རྒྱ་གར་གྱི་མེས་པོ་དམ་པ་གྷན་དྷི་མཆོག་གི་འཁྲུངས་སྐར་ཏེ་རྒྱལ་སྤྱིའི་འཚེ་མེད་ཞི་བའི་ཉིན་མོ་དང་བསྟུན་དྷ་སའི་ཉེ་ཁུལ་གྱི་བཙན་བྱོལ་བོད་མིའི་སློབ་གྲྭ་ཁག་དྲུག་གིས་འཚེ་མེད་ཞི་བ་དང་འབྲེལ་བའི་བརྗོད་གཞིའི་ཐོག་གཏམ་བཤད་འགྲན་སྡུར་བྱས་སོང་།
ཁ་སང་ཕྱི་དྲོའི་ཆུ་ཚོད་ ༤ བའི་སྟེང་དྷ་སའི་ཁོར་ཡུག་ཚོགས་ཁང་དུ། འཚེ་མེད་ཞི་བའི་ལྟ་གྲུབ་སྦྱོང་བརྡར་བསྟི་གནས་ཁང་གི་གོ་སྒྲོག་འོག རྒྱ་གར་གྱི་འཚེ་མེད་ཞི་བའི་འཐབ་རྩོད་ཀྱི་མེས་པོ་དམ་པ་གྷན་དྷི་མཆོག་གི་འཁྲུངས་སྐར་ཏེ་རྒྱལ་སྤྱིའི་འཚེ་མེད་ཞི་བའི་ཉིན་མོ་སྲུང་གཙི་དང་། ༧གོང་ས་མཆོག་ཕྱི་ལུགས་ཀྱི་དགུང་གྲངས་བརྒྱད་ཅུར་ཕེབས་པའི་རྟེན་འབྲེལ་མཚོན་བྱེད་དུ། དྷ་རམ་ས་ལའི་གཡས་གཡོན་གྱི་སློབ་གྲྭ་ཁག་དྲུག་གི་འཛིན་རིམ་བཅུ་བའི་སློབ་ཕྲུག་རེ་རེ་ཡིས་༼འཚེ་མེད་ཞི་བའི་འཐབ་རྩོད་དང་གཞོན་སྐྱེས་ཀྱི་མཉམ་བཞུགས༽ཞེས་པའི་བརྗོད་གཞིའི་སྟེང་གཏམ་བཤད་འགྲན་སྡུར་བྱས་སོང་བ་དང་། འགྲན་སྡུར་གྱི་གཟུ་དཔང་དུ་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་ཟུང་དྲུང་ཚེ་རིང་བསམ་འགྲུབ་ལགས་དང་འཚེ་མེད་ཞི་བའི་ལྟ་གྲུབ་སྦྱོང་བརྡར་བསྟི་གནས་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་ཡོན་ཏན་རྒྱ་མཚོ་ལགས། དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་ཟུར་བ་གྲྭ་ངག་དབང་འོད་འབར་ལགས་བཅས་ཕེབས་འདུག
ཐོག་མར་འཚེ་མེད་ཞི་བའི་ལྟ་གྲུབ་སྦྱོང་བརྡར་བསྟི་གནས་ཁང་གི་འགན་འཛིན་དབང་འདུས་ལགས་ཀྱིས་ལས་རིམ་ངོ་སྤྲོད་གནང་སྐབས། ལས་རིམ་འདི་གོ་སྒྲིག་བྱས་པའི་རྒྱུ་མཚན་གཙོ་བོ་དེ་ཕྱི་ཟླ་ ༡༠ ཚེས་ ༣ ནི་གྷན་དྷི་མཆོག་གི་འཁྲུངས་སྐར་དང་ཁོང་གི་འཁྲུངས་སྐར་དེ་ཡང་རྒྱལ་སྤྱིའི་འཚེ་མེད་ཞི་བའི་ཉིན་མོ་རུ་སྲུང་གཙི་ཞུ་བཞིན་ཡོད་སྟབས། ཉིན་མོ་ཁྱད་པར་ཅན་འདི་དང་བསྟུན་དེ་ ༧གོང་ས་མཆོག་དགུང་གྲངས་བརྒྱད་ཅུར་ཕེབས་པའི་སྐུའི་གྱ་སྟོན་རྟེན་འབྲེལ་མཚོན་བྱེད་དུ། དྷ་རམ་སའི་གཡས་གཡོན་གྱི་སློབ་གྲྭ་ཁག་དྲུག་གི་འཛིན་རིམ་བཅུ་བའི་འབྲིང་རིམ་སློབ་མ་རྣམས་ལ་གཏམ་བཤད་འགྲན་སྡུར་ཞིག་གོ་སྒྲིག་ཞུས་པ་ཡིན་ལ། སློབ་མ་ཚོའི་འགྲན་སྡུར་གྱི་དམིགས་ཡུལ་གཙོ་བོ་འགྲན་སྡུར་ནང་ཞུགས་མཁན་སློབ་མ་ཚོར་ཟླ་བ་གཅིག་གཉིས་ཞིག་གི་དུས་ཚོད་སྤྲད་ནས་ཁོ་རང་ཚོས་དེའི་སྒང་ལ་ཉམས་ཞིབ་བྱས་པ་དང་། དེ་ཡང་གློག་ཀླད་ནང་ (Power Point) བརྒྱུད་ནས་སྟོན་རྒྱུ་ཡོད་པ་མ་ཟད། དེ་དག་བོད་ཡིག་ནང་བྲིས་པ་དང་བོད་སྐད་གཙང་མ་རྒྱག་པ་དེ། བཙན་བྱོལ་བོད་མིའི་ཤེས་ཡོན་སྲིད་བྱུས་ཀྱི་དགོངས་དོན་ཐོག་ཤུགས་རྒྱག་རྒྱུའི་ཆེད་ཡིན། ཞེས་སོགས་བརྗོད་སོང་།
འགྲན་ཞུགས་པ་ཅོང་ཏ་ར་བོད་ཁྱིམ་གྱི་སློབ་མ་བློ་བཟང་རབ་རྒྱས་དང་ཅོང་ཏ་ར་སམ་བྷོ་ཊའི་སློབ་མ་བློ་བཟང་དཔལ་ལྡན། དྷ་སྟེང་བོད་ཁྱིམ་གྱི་སློབ་མ་བསྟན་འཛིན་ཆོས་ཉིད། དྷ་ཤོད་བོད་ཁྱིམ་གྱི་སློབ་མ་བསྟན་འཛིན་རབ་དགའ། གྷོ་པལ་པུར་བོད་ཁྱིམ་གྱི་སློབ་མ་ཚེ་བཟང་། སུ་ཇ་བོད་ཁྱིམ་གྱི་སློབ་མ་བསྟན་འཛིན་དོན་འགྲུབ་བཅས་ཀྱིས། རིམ་པ་བཞིན་༼འཚེ་མེད་ཞི་བའི་འཐབ་རྩོད་དང་གཞོན་སྐྱེས་ཀྱི་མཉམ་བཞུགས༽ཞེས་པའི་བརྗོད་གཞིའི་སྟེང་སྐར་མ་ ༡༥ ལ་གཏམ་བཤད་བྱས་རྗེས། སློབ་མ་གཞན་གྱི་དྲི་བ་གཅིག་ལ་ལན་འདེབས་བཅས་བྱས་པ་བརྒྱུད། ཅོང་ཏ་ར་བོད་ཁྱིམ་གྱི་སློབ་མ་བློ་བཟང་རབ་རྒྱས་ལ་ཨང་དང་པོ་དང་། སུ་ཇ་བོད་ཁྱིམ་གྱི་སློབ་མ་བསྟན་འཛིན་དོན་འགྲུབ་ལ་ཨང་གཉིས་པ། གྷོ་པལ་པུར་བོད་ཁྱིམ་གྱི་སློབ་མ་ཚེ་བཟང་ལ་ཨང་གསུམ་པ་བཅས་ཀྱི་རྒྱལ་ཁ་ཐོབ་སྟེ། འགྲན་ཞུགས་པ་དང་སློབ་གྲྭ་སོ་སོར་བྱ་དགའི་གསོལ་རས་གནང་སོང་།
སྐུ་མགྲོན་གཙོ་བོ་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་ཟུང་དྲུང་ཚེ་རིང་བསམ་འགྲུབ་ལགས་ཀྱིས་མཇུག་སྡོམ་གསུང་བཤད་གནང་སྐབས། སྤྱིར་བཏང་འགྲན་སྡུར་གྱི་ཆ་ཤས་ལེན་མཁན་སློབ་ཕྲུག་ཚོས་གཏམ་བཤད་བྱས་པ་དང་། གཟུ་དཔང་རྣམ་པ་གཉིས་དང་ངེད་ཚོས་བརྒྱ་ཆ་ཞིག་སྤྲད་ཡོད་སྟབས། རྣམ་པ་ཚོ་ཁ་ཤས་ཀྱི་བརྒྱ་ཆ་མཐོ་བོ་ཡོད་པ་དང་ཁ་ཤས་ལ་མཐོ་བོ་མེད་པ་དེར་ཁྱད་པར་ཡོད་པ་མ་རེད། གལ་ཆེ་ཤོས་དེ་རྣམ་པ་ཚོ་འདིར་ཡོང་ནས་ཆ་ཤས་བླངས་ཏེ་གཏམ་བཤད་བྱས་པ་དེ་ཆགས་ཡོད་པ་རེད། སྔོན་མ་ང་རང་སུ་ཇ་སློབ་གྲྭའི་ནང་ལོ་ ༩ ཙམ་ལ་དགེ་རྒན་བྱེད་སྐབས་བགྲོ་གླེང་འདི་འདྲ་གོ་སྒྲིག་མང་པོ་ཞུས་མྱོང་། སྔོན་མ་གོ་སྒྲིག་ཞུས་པའི་བརྒྱུད་རིམ་དང་དེ་རིང་གི་སློབ་ཕྲུག་ཚོས་གཏམ་བཤད་བྱས་པ་མཐོང་དུས་ཏོག་ཙམ་དགའ་སྤོབས་སྐྱེས་བྱུང་། སྔོན་མ་སུ་ཇ་སློབ་གྲྭའི་སློབ་ཕྲུག་ཚོ་རྒན་པ་ཡོད་སྟབས་བགྲོ་གླེང་ག་རེ་བྱེད་དགོས་མིན་ལབ་མི་དགོས་པར་སོ་སོའི་ངོས་ནས་གཏམ་བཤད་དང་གྲ་སྒྲིག་བྱ་ཐུབ་ཀྱི་ཡོད་པ་རེད། ཡིན་ན་ཡང་། བགྲོ་གླེང་སྐབས་སློབ་གྲྭ་གཞན་པ་ནས་ཡོང་མཁན་མང་པོ་ཞིག་ལ་རྒན་ལགས་ཀྱིས་ག་རེ་ལབ་པ་དེ་སྡིངས་ཆའི་སྟེང་ཡོང་ནས་མར་གྱེར་བསྡད་པ་འདྲ་བོ་མ་གཏོགས་སློབ་ཕྲུག་གི་བཤད་སྟངས་དེ་རང་བཞིན་གྱི་བཀའ་མོལ་གནང་སྟངས་མིན་པའི་ཚོར་སྣང་ཡོང་གི་ཡོད། འོན་ཀྱང་། དེ་རིང་གཏམ་བཤད་བྱ་མཁན་ཆ་ཚང་གིས་སོ་སོ་རང་གིས་དཀའ་ལས་བརྒྱབ་པ་ཞིག་དང་སོ་སོ་རང་གིས་བསམ་བློ་འཁོར་བསྡད་པ་ཞིག རང་གི་རྒྱུད་ལ་ངེས་ཤེས་ཅུང་ཙམ་རྙེད་ཡོད་པའི་ཚོར་སྣང་བྱུང་། ཞེས་བརྗོད་སོང་།
བོད་དོན་ཞི་བའི་ཐབས་ལམ་ལ་བརྟེན་ནས་སེལ་ཐབས་གནང་རྒྱུ་དེ་བོད་རིགས་གཞོན་སྐྱེས་ཚོའི་འོས་འགན་གལ་ཆེན་ཡིན་པའི་སྐོར་ལ་ཁོང་གིས། གལ་ཆེ་ཤོས་གཅིག་དེ་གཞོན་སྐྱེས་ཚོས་འཚེ་མེད་ཞི་བའི་ལྟ་གྲུབ་སྟེང་ལ་སློབ་སྦྱོང་བྱ་རྒྱུ་ཧ་ཅང་གལ་ཆེན་པོ་ཞིག་དང་འཚེ་མེད་ཞི་བའི་ལམ་ནས་ང་ཚོའི་འཐབ་རྩོད་མཇུག་སྐྱོང་གནང་རྒྱུ་རྣམ་པ་ཚོར་རག་ལས་རེད། དེ་རིང་འདིར་སློབ་གྲྭའི་ཕྲུ་གུ་མང་པོ་མེད་ཀྱང་། ངས་རྣམ་པ་ཚོ་བརྒྱུད་ནས་འཚེ་མེད་ཞི་བའི་སྦྱོང་བརྡར་གནང་མཁན་དེ་ཚོར་ག་རེ་ཞུས་དགོས་ཞེ་ན། སྤྱིར་འཚེ་མེད་ཞི་བར་ཐབས་ལམ་བརྒྱ་ཕྲག་ལྷག་ཡོད་ཀྱང་བཙན་བྱོལ་ནང་གི་ཚོགས་པ་སྐྱིད་སྡུག་ཁག་གིས་ཐབས་ལམ་བཅུ་གྲངས་ཤིག་མ་གཏོགས་བེད་སྤྱོད་གནང་གི་མེད་སྟབས། ང་ཚོའི་སློབ་གྲྭའི་ཕྲུ་གུ་ཚོའི་ངོས་ནས་འདིའི་ཐོག་སློབ་སྦྱོང་བྱས་ཏེ། ལས་འགུལ་སྤེལ་སྟངས་འདྲ་མིན་ཞིག་གནང་རྒྱུ་གལ་ཆེན་པོ་ཆགས་འདུག བོད་ནང་ལ་འཚེ་མེད་ཞི་བའི་གོ་རྟོགས་དང་ཟབ་སྦྱོང་སྤྲོད་མཁན་གང་ཡང་མེད་ཀྱང་། བོད་ནང་གི་ལས་འགུལ་སྤེལ་སྟངས་ཀྱི་རྣམ་པ་རེ་རེར་ང་ཚོས་ཞིབ་འཇུག་བྱོས་དང་། དེ་ཧང་སང་བའི་ཚད་མཐོ་བོ་ཞིག་རེད་འདུག ད་ལྟའི་བར་བོད་ནང་དུ་རང་ལུས་མེར་སྲེག་གནང་མཁན་མི་ ༡༤༠ ལྷག་བྱུང་ཡོད་པ་རེད། རང་ལུས་མེར་སྲེག་མཁན་རེ་རེ་ཡིས་རྒྱ་མི་གཉིས་གསུམ་མེར་བསྲེགས་གནང་པའི་ནུས་པ་ཡོད་པ་རེད། ཁོང་ཚོས་དེ་ལྟར་བྱེད་ཀྱི་མེད་པ་དེ་འཚེ་མེད་ཞི་བའི་ལྟ་གྲུབ་ལ་ཡིད་ཆེས་བརྟན་པོ་ཡོད་པས་རེད་བསམ་གྱི་འདུག སོ་སོའི་ལུས་པོ་མཆོད་མེར་ཕུལ་ཡང་གཞན་པའི་རྒྱུ་དང་ཅ་དངོས་གཅིག་ལའང་གནོད་བསྐྱལ་ཡོད་པ་མ་རེད། ཕྱི་ལོ་ ༢༠༠༨ ལོར་ཞི་རྒོལ་བྱེད་སྐབས་ཀྱང་རྒྱ་མིའི་མེ་མདའ་ལག་ཏུ་རག་ཀྱང་དེ་བཅག་ནས་ངོ་རྒོལ་བྱས་ཡོད་པ་མ་ཟད། ཉེ་སྔོན་སྐད་ཡིག་སྲུང་སྐྱོབ་ཆེད་ཨ་མདོའི་ཁུལ་དུ་སོ་སོའི་སྐད་ཡིག་སྒང་སློབ་ཚན་ཆ་ཚང་བསླབ་དགོས་ཞེས་ངོ་རྒོལ་གྱི་རྣམ་པ་དེ་ཚོ་མཐོང་ཡོང་དུས་ཧང་སང་དགོས་པ་དང་ཧ་ལས་དགོས་པ་རེད་དྲན་གྱི་འདུག དེ་བཞིན་རྣམ་པ་ཚོས་འདི་འདྲའི་ཐོག་སློབ་སྦྱོང་བྱ་རྒྱུ་གལ་ཆེན་པོ་རེད། ༧སྐྱབས་མགོན་རིན་པོ་ཆེ་ཡིས་བོད་དེ་འཚེ་མེད་ཞི་བའི་ལྟེ་གནས་ཤིག་ཏུ་བསྒྱུར་གྱི་ཡིན་གསུང་གི་ཡོད་པ་རེད། ལྟེ་གནས་ཤིག་ཏུ་བསྒྱུར་བར་དང་པོ་དེའི་ནང་ལ་ཡོད་པའི་སེམས་ཅན་དང་མི། སྤྱི་ཚོགས་ཆ་ཚང་ལ་འཚེ་མེད་ཞི་བའི་གོམས་གཤིས་ཡག་པོ་ཡོད་མཁན་ཞིག་དང་དེའི་ཐོག་ཡིད་ཆེས་ཡོད་མཁན་གྱི་སྤྱི་ཚོགས་ཤིག་ཏུ་བསྒྱུར་རྒྱུ་གལ་ཆེན་པོ་རེད། དེ་འདྲ་བསྒྱུར་རྒྱུར་ང་ཚོ་མི་རེ་ངོས་རེ་ནས་འགྱུར་བ་ཞིག་གཏང་ནས་དེར་ཡིད་ཆེས་དང་གོམས་གཤིས་ཆགས་རྒྱུ་དཔེ་གལ་ཆེན་པོ་རེད་དྲན་གྱི་འདུག ཅེས་སོགས་བརྗོད་སོང་།
གསར་འགོད་པ། འཇིགས་མེད་རྒྱ་མཚོ།
