སྲིད་སྐྱོང་སློབ་ཡོན་གསལ་བསྒྲགས་སྐབས་སྲིད་སྐྱོང་མཆོག་གིས་ཚན་རིག་པཱ་ལགས་ཀྱི་སྐབས་ལ་ཚན་རིག་གི་བུ་བྱུང་བ་མ་ཟད། མ་འོངས་པར་ཁོང་མེ་ཤུགས་འཕུར་མདའི་ཚན་རིག་མཁས་པ་ཞིག་ཆགས་ཏེ་ནམ་མཁར་འཕུར་བའི་ཉིན་མོ་དེར་ང་ཚོ་ཚང་མ་ཧ་ཅང་དགའ་བོ་ཡོང་སྐོར་གསུངས་སོང་།
དེ་རིང་སྔ་དྲོའི་ཆུ་ཚོད་ ༡༡ སྟེང་བཀའ་ཤག་གི་སྐུ་མགྲོན་སྣེ་ལེན་ཁང་དུ། གསར་འགོད་ལྷན་ཚོགས་ཤིག་བསྐོངས་ཏེ་འཇིགས་མེད་ཚེ་རིང་ལགས་སུ་རྒྱ་གར་གྱི་ཚན་རིག་དང་འཕྲུལ་རིག་གཙུག་ལག་སློབ་ཆེན་གྱི་འཕྲུལ་ལས་རིག་གནས་རམས་འབྱམས་པའི་ལོ་རིམ་དང་པོའི་ལོ་འཁོར་རྒྱུགས་འབྲས་བརྒྱ་ཆ་ ༩༧.༩ ཐོབ་པར་སྲིད་སྐྱོང་སློབ་ཡོན་གནང་རྒྱུ་ཡིན་པའི་གསལ་བསྒྲགས་གནང་སོང་།
གསར་འགོད་ལྷན་ཚོགས་ཐོག་སྲིད་སྐྱོང་བློ་བཟང་སེང་གེ་མཆོག་གིས་འཇིགས་མེད་ཚེ་རིང་ལགས་ཀྱི་ཁྱིམ་ཚང་གི་རྒྱབ་ལྗོངས་དང་འབྲེལ་ནས་བསྔགས་བརྗོད་གནང་དོན། འཇིགས་མེད་ཚེ་རིང་ནི་སྲིད་སྐྱོང་སློབ་ཡོན་ཧིན་སྒོར་འབུམ་གཅིག་རག་མཁན་དང་། ད་ལྟའི་བར་གྱི་སྲིད་སྐྱོང་སློབ་ཡོན་རག་མཁན་བརྒྱ་ཆ་མཐོ་ཤོས་དེ་རེད། དེའི་ནང་ནས་དམིགས་བསལ་དགའ་དགོས་པ་ཞིག་ལ་རྒྱུ་མཚན་གཉིས་ཡོད་པ་རེད། ཁོ་རང་མ་སུ་རི་གཏན་སློབ་ནས་འཛིན་རིམ་ ༡༢ ཐོན་པ་དེ་དམིགས་བསལ་མ་རེད། དམིགས་བསལ་དེ་ག་རེ་རེད་ཅེ་ན། འཛིན་གྲྭ་ ༡༠ བའི་བར་དུ་ཁོ་རང་རྡོར་རྗེ་གླིང་གཏན་སློབ་ནས་ཐོན་པ་དང་། ནང་ཡང་རྡོར་རྗེ་གླིང་དུ་ཡོད་པ་རེད། འཇིགས་མེད་ཚེ་རིང་གི་པཱ་ལགས་ཀྱིས་སློབ་སྦྱོང་རྩ་བ་ཉིད་ནས་གནང་མྱོང་མེད་པ་དང་། ཨ་མ་ལགས་ལ་བྱི་རིལ་འཚོང་སའི་ཚོང་ཁང་ཆུང་ཆུང་ཞིག་ཡོད་པ་རེད། པཱ་ལགས་སྙིང་རྗེ་སྐུ་ལས་ཞེ་དྲགས་བསྐྱོན་འདུག འབྲས་ལྗོངས་སྒང་ཏོག་ཏུ་ཕྱིན་ཏེ། ཡུལ་སྐོར་བ་དེ་ཚོར་རྟ་དང་དྲེལ་དེད་ནས་ཕྱག་ལས་གནང་གི་འདུག དེར་བརྟེན་ད་ལྟའི་བར་དུ་ནང་མི་གསུམ་ཆ་དཀྱུས་མ་ཞིག་རེད། ངས་ག་རེ་མཐོང་གི་འདུག་ཟེར་ན། ནང་མི་དཀྱུས་མ་ཞིག་ཡིན་ནའང་ཕ་མའི་དཔལ་འབྱོར་དང་ཤེས་ཡོན་གནས་ཚད་ག་འདྲ་ཡིན་མིན་ལ་མ་ལྟོས་པའི་ཐོག་ནས་སློབ་ཕྲུག་རང་ནས་སྐུ་ལས་སྐྱོན། དེ་བཞིན་དགེ་རྒན་ལས་བྱེད་ཚོས་འཕྱར་གྲུ་མཉམ་འདེགས་གནང་། ང་ཚོ་བོད་མིའི་སྒྲིག་འཛུགས་ནས་མཐུན་རྐྱེན་སྦྱར་བ་ཡིན་ན། ནམ་རྒྱུན་བཤད་ཀྱི་ཡོད་པ་ལྟར། དགའ་ལྡན་ཁྲི་ལ་བདག་པོ་མེད་པ་ནང་བཞིན་སྲིད་སྐྱོང་སློབ་ཡོན་ལ་ཡིན་ནའང་སུས་སྐུ་ལས་བསྐྱོན་ནས་བརྒྱ་ཆ་ག་ཚོད་མཐོ་བ་ལོན་པ་ཡིན་ན་དེ་ལ་རག་གི་རེད། ཅེས་གསུངས་སོང་།
མ་འོངས་པར་འཇིགས་མེད་ཚེ་རིང་ལགས་ཀྱི་དམིགས་ཡུལ་ལེགས་འགྲུབ་བྱུང་ཚེ་དགའ་སྤོབས་ཆེན་པོ་ཡོང་རྒྱུ་ཡིན་སྐོར་ལ་ཁོང་གིས། འཇིགས་མེད་ཚེ་རིང་ལགས་ཀྱི་མ་འོངས་པའི་དམིགས་ཡུལ་དེ་མེ་ཤུགས་འཕུར་མདའི་ཚན་རིག་མཁས་པ་ཞིག་གནང་འདོད་ཡོད་ཟེར་གྱི་འདུག ང་ཚོས་མ་ཤེས་པ་ཞིག་ལ་ཁོ་རང་ཉེ་ཆར་ཧིན་རྡུའི་འཕྲུལ་རིག་དང་ཚན་རིག་སློབ་གཉེར་ཁང་ནང་དུ། ཁོ་རང་ཚོ་སོ་སོས་བཟོས་པའི་འཕྲུལ་ཆས་ཀྱི་དཔེ་གཟུགས་ (Model) འགྲན་བསྡུར་བྱས་ཡོད་པ་དང་། ཁོ་རང་གི་རུ་ཁག་དེར་སློབ་གྲྭ་ཡོངས་ནས་རྒྱལ་ཁ་ཐོབ་འདུག འཕྲུལ་ཆས་ཀྱི་དཔེ་གཟུགས་གསར་བ་ག་རེ་བཟོས་འདུག་ཟེར་ན། འཛམ་གླིང་ནང་སྙན་གྲགས་ཆེ་ཤོས་ (Drones) ཟེར་བ་ཞིག་ཡོད་པ་དེ། གནམ་གྲུ་མི་མེད་པའི་ཐོག་ནས་གནམ་ལ་འཕུར་ཏེ་སོ་སོས་པར་རྒྱག་ཐུབ་པ་ད་ལྟ་ཨ་རི་དང་ཨི་ཛི་རལ་ནང་ཡོངས་གྲགས་ཆགས་བསྡད་ཡོད་པ་རེད། དེ་བཟོས་པའི་ཐོག་ནས་ཁྱད་ཆོས་མ་འདྲ་བ་ཆེ་ཤོས་ག་རེ་འདུག་ཟེར་ན། སྤྱིར་བཏང་གནམ་གྲུ་འཕུར་བཞིན་པའི་སྐབས་སུ་འཕྲོ་བརླག་ཏུ་ཕྱིན་པ་ཡིན་ན་མར་ཟེགས་འགྲོ་ཡི་ཡོད་ཀྱང་། ཁོ་རང་གིས་གནམ་གྲུ་འཕྲོ་བརླག་ཏུ་ཕྱིན་པ་ཡིན་ན་ས་ཆ་ག་བ་ནས་འཕུར་བ་ཡིན་ནའང་དེ་རང་ལ་ཕྱིར་ལོག་ཐུབ་པ་ཞིག་བཟོས་ཡོད་པར་བརྟེན་ཨང་དང་པོ་ཐོབ་འདུག མ་འོངས་པར་ཁོ་རང་གིས་འཆར་གཞི་བཟོས་ཏེ་གནམ་གྲུ་སྦྱོང་བའི་ཆེད་དུ་ (Training air card) བཟོ་ཡི་ཡིན་ཟེར་དུས། མེ་ཤུགས་འཕུར་མདའི་ཚན་རིག་མཁས་པ་ཆགས་པར་སྔོན་མ་ང་ཚོའི་ཤེས་རིག་བཀའ་བློན་དངོས་གྲུབ་ཚེ་རིང་མཆོག་གི་སྐབས་ལ་ཚན་རིག་པཱ་ལགས་ཟེར་བ་ཞིག་ཡོང་གྲགས་སུ་ཡོད་པ་དང་། ད་ལྟ་ཚན་རིག་པཱ་ལགས་ཡོད་སྐབས་ཚན་རིག་གི་བུ་ཡང་བྱུང་བ་མ་ཟད། དངོས་གནས་མེ་ཤུགས་འཕུར་མདའ་རང་གི་ཚན་རིག་མཁས་པ་ཞིག་གནང་འཆར་ཡོད་པས། ང་ཚོ་ཤེས་རིག་ལས་ཁུངས་ཧ་ལས་པའི་དགའ་བོ་བྱུང་ལ། འདི་ལས་ལྷག་གི་དགའ་བོ་ག་དུས་བྱུང་གི་རེད་ཟེར་ན། ཁོ་རང་མེ་ཤུགས་འཕུར་མདའི་ཚན་རིག་མཁས་པ་བྱས་ཏེ་གནམ་ལ་འཕུར་བའི་ཉིན་མོ་དེར་ད་ལན་ལས་ལྷག་ང་ཚོ་དགའ་བོ་ཡོང་གི་རེད། ཅེས་སོགས་གསུངས་སོང་།
སློབ་བུ་འཇིགས་མེད་ཚེ་རིང་ལགས་ཀྱིས། ང་རང་འཛིན་གྲྭ་བཅུ་གཅིག་བཅུ་གཉིས་སྐབས་མ་སུ་རི་གཏན་སློབ་ཏུ་སློབ་སྦྱོང་བྱེད་དུས། ཚན་རིག་དང་དམིགས་བསལ་དངོས་ཁམས་ཚན་རིག་ལ་དོ་སྣང་ཞེ་དྲགས་ཡོད་པ་དང་། ང་རང་ཆུང་དུས་ནས་ (Rocket Booster) དང་ (Launch Vehicle Missile)་ལ་དགའ་བོ་ཡོད་པ་མ་ཟད། འཛིན་གྲྭ་དགུ་པ་བཅུ་པ་ནས་ (Dronestar) སྐོར་ལ་དགའ་སྣང་ཞེ་དྲགས་བསླེབས་སོང་བས། མཐོ་རིམ་སློབ་གྲྭའི་སྐབས་ཆེད་དུ་ (Aeronautical Aerospace) ལེན་པའི་དམིགས་ཡུལ་བཟུང་བ་ཡིན། འཛིན་གྲྭ་བཅུ་གཉིས་ཐོན་རྗེས། ཆིན་ནཱ་ (Chennai) གྲོང་ཁྱེར་གྱི་ཧིན་རྡུའི་ཚན་རིག་དང་འཕྲུལ་རིག་སློབ་ཁང་དུ་ཐེངས་གཅིག་ཕྱིན་པ་ཡིན་ལ། སློབ་ཞུགས་མ་ཆགས་སྔོན་དུ་སློབ་གྲྭའི་ནང་ (Aircraft Drones) དང་ (Fighter Aircraft Mig 21)། (Boeing 737)། (Hover Training Aircraft)། དེ་བཞིན་ (Seasonal Aircraft) སོགས་སློབ་གྲྭ་དེའི་འཕྲུལ་རིག་ཡག་ཤོས་རེད་བསམ་བྱུང་། དེའི་རྗེས་རྒྱ་གར་གྱི་སློབ་ཕྲུག་ཚོ་དང་མཉམ་དུ་སྐད་ཆ་བཤད་པ་ཡིན། ཁོ་ཚོས་བཤད་ན་སློབ་གྲྭ་དེ་དམིགས་བསལ་ (Aeronautical Aerospace) སྐོར་ལ་སྐད་གྲགས་ཆེན་པོ་ཡོད་པ་རེད་ཟེར། དེའི་རྗེས་སུ་དེ་ག་རང་དུ་སློབ་ཞུགས་བྱས་ནས་ད་ལྟ་ལོ་གཉིས་པ་ནང་སློབ་སྦྱོང་བྱེད་མུས་ཡིན། ཞེས་བརྗོད་སོང་།
གསར་འགོད་པ། པདྨ་རྒྱལ།
