱུན་ལས་ནས་ཞིབ་འཇུག་གནང་བ་དང་། ཆེད་འཛུགས་གནང་བའི་ཚོགས་ཆུང་ཁག་གིས་ཞིབ་འཇུག་དང་འདྲི་རྩད་ཞིབ་ནན་གནང་བ་བརྒྱུད་གཞུང་མང་གཉིས་ལ་ཐུགས་ཕན་ཆེན་པོ་གསོས་ཡོད་ལ། ཚང་མས་སྒྲིག་འཛུགས་ཤིག་གི་སྤྱི་དོན་གྱི་ཆེད་དུ་སྐུ་ལས་སྐྱོན་གྱི་ཡོད་པ་མ་གཏོགས་སྒེར་གྱི་ཆེད་དུ་མིན་སྐོར་གསུངས་སོང་།
མཇུག་སྡོམ་ཐོག་སྤྱི་འཐུས་ཚོགས་གཙོ་མཆོག་ནས་ཐེངས་འདིའི་གྲོས་ཚོགས་དབུ་འཛུགས་སྐབས་སུ་གདུང་སེམས་མཉམ་སྐྱེད་ཀྱི་གཞུང་འབྲེལ་གྲོས་ཆོད་དོན་ཚན་ ༤ སྤྱི་མོས་གཏན་འབེབས་གནང་ཡོད་པ་དང་འབྲེལ་ནས་གསུངས་དོན། ཕྱི་ལོ་ ༢༠༠༨ ནས་ད་ལྟའི་བར་དུ་ང་ཚོའི་གྲོས་ཚོགས་ག་དུས་མགོ་བཙུགས་པ་ཡིན་ནའང་གཞུང་འབྲེལ་མྱ་ངན་གུས་འདུད་ཀྱི་གྲོས་གཞིའི་གྲོས་འཆར་དེ་འདྲ་འགྲོ་ཡི་ཡོད་པ་དང་། ལྷག་པར་དུ་བོད་ནང་གི་གནས་སྟངས་ད་དུང་ཡིན་ནའང་ཧ་ཅང་ཛ་དྲག་པོའི་ངང་གནས་ཡོད་སྟབས། བཀུར་འོས་སྤྱི་འཐུས་རྣམ་པ་ཚོས་དེ་དང་འབྲེལ་བའི་ཐོག་ནས་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་གཞིའི་གྲོས་འཆར་ལའང་ཐུགས་འཁུར་ཆེན་པོ་བཞེས་ཏེ་གསུང་བཤད་གནང་བ་རེད། དེ་བརྒྱུད་ནས་དེང་སང་གྲོས་ཚོགས་ལ་དོ་སྣང་གནང་མཁན་ཞེ་དྲག་མང་དུ་ཕྱིན་ཡོད་པ་དང་། རྒྱ་ནག་གཞུང་གི་ངོས་ནས་ཡིན་ནའང་ཏན་ཏན་ང་ཚོའི་གྲོས་ཚོགས་ཀྱི་ལས་རིམ་འདི་ལ་དོ་སྣང་བྱེད་བཞིན་པ་ཞིག་ལ་ངོས་འཛིན་ཞུ་ཡི་ཡོད། དེར་བརྟེན་བཀུར་འོས་སྤྱི་འཐུས་རྣམ་པ་ཚོས་བོད་ནང་ལོགས་ཀྱི་ཛ་དྲག་གནས་སྟངས་དང་བསྟུན་ནས། གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་གཞིའི་གྲོས་འཆར་ནང་མཉམ་ཞུགས་གནང་བ་དེས་ཐུགས་ཕན་ཆེན་པོ་ཞིག་གསོས་ཡོད་པ་རེད། རྒྱ་ནག་ལ་ཡིན་ནའང་ང་ཚོའི་ངོས་ནས་བརྡ་ལན་ཏག་ཏག་ཅིག་སྤྲད་ཐུབ་ཡོད་པ། ད་ལྟའི་བོད་ནང་གི་ཛ་དྲག་གནས་སྟངས་ག་འདྲ་རེད། སྤྱིའི་གནས་སྟངས་ག་འདྲ་རེད། བྱེ་བྲག་གི་གནས་སྟངས་ག་འདྲ་ཡིན་པ། རྒྱ་ནག་གཞུང་གིས་བོད་ཐོག་འཛིན་པའི་སྲིད་བྱུས་ཀྱི་གནས་བབ་ག་འདྲ་རེད། དེ་བཞིན་རྒྱབ་ཤ་དཀར་པོའི་ཐོག་ལ་ལྟ་སྟངས་ག་འདྲ་ཡོད་པ། བོད་རང་སྐྱོང་ལྗོངས་དབུ་བརྙེས་ནས་ལོ་ངོ་ ༥༠ འཁོར་བ་ཟེར་བའི་དུས་དྲན་སྲུང་གཙི་ཞུ་ཕྱོགས་ཀྱི་ཐོག་ལ་ང་ཚོའི་ལྟ་སྟངས་ག་འདྲ་ཡོད་པ། དེ་ཚོ་ཆ་ཚང་གི་ཐོག་ནས་ངོ་འཕྲོད་པ་ཞིག་དང་བརྡ་འཕྲོད་པ་ཞིག་ལ་ངོས་འཛིན་ཞུ་ཡི་ཡོད། ཞེས་གསུངས་སོང་།
བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་མ་ལག་དང་བཅས་པའི་ལས་སྡོམ་དང་ཞིབ་འཇུག་སྙན་ཐོ་ཁག་སྙན་སྒྲོན་ཞུས་པ་དང་འབྲེལ། བགྲོ་གླེང་གསལ་བཤད་གནང་བ་དེས་གཞུང་མང་གཉིས་ལ་ཐུགས་ཕན་གསོས་ཡོད་པའི་སྐོར་ནས་ཁོང་གིས། ད་རེས་གྲོས་ཚོགས་ཀྱི་དུས་ཚོད་མང་ཆེ་བ་ཕྱི་ལོ་ ༢༠༡༤ དང་ ༢༠༡༥ ཡི་ལས་སྡོམ་སྒང་ལ་བཏང་ཡོད་ཅིང་། དེ་ཚོའི་ནང་ལ་ཡིན་ནའང་དངོས་གནས་ཚང་མས་འགན་བཞེས་གནང་སོང་། སྐབས་རེར་དུས་ཚོད་ཀྱིས་འདང་དང་མ་འདང་གི་དབང་གིས་སྟངས་འཛིན་བྱེད་དགོས་པའི་གནས་སྟངས་དེ་འདྲར་ཐུག་གི་ཡོད་པ་རེད་མ་གཏོགས། བཀུར་འོས་སྤྱི་འཐུས་རྣམ་པ་ཚོའི་ངོས་ནས་ཕལ་ཆེར་དྲི་བ་ལྷག་མ་སོང་བསམ་པ་བྱུང་། ཡང་མང་པོ་ཞིག་གྲོས་ཚོགས་སྔོན་མ་སྔོན་མའི་ནང་དུ་བཏང་ཚར་བའི་བསྐྱར་ལྡབ་དེ་འདྲ་ཡོང་གི་ཡོད་ལ། དེ་བཞིན་གྲོས་ཚོགས་འདི་རང་གི་ནང་ལའང་བསྐྱར་ལྡབ་དེ་འདྲ་ཡོང་གི་ཡོད་པ་རེད། རྩ་བའི་ཆ་ནས་འཛིན་སྐྱོང་གིས་ལྷན་ཁང་རེ་རེ་བྱས་ཏེ་ཞིབ་ཚགས་པོའི་ཐོག་ནས་དྲི་བ་དང་བསམ་འཆར་ཕུལ་བ་སོགས་ཀྱི་ཐོག་དཔེ་མི་སྲིད་པའི་ཐུགས་ཁུར་ཆེན་པོ་བཞེས་སོང་། མང་ཚོགས་ལ་དཔེ་མི་སྲིད་པའི་ཁེ་ཕན་བྱུང་བསྡད་ཡོད་པ་རེད་བསམ་གྱི་འདུག་ལ། འཛིན་སྐྱོང་གི་ངོས་ནས་ཀྱང་དྲི་བ་རེ་རེར་བཀའ་ལན་བསྐྱོན་པའི་བརྒྱུད་རིམ་ཁྲོད་ནས་མང་ཚོགས་ནང་བོད་མིའི་སྒྲིག་འཛུགས་ཀྱིས་ཕྱག་ལས་ག་རེ་གནང་ཡོད་པ་ཚང་མ་ཤེས་རྟོགས་གསལ་བོ་ཞིག་ཐུབ་ཡོད་པ་དང་། ལྷག་པར་དུ་ས་གནས་བྱེ་བྲག་ནང་དཀའ་ངལ་ཡོད་པ་དེ་ཚོ་གྲོས་ཚོགས་འདིའི་ནང་གླེང་ཡོད་པས། གྲོས་ཚོགས་ཀྱི་ལས་རིམ་འདི་ལ་ཐུགས་སྣང་གནང་ཡོད་ན། གནད་དོན་རེ་རེའི་ཐོག་འཛིན་སྐྱོང་གི་དགོངས་པ་བཞེས་ཕྱོགས་དང་ཕྱག་ལས་གནང་སྟངས་ཐོག་དཔེ་མི་སྲིད་པའི་གསལ་བོ་བྱུང་སོང་། ཞེས་དང་།
དེ་དང་འབྲེལ་བའི་ཐོག་ནས་ཚོགས་ཆུང་གི་ལས་དོན་བྱེད་ཕྱོགས་རེད། དཔེར་ན་ཤེས་ཡོན་ཚོགས་ཆུང་འདྲ་བོ་ཞིག་ཡིན་ན། དུས་ཚོད་མང་པོ་བཏང་སྟེ་ཞིབ་འཇུག་གནང་བ་དང་དྲི་བ་བཟོས་པ། དེ་བཞིན། སློབ་གྲྭ་སོ་སོར་བསྐྱོད་དེ་ཉམས་ཞིབ་གནང་བ་དང་ལས་སྡོམ་སྙན་ཐོ་བཟོས་པ་སོགས་ལ་དཔེ་མི་སྲིད་པའི་དུས་ཚོད་མང་པོ་ཞིག་བཏང་བ་རེད། དཔལ་ལྡན་ཤེས་རིག་བཀའ་བློན་མཆོག་ནས་གསལ་བཤད་གནང་སྐབས་གསུངས་བ་ནང་བཞིན་ཏན་ཏན་ཤེས་རིག་ལས་ཁུངས་ཀྱི་ལས་བྱེད་ཚོས། ང་ཚོར་ལས་དོན་མང་པོ་ཞིག་བཀོལ་སོང་བསམ་པ་ཞིག་ཡོང་སྲིད་པ་རེད། ད་རེས་ཤེས་ཡོན་ཚོགས་ཆུང་གི་ངོས་ནས་དེབ་བཏོན་བཞག་པ་དེས་འདས་པའི་ལོ་ ༡༠ ནང་གི་ཤེས་ཡོན་སྲིད་བྱུས་དང་འབྲེལ་བའི་གནས་སྟངས་ག་འདྲ་ཆགས་ཡོད་མེད་ཆ་ཚང་ཞིག་དང་། ཡིག་ཆ་མང་པོ་ཞིག་སྔོག་མི་དགོས་པར་ཡིག་ཆ་འདི་གཅིག་པུར་བལྟས་པ་ཡིན་ན་དེ་རང་ནས་ཤེས་ཐུབ་པའི་གནས་སྟངས་ཤིག་བཟོས་སོང་། འཛིན་གྲྭ་བཅུ་པ་དང་བཅུ་གཉིས་ཀྱི་རྒྱུགས་འབྲས་དང་འབྲེལ་བའི་ཐོག་ནས་གྲོས་ཚོགས་ནང་བཀའ་མོལ་མང་པོ་བྱུང་སོང་། དེ་བཞིན་དཔེ་སྟོན་སློབ་གྲྭའི་གནས་སྟངས་ཀྱི་ཐོག་ནས་ཀྱང་བཀའ་མོལ་མང་པོ་བྱུང་བ་རེད། ཡིག་རྒྱུགས་ཀྱི་གྲུབ་འབྲས་དེ་གནས་སྟངས་གཅིག་རེད། དཔེ་སྟོན་སློབ་གྲྭའི་ནང་ཤེས་ཡོན་སྲིད་བྱུས་གཏན་འབེབས་བྱེད་པའི་དགོས་པ་དང་རྒྱུ་མཚན་གཙོ་བོ་དེ། སློབ་ཕྲུག་ཚོའི་ལེགས་ཉེས་ཀྱི་རྣམ་པར་དབྱེ་བ་འབྱེད་ཐུབ་པའི་བློ་བཀོད་ཅིག་བསྐྲུན་ཐུབ་པའི་ཆེད་དུ་བཙུགས་པ་ཡིན་ལ། ཡིག་རྒྱུགས་ཀྱི་གྲུབ་འབྲས་གཅིག་པུ་མ་ཡིན་པར་དཔེ་སྟོན་སློབ་གྲྭ་ནས་ཐོན་པའི་སློབ་ཕྲུག་དེ་ཚོས་བཟང་པོ་དང་ངན་པ། ལེགས་པ་དང་ཉེས་པ། ཡག་པོ་དང་སྡུག་པོའི་དབྱེ་བ་འབྱེད་ཐུབ་པའི་བསམ་བློ་ཞིག་བསྐྲུན་ཐུབ་པའི་ཆེད་དུ་བཟོས་པ་རེད། དེས་ཏན་ཏན་ཡིག་རྒྱུགས་ཀྱི་གྲུབ་འབྲས་གཅིག་པུ་མ་ཡིན་པར་མི་བཟང་པོ་ཞིག་དང་མི་ཡག་པོ་ཞིག་ཆགས་པའི་ས་བོན་འདེབས་ཐུབ་པ་ཞིག་ལ་ངོས་འཛིན་ཞུ་ཡི་ཡོད་ཅིང་། དེ་ཚོགས་ཆུང་གི་སྙན་ཐོའི་ནང་དུ་བཀོད་འདུག་ལ། འཛིན་སྐྱོང་གི་ངོས་ནས་ཚོགས་ཆུང་བཙུགས་པའི་གཤིབ་བསྡུར་གྱི་ནང་དུའང་གསལ་བོ་ཞེ་དྲགས་བཀོད་ཡོད་པས། དེའི་གནས་སྟངས་དེ་གྲུབ་འབྲས་གཅིག་པུར་གཞི་བཞག་ན་འགྲིག་གི་མི་འདུག་བསམ་པའི་བསམ་ཚུལ་ཞིག་བྱུང་བ་རེད། ལས་སྡོམ་གྱི་ཐོག་ནས་ཡིན་ན་རེད། ཤེས་ཡོན་སྲིད་བྱུས་ཀྱི་ཐོག་ནས་ཡིན་ནའང་རེད། དེ་འབུར་དུ་བཏོན་ནས་མཉམ་དུ་ཞུས་ན་བསམ་བྱུང་། ཞེས་གསུངས་སོང་།
ཡང་སྤྱི་འཐུས་རྣམས་པས་སྤྱི་པའི་ལས་དོན་ཐོག་འགན་བབ་མཉམ་འཁུར་དགོས་པ་གལ་ཆེན་པོ་ཡིན་ལ། མ་འོངས་པར་མི་མང་གིས་སྤྱི་འཐུས་འོས་འདེམས་གནང་སྐབས་ཀྱང་དེའི་ཐོག་བསམ་བློ་གཏོང་དགོས་སྐོར་ལ་ཁོང་གིས། བོད་ཀྱི་གསོ་བ་རིག་པའི་སྨན་པའི་ལྷན་ཚོགས་དང་འབྲེལ་བའི་ཚོགས་ཆུང་གི་ཚོགས་མི་ཚོས་ཚོགས་ཆུང་གཉིས་གསུམ་ནང་ཕྱག་ལས་གནང་དགོས་པའི་གནས་སྟངས་དེ་འདྲ་ཆགས་བསྡད་ཡོད་པ་རེད། བཀུར་འོས་སྤྱི་འཐུས་ཤིག་གིས་ཚོར་ཤུགས་ཆེན་པོའི་ཐོག་ནས་གྲོས་ཚོགས་ནང་གསུངས་པ་རེད། ཚོགས་གཙོ་གཞོན་གཉིས་ལའང་དཀའ་ངལ་མི་ཉུང་བ་ཞིག་འཕྲད་ཀྱི་ཡོད་སྟབས། མ་འོངས་པར་མི་མང་ཚོས་སྤྱི་འཐུས་འདེམས་པའི་སྐབས་སུ་དགོངས་པ་བཞེས་དགོས་པའི་གནས་སྟངས་ཤིག་ཏན་ཏན་ཡོད་པ་རེད། སྤྱི་པའི་འགན་འཁུར་བའི་དམ་བཅའ་ཞིག་བཞག་ཚར་རྗེས། སྤྱི་པའི་ལས་དོན་ག་འདྲ་ཞིག་ཡིན་ནའང་དེའི་ནང་མཉམ་ཞུགས་བྱེད་ཐུབ་པའི་ནུས་པ་དང་འཇོན་ཐང་། དུས་ཚོད་གཏོང་ཐུབ་དགོས་པ་རེད། ང་ཚོས་ཚོགས་ཆུང་བཙུགས་པའི་སྐབས་སུ་མི་གཅིག་ལ་སྐད་ཆ་དྲིས་ན་ཞུགས་ཐུབ་ཀྱི་མི་འདུག གཉིས་ལ་སྐད་ཆ་དྲིས་ན་ཞུགས་ཐུབ་ཀྱི་མི་འདུག གསུམ་ལ་སྐད་ཆ་དྲིས་ན་ཞུགས་ཐུབ་ཀྱི་མི་འདུག་ཅེས་གསུང་ཡོང་སྐབས། སྤྱི་འཐུས་གཅིག་ལ་ལས་འགན་གཉིས་རེ་སྤྲོད་དགོས་པའི་གནས་སྟངས་དེ་འདྲ་ཡོང་གི་འདུག དེར་བརྟེན་ཚོགས་ཆུང་ཁག་ནང་འགན་འཁུར་མཁན་རྣམ་པ་ཚོར་ཚོགས་གཙོ་སྦྲེལ་པོས་དངོས་གནས་དྲང་གནས་སྙིང་ཐག་པ་ནས་ཐུགས་རྗེ་ཆེ་ཞུས་པ་ཡིན། ཞེས་གསུངས་སོང་།
མང་ཚོགས་རྩིས་ཁྲའི་ཚོགས་ཆུང་གི་ལས་དོན་དང་འབྲེལ་བའི་ཐོག་ཁོང་གིས། མང་ཚོགས་རྩིས་ཁྲའི་ཚོགས་ཆུང་གི་ལས་དོན་ལ་སྐབས་བཅོ་ལྔ་པའི་གྲོས་ཚོགས་ཀྱིས་དངོས་གནས་འགན་མང་པོ་ཞིག་འཁུར་ཡོད་པ་རེད། མང་ཚོགས་རྩིས་ཁྲའི་ཚོགས་ཆུང་སྐབས་ལྔ་པ་དང་དྲུག་པ་དེ་ཚོ་ཚང་མའི་སྙན་ཐོ་གྲོས་ཚོགས་ནང་བསླེབས་པ་དང་། སྐབས་བདུན་པར་བསྐོ་བཞག་ཟིན་པ་རེད། མང་ཚོགས་རྩིས་ཁྲའི་ཚོགས་ཆུང་གི་ཕྱག་ལས་གཅིག་པུ་མ་ཡིན་པར། དེ་མཇུག་སྐྱོང་བའང་སྤྱི་འཐུས་རྒྱུན་ལས་རང་ནས་དུས་ཚོད་མང་པོ་ཞིག་བཏང་ཡོད་པ་རེད། ཚོགས་གཙོ་རང་ཉིད་ཡིན་ནའང་དེའི་སྒང་ལ་དུས་ཚོད་མང་པོ་ཞིག་གཏོང་དགོས་ཐུག་གི་འདུག མ་འོངས་པར་དེ་ཚོ་མི་ཡོང་བའི་ཆེད་དུ། ད་ལྟའི་ལས་བྱེད་འགན་འཁུར་མཁན་ཚོས་ཉིན་རེའི་ལས་དོན་ཧྲ་ཏག་ཏག་ཅིག་བྱས་པ་ཡིན་ན། རྩིས་ཞིབ་སྙན་ཐོའི་ནང་དེ་འདྲ་ཞིག་ཐོན་དགོས་ཀྱི་ཡོད་པ་མ་རེད། དེ་བཞིན་ལས་ཀྱི་སྣེ་མོ་བ་དབང་ལྡན་འགན་འཛིན་ཚོ་ཡིན་ནའང་རྩིས་ཞིབ་བྱེད་དུ་ཡོང་བའི་སྐབས་སུ། ཡིག་ཆ་མཁོ་སྤྲོད་ཡིན་ན་རེད། རྒྱུ་མཚན་གསལ་བཤད་བྱེད་པ་ཡིན་ནའང་རེད། དེ་ཚོ་གང་ཐུབ་ཐུབ་ཅིག་ས་གནས་རང་ནས་བྱེད་ཐུབ་པ་ཡིན་ན། རྩིས་ཞིབ་སྙན་ཐོའི་ནང་དུ་འགོད་རྒྱུ་རང་བཞིན་གྱིས་ཉུང་དུ་འགྲོ་ངེས་རེད། རྩིས་ཞིབ་ལས་ཁུངས་ཀྱི་ངོས་ནས་ཡིན་ནའང་མང་པོ་ཞིག་འབྲི་བའི་འདོད་པ་ཏན་ཏན་ཡོད་རྒྱུ་མ་རེད་བསམ་གྱི་འདུག ལས་དོན་འགྲུབ་དང་མ་འགྲུབ་སོགས་ཀྱི་གནད་དོན་ཐད་དུས་ཚོད་གང་ལ་གང་འཚམ་གཏོང་གི་འདུག ང་ཚོས་དྲི་ཞིབ་བྱེད་སྐབས་རྩིས་ཞིབ་ལས་ཁུངས་ཀྱིས་ལམ་སྟོན་ཆ་ཚང་ཞུ་ཡི་ཡོད་ཅེས་གསུང་གི་འདུག ཡང་ས་གནས་སོ་སོའི་འགན་འཁུར་མཁན་ཚོས་ལམ་སྟོན་གནང་གི་མི་འདུག ང་ཚོས་ཡང་བསྐྱར་གསལ་བཤད་བྱེད་སྐབས་སྙན་ཐོའི་ནང་བཀོད་ཚར་ན་འགྱུར་བ་གཅིག་ཀྱང་གཏོང་རོགས་བྱེད་ཀྱི་མི་འདུག་ཅེས་གསུང་མཁན་དེ་འདྲ་ཡོང་གི་འདུག ཕྱོགས་གཉི་གར་བསམ་ཚུལ་མི་འདྲ་བ་ཡོད་པ་དེ་ཚོ། ང་ཚོས་མཐུན་པ་ཞིག་བཟོ་དགོས་པ་དེ་ཧ་ཅང་གལ་ཆེན་པོ་རེད། ང་ཚོས་སྒྲིག་འཛུགས་ཤིག་གི་ལས་དོན་བྱེད་ཀྱི་ཡོད་པ་རེད། དེ་ག་ཚོད་ཐུབ་ཐུབ་ཀྱིས་ཕྱི་གསལ་ནང་གསལ་དང་གཙང་མ་ཞིག་བྱུང་བ་ཡིན་ན། དེ་ང་ཚོ་སྤྱི་པའི་སྒྲིག་འཛུགས་ལ་ཕན་པའི་ཆེད་དུ་རེད་མ་གཏོགས། རྩིས་ཞིབ་ལས་བྱེད་ཡིན་ན་སོ་སོ་སྒེར་གྱི་ཆེད་དུ་མ་རེད། སྒྲིག་འཛུགས་སོ་སོའི་ལས་བྱེད་ཡིན་ནའང་སྒེར་གྱི་ཆེད་དུ་ལས་ཀ་བྱེད་ཀྱི་ཡོད་པ་མ་རེད། དེར་བརྟེན་ཕན་ཚུན་བར་གོ་བརྡ་འཕྲོད་པའི་ཐད་ཏོག་ཙམ་ཡག་ཏུ་ཕྱིན་པ་ཡིན་ན། མ་འོངས་པར་རྩིས་ཞིབ་སྙན་ཐོ་དེ་ཚོ་འགོད་རྒྱུ་ཏན་ཏན་ཉུང་དུ་འགྲོ་ངེས་རེད། ཅེས་དང་། དེ་བཞིན་༧རྒྱལ་བའི་སྐུ་ཕྱྭ་དང་འབྲེལ་བའི་ཐོག་དཔལ་ལྡན་ཕོ་བྲང་གིས་གཙོས། འབྲེལ་ཡོད་ཚོགས་པ་དང་མི་སྒེར་ནས་སྔར་ལས་ཐུགས་གཟབ་གནང་དགོས་སྐོར་དང་། སྐབས་བཅོ་ལྔ་པའི་སྤྱི་འཐུས་ལྷན་ཚོགས་ནས་ཇོ་ནང་གི་དགོས་འདུན་དོན་ཚན་ ༧ ཆ་ཚང་སྒྲུབ་ཐུབ་མེད་ཀྱང་། སྙན་ཞུ་འབུལ་སྟངས་དང་ལས་འགུལ་སྤེལ་ཕྱོགས་ཀྱི་ཐོག་ནས་སྐབས་རྗེས་མའི་སྤྱི་འཐུས་ལྷན་ཚོགས་ཀྱི་ལས་ཡུན་ནང་འགྱུར་བ་འགྲོ་སྲིད་སྐོར་སོགས་གསུངས་རྗེས། ཟླ་ ༦ གི་རྗེས་སུ་སྤྱི་འཐུས་རྣམ་སླར་ཡང་ཚང་འཛོམས་བྱུང་སྟེ། སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་རྒྱལ་ཁའི་ངང་མཇུག་སྐྱོང་ཐུབ་པའི་སྨོན་འདུན་དང་བཅས་གྲོས་ཚོགས་ཚོགས་དུས་ ༡༠ པ་ལེགས་པར་མཇུག་བསྡུས་སོང་།
གསར་འགོད་པ། པདྨ་མཚོ།
