གདན་ས་ཆེན་མོ་དགའ་ལྡན་དགོན་དུ་ཉིན་གྲངས་ ༡༡ རིང་དབུ་ཚད་སེང་གེ་མཇིང་བསྣོལ་གྱི་རིས་མེད་མཁས་པའི་བགྲོ་གླེང་ཆེན་མོ་ཚོགས་བཞིན་ཡོད་འདུག
དགེ་ལུགས་ཡོངས་ཀྱི་༸རྒྱལ་བའི་བརྟན་བཞུགས་དང་བཀའ་དྲིན་རྗེས་དྲན་ཚོགས་ཆུང་གི་གོ་སྒྲིག་འོག ༧གོང་ས་མཆོག་དགུང་གྲངས་ ༨༠ ལ་ཕེབས་པར་བཀའ་དྲིན་རྗེས་དྲན་ཆེད། ཟླ་འདིའི་ཕྱི་ཚེས་ ༡༣ ནས་ ༢༢ ཉིན་བར་དགེ་ལུགས་ཀྱི་གདན་ས་ཆེན་མོ་དགའ་ལྡན་དགོན་དུ། བོད་ཀྱི་ཆོས་བརྒྱུད་ཆེན་པོ་བཞི་གཡུང་དྲུང་བོན་དང་བཅས་ཀྱི་མཁན་ཆེན་དང་། མཁན་པོ། ལྷ་རམས་པ་དང་། སློབ་དཔོན་རྣམ་པ་ལྷན་བཞུགས་ཀྱི་དབུ་ཚད་སེང་གེ་མཇིང་བསྣོལ་གྱི་རིས་མེད་མཁས་པའི་བགྲོ་གླེང་ཆེན་མོ་ཚོགས་བཞིན་ཡོད་འདུག
བགྲོ་གླེང་དབུ་འབྱེད་ཀྱི་མཛད་སྒོའི་ཐོག་དགེ་ལུགས་ཡོངས་ཀྱི་༸རྒྱལ་བའི་བརྟན་བཞུགས་དང་བཀའ་དྲིན་རྗེས་ཚོགས་ཆུང་གི་རྒྱུན་ལས་ཚོགས་གཙོ་དགེ་ལུགས་སྤྱི་འཐུས་དགེ་བཤེས་རོང་པོ་བློ་བཟང་སྙན་གྲགས་ལགས་ཀྱིས་ཕེབས་བསུ་དང་འབྲེལ་མཛད་རིམ་ངོ་སྤྲོད་དང་། སྐུ་མགྲོན་གཙོ་བོ་བྱང་རྩེ་ཆོས་རྗེ་རིན་པོ་ཆེ་མཆོག་ནས་དབུ་ཚད་སེང་གེ་མཇིང་བསྣོལ་ཞེས་ཡོངས་སུ་གྲགས་པའི་དོན་གནད་སྐོར་ལ་གསུང་བཤད་གནང་ཡོད་པ་དང་། དེ་བཞིན་སྒོ་མང་མཁན་པོ་དང་། ཤར་རྩེ་མཁན་པོ། བྱང་རྩེ་མཁན་པོ། བློ་གསལ་གླིང་མཁན་པོ་བཅས་ནས་བསྟན་བཅོས་བགྲོ་གླེང་གནང་རྒྱུ་གལ་གནད་ཆེན་པོ་ཡིན་པ་དང་། ལུང་རིགས་ཀྱི་ལམ་ནས་དགག་བཞག་སྤོང་གསུམ་གྱིས་བཀའ་དང་དགོངས་འགྲེལ་གྱི་བསྟན་བཅོས་དག་ལ་བགྲོ་གླེང་བྱས་ཏེ་ཆོས་བརྒྱུད་ཕན་ཚུན་དམ་ཚིག་རྡོག་རྩ་གཅིག་སྒྲིལ་དང་དག་སྣང་ནོར་བུའི་འོད་ཀྱིས་ཁྱབ་ཐུབ་པ་བཟོ་དགོས་རྒྱུ་དེ་དུས་བབ་ཀྱི་དགོས་མཁོ་དང་། རྒྱལ་བསྟན་སྤྱི་དང་བྱེ་བྲག་འཛམ་གླིང་གི་སྤྱི་ནོར། བོད་གངས་ཅན་གྱི་ཁྱད་ནོར་བོད་བརྒྱུད་ནང་བསྟན་གྱི་རིག་གཞུང་སྤྱིའི་རྩ་དོན་ཡིན་སྐོར་གསུང་བཤད་གནང་ཡོད་འདུག
ཉིན་རྒྱབ་ནས་བཟུང་བགྲོ་གླེང་དངོས་གཞི་དབུ་འཛུགས་གནང་ཡོད་པ་དང་། ཐེངས་འདིའི་བགྲོ་གླེང་ཐོག་སྔ་འགྱུར་རྙིང་མའི་སློབ་དཔོན་གཅིག་དང་། དཔལ་ལྡན་ས་སྐྱའི་མཁན་ཆེན་གཅིག་དང་། མཁན་པོ་གཉིས། བཀའ་བརྒྱུད་ཀྱི་མཁན་པོ་གསུམ་དང་། གཡུང་དྲུང་བོན་གྱི་དགེ་བཤེས་གསུམ། རི་བོ་དགེ་ལུགས་པའི་གདན་གསུམ་གྲྭ་ཚང་དྲུག་ནས་དགེ་བཤེས་ལྷ་རམས་པ་དྲུག་རེ་དང་། བཀྲ་ཤིས་ལྷུན་པོའི་དཀའ་ཆེན་གཉིས། རྭ་སྟོད་གྲྭ་ཚང་གི་དགེ་བཤེས་གཅིག་བཅས་རིས་མེད་མཁས་པ་༤༦ གིས། མཁན་ཆེན་ཞི་བ་འཚོས་མཛད་པའི་ཚད་ཆེན་དང་། མགོན་པོ་ཀླུ་སྒྲུབ་ཀྱིས་མཛད་པའི་རྩ་བ་ཤེས་རབ་གཉིས་ཀྱི་བརྗོད་གཞི་གནད་འགག་ཅན་སྔོན་ཕུལ་ཐོག་ཕྱག་རྩོམ་བྲིས་ཏེ། སྐར་མ་༡༥ རེར་གསུང་བཤད་གནང་བ་དང་འབྲེལ། སྐར་མ་སུམ་ཅུ་རེར་དྲི་བ་དྲིས་ལན་དང་དགོངས་འཆར་གནང་སྟེ། ཚད་ཆེན་དང་རྩ་བ་ཤེས་རབ་ཀྱི་དགོངས་དོན་ལ་རྒྱ་ཆེ་གཏིང་ཟབ་ཀྱི་བགྲོ་གླེང་གནང་བཞིན་ཡོད་འདུག
གཞན་ཡང་། དགེ་ལུགས་ཡོངས་ཀྱི་༸རྒྱལ་བའི་བརྟན་བཞུགས་དང་བཀའ་དྲིན་རྗེས་དྲན་ཚོགས་ཆུང་གིས་གོ་སྒྲིག་ཞུས་ཏེ། ༸གོང་ས་མཆོག་གི་བཀའ་དྲིན་རྗེས་དྲན་ཆེད། འདི་ལོའི་ཕྱི་ཟླ་ ༡༡ པའི་ཚེས་༡༥ ཉིན་དཔལ་ལྡན་སྨད་རྒྱུད་གྲྭ་ཚང་དུ་རྒྱུད་གྲྭ་སྟོད་སྨད་གཉིས་ཀྱི་གཙོས་པའི་གདན་ས་ཁག་གི་དགེ་བཤེས་རྣམ་པས་རིམ་ལྔ་གསལ་སྒྲོན་གཞིར་བཟུང་གསང་ཆེན་སྔགས་ཀྱི་རྩོད་པའི་ཆོས་ཐོག་ཚུགས་རྒྱུ་དང་། ཕྱི་ཟླ་ ༡༡ པའི་ཚེས་༡༨ ཉིན་དཔལ་ལྡན་འབྲས་སྤུངས་སུ་གདན་ས་གསུམ་གྱི་གཙོས་པའི་དགེ་ལུགས་པའི་དགོན་ཁག་བཅུ་གཅིག་གི་གཙོས་པའི་གཞུང་ལུགས་རབ་འབྱམས་སྨྲ་བས་ལེགས་བཤད་གསེར་ཕྲེང་དང་། རྩ་ཤེ་ཌིཀ་ཆེན་གཉིས་གཞིར་བཟུང་དབུ་ཕར་གྱི་རྩོད་པའི་ཆོས་ཐོག་ཚུགས་རྒྱུ་ཡིན་འདུག
གསར་འགོད་པ། པདྨ་མཚོ།
