སྐད་ཡིག་གི་སང་ཉིན།

———སྐད་ཡིག་ནི་མི་རིགས་ཤིག་གི་བསམ་བློའི་གཞུང་རྟ་དང་བླ་སྲོག་གི་རྟེན་ཕུར་ཡིན།

(2015/10/4) རྫ་ཚེ་རིང་བཀྲ་ཤིས།

སངས་རྒྱས་ལ་ཕྱག་འཚལ་ལོ།། སྐད་ཡིག་གིས་རིག་གནས་མཐའ་དག་གི་གཞི་འཛིན་པ་ཡིན།
ལར་སྐད་ནི་ཡིེ་གེ་ལས་སྔ་བར་མ་ཟད། དེས་འཚོ་བའི་ཁྲོད་ཀྱི་དགའ་སྐྱོ་ཆགས་སྡང་དང་།
བཟང་ངན་བདེ་སྡུག་གི་ཚོར་བ་དང་འཛིན་སྟངས་སོགས་མཚོན་པར་བྱེད།
ཡི་གེ་ནི་སྐད་ཀྱི་རམ་འདེགས་མཁན་ལྟ་བུ་ཡིན་ཞིང་།
བརྡ་རྟགས་ཀྱི་མཚོན་བྱེད་སྤྱད་དེ་སྔར་ལས་གཏིང་ཟབ་པོས་བྱ་དངོས་འབྲེལ་བརྗོད་བྱེད་པ་དང་།
མངོན་འདོད་དང་ཚོར་བ་མཚོན་པར་བྱེད།

རིགས་པའི་གཞུང་ལུགས་ནི་ཉམས་མྱོང་རིམ་བསགས་ཀྱི་སྡོམ་ཚིག་ལྟ་བུ་ཞིག་ཡིན་ཞིང་།
འཚོ་བ་དང་ལག་ལེན་ལས་བྱུང་བའི་གལ་ཆེའི་རིག་གཞུང་དང་ལེགས་བྱང་དེ་དག་མི་ཚོས་ཡི་གེར་བཀོད་ཅིང་།
མུ་མཐུད་དབྱེ་ཞིབ་བྱས་པའི་རྨང་གཞི་དང་ལག་ལེན་ལས་འཐུས་སྒོ་ཚང་ཞིང་རྙོགས་འཛིངས་ཆེ་བའི་མིའི་རིགས་ཀྱི་ཤེས་རིག་གི་དྲ་བ་འདི་གྲུབ་པ་རེད།

ད་ཆ་ང་ཚོས་ཤེས་རིག་འདིའི་འཕེལ་རིམ་དང་སྨིན་ཚད་ལས་ཡར་ཐོན་དང་རྗེས་ལུས་འཇོག་གིན་ཡོད་ལ།
བླུན་རྨོངས་དང་མཁས་པ་ཞེས་སུ་དགར་བཞིན་ཡོད། ད་དུང་དེ་ལས་ཀྱང་གལ་ཆེ་བ་ཞིག་ནི།
དེ་ལྟ་བུའི་ཤེས་ཡོན་དེ་ཉིད་མིའི་ཚོགས་སྡེ་འདིའི་དངོས་ཡོད་ཀྱི་སྟོབས་ཤུགས་དང་།
རིན་ཐང་ཡོངས་རྫོགས་ཀྱི་ལྟེ་བ་ཆགས་ཟིན།

སྔར་ཡོད་ཀྱི་སྲོལ་རྒྱུན་རྒྱུན་འཛིན་བྱེད་དགོས་ནའང་འདྲ།
གསར་དར་གྱི་རིག་གནས་གོང་འཕེལ་གཏོང་དགོས་ནའང་འདྲ།
གཞན་རིགས་ཀྱི་རིག་གནས་ནང་འདྲེན་བྱེད་དགོས་ནའང་འདྲ།
མེད་ཐབས་མེད་པའི་གཞི་རྩའི་ཆ་རྐྱེན་ནི་འཐུས་སྒོ་ཚང་བའི་སྐད་ཡིག་གི་མ་ལག་ཡིན་ཞིང་།
དེ་ལ་སྐད་ཡིག་རང་སྟེང་ན་ཡོད་པའི་ལེགས་ཆ་ལས་གཞན།
སྐད་ཡིག་དེ་ཉིད་འཚོ་བ་དངོས་ཀྱི་ཁྱབ་ཁོངས་སུ་གཏིང་ཟབ་པོས་འཛུལ་ཟིན་པ་དང་།
ཉིད་དང་ཚེ་སྲོག་གཞི་རྩའི་ལྟེ་ཐག་གཅིག་གིས་སྦྲེལ་བའི་བེད་སྤྱོད་གཏོང་མཁན་གྱི་མི་རིགས་ཤིག་དགོས། སྐད་ཡིག་གང་ཡིན་ཡང་དེ་ཉིད་རང་གི་ཐུན་མོང་མིན་པའི་སྐྱེ་འཚར་གྱི་ཁོར་ཡུག་ཅིག་གི་བསྐྱེད་འབྲས་ཡིན་ཞིང་།
ཁོར་ཡུག་དེ་དང་འཚེ་མ་སྲོག་གཅིག་གི་འབྲེལ་བ་ཞིག་གྲུབ་སྟེ་ཡོད།

ལོ་ཙཱ་བ་མང་པོ་ཞིག་གིས་སྐབས་མང་པོ་ཞིག་ཏུ། ཅི་ཙམ་གཏིང་ཟབ་པའི་ཚོར་བ་དང་།
འཚོ་བའི་ཐུན་མིན་གྱི་ཟབ་སར་སྙོགས་པའི་དམངས་ཁྲོད་ཀྱིགཏམ་བརྗོད་དང་སྙན་ཚིག་སོགས་བསྒྱུར་དཀའ་བར་ཡོང་བའང་།
ངས་བལྟས་ན་སྐད་ཆ་དེ་རིགས་སྐད་ཡིག་དེ་དང་མཉམ་སྐྱེས་མཉམ་འཚར་གྱི་འབྲེལ་བ་ཁྱད་པར་ཅན་ཞིག་ཡོད་ངེས་པ་དེ་ཡིན་ཞིང་།
དེ་ནི་སྐད་ཡིག་བྱེ་བྲག་པ་དང་རིག་གཞུང་བྱེ་བྲག་པའི་བར་གྱི་ཁྱད་པར་གྱི་འབྲེལ་བ་གྲུབ་སྟངས་དངོས་དེ་ཡིན་པའི་ངོས་འཛིན་བྱེད་ཀྱི་ཡོད།
དེ་ལ་སྐད་ཆ་གཞན་གྱིས་ཚབ་བྱེད་པ་ནི་སྐྱེ་ཁམས་བར་གྱི་འགལ་ཟླ་བཞིན་དཀའ་རྙོགས་ཀྱི་གཞི་རྩ་་གསར་པ་བཟོ་མཁན་ཡིན།

 
འབྲེལ་བ་འདིས་བལྟས་ན།
རིག་གནས་ཞིག་གི་གཏིང་ཟབ་ས་དེ་སྐད་ཡིག་ཅིག་གི་གཏིང་ཟབ་ས་ན་ཡོད་ཅིང་།
སྐད་ཡིག་ཅིག་གི་གཏིང་ཟབ་ས་དེ་མི་རིགས་ཤིག་གི་འཚོ་བའི་གཏིང་ཟབ་ས་ན་འཚོ་བ་ལས་གཞན་པའི་ལམ་ཁ་ཞིག་མེད་པ་དེ་རེད།

བཤད་སྟངས་གཞན་ཞིག་བྱས་ན།

མི་ཞིག་གིས་རང་གི་ཕ་མེས་ཀྱི་སྐད་ཡིག་ཡག་པོ་ཞིག་མ་ཤེས་ན།
རང་གི་མེས་པོ་དག་གི་ཤུལ་བཞག་གི་རིག་གནས་ལ་ངོས་འཛིན་ལེགས་པོ་ཞིག་ཐོབ་མི་སྲིད་ལ།
གཏིང་ཟབ་པོའི་ཤེས་རྟོགས་ནི་དེ་བས་ཀྱང་མི་སྲིད། དེ་མི་སྲིད་ན།
བརྒྱུད་འཛིན་དང་དར་སྤེལ་ནི་དེ་ལས་ཀྱང་ཡོང་ཐབས་མེད་པ་ཞིག་རེད། གནས་སྟངས་ཤིན་ཏུ་མང་པོ་ཞིག་གི་ཐོག་ནས་སྐད་ཆ་འདི་ཚོ་བཟང་ཕྱོགས་སུ་ཁ་བསྒྱུར་རྒྱུ་ནི་དཀའ་ཚེགས་ཅན་ཞིག་རེད།

མཁས་དབང་ཚུལ་ཁྲིམས་བློ་གྲོས་ཀྱིས་ལུག་རྫི་རྒད་པོའི་ཀུ་སྒྲ་ཞེས་པའི་ཕྱག་དེབ་ཏུ་ཞིབ་ཚགས་པོས་གླེང་སློང་གནང་བ་ལྟར།
ད་ལྟའི་དུས་འདིར་གོ་ལ་འདིའི་སྒང་གི་སྐད་ཡིག་མང་པོ་ཞིག་གིས་ཁྲོམ་རའི་དགོས་མཁོ་བསྐོང་མི་ཐུབ་པ་སོགས་ཕྱི་ནང་གི་རྒྱུ་རྐྱེན་ཧ་ཅང་མང་པོ་ཞིག་གིས་འཚོ་གནས་ཉེན་ཁ་ཅན་དུ་གྱུར་ཡོད།
བོད་ཀྱི་སྐད་ཡིག་ལ་མཚོན་ན་ཡང་།
ཕ་སྐད་དང་མ་ཡིག་གི་ངོ་བོས་བེད་སྤྱོད་གཏོང་མཁན་བོད་མི་བྱིངས་དང་ཧི་མ་ལ་ཡའི་རི་ཁུལ་ཕལ་མོ་ཆེ།
ཆོས་ལུགས་གཅིག་པའི་སློབ་སྦྱང་གི་མ་ལག་ཏུ་བེད་སྤྱོད་བྱེད་མཁན་སོག་པོའི་ནང་པ་སོགས་དང་།
ཞིབ་འཇུག་རྣམ་གྲངས་ཀྱི་ལག་ཆར་བེད་སྤྱོད་བྱེད་མཁན་རྒྱལ་སྤྱིའི་བོད་རིག་པའི་ཁྱབ་ཁོངས་ཀྱི་མཐོ་སློབ་དང་མི་སྒེར་ལྟ་བུ་ངེས་ཅན་ཞིག་ཡོད་མོད།
དོན་གྱི་ཆ་ལ་རྒྱ་དབྱིན་གྱི་ཡི་གེ་ཤེས་མཁན་མང་དུ་ཕྱིན་པ་དང་སྤྱོད་གོ་ཆེ་རུ་ཕྱིན་པས་བོད་མི་ཡིན་ཡང་རང་གི་སྐད་ཡིག་ལ་དོ་སྣང་ཉམས་པ་དང་།
མི་རིགས་གཞན་དག་གིས་ཀྱང་བོད་ཀྱི་རིག་གནས་དང་ནང་ཆོས་སོགས་ཀྱི་སློབ་སྦྱོང་ཆེད་བོད་ཡིག་སློབ་
སྦྱོང་དགོས་པའི་ལྟ་ཚུལ་ལ་འགྱུར་བ་འགྲོ་ངེས་ཡིན་པ།
སྤྱི་ཚོགས་ཁ་འཐོར་གྱི་རྣམ་པ་དང་མཉམ་འདྲེས་གྱི་རྣམ་པ་ཤུགས་ཆེ་རུ་ཕྱིན་པས་སྐད་ཡིག་གི་ཁོར་ཡུག་ལ་དོ་ཕོག་ཆེན་པོ་འགྲོ་བཞིན་པ་སོགས་ཀྱི་དཀའ་ངལ་མང་དག་ཅིག་གིས་ང་ཚོའི་སྐད་ཡིག་གི་མདུན་ལམ་ནི་སྤྲོ་བ་འདྲེན་པ་ཞིག་མ་རེད།

འོན་ཀྱང་། བོད་ཀྱི་རིག་གཞུང་གི་བླ་ན་མེད་པའི་མཛེས་སྡུག་དང་།
ཕུན་སུམ་ཚོགས་པའི་རིན་ཐང་། ད་དུང་བོད་ཡིག་རང་སྟེང་གི་ལེགས་ཆ་དང་།
བརྡ་འཕྲིན་མ་ལག་གི་བཟང་ཕྱོགས་ཀྱི་མཐུན་སྦྱོར།
ཁྱད་པར་ང་ཚོ་བོད་པ་དག་གི་བྱ་སྤྱོད་ཀྱི་ཐོག་ནས་མངོན་པའི་སེམས་ཤུགས་དང་འགུལ་བསྐྱོད་མང་པོ་ཞིག་ཡོང་དང་ཡོང་བཞིན་པ་དག་གིས་ང་ཚོར་མུ་མཐུད་རེ་བ་ཡོད་པ་མཚོན་གྱིན་ཡོད་ཅིང་།
ང་ཚོས་ཀྱང་མི་རེ་ངོ་རེ་ནས་མི་རིགས་གི་འཚོ་གནས་དང་། སྐད་ཡིག་གི་འཚོ་གནས།
རིག་གཞུང་གི་འཚོ་གནས་བཅས་ཀྱི་འཚེ་མ་སྲོག་བཅིག་ལྟ་བུའི་འབྲེལ་བ་ངོས་ཟིན་པར་བྱས་ཏེ།
སྔར་ལས་ལྷག་པའི་འབད་པ་ཆེན་པོས་སྒོ་ཧ་ཅང་མང་པོ་ནས་རིན་བྲལ་གྱི་ནོར་བུ་ལྟ་བུའི་སྐད་ཡིག་འདི་མུ་མཐུད་མི་རིགས་འདིའི་བསམ་བློའི་གཞུང་རྟ་དང་བླ་སྲོག་གི་རྟེན་ཕུར་དུ་གནས་རྒྱུར་ཁེག་ཐག་བྱ་རྒྱུའི་ཆོད་སེམས་མ་ཉམས་པ་དགོས།

འོན་ཀྱང་།
ཆེས་གལ་ཆེ་བ་ཞིག་ནི་འབོད་ཚིག་འདི་དག་མི་རེ་ངོ་རེ་ནས་རང་སྟེང་ནས་མངོན་གྱུར་བྱེད་པ་དང་།
ལག་ལེན་དངོས་ཀྱིས་ངོན་གྱུར་བྱེད་པ།
ཡོངས་ཁྱབ་རང་བཞིན་གྱིས་མངོན་གྱུར་བྱེད་པ་སྟེ།
མངོན་གྱུར་བྱེད་པ་གསུམ་གྱི་ཆེད་འབད་བརྩོན་ཆེན་པོ་བྱ་དགོས་སོ།།