སྨན་པའི་ལྷན་ཚོགས་དགོས་ན་རྒྱུན་གྲོན་སྔོན་རྩིས་གྲ་སྒྲིག་བྱོས།

བོད་ཀྱི་སྨན་པའི་ལྷན་ཚོགས་ཀྱི་ཤེས་ཡོན་ཟབ་འཁྲིད་དབུ་འཛུགས་མཛད་སྒོའི་སྟེང་། བོད་མི་མང་སྤྱི་འཐུས་ཚོགས་གཙོ་མཆོག་གིས། འཛིན་སྐྱོང་བཀའ་ཤག་གིས་སྨན་པའི་ལྷན་ཚོགས་དགོས་མཁོ་ཡོད་སྐོར་གསུང་བཞིན་དུ་ལྷན་ཚོགས་རྒྱུན་གནས་ཡོང་ཐབས་ལ་རྒྱུན་གྲོན་གཏོང་འདོད་མེད་པ་དེ་འགྲིག་གི་མེད་སྐོར་གསུངས།

དེ་རིང་སྔ་དྲོའི་ཆུ་ཚོད་ ༩།༣༠ སྟེང་དབུས་བོད་ཀྱི་སྨན་རྩིས་མཐོ་སློབ་ཚོགས་ཁང་དུ། བོད་ཀྱི་གསོ་བ་རིག་པའི་ཆེས་མཐོའི་སྨན་པའི་ལྷན་ཚོགས་ཀྱི་གོ་སྒྲིག་འོག ཉིན་ ༦ རིང་བོད་ཀྱི་གསོ་རིག་སྨན་པའི་ཤེས་ཡོན་གོང་སྤེལ་གྱི་ཟབ་འཁྲིད་ཐེངས་ ༤པ་དེ་ཚོགས་སོང་ལ། དབུ་འབྱེད་མཛད་སྒོའི་སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་འཕྲོད་བསྟེན་དྲུང་ཆེ་སྤྲ་ཉིད་ཚེ་རྒྱལ་ལགས། བོད་ཀྱི་གསོ་རིག་ལྷན་ཚོགས་ཀྱི་ཚོགས་གཙོ་ངག་དབང་བཟོད་པ་ལགས་གསུམ་གྱི་གཙོས་བོད་པའི་སྨན་པ་དང་གསོ་རིག་ལྷན་ཚོགས་ཀྱི་ཚོགས་མི་ ༣༠ ཙམ་འཛོམས་འདུག

ཚོགས་ཐོག་ཏུ་བོད་ཀྱི་གསོ་བ་རིག་པའི་ལྷན་ཚོགས་ཀྱི་ཚོགས་གཙོ་ངག་དབང་བཟོད་པ་ལགས་གྲོས་ཚོགས་ཚོགས་དུས་ ༡༠ པའི་ཐོག་བོད་ཀྱི་གསོ་བ་རིག་པ་དང་ལྷན་ཚོགས་ཀྱི་ལས་དོན་ངོ་བོ། ཁྲིམས་ཡིག་བསྐྱར་བཅོས་སོགས་ཀྱི་ཐད་གྲོས་ཆོད་བཞག་པའི་ཡིག་ཆ་ཁག་གསལ་བསྒྲགས་ཞུས་རྗེས། འཕྲོད་བསྟེན་དྲུང་ཆེ་སྤྲ་ཉིད་ཚེ་རྒྱལ་ལགས་ཀྱིས། ང་རང་ཚོའི་རྩ་ཆེ་བའི་རིག་གཞུང་གི་ཁོངས་ནས་བོད་ཀྱི་གསོ་བ་རིག་པ་འདི་གལ་གནད་ཆེན་པོ་ཞིག་ཆགས་པ་དེ་མི་ཉམས་གོང་འཕེལ་གཏོང་མཁན་གཙོ་བོ་འདིར་བཞུགས་སློབ་གཉེར་གནང་མཁན་དང་ཕྱག་བསྟར་གནང་མཁན་སྨན་པ་ཚོ་རེད་ལ། དེ་བཞིན་སྤྱི་པའི་འགན་བཞེས་མཁན་གསོ་རིག་ལྷན་ཚོགས་ཡོད་པ་རེད། དེ་རིང་འདིར་ལྷན་ཚོགས་ཀྱིས་ཐུགས་འགན་བཞེས་པའི་ཐོག་ནས་ཉིན་ ༦ རིང་བོད་ཀྱི་གསོ་རིག་སྨན་པའི་ཤེས་ཡོན་གོང་སྤེལ་གྱི་ཟབ་འཁྲིད་ཀྱི་གཙོས་ཤེས་ཚད་སྤྱི་ཡོངས་ཀྱི་ཐུགས་འགན་དེ་ལྷན་ཚོགས་ཀྱིས་བཞེས་ཀྱི་ཡོད་པ་རེད། གསོ་རིག་ལྷན་ཚོགས་ལ་སྨན་པ་རྣམ་པ་ཚོ་མཁོ་ཡི་ཡོད་དང་། སྨན་པ་རྣམས་ལའང་གསོ་རིག་ལྷན་ཚོགས་མཁོ་ཡི་ཡོད་པ་རེད། གོང་དུ་གསོ་རིག་ལྷན་ཚོགས་ཀྱི་ཚོགས་གཙོ་མཆོག་གིས་ཉེ་བའི་གྲོས་ཚོགས་ཚོགས་དུས་ ༡༠ པའི་ཐོག་བོད་ཀྱི་གསོ་བ་རིག་པ་དང་ལྷན་ཚོགས་ཀྱི་ལས་དོན་ངོ་བོ། ཁྲིམས་ཡིག་བསྐྱར་བཅོས་སོགས་ལ་གྲོས་བསྡུར་གྲོས་ཆོད་ཁག་སྙན་སྒྲོན་ཞུས་སོང་བ་ལྟར། དེ་ལ་རྣམ་པ་ཚོས་ཡིན་གཅིག་མིན་གཉིས་དོ་སྣང་གནང་རོགས་ཞུ་རྒྱུ་ཡིན། རྣམ་པ་ཚོ་ལྷན་ཚོགས་ཀྱི་ཚོགས་མི་ཡིན་པའི་ཆ་ནས། ལྷན་ཚོགས་ནས་འཆར་ལས་གནང་དགོས་པ་དང་། དེའི་ནང་གཏན་ལ་ཕབ་པའི་ཡིག་ཆ་ག་རེ་ལ་འགྱུར་བ་འགྲོ་གི་ཡོད་མེད། གཏན་ལ་ཕབ་པའི་ཁྲིམས་ལ་འགྱུར་བ་ག་རེ་ཕྱིན་ཡོད་མེད། དེ་བཞིན་བོད་ཀྱི་གསོ་རིག་གི་གནས་སྟངས་ལ་འགྱུར་བ་ག་རེ་འགྲོ་གི་ཡོད་མེད་སོགས་ལ་དོ་སྣང་གནང་རོགས། ཞེས་བརྗོད་སོང་།

དེའི་རྗེས་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས། ད་ལམ་ང་ཚོས་འདིར་ཚོགས་ཆུང་འཛུགས་དགོས་པའི་གནད་འགག་གཙོ་བོ་དེ་ག་རེ་ལ་ཐུག་ཡོད་པ་རེད་ཟེར་ན། ཐོག་མར་འདི་འདྲའི་སྒྲིག་གཞི་ཞིག་དགོས་ཀྱི་འདུག་ཟེར་བའི་བསམ་འཆར་དེ་སྨན་རྩིས་ཁང་རང་ནས་ཡོང་བ་རེད། དེ་ལ་འཛིན་སྐྱོང་བཀའ་ཤག་གིས་བདག་པོ་བརྒྱབ་པའི་རྗེས་ལ། གྲོས་ཚོགས་ནས་སྒྲིག་གཞི་འདི་འདྲ་ཞིག་གཏན་འབེབས་བྱས་པ་རེད། ཡིན་ན་ཡང་བར་ལམ་ནས་བོད་མིའི་སྒྲིག་འཛུགས་ཀྱི་སྲིད་བྱུས་འཛིན་སྟངས་ཡིན་ན་རེད། བསམ་བློ་གཏོང་སྟངས་ཡིན་ན་འདྲ། སྨན་པའི་གསོ་རིག་ལྷན་ཚོགས་ཀྱི་ཁྱབ་ཁོངས་ཀྱི་སྒྲིག་འཛུགས་དེ་ཚོས་ལྷན་ཚོགས་འདི་ལ་ལྟ་སྟངས་མི་འདྲ་བའི་རྣམ་པ་ཤུགས་ཆེན་པོ་ཞིག་ཡོང་གི་འདུག དེར་བརྟེན་གྲོས་ཚོགས་ནང་བགྲོ་གླེང་གནང་བ་གཞིར་བཞག་དང་། གྲོས་ཆོད་ཀྱི་ནང་དོན་གཞིར་བཟུང་གིས་ཚོགས་གཙོ་སྤྲེལ་པོས་ཚོགས་ཆུང་བཙུགས་པའི་སྐབས་སུ་ལམ་སྟོན་གནང་རྒྱུ་དང་པོ་དེ། ལྷན་ཚོགས་འདི་དགོས་ཀྱི་ཡོད་མེད་ཐག་གཅོད་དགོས་ཀྱི་འདུག དགོས་ཀྱི་མེད་ན་མེད་པར་ཐག་བཅད་ན་འགྲིག་གི་རེད། དགོས་ཀྱི་ཡོད་ན། ལྷན་ཚོགས་འདི་རྒྱུན་གནས་ཐུབ་ཐབས་སུ་རོགས་སྐྱོར་ག་རེ་དགོས་ཀྱི་ཡོད་པ་དང་། སུས་ག་རེ་ག་རེ་བྱེད་དགོས་ཀྱི་ཡོད་པར་བསམ་བློ་གཏོང་དགོས་ཀྱི་འདུག དེ་རྒྱུན་གནས་ཐུབ་པ་གཅིག་པུས་མི་ཆོག་པར་དེ་ནུས་པ་དང་ལྡན་པ་ཞིག་ག་འདྲ་བྱས་ནས་བཟོ་དགོས་པའི་ཐད་ལའང་བསམ་བློ་གཏོང་དགོས། ཅེས་གྲོས་ཚོགས་ནང་བོད་ཀྱི་གསོ་རིག་ལྷན་ཚོགས་ཀྱི་སྐོར་ལ་བཀའ་བསྡུར་གལ་ཆེན་གནང་བ་རེད།

འཛིན་སྐྱོང་བཀའ་ཤག་དང་འཕྲོད་བསྟེན་ལས་ཁུངས་ཀྱི་ངོས་ནས་ཡིན་ན་རེད། ལྷན་ཚོགས་འདི་དགོས་ཀྱི་འདུག གལ་ཆེན་པོ་འདུག་ཟེར། སྨན་རྩིས་ཁང་གིས་ཀྱང་གལ་ཆེན་པོ་འདུག་ཟེར། དེ་བཞིན་འབྲེལ་ཡོད་ཚང་མས་གལ་ཆེན་པོ་འདུག་ཟེར་གྱི་ཡོད་པ་རེད། ཉེ་ཆར་གྲོས་ཚོགས་ནང་གྲོས་ཆོད་འཇོག་པའི་སྐབས་དེར། གྲོས་ཆོད་ཀྱི་ནང་དོན་ལ་གཟིགས་པ་ཡིན་ན། ཁྱེད་རང་ཚོར་གྲོས་ཆོད་དོན་ཚན་ ༤ བཞག་ཡོད་པ་རེད་དེ། དོན་ཚན་ ༢ དང་ ༣། ༤ དེ་ལྷན་ཚོགས་འདི་རྒྱུན་གནས་ཐུབ་པ་དང་ནུས་པ་བཟོ་བའི་ཆེད་དུ་རེད། དེའི་སྐབས་སུ་འཛིན་སྐྱོང་བཀའ་ཤག་ནས་ང་ཚོས་དེ་བྱེད་ཐུབ་ཀྱི་མ་རེད་མདོག་མདོག་དང་། རྒྱུན་གྲོན་འགྲོ་སོང་གཏོང་ཐུབ་པ་མ་རེད་ཅེས་གསལ་བོ་བྱས་ནས་བཤད་ཡོང་གི་འདུག་གཱ དེར་བརྟེན། ད་དངོས་གནས་དྲང་གནས་ཆོད་སེམས་ཤིག་ཡོད་ན་མེད་ན། ལྷན་ཚོགས་འདི་དགོས་ཀྱི་འདུག་ཟེར་བ་གཅིག་ལབ། ཡང་རྒྱུན་གནས་ཐུབ་པར་མཐུན་འགྱུར་རོགས་རམ་ཐུབ་ཀྱི་མ་རེད་ཟེར་ནས་ངས་དེའི་སྐབས་སུ་ཞུས་ཡོད། ཡིན་གཅིག་མིན་གཉིས་འཛིན་སྐྱོང་བཀའ་ཤག་དང་འཕྲོད་བསྟེན་ལས་ཁུངས་གཅིག་པུ་མ་ཡིན་པར། གཞན་གང་ཅིའི་ཐད་ཐབས་ཤེས་བྱེད་དགོས་འབྱུང་ནའང་། གང་ལྟར་ནུས་པ་ལྡན་པ་ཞིག་ཡོང་ཆེད་བྱེད་དགོས་པ་རེད་ཅེས་ངས་ཞུ་དགོས་པ་དེ་ཞུས་ཡོད། རེ་བ་ལ་གྲོས་ཚོགས་ཀྱི་ཚོར་བ་ཆ་ཚང་ཞིག་གྲོས་ཚོགས་ནང་བཏོན་ནས་གྲོས་ཆོད་གཏན་འབེབས་བྱས་ཡོད་པ་རེད། འཛིན་སྐྱོང་གི་ངོས་ནས་ཡིན་ནའང་ཕྱི་ཟླ་ ༡༡ དང་ ༡༢ ནས་ལོ་རྗེས་མའི་དངུལ་རྩིས་བཟོ་མགོ་བཙུགས་ཡོང་གི་ཡོད་དུས། དེ་ཚོའི་ནང་ལ་ག་འདྲ་ཞིག་ཡོང་དགོས་ཀྱི་ཡོད་ནའང་། ཐབས་ཤེས་ཡོད་དགུ་བཙལ་ནས་འདོན་དགོས་པ་དེ་གལ་ཆེན་པ་རེད་བསམ་གྱི་འདུག ཅེས་བརྗོད་སོང་།

སྤྱི་འཐུས་ལྷན་ཚོགས་ཀྱི་གྲོས་ཆོད་དོན་ཚན་ ༤ བཞག་པ་ནི།

༡ ༽ ཚོགས་ཆུང་ནས་བོད་ཀྱི་གསོ་བ་རིག་པའི་ཆེས་མཐོའི་སྨན་པའི་ལྷན་ཚོགས་དང་འབྲེལ་ བའི་ཞིབ་འཇུག་ཞུ་སྒོ་རུ་བསྐྱར་ཞིབ་ཚགས་འཁུར་བསྐྱེད་གང་ལེགས་གནང་འདུག་པར་ ལེགས་སོའི་བསྔགས་བརྗོད་དང་། དེ་བཞིན་འཕྲོད་བསྟེན་ལས་ཁུངས་དང་འབྲེལ་ཡོད་སྡེ་ཚན་ཁག་ནས་ཀྱང་ཞིབ་འཇུག་ཚོགས་ ཚུང་ལ་མཐུན་འགྱུར་ཇི་དགོས་གནང་བར་ཡང་ཐུགས་རྗེ་ཆེ་ཞུ་རྒྱུ།

༢ ༽ ཚོགས་ཆུང་གི་སྙན་ཐོའི་རྒྱབ་གཉེར་དོན་ཚན་ ༣ པའི་ནང་གསལ་འཛིན་སྐྱོང་བཀའ་ཤག་ནས་འབྲེལ་ཡོད་འཕྲོད་བསྟེན་ལས་ཁུངས་བརྒྱུད་ བོད་ཀྱི་གསོ་བ་རིག་པའི་ཆེས་མཐོའི་སྨན་པའི་ལྷན་ཚོགས་ཀྱི་རྒྱུན་གྲོན་ཐད་ལྷན་ ཚོགས་ཀྱི་འཛིན་སྐྱོང་རྨང་གཞི་རང་རྐང་ཐོག་སྲ་བརྟན་དུ་ལང་ཐུབ་པ་ཞིག་མ་བྱུང་ བར་ཆ་ཚང་གསོལ་བསྩལ་གནང་ཐབས་དགོས་རྒྱུ།

༣ ༽ བོད་ཀྱི་གསོ་བ་རིག་པའི་ཆེས་མཐོའི་སྨན་པའི་ལྷན་ཚོགས་ཀྱི་ཚོགས་མིའི་ཐད་འབྲེལ་ ཡོད་སྡེ་ཚན་ཁག་གིས་གཞུང་འབྲེལ་ཐོག་ནས་གཏོང་ཐབས་གནང་དགོས།

༤ ༽ གསོ་བ་རིག་པ་རྒྱ་གར་གཞུང་ཁྲིམས་ནས་ངོས་བཞེས་གནང་བར་རྒྱ་གར་གཞུང་ལ་ཐུགས་རྗེ་ ཆེ་ཞེས་ཞུ་རྒྱུ་དང་། “བོད་ཀྱི་གསོ་བ་རིག་པ་” འདི་བཞིན་བོད་ཀྱི་ཐུན་མོང་མ་ཡིན་པའི་རྩ་ཆེའི་རིག་གཞུང་ཞིག་ཡིན་པར་བརྟེན། བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ཀྱིས་གཙོས་རང་རེའི་འབྲེལ་ ཡོད་སྡེ་ཚན་ཁག་ཚང་མས་འདི་དག་མི་ཉམས་རྒྱུན་འཛིན་དང་དར་སྤེལ་སླད་འགན་ཁུར་ཆེར་ བསྐྱེད་ཀྱིས་འཐུས་ཤོར་མ་སོང་བ་གནང་དགོས་པ་བཅས་རེད།

གསར་འགོད་པ། པདྨ་རྒྱལ།