སྤྱི་འཐུས་ཀྱི་འོས་བསྡུའི་ནང་ཐེངས་དང་པོར་འོས་ཤོག་འཕངས་པ།

༡) ཁྱེད་ཀྱི་བསམ་ཚུལ་གུས་བརྩི་ཡོད་ལ་བསམ་ཤེས་ཐུབ་ཐབས་ཞུ་བཞིན་ཡོད། ནམ་རྒྱུན་མིོ་ཚོས་ལྡོག་ཕྱོགས་ཀྱི་སྐད་ཆ་བཤད་ཡོང་དུས། ངས་དེ་ལ་གུས་བརྩི་ཞུས་ནས་ཉན་གྱི་ཡོད། རང་གི་ལྟ་ཚུལ་དང་ཇི་ཙམ་མ་མཐུན་ཡང་ཉན་གྱི་ཡོད། ཕར་དགག་བཞག་བྱེད་སྐབས། ༸གོང་ས་མཆོག་གི་མཚན་དང་བཀའ་དྲངས་ཏེ་འབུར་འཇོམས་བྱེད་ཐབས་ཞར་ཡང་བྱེད་ཀྱི་མེད། དེ་ལྟར་མི་བྱེད་པའི་རྒྱུ་མཚན་ནི། ངས་གཞན་གྱིས་བསམ་ཚུལ་མི་མཐུན་པ་ཞིག་བཤད་པ་དེ་ང་དང་མི་མཐུན་རུང་། དེ་ཁོ་རང་གི་བསམ་ཚུལ་ངོ་མ་རང་ཡིན་པ་དང་། བསམ་ཚུལ་དེ་ཁོ་རང་ལ་ལྟོས་ནས་བཤད་ན་བདེན་པ་རང་དུ་ཚོར་བཞིན་ཡོད་པར་ངོས་འཛིན་བྱེད་བཞིན་ཡོད། དེར་བརྟེན་ངས་དེ་ལ་གུས་བརྩི་ཞུ་གི་ཡོད། ང་རང་རང་ངོས་ནས་ཀྱང་རང་གི་བསམ་ཚུལ་ངོ་མ་བཤད་ཐབས་ཞུ་བཞིན་ཡོད། ངས་བཤད་པའི་བསམ་ཚུལ་དེ་ཚོ་ང་རང་ལ་ལྟོས་ནས་བཤད་ན་བདེན་པ་རང་ཡིན། དེ་འདྲའི་བསམ་བློའི་ཁྱེར་སོ་མེད་པར། ངས་གང་བཤད་བདེན་པ་རྐྱང་དང་། གཞན་གྱིས་གང་བཤད་རྫུན་མ་ཤ་སྟག་ཏུ་བསམས་ཏེ་ངན་སྨྲས་བྱས་ན། དོན་ངོ་མའི་བགྲོ་གླེང་ཟེར་བ་ཡོང་ཐབས་བྲལ་བ་རེད། དེར་བརྟེན་ད་ལྟ་དང་། མ་འོངས་བཅས་སུ་འདིར་བགྲོ་གླེང་བྱེད་སྐབས། ངས་༸གོང་ས་མཆོག་དང་བླ་ཆེན་མི་ཆེན་གྱི་མཚན་དྲངས་ཏེ་གཞན་ནག་པོ་བཟོ་ཐབས་ཞར་ཡང་མི་ཞུ་ལ། གཞན་གྱིས་གང་བཤད་ནོར་བ་དང་། ངས་གང་བཤད་འགྲིག་པར་ངོས་འཛིན་གྱིས་གླེང་རྩོད་ཀྱང་མི་ཞུ། དེ་མཁྱེན་པར་འཚལ།
༢) ཕྲན་གྱིས་ད་ཕན་བཙན་བྱོལ་བོད་མིའི་བཅའ་ཁྲིམས་གཞི་བཟུང་འོས་བསྡུའི་ནང་ཆ་ཤས་བླངས་ཡོད། དེ་ཡང་དཔྱ་དངུལ་ཕུལ། འོས་བསྡུའི་དེབ་སྐྱེལ་ཞུས། འོས་བསྡུའི་ཉིན་འོས་འཕེན་སར་བསྐྱོད། རང་གིས་འདོད་མོས་ཡོད་སར་འོས་འཕངས། རང་གི་འདོད་མོས་མེད་སར་འོས་འཕེན་གྱི་མེད། དེ་ནི་འོས་བསྡུའི་ནང་ཆ་ཤས་བླངས་པ་ལས་མ་བླངས་པ་མ་རེད། འོས་འཕེན་སར་དངོས་སུ་བསྐྱོད་དེ་སྡེ་ཚན་བྱེ་བྲག་ཅིག་ལ་འོས་འཕངས། སྡེ་ཚན་བྱེ་བྲག་ཅིག་ལ་འོས་མི་འཕེན་པ་དེ་འོས་བསྡུའི་ནང་རང་གི་ལྟ་ཚུལ་བཞིན་འགན་འཁྱེར་བ་ཆགས་ཡོད། དེ་ངའི་ཡིད་ཆེས་ཡིན།
༣) བཙན་བྱོལ་བོད་མིའི་བཅའ་ཁྲིམས་ཀྱི་དོན་ཚན་གང་དུའང་། བོད་ཀྱི་ཡུལ་མིར་འོས་གཞིར་ལངས་པ་དང་འོས་འཕེན་པའི་ཐོབ་ཐང་ཡོད་པར་གསུངས་པ་མ་གཏོགས། ཆོལ་ཁ་ཆོས་ལུགས་གང་རུང་ངམ་གཉིས་ཀ་ལ་ངེས་པར་འོས་འཕེན་དགོས་པ་དེ་ངེས་པར་སྒྲུབ་དགོས་པའི་ལས་འགན་ཡིན་པར་གསུངས་མེད། རང་གི་འདོད་མོས་བཞིན་འོས་འཕེན་པ་དེ་ཐོབ་ཐང་ལོངས་སུ་སྤྱོད་པ་དང་། བཅའ་ཁྲིམས་དང་མཐུན་པ་ཇི་བཞིན། རང་གི་འདོད་མོས་མེད་སར་འོས་མི་འཕེན་པ་དེ་ཡང་ཐོབ་ཐང་ལོངས་སུ་སྤྱོད་པ་དང་། བཅའ་ཁྲིམས་དང་ཡོངས་སུ་མཐུན་པ་ཞིག་ཡིོན་སྙམ།
༤) ཆོལ་ཁ་དང་ཆོས་ལུགས་ཀྱི་དབྱེ་བ་མེད་པར་འོས་འདེམས་བྱས་ན། སྤྱི་འཐུས་ཆ་ཚང་དབུས་གཙང་བ་ཆགས་ཉེན་ཡོད་དང་མེད་དེ་དཔྱད་གཞི་ཞིག་རེད། དང་པོ། ད་ཕན་ལོ་བཅོ་ལྔའི་རིང་བཀའ་བློན་ཁྲི་པ་དང་། སྲིད་སྐྱོང་གི་འོས་བསྡུ་དེ་ཆོལ་ཁ་དབྱེར་མེད་དུ་བྱས་པ་རེད། ད་ལྟ་མ་འོངས་པའི་ལོ་ལྔའི་རིང་གི་སྲིད་སྐྱོང་ཡང་ཆོལ་གསུམ་དབྱེར་མེད་དུ་འདེམས་བཞིན་ཡོད། ད་བར་གྱི་ཉམས་མྱོང་ལྟར་ན། གྲངས་མང་དབུས་གཙང་གིས་ཆོལ་ཁའི་ཞེན་ཁོག་བྱས་ཏེ་དབུས་གཙང་བ་ཁོ་ནར་འོས་འཕེན་ཉེན་མེད་པ་དེ་གསལ་པོ་ཆགས་འདུག་སྙམ། ཡིན་ན་ཡང་། སྲིད་སྐྱོང་དེ་ལྟར་བྱུང་ན། སྤྱི་འཐུས་ལའང་དེ་ལྟར་ཡོང་བའི་ངེས་པ་ཡོད་ཀྱི་མ་རེད། ཡིན་ནའང་དེ་ལ་ཐབས་ཤེས་ཡོད་ངེས་རེད། གོང་དུ་ཕྲན་གྱི་མཆན་གཅིག་གི་ནང་དེའི་སྐོར་ཞིག་གླེང་ཡོད་པས་འདིར་བསྐྱར་ཟློས་མི་ཞུ།

དེ་བདེན་པ་རེད། དེའི་དབང་གིས་གོང་གི་རྩོམ་ཡིག་ནང་ངས་ཀྱང་“ཆོལ་ཁ་ཆོས་རྒྱུད་གཞི་ལ་བཞག་པའི་འོས་བསྡུའི་ལམ་ལུགས་དེ་ལ་ལེགས་ཆ་ཡོད་པ་རེད།”ཅེས་གསལ་པོ་བྲིས་ཡོད་ལགས།