རྒྱ་ནག་གཞུང་གིས་ཕྱིའི་རྒྱལ་ཁབ་ཁག་ཏུ་བོད་རིགས་ཕ་ཡུལ་གཅིག་པའི་ལྷན་ཚོགས་ཟེར་བ་བཙུགས་ཏེ་༸གོང་ས་རྒྱལ་བ་རིན་པོ་ཆེ་མཆོག་དང་བོད་མིའི་སྒྲིག་འཛུགས་ཀྱི་ལས་དོན་ལ་འགོག་རྐྱེན་སྔར་ལྷག་བཟོ་བཞིན་འདུག
ཉེ་ལམ་རྒྱ་ནག་འཐབ་ཕྱོགས་གཅིག་གྱུར་ཁང་གིས་ཉི་ཧོང་ནང་བོད་རིགས་སྤུན་ཟླའི་རོགས་རམ་མཐུན་ཚོགས་ཟེར་བ་ཞིག་གསར་འཛུགས་བྱས་པ་དང་། དེ་འབྲེལ་གྱི་གནས་ཚུལ་མང་པོ་ཞིག་དྲིལ་བསྒྲགས་བྱེད་བཞིན་ཡོད་སྟབས། འདི་གའི་གསར་འགོད་པས་རྒྱ་ནག་འཐབ་ཕྱོགས་གཅིག་གྱུར་ཁང་གི་བོད་རིགས་སྤུན་ཟླའི་རོགས་རམ་མཐུན་ཚོགས་ཟེར་བ་སོགས་གསར་འཛུགས་བྱེད་དགོས་པའི་དམིགས་ཡུལ་དང་རྒྱབ་ལྗོངས་གང་ཡིན། ཚོགས་མི་དང་ལས་འགུལ་སྤེལ་ཕྱོགས་སོགས་ཀྱི་སྐོར་ལ་རྒྱ་ནག་དབྱེ་ཞིབ་པ་ཁག་ཅིག་ལ་དྲི་བ་དྲིས་ལན་བྱས་ཡོད།
བོད་རིགས་སྤུན་ཟླའི་རོགས་རམ་མཐུན་ཚོགས་ཟེར་བ་དེ་ག་དུས་བཙུགས་ཡོད་སྐོར་ལ་མིང་བརྗོད་འདོད་མེད་པའི་རྒྱ་ནག་དབྱེ་ཞིབ་པ་ཞིག་གིས། ཕྱི་ལོ་ ༢༠༡༢ ལོར་འཐབ་ཕྱོགས་གཅིག་གྱུར་གྱིས་བོད་རང་སྐྱོང་ལྗོངས་ནང་ཕྱིར་སྡོད་མི་སེར་གྱི་ལས་དོན་དང་འབྲེལ་བའི་ལས་ཁུངས་ཟེར་བ་ཞིག་མགོ་བཙུགས་ཡོད། ལས་ཁུངས་དེས་ཕྱི་རྒྱལ་ལ་ཡོད་པའི་མི་སེར་རྣམས་ལ་སྟངས་འཛིན་དང་འབྲེལ་བ་བྱ་རྒྱུ་སོགས་ལ་དམིགས་ཏེ་ལས་ཁུངས་དེ་མགོ་བཙུགས་པ་ཞིག་རེད། དེའི་རྗེས་ཕྱི་ལོ་ ༢༠༡༢ ལོར་ཨ་རིའི་ནང་བྱང་ཨ་རིའི་བོད་རིགས་ཕ་ཡུལ་གཅིག་པའི་ལྷན་ཚོགས་ཟེར་བ་ཞིག་བཙུགས་ཡོད་ཅིང་། དོལ་རྒྱལ་ལམ་ཤུགས་ལྡན་དང་འབྲེལ་བ་ཡོད་པའི་བདེ་ཆེན་སྤྲུལ་སྐུའམ་ཐུབ་བསྟན་ལུང་རིགས་ཟེར་བ་ཞིག་གིས་འགན་འཁུར་བ་དང་། ཁོས་བོད་པའི་གནད་དོན་ཐོག་བྱུང་བའི་དཀའ་ངལ་དེ་དག་མེད་པ་དང་། རྒྱ་ནག་གིས་བོད་ནང་འཛུགས་སྐྲུན་ཡག་པོ་བྱས་ཡོད་ལ། བོད་ནང་བདེ་སྐྱིད་ཡོད་ཚུལ་གྱི་འགྲེལ་བརྗོད་བྱེད་མཁན་ཞིག་རེད། ཚོགས་པ་དེའི་ནང་མང་ཆེ་བ་དོལ་རྒྱལ་རེད།
ཕྱི་ལོ་ ༢༠༡༣ ལོར་ཨོ་གླིང་དུ་ཨོ་གླིང་གི་བོད་རིགས་ཕ་ཡུལ་གཅིག་པའི་ལྷན་ཚོགས་ཟེར་བ་ཞིག་གསར་འཛུགས་བྱས་ཡོད་ལ། ཕྱི་ལོ་ ༢༠༡༩ ལོར་ཁེ་ན་ཌའི་ནང་ཁེ་ན་ཌའི་བོད་རིགས་ཕ་ཡུལ་གཅིག་པའི་ལྷན་ཚོགས་ཟེར་བ་བཙུགས་པ་དང་། དབུ་འབྱེད་ཀྱི་མཛད་སྒོའི་སྟེང་ཁེ་ན་ཌའི་སྲིད་བློན་རྗ་སི་ཊིན་ཊུ་རུ་ཌོ་ (Justin Trudeau) ལགས་ཀྱིས་ཚོགས་པ་དེ་བཙུགས་པར་འཚམས་འདྲི་ཞུ་ཡིག་གནང་ཡོད་ལུགས་བརྗོད་ཡོད་ཀྱང་། ཕྱིས་སུ་དེ་དག་རྫུན་བཟོ་བྱས་ཡོད་པ་ར་སྤྲོད་བྱུང་ཡོད། ལོ་ཁ་ཤས་ཀྱི་སྔོན་ལ་སྦེལ་ཇམ་ནང་ཡུ་རོབ་ཀྱི་བོད་རིགས་ཕ་ཡུལ་གཅིག་པའི་ལྷན་ཚོགས་ཟེར་བ་ཞིག་གསང་བའི་ཐོག་ནས་བཙུགས་པ་ཞིག་གོ་ཐོས་བྱུང་། ཟླ་འདིའི་ཕྱི་ཚེས་ ༡༤ ཉིན་ཉི་ཧོང་དུ་བོད་རིགས་སྤུན་ཟླའི་རོགས་རམ་མཐུན་ཚོགས་ཟེར་བ་བཙུགས་ཡོད་འདུག་ལ། དེའི་ངོ་བོ་གཅིག་པ་རེད་བསམ་གྱི་འདུག རྒྱ་ནག་གིས་བོད་ནང་ཡར་རྒྱས་བཏང་ཡོད་པ་དང་། བོད་མི་རྣམས་ཀྱིས་བདེ་སྐྱིད་ཀྱི་འཚོ་བ་སྐྱེལ་གྱི་ཡོད་པ་སོགས་འགྲེལ་བརྗོད་བྱེད་ཀྱི་ཡོད་པའི་ཚོགས་པ་ཞིག་རེད་བསམ་གྱི་འདུག ཅེས་བརྗོད་བྱུང་།
ཚོགས་པ་དེ་དག་གི་དམིགས་ཡུལ་དང་ལས་དོན་བྱེད་ཕྱོགས་གང་འདྲ་ཡིན་སྐོར་ལ་ཁོང་གིས། ཚོགས་པ་དེ་དག་གི་ལས་དོན་གཙོ་བོ་ནི་༸གོང་ས་རྒྱལ་བ་རིན་པོ་ཆེ་མཆོག་དང་། བོད་མིའི་སྒྲིག་འཛུགས་ཀྱིས་རྒྱལ་སྤྱིའི་སྤྱི་ཚོགས་སྟེང་ད་ལྟ་བར་དུ་བོད་ནང་དཀའ་ངལ་ཡོད་པ་དང་། བོད་ནང་གི་ཛ་དྲག་གི་གནས་སྟངས་སོགས་གང་ཐུབ་ཐུབ་ཀྱིས་འགྲེལ་བརྗོད་བྱེད་ཀྱི་ཡོད་ཀྱང་། རྒྱ་ནག་གིས་ཚོགས་པ་དེ་འདྲ་བཙུགས་ཏེ་ལས་འགུལ་གྱི་ངོ་བོའི་ཐོག་ནས་བོད་ནང་བདེ་སྐྱིད་ཡོད་པ་དང་། རྒྱ་ནག་གིས་བོད་ཞི་བའི་བཅིངས་གྲོལ་བཏང་ནས་ཡར་རྒྱས་བཏང་ཡོད་པ་སོགས་འགྲེམས་སྟོན་བྱས་ནས་ལས་འགུལ་སྤེལ་ཡོད། མདོར་ན། ༸གོང་ས་རྒྱལ་བ་རིན་པོ་ཆེ་མཆོག་དང་། བོད་མིའི་སྒྲིག་འཛུགས་ཀྱི་ལས་དོན་ཁག་ལ་འགོག་རྐྱེན་བཟོ་ཡི་ཡོད། བོད་མིའི་ངོ་བོ་འཁྱེར་ནས་རྒྱ་ནག་གཞུང་གི་ཚབ་བྱས་ཏེ་ཕྱི་རྒྱལ་ཡུལ་གྲུ་ཁག་ཏུ་རྒྱ་ནག་གི་སྲིད་ཇུས་སོགས་འགྲེལ་བརྗོད་བྱེད་ཀྱི་ཡོད་པ་རེད། ཕྱི་རྒྱལ་ཡུལ་གྲུ་ཁག་ཏུ་ཡོད་པའི་བོད་མི་ཞིག་གིས་དེ་འདྲ་བྱེད་ཀྱི་ཡོད་ཚེ། བོད་མིའི་གཅིག་སྒྲིལ་གྱི་ངོ་བོ་གང་འདྲ་ཡིན་པའི་ཐོག་ལ་རང་བཞིན་གྱི་དོགས་སློང་སླེབ་ཀྱི་རེད་བསམ་གྱི་འདུག ཕྱི་ལོ་ ༢༠༢༡ ལོར་བོད་ཞི་བའི་བཅིངས་གྲོལ་བཏང་སྟེ་ལོ་ ༧༠ འཁོར་བའི་སྐབས། ཁེ་ན་ཌ་དང་ཨ་རིའི་ནང་འགྲེམས་སྟོན་གྱི་རྣམ་པའི་ཐོག་ནས་བོད་ནང་བདེ་སྐྱིད་ཡོད་པ་དང་། རྒྱ་ནག་གིས་བོད་ནང་འཛུགས་སྐྲུན་བྱས་ཏེ་ཡར་རྒྱས་བཏང་ཡོད་པ་སོགས་འགྲེམས་སྟོན་བརྒྱུད་འགྲེལ་བརྗོད་བྱ་རྒྱུའི་ལས་འགུལ་མང་པོ་ཞིག་སྤེལ་སོང་། ཞེས་བརྗོད་བྱུང་།
སྤྱིར་བཏང་བོད་པ་མང་པོ་ཞིག་གིས་གནད་དོན་འདི་ཧ་གོ་ཡི་ཡོད་རེད་བསམ་གྱི་འདུག་སྟེ། གཞོན་སྐྱེས་ཚོར་དེའི་ཐོག་ཐུགས་སྣང་དེ་ཙམ་ཡོད་མེད་ཐེ་ཚོམ་རེད་འདུག དེ་དག་མཁྱེན་དགོས་རྒྱུ་གལ་ཆེན་པོ་རེད། བོད་མིའི་སྒྲིག་འཛུགས་དང་བདེ་སྲུང་ལས་ཁུངས་ཀྱིས་ནམ་རྒྱུན་དུ་ནས་བོད་པའི་གནད་དོན་ཐོག་འགྲེལ་ལོག་རྒྱག་མཁན་རྣམས་ལ་དོགས་ཟོན་དང་། གནད་དོན་ཞིག་ལ་བརྩིས་ནས་དོ་སྣང་བྱེད་དགོས་རྒྱུ་གལ་ཆེན་པོ་ཡིན་པའི་ལམ་སྟོན་གནང་གི་ཡོད་པ་ལྟར། ད་ལྟའི་གནད་དོན་དེ་དག་བྱུང་བ་དང་ཤེས་དགོས་རྒྱུ་གལ་ཆེན་པོ་རེད་འདུག ཅེས་བརྗོད་བྱུང་།
ས་དཀར་བཀྲ་ཤིས་ལགས་ཀྱིས་གནད་དོན་དེའི་ཐད། ཚོགས་པ་དེ་གསར་འཛུགས་བྱེད་པར་རྒྱ་ནག་གཞུང་ཚབ་ཁང་གིས་དངོས་ཤུགས་བརྒྱུད་གསུམ་ནས་རོགས་རམ་བྱས་པ་དང་། ཚོགས་པ་དེར་བོད་པ་དང་རྒྱ་མི་གཉིས་ཀ་ལྡན་པའི་ཚོགས་མི་ ༣༠༠ ཙམ་ཡོད་པ་རེད། ཕྱི་ལོ་ ༢༠༡༩ ལོར་ཁེ་ན་ཌ་རུ་ཁེ་ན་ཌའི་བོད་རིགས་ཕ་ཡུལ་གཅིག་པའི་ལྷན་ཚོགས་ཟེར་བ་གསར་འཛུགས་བྱས་ཡོད་པ་དང་། དེའི་ནང་ཚོགས་མི་ག་ཚོད་ཡོད་མེད་ཁ་གསལ་ཤེས་ཀྱི་མེད། དེ་ནས་ལྷོ་ཨེ་ཤ་ཡའི་བོད་རིགས་ཕ་ཡུལ་གཅིག་པའི་ལྷན་ཚོགས་ཟེར་བ་དང་། ཡུ་རོབ་ཀྱི་བོད་རིགས་ཕ་ཡུལ་གཅིག་པའི་ལྷན་ཚོགས་ཟེར་བ་གསར་འཛུགས་བྱས་ཡོད་ཅིང་། དེའི་ནང་ཚོགས་མི་ ༡༢ ཙམ་ཡོད་པ་རེད། ཟླ་འདིའི་ཕྱི་ཚེས་ ༡༤ ཉིན་བདེ་སྐྱིད་ཚང་པཱ་དོན་ཀྲོན་ཞན་སིན་(德吉金仓-巴顿钟先森) ཟེར་བའི་རྒྱ་མི་ཞིག་གིས་ཉི་ཧོང་དུ་བོད་རིགས་སྤུན་ཟླའི་རོགས་རམ་མཐུན་ཚོགས་ཟེར་བ་གསར་འཛུགས་བྱས་འདུག ཅེས་བརྗོད་བྱུང་།
ས་དཀར་བཀྲ་ཤིས་ལགས་ཀྱིས། བོད་རིགས་སྤུན་ཟླའི་རོགས་རམ་མཐུན་ཚོགས་ཟེར་བ་དེ་གཙོ་བོ་རྒྱ་ནག་གཞུང་གིས་དངོས་ཤུགས་བརྒྱུད་གསུམ་ནས་རོགས་རམ་བྱས་ཏེ་གསར་འཛུགས་བྱས་པ་དང་ཚོགས་པ་དེ་འཐབ་ཕྱོགས་གཅིག་གྱུར་ཁང་དང་ཐད་ཀར་འབྲེལ་བ་ཡོད་སྐོར་དང་། བཙན་བྱོལ་གཞུང་ལ་ངོ་རྒོལ་བྱ་རྒྱུ་དང་། བོད་ཀྱི་རྩ་དོན་གྱི་འཐབ་རྩོད་དང་། བོད་མིའི་ནང་ཁུལ་གྱི་མཐུན་སྒྲིལ་སོགས་གཏོར་བཤིག་གཏོང་རྒྱུར་དམིགས་ཡོད་པ་མ་ཟད། བོད་དང་རྒྱ་ནག་ནང་དུ་ལྟ་སྐོར་དུ་འཁྲིད་དེ་བོད་ནང་ཡར་རྒྱས་ཤུགས་ཆེན་པོ་བཏང་ཡོད་པའི་སྐོར་སོགས་ཁྱབ་བསྒྲགས་བྱ་རྒྱུའི་ལས་འགུལ་སྤེལ་གྱི་ཡོད་སྐོར་དང་། རྒྱ་ནག་གིས་འཛམ་གླིང་ས་ཕྱོགས་གང་སར་བཙུགས་པའི་བོད་རིགས་སྤུན་ཟླའི་རོགས་རམ་མཐུན་ཚོགས་ཟེར་བ་དེ་ཕྱི་ལོགས་སུ་ཡོད་པའི་བོད་པའི་སྐུ་ཚབ་ཡིན་ཁུལ་གྱི་མིང་བཏགས་ཡོད་ཅིང་། བཙན་བྱོལ་དུ་ཡོད་པའི་བོད་པའི་སྐུ་ཚབ་ཡིན་ཁུལ་བྱས་ཏེ་རྒྱ་ནག་གཞུང་ཚབ་ཁང་གིས་གོ་སྒྲིག་བྱས་པའི་ལོ་གསར་གྱི་མཛད་སྒོ་ཁག་དང་། ཚོགས་འདུ་སོགས་ལ་མཉམ་ཞུགས་བྱས་ཏེ་བོད་མི་རྣམས་ལ་སྣང་བརྙན་བསྐྲུན་པ་སོགས་ཤུགས་རྐྱེན་ངན་པ་ཐེབས་ཀྱི་ཡོད་པ་མ་ཟད། དེ་སྔ་ནས་ཚོགས་པ་དེ་འདྲ་བཙུགས་ཏེ་བོད་མིའི་སྒྲིག་འཛུགས་དང་། བཙན་བྱོལ་བོད་མིའི་གཅིག་སྒྲིལ་སོགས་གཏོར་བཤིག་བཏང་དང་གཏོང་མུས་ཡིན་ཡང་། ད་བར་ལས་འགུལ་དེ་དག་ལམ་ལྷོངས་བྱུང་གི་མེད་སྐོར་སོགས་འགྲེལ་བརྗོད་གནང་བྱུང་།
ཁོང་གིས། ཨོ་གླིང་གི་བོད་རིགས་སྤུན་ཟླའི་རོགས་རམ་མཐུན་ཚོགས་ཟེར་བ་དང་། ཡུ་རོབ་ནང་ཡོད་པའི་བོད་རིགས་སྤུན་ཟླའི་རོགས་རམ་མཐུན་ཚོགས་ཟེར་བ་དེ་དག་གིས་བོད་མི་རྣམས་བོད་ནང་དུ་ལྟ་སྐོར་དུ་འཁྲིད་པ་སོགས་ཀྱི་ལས་འགུལ་སྤེལ་གྱི་ཡོད་འདུག་ལ། བོད་ནང་དུ་ལྟ་སྐོར་དུ་འགྲོ་བར་རྒྱ་ནག་གིས་འགྲོ་སོང་ཆ་ཚང་གཏོང་རྒྱུ་དང་། ཡིག་ཆ་བཟོ་རྒྱུ་ཡིན་སྐོར་སོགས་བརྗོད་དེ་བཙན་བྱོལ་གྱི་བོད་མི་རྣམས་ལ་མགོ་སྐོར་བསླུ་བྲིད་ཀྱིས་བོད་ནང་དུ་ལྟ་སྐོར་དུ་འཁྲིད་དེ། བོད་ནང་དུ་ཡར་རྒྱས་ཕྱིན་པ་དང་། རྒྱ་ནག་གི་སྲིད་ཇུས་ཁྱབ་བསྒྲགས་བྱ་རྒྱུའི་དམིགས་ཡུལ་འཛིན་གྱི་འདུག ལས་འགུལ་འདི་དང་འདིའི་རིགས་ལ་ང་ཚོ་གཞུང་མང་གཉིས་ནས་གདོང་ལེན་བྱེད་དགོས་གལ་ཆེན་པོ་ཡིན་པ་དང་། ལྷག་པར་དུ་མ་འོངས་པར་གནས་སྟངས་ཛ་དྲག་ཅིག་ཆགས་དུས། བཙན་བྱོལ་བོད་མིའི་སྐུ་ཚབ་ཡིན་ཁུལ་བྱས་ཏེ་རྒྱལ་སྤྱིའི་སྟེང་བོད་དོན་འཁྱོག་བརྗོད་དང་། བོད་མིའི་ནང་ཁུལ་གྱི་མཐུན་སྒྲིལ་ལ་གཏོར་བཤིག་གཏོང་རྒྱུ། མ་འོངས་པར་རྒྱལ་སྤྱིའི་སྟེང་བོད་མིའི་སྐུ་ཚབ་ཡིན་ཁུལ་བྱས་ཏེ་ལས་ཀ་འདྲ་མིན་བྱེད་མི་སྲིད་པ་མིན་པས། དོགས་ཟོན་བྱེད་དགོས་པ་ནི་ཧ་ཅང་གི་གལ་ཆེན་པོ་རེད། ཅེས་བརྗོད་བྱུང་།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
