རྩོམ་ཡོན་གསལ་བསྒྲགས།

༄༅། །ས་ཡུལ་དུ་བཞུགས་ཤིང་རྩོམ་རྩལ་རིག་ལམ་གྱི་སྨྱུག་ཁ་རྒོད་པའི་རང་རེའི་ཤེས་ལྡན་པ་ཚོའི་སྙན་ལམ་དུ།།

ཆེད་ཞུ།།

འདི་གའི་འགྲེམས་སྟོན་༼༧གོང་ས་མཆོག་གི༽པའི་ངོས་ནས་ཐོག་མའི་འཆར་ཟིན་ལྟར་གྱིས་ཟླ་འགའི་སྔོན་ཚུན་ནས་༧གོང་ས་མཆོག་གི་གསུང་རྩོམ་གྱི་དགོངས་དོན་ཐོག་རང་རེའི་མི་སྡེ་རུ་སློབ་སྦྱོང་ངམ་དེབ་ཀློག་གི་གོམས་གཤིས་ཤིག་བསྐྲུན་ཆེད་ཡོངས་ཁྱབ་རང་བཞིན་གྱི་འགྲན་རྩོམ་ཞིག་བཀོད་སྒྲིག་ཞུས་ཟིན་ལ། མང་མང་གི་ཆ་ཤས་ལེན་ཕྱིར་རྩོམ་ལུས་ཀྱང་རང་མོས་དང་སྐད་ཡིག་ཉིད་བོད་ཨིན་གཉིས་གང་བདེར་སྤྱད་འཐུས་བྱས་ཡོད། གསལ་བསྒྲགས་སྔོན་སོང་བཞིན་རྩོམ་ཡིག་འབྱོར་ཚེས་ཀྱི་མཐའ་མའི་དུས་བཀག་ནི་ཕྱི་ལོ་ ༢༠༡༥ ལོའི་ཟླ་ ༧ ཚེས་ ༡༣ ཉིན་དང་དེའི་གྲུབ་འབྲས་ཀྱང་དེ་ལྟར་ཏུ་སྔོན་ཚུན་ནས་སྤེལ་དགོས་པར་མཐོང་མོད། ཕྱོགས་གཅིག་ནས་རྩོམ་ཡིག་རྣམས་དུས་ཐོག་ཏུ་མ་འབྱོར་བ་དང་གཉིས་སུ་ནི་འགྲན་རྩོམ་ནང་གཟེངས་སུ་ཐོན་པ་རྣམས་ལ་རྗེས་སུ་ཡི་རངས་སམ་ཆེ་མཐོང་གི་ཕྱིར་མཛད་སྒོ་ཞིག་དང་སྟབས་བསྟུན་འབུལ་འཆར་གྱི་བཀོད་སྒྲིག་དེའི་རྐྱེན་པས་འགོར་འགྱངས་སུ་ཕྱིན་འདུག་ན་བཟོད་གསོལ་ཞུ་བ་ལགས།

འགྲན་རྩོམ་གྱི་གྲུབ་འབྲས་དང་དེའི་རྩོམ་ཡོན།

ཡོངས་ཁྱབ་རང་བཞིན་གྱི་འགྲན་རྩོམ་འདི་སྐབས་དེའི་བོད་ཀྱི་དུས་བབས་དང་བང་ཆེན། དེ་བཞིན་རྒྱལ་སྤྱིའི་བོད་ཀྱི་ཆ་འཕྲིན་ (Tibet post) སོགས་ཀྱི་ཚགས་ཤོག་དང་དྲ་རྒྱ་སྟེང་དུ་མ་ཟད། ཤེས་རིག་གི་ཁྱབ་ཁོངས་བཅས་སུའང་གསལ་བསྒྲགས་ སྤེལ་དོན་ལྟར་ཏུ་རྩོམ་འབྱོར་བྱུང་བ་ནི་བོད་ཡིག་ནང་༡༣དང་། ཨིན་ཡིག་ནང་རྩོམ་ཡིག་གྲངས་༦བཅས་ཁྱོན་འགྲན་རྩོམ་ འདིའི་ཆ་ཤས་ལེན་མཁན་མི་སྣ་༡༩ བྱུང་བའོ། །

རྩོམ་ཡིག་གི་དཔྱད་འདེམས་པ་རྣམ་པ།
རྩོམ་ཡིག་གང་འབྱོར་བ་རྣམས་ཀྱི་བརྒྱ་ཆའི་ཐོབ་སྐར་དེ་དྲང་སྙོམ་མམ་ཁམས་གཙང་ཡོང་ཕྱིར་འབྲེལ་ཡོད་༼༸གོང་ས་མཆོག་གི་དགོངས་དོན་ཐོག་རྒྱུས་མངའ་ཡོད་མཁན༽ གྱི་མི་དྲུག་ལག་ཏུ་ཕུལ་བ་ཡིན་ལ། དེའང་བོད་ཡིག་ཐོག་ཞུ་དག་གམ་བརྒྱ་ཆ་སྤྲོད་མཁན་ནི། ༡༽བོད་ཀྱི་དཔེ་མཛོད་ཀྱི་སྲོལ་རྒྱུན་ཉམས་ཞིབ་ཚན་པའི་འགན་འཛིན་རྒན་ན་ག་སངས་རྒྱས་བསྟན་དར་ལགས་དང་། ༢༽རྣམ་གྲྭ་ཐུབ་བསྟན་ཡར་འཕེལ༼རྩོམ་པ་པོ་དང་༧གོང་ས་མཆོག་གི་གསུང་འབུམ་ཕྱོགས་སྒྲིག་པའི་ཁོངས་མི༽། ༣༽མགོན་པོ་རྒྱལ༼ས་རཱ་སློབ་ཆེན་གྱི་ལོ་རྒྱུས་ཉམས་ཞིབ་དང་༧གོང་ས་མཆོག་གི་གསུང་རྩོམ་འགྲེམས་སྟོན་པ༽བཅས་གསུམ་ཡིན།      ཨིན་ཡིག་ནང་བརྒྱ་ཆ་སྤྲོད་མཁན་ནི། ༡༽བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་མཆོག་དང་། ༢༽བསྟན་འཛིན་ཤེས་རབ༼སྐུ་སྒེར་གྱི་ལས་བྱེད་༽།  ༣༽སམ་བྷོ་ཊའི་སྤྱི་ཁྱབ་འགན་འཛིན་རྒན་ཀརྨ་ཆུང་བདག་བཅས་ཡིན།   དཔྱད་འདེམས་པ་རྣམས་ཀྱི་༼བོད་ཡིག་ཐོག༽བརྒྱ་ཆའི་ཐོབ་སྐར་ལས་ཨང་རིམ་རྩེར་སོན་པ་གསུམ་གྱི་སྐར་གྲངས་གཅིག་ཏུ་ཁེལ་བའི་རྩོམ་ཤོག་གང་དེ་སླར་ཡང་བསྐྱར་ཞིབ་གྱིས་ཐག་གཅོད་གནང་བ་ཡིན་ལ་དེའི་ཞལ་འདེམས་པ་ནི་ ༡ ས་རཱ་སློབ་ཆེན་གྱི་སྐབས་དང་པོའི་གཙུག་ལག་རམ་འབྱམས་པའི་རྩོམ་རིག་སློབ་དཔོན་རྒན་སྤྲེལ་ནག་པ་བློ་གྲོས་དཔལ་བཟང་མཆོག་དང་རིག་གནས་རམ་འབྱམས་པའི་ལོ་རྒྱུས་སློབ་དཔོན་གཙང་ཕྲུག་སྟོབས་ལགས་གཉིས་ཡིན།
གསལ་བཤད།  དེའང་ཕྱི་ཟླ་ ༡༠ པའི་ཚེས་ ༢༦ ཉིན་ས་རཱ་སློབ་ཆེན་དུ་༧གོང་ས་མཆོག་གི་གསུང་རྩོམ་འགྲེམས་སྟོན་༼འདི་ནས་བཟུང་ལས་དོན་ཕྱི་མ་རྣམས་ཀྱི་ཕྱིར་གནས་སྐབས་རིང་འགྲེམས་སྟོན་མཚམས་འཇོག་བྱེད་རྒྱུ༽གྱི་མཇུག་སྡོམ་མཛད་སྒོ་ཞིག་དང་དེའི་ཐོག་ཤེས་ཡོན་པའི་སྡེ་ནས་འབྲེལ་ཡོད་མཁས་པའི་གསུང་བཤད་ཁག་ཅིག་ཀྱང་བཀོད་སྒྲིག་དང་སྟབས་བསྟུན་འགྲན་རྩོམ་གྱི་ཆ་ཤས་ལེན་མཁན་རྣམས་སུ་གཟིགས་གསོལ་སྩོལ་གནང་ཡོང་བ་ལགས་ན་དེའི་དོན་མཁྱེན་ཆུབ་གྱིས་ཚང་མ་ངེས་ཕེབས་ཡོང་བའི་རེ་བ་ཤིན་ཏུ་ནས་ཆེ་ཞུ་བའོ།།

ཕྱི་ལོ་ ༢༠༡༥ ལོའི་ ༡༠ ཚེས ༢༡ ཉིན།།

ལས་དོན་པ་མགོན་པོ་རྒྱལ་གྱིས།།