རྒྱ་གར་ཨུ་ཌར་ཁན་མངའ་སྡེ་ནས་ཡིན་པའི་བུ་མོ་ཐན་ཞོ་མན་གྷོ་རོང་ལགས་ལ་ཕྱི་ལོ་ ༢༠༡༥ ལོའི་ཧི་མ་ལ་ཡའི་མཛངས་མའི་རྒྱལ་ཁ་ཐོབ་ཡོད་འདུག
ཁ་སང་དགོང་དྲོའི་ཆུ་ཚོད་ ༧ ཙམ་པ་ལ་དྷ་ས་བོད་ཀྱི་ཟློས་གར་ཐང་ཆེན་དུ། ཧི་མ་ལ་ཡའི་མཛངས་མ་འགྲན་སྡུར་གྱི་རྟིང་རྩོད་སྤྲོ་ཚོགས་བསྡུས་ཡོད་པ་དང་། འགྲན་སྡུར་གྱི་གཟུ་དཔང་དུ་ཨ་རི་ནས་ཡིན་པ་བོད་ཀྱི་བུད་མེད་སྤོ་ལོ་རུ་ཁག་གི་དགེ་རྒན་ལྕམ་ཁ་ལི་ཆལ་ཌིར་(Cassie Childer)ལགས་དང་། དྷ་སར་གནས་སྡོད་རྒྱ་གར་གཞུང་འབྲེལ་སློབ་གྲྭ་ཞིག་གི་དགེ་རྒན་ལྕམ་ནཱ་ལི་ནི་གྷོ་རོང་ (Nalini Gurung)ལགས་གཉིས་ཆེད་དུ་སྐད་བཏང་ཡོད་པ་དང་། འགྲན་ཞུགས་གཞོན་ནུ་མ་ ༦ གིས་རང་ཉིད་ངོ་སྤྲོད་དང་སོ་སོའི་ཐུན་མིན་ཆས་གོས་འགྲེམ་སྟོན། གཟུ་དཔང་པའི་དྲི་བར་ལན་འདེབས་བྱས་པ་བཅས་བརྒྱུད། ཨུ་ཊར་ཁན་ནས་ཡིན་པ་བུ་མོ་ཐན་ཞོ་མན་གྷོ་རོང་ (Tanshuman Gurung)ལགས་ལ་ཨང་དང་པོའི་རྒྱལ་ཁ་ཐོབ་སྟེ། ཧི་མ་ལ་ཡའི་མཛངས་མའི་དབུ་རྒྱན་དང་ཧིན་སྒོར་འབུམ་གཅིག ཨང་གཉིས་པ་ཐོབ་མཁན་བོད་རིགས་བུ་མོ་བསྟན་འཛིན་སངས་ཉིད་ལ་ཧིན་སྒོར་ཁྲི་ལྔ། ཨང་གསུམ་པ་ཐོབ་མཁན་ཨར་ནཱ་ཅལ་པར་དྷི་ཤི་ནས་ཡིན་པ་བུ་མོ་ཆུམ་ཌཱ་རང་(Chum Darang) ལ་ཧིན་སྒོར་ ༢༥༠༠༠ བཅས་ཀྱི་བྱ་དགའ་སྤྲད་ཡོད་འདུག
དེ་རིང་མཛངས་མ་གོ་སྒྲིག་པ་བློ་བཟང་དབང་རྒྱལ་ལགས་ཀྱིས་བརྗོད་པ་ལྟར་ན། ཧི་མ་ལ་ཡའི་མཛངས་མ་ཐན་ཞོ་མན་གྷོ་རོང་ལགས་ཀྱིས་གསར་འགོད་པར། ཁོང་མོར་ཧི་མ་ལ་ཡའི་མཛངས་མའི་དབུ་རྒྱན་གཡོགས་པ་དེ་འགན་ཆེན་པོ་ཞེ་དྲགས་ཡིན་སྟབས། མ་འོངས་པར་ཧི་མ་ལ་ཡའི་རི་བརྒྱུད་ཁུལ་གྱི་མི་རིགས་འཆམ་མཐུན་ཡོང་ཐབས་དང་ཁོར་ཡུག་གནད་དོན་རྒྱལ་སྤྱིའི་སྒང་གླེང་སློང་བྱ་རྒྱུ། དེ་བཞིན་བུད་མེད་ཀྱི་ནུས་སྟོབས་གོང་འཕེལ་སོགས་ཀྱི་ཐོག་ཁོང་མོས་རང་ནུས་ཅི་ཡོད་ཀྱིས་འབད་བརྩོན་བྱ་རྒྱུ་ཡིན་སྐོར་བརྗོད་ཡོད་འདུག
གསར་འགོད་པ། པདྨ་མཚོ།
