ལྷ་སྤྱི་ཚོགས་ཞབས་ཞུ་ཚོགས་པར་ལྷོ་ཨེ་ཤེ་ཡའི་གཞུང་འབྲེལ་མིན་པའི་ཚོགས་པ་ཁག་གི་ནང་ནས་དྲ་ཚིགས་བེད་སྤྱོད་གཏོང་མཁན་ཡག་ཤོས་ཀྱི་གཟེངས་རྟགས་ཨང་དང་པོ་ཐོབ་འདུག
ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་ནས་གནས་ཚུལ་མཁོ་གཏོང་གནང་བ་ལྟར་ན། ཟླ་འདིའི་ཕྱི་ཚེས་༩ ཉིན་རྒྱ་གར་གྱི་རྒྱལ་ས་ལྡི་ལི་གསར་པར་རྒྱ་གར་རང་བྱུང་བསྟི་གནས་ཁང་( India Habitat Centre )དུ། མང་ཚོགས་ཁེ་ཕན་དེབ་སྐྱེལ་ཚོགས་པ་ Public Interest Registry (PIR) དང་། བརྡ་འཕྲིན་ནུས་པ་གོང་སྤེལ་ཐེབས་རྩ་ཁང་(Digital Empowerment Foundation ) གཉིས་ཀྱི་གོ་སྒྲིག་འོག སྐབས་བཞི་པའི་ཕྱི་ལོ་ ༢༠༡༥ལོའི་ལྷོ་ཨེ་ཤེ་ཡའི་གཞུང་འབྲེལ་མིན་པའི་ཚོགས་པ་ཁག་གི་ནང་ནས་བརྡ་འཕྲིན་བེད་སྤྱོད་ཡག་ཤོས་གཏོང་མཁན་གྱི་གཟེངས་རྟགས་སྤྲོད་པའི་མཛད་སྒོ་ཚོགས་ཡོད་པ་དང་། མཛད་སྒོའི་ཐོག་བཞུགས་སྒར་དྷ་རམ་ས་ལར་རྟེན་གཞི་བྱས་པའི་ལྷ་སྤྱི་ཚོགས་ཞབས་ཞུ་ཚོགས་པར་<<དྲ་ཚིགས་དང་དྲ་བའི་ཡོ་བྱད་བེད་སྤྱོད་ཆེས་ཡག་ཤོས་གཏོང་མཁན་>> (Best use of Website & Internet Tools) གྱི་གཟེངས་རྟགས་ཨང་དང་པོ་ཕུལ་ཡོད་པ་དང་། ཕྱི་ལོ་ ༢༠༡༤ ལོར་གཟེངས་རྟགས་ཨང་གཉིས་པ་ཐོབ་ཡོད་འདུག
ལྷ་སྤྱི་ཚོགས་ཞབས་ཞུ་ཁང་གི་འགན་འཛིན་གཞོན་པ་བློ་བཟང་རབ་གསལ་ལགས་དང་། དྲུང་ཆེ་ཚེ་རིང་དབང་འདུས་ལགས། ལས་འཆར་འགན་འཛིན་རྡོ་རྗེ་སྐྱིད་ལགས་བཅས་གཟེངས་རྟགས་ཕུལ་བའི་མཛད་སྒོར་ཞུགས་ཏེ། དྲུང་ཆེ་ཚེ་རིང་དབང་འདུས་ལགས་ཀྱིས་གོང་གསལ་ཚོགས་པ་དེ་གཉིས་ཀྱི་འགན་འཛིན་ལྷན་ཚོགས་ཀྱི་ཚོགས་མི་དང་། ཟུར་དཔང་བ། གོ་སྒྲིག་ཚོགས་ཆུང་གི་ཚོགས་མིའི་གཙོས་རྒྱལ་ཁབ་བརྒྱད་ནས་ཕེབས་པའི་ཚོགས་པ་ཁག་གི་སྐུ་ཚབ་བཅས་ཁྱོན་མི་གྲངས་ ༡༠༠༠ ཙམ་ལ་ཚོགས་པའི་ལས་དོན་ཁག་དང་། བོད་དོན། དམིགས་བསལ་དྲ་ཚིགས་དང་དྲ་བའི་བརྒྱུད་ལམ་བེད་སྤྱོད་ཇི་ལྟར་གཏོང་གི་ཡོད་མེད་སོགས་ངོ་སྤྲོད་གནང་ཡོད་འདུག
ཐོག་མའི་འོས་གཞིའི་ནང་ལྷོ་ཨེ་ཤེ་ཡའི་རྒྱལ་ཁབ་རྒྱ་གར་དང་། བལ་ཡུལ། པཱ་ཀི་སི་ཐན། ཨ་ཧྥི་གྷན་ནི་སི་ཐན། བྷང་ལ་དྷི་ཤི། འབྲུག སིང་གྷ་ལ། མལ་ཌེ་ཝས་བཅས་རྒྱལ་ཁབ་བརྒྱད་ཀྱི་ནང་གཞུང་འབྲེལ་མིན་པའི་ཚོགས་པ་གྲངས་ ༢༢༥ ནང་བསླེབས་ཡོད་པ་དང་། དེ་དག་འདེམས་སྒྲུབ་ཀྱི་སྡེ་ཚན་དྲ་ཚིགས་དང་དྲ་བའི་ཡོ་བྱད་བེད་སྤྱོད་ཆེས་ཡག་ཤོས་གཏོང་མཁན་དང་། སྤྱི་ཚོགས་འབྲེལ་མཐུད་ཀྱི་བརྒྱུད་ལམ། ཁ་པར་གྱི་མཉེན་ཆས་རིགས། རང་འགུལ་གྱི་མཉེན་ཆས་དང་བརྒྱུད་ལམ། དྲ་ཚིགས་ཐོག་གྲངས་འཛིན་གྱི་ཡི་གེ་དང་པར། དྲ་ཐོག་ཚོང་དོན་རྒྱུས་སྟོན་སོགས་ཁྱོན་སྡེ་ཚན་ཁག་དྲུག་ཙམ་ཕྱེས་ཏེ། དཔྱད་ཞིབ་བྱས་པ་བརྒྱུད་གཏན་ཁེལ་གནང་ཡོད་འདུག
ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་གིས་བོད་ཨིན་གཉིས་ནང་དྲ་ཚིགས་མི་འདྲ་བ་བརྒྱད་ཙམ་གཙོ་གཉེར་བྱེད་བཞིན་ཡོད་ཅིང་། དེ་བཞིན་དྲ་ལམ་ལ་ཚོགས་པའི་ཉིན་རེའི་ལས་དོན་སྐོར་དང་། བོད་གནས་གསར་འགྱུར། བོད་ཀྱི་སྐད་ཡིག་དང་ལེགས་བྱང་དར་སྤེལ་སྐོར། ཁོར་ཡུག་སྲུང་སྐྱོབ་ཀྱི་ཤེས་བྱ་སོགས་དུས་ཐོག་ཏུ་འགོད་སྤེལ་བྱེད་བཞིན་པ་མ་ཟད། དྲ་ཚིགས་དང་དྲ་ལམ་དོ་དམ་དང་བེད་སྤྱོད་ཚད་ལྡན་གཏོང་བཞིན་པ་བཅས་ལ་བརྟེན་ནས་ད་ཐེངས་ཀྱི་གཟེངས་རྟགས་དེ་ཐོབ་པ་ཡིན་འདུག
