ཝཱ་ཎ་སློབ་ཟུར་ལྷུན་འགྲུབ་རྡོ་རྗེ།
སློབ་གྲོགས་འཇམ་དབྱངས་དོན་གྲུབ་ལགས་ནས་ཕྱི་ལོ་ ༢༠༡༥།༡༠།༡༢ ཉིན་དུས་བབ་དྲ་ཚིགས་སྟེང་། སྲིད་སྲིད་སྐྱོང་བློ་བཟང་སེང་གེ་མཆོག་གིས་ཝཱ་ཎ་བོད་ཀྱི་གཙུག་ལག་སློབ་གཉེར་ཁང་དེ་བོད་ཀྱི་སྲོལ་རྒྱུན་རིག་གནས་སྐད་ཡིག་དང་བཅས་པའི་བསྟི་གནས་གལ་ཆེན་ཞིག་ཡིན་སྟབས། ཁོང་གིས་སློབ་མའི་འཚོ་དོད་ཀྱི་སླད་དུ་ཧིན་སྒོར་ཁྲི་འགའ་ཞལ་འདེབས་གནང་རྒྱུ་ཡིན་པ་མ་ཟད། སླད་ཀྱང་མཐུན་འགྱུར་རམ་འདེགས་བསྟུད་མར་གནང་འཆར་ཡོད་ཅེས་གསུངས་མོད། འོན་ཀྱང་། ཁོང་གིས་ད་ལྟ་བར་ཝཱ་ཎ་མཐོ་སློབ་ཏུ་ལོ་དྲུག་གི་རིང་སློབ་གཉེར་བྱས་ཀྱང་སྲིད་སྐྱོང་མཆོག་ནས་སློབ་མའི་ཞལ་ལག་ཡར་རྒྱས་དང་འཚོ་དོད་ཆེད་དུ་སྒོར་གཅིག་གནང་བ་མ་ཐོས་ཞེས་གདེང་སྤོབས་ཆེན་པོས་བཤད་པར་བརྟེན། གུས་པས་ཕྱི་ལོ་ ༢༠༡༣ ལོར་ཝཱ་ཎ་མཐོ་སློབ་ཀྱི་སློབ་ཕྲུག་བདེ་དོན་ཚོགས་པའི་ཚོགས་གཙོའི་ལས་གནས་ཐོག་སློབ་ཕྲུག་ལྟོ་ཚང་ལྟ་རྟོག་ཚོགས་པ་དང་མཉམ་དུ་ལས་ཀ་བྱས་སྐབས། ཤེས་རྟོགས་གང་བྱུང་དུས་བབ་ཀློག་མཁན་རྣམ་པར་དངོས་ཡོད་གནས་ཚུལ་ཅི་ཡིན་གསལ་བཤད་ཙམ་ལས། དེ་མིན་ཕྱོགས་རིས་དང་འཐེན་ཁྱེར་གྱི་དྲི་མས་མ་སྦགས་པར་ཞུ་བར། ལར་ནས་ཝཱ་ཎ་བོད་ཀྱི་གཙུག་ལག་སློབ་གཉེར་ཁང་གི་སློབ་མའི་ཞལ་ལག་གི་མཐུན་རྐྱེན་རྒྱ་གར་དབུས་གཞུང་གིས་གནང་གི་ཡོད་ཀྱང་། ཟླ་རེར་སློབ་མ་རེའི་སློབ་ཡོན་ཐོབ་སྐལ་ཉུང་སྟབས། ལོ་ལྟར་སློབ་ཕྲུག་ལྟ་རྟོག་ཚོགས་པར་བཟའ་ཆས་ཀྱི་རིན་གོང་འཕར་བའི་རྐྱེན་གྱིས་དཀའ་ངལ་མང་དག་ཅིག་འཕྲད་བཞིན་པ་དངོས་ཡོད་ཡིན་ལ། དེ་སྔར་༸གོང་ས་མཆོག་གི་གསུང་ཆོས་དང་བསྟུན་ནས་ལྟོ་ཚང་འགན་བདག་རྣམ་པས་སློབ་མའི་ཟས་དོད་ཆེད་དུ་ཟ་ཁང་བཙུགས་དགོས་པའི་གནས་སྟངས་ཀྱང་བྱུང་ཡོད། གཙུག་ལག་སློབ་གཉེར་ཁང་ལ་མཚོན་ན་ལོ་རེར་རྒྱུགས་དུས་གཉིས་དང་། རྒྱུགས་དུས་རེ་ལ་ཡིག་རྒྱུགས་ཐེངས་རེ་བྱས་ནས་སློབ་དུས་རེ་ལ་ཡིག་ཚད་གཉིས་རེ་གཏོང་གི་ཡོད།
ཡིག་རྒྱུགས་གཏོང་སྐབས་ལྟོ་ཚང་ལྟ་རྟོག་ཚོགས་ཆུང་ནས་སློབ་མ་རྣམས་ལ་དམིགས་བསལ་ཞལ་ལག་གོ་སྒྲིག་བྱེད་སྲོལ་ཡོད་ཀྱང་། སྐབས་དེར་རྒྱ་གར་གཞུང་གིས་ཡིག་རྒྱུགས་ལ་དམིགས་ནས་ཆེད་མངགས་སློབ་མའི་ཟས་དོད་དངུལ་འབོར་མང་དུ་གཏོང་གི་མེད་སྟབས། སློབ་ཕྲུག་བདེ་དོན་ལྷན་ཚོགས་བརྒྱུད་ནས་ལྟོ་ཚང་ལྟ་རྟོག་ཚོགས་པར་རྒྱུགས་དུས་རེ་ལ་ཧིན་སྒོར་ ༥༠༠༠༠ བྱས་ནས་རྒྱུགས་དུས་གཉིས་ལ་བསྡོམས་སྒོར་ ༡༠༠༠༠༠ ཡས་མས་རག་གི་ཡོད་པ་མ་ཟད། བདེ་དོན་ལྷན་ཚོགས་ནས་ཡིག་རྒྱུགས་སླེབས་སྐབས་འཚོ་དོད་ཧིན་སྒོར་ལྟོ་ཚང་ཚོགས་པར་སྤྲད་རྗེས་ལྟོ་ཚང་ལྟ་རྟོག་ཚོགས་ཆུང་ནས་བླངས་པའི་བྱུང་འཛིན་དང་མཉམ་དུ་སློབ་ཕྲུག་ཚོས་དམིགས་བསལ་ཞལ་ལག་བཞེས་སྐབས་བརྒྱགས་པའི་འདྲ་དཔར་རྣམས་རང་གཞུང་ཤེས་རིག་ལས་ཁུངས་སུ་ངེས་འབུལ་ཞུ་དགོས།
གོང་གི་ཟས་དོད་ཆེད་དུ་འབྱོར་བའི་ཧིན་སྒོར་སྲིད་སྐྱོང་བློ་བཟང་སེང་གེ་ལགས་བརྒྱུད་ནས་ཨ་རི་བ་ཇོན་གྱིས་ཞལ་འདེབས་གནང་བ་ཡིན་འདུག ད་དུང་རོགས་སྐྱོར་འདི་དང་འབྲེལ་བའི་གནས་ཚུལ་རྒྱས་པ་མཁྱེན་འདོད་ན་ཝཱ་ཎ་མཐོ་སློབ་ཀྱི་སློབ་ཕྲུག་བདེ་དོན་ལྷན་ཚོགས་དང་། སློབ་ཕྲུག་ལྟོ་ཚང་ལྟ་རྟོག་ཚོགས་ཆུང་གཉིས་ཀྱི་ཡིག་ཚང་དུ་འབྲེལ་གཏུགས་གནང་ན་གནས་ཚུལ་རྒྱས་པ་ཤེས་ངེས་སོ།།
སྐྱོན་འཛུགས་ཡང་བྱས་རྒྱབ་སྐྱོར་ཡང་བྱས། སྲིད་སྐྱོང་གི་འགན་འཁུར་བཞེས་ནས་ལག་བསྟར་མམ་བྱས་པའི་སྐྱོན་འཛུགས་དང་སྲིད་སྐྱོིང་སྔོན་འགྲོའི་འོས་བསྡུ་ནང་ལས་ཐོག་བློ་བཟང་སེང་གེ་མཆོག་ལ་འོས་མང་ཤོས་ཕེན་པ་རྒྱབ་སྐྱོར་ཡང་བྱས། དེ་འདྲ་ཅི་ཡིན་ན།།།
ཁོང་གིས་དེ་འདྲ་སྤྲད་ཐུབ་ཀྱི་མེད་ཚེ་གང་བྱེད་ནས་རྫུན་གསུངས་ཀྱི་ཡོད་རེད། ང་ཚོར་དྲང་བདེན་དགོས་པ་ལས་རྫུན་དགོས་ཀྱི་མེད།
གོང་དུ་སློབ་ཕྲུག་ཁོང་གིས་གསུངས་པ་དེར་དངོས་བདེན་རེད། སློབ་ཕྲུག་ཁོང་ལ་རྒྱབ་སྐྱོར་ཡོད།
ཨ་ལས་བྱས་ན་བློ་བཟང་སེང་གེ་ལགས་ཀྱི་ཟླ་རེའི་གླ་ཕོགས་ནས་ཐད་ཀར་སྤྲོད་དགོས་སམ་
ཟས་དོད་ཆེད་ཧིན་སྒོར་འབུམ་གཅིག་ཡས་མས་རག་གི་ཡོད་ཅེས་པ་དེ་བློ་བཟང་སེངྒེས་སྤྲད་པ་ཞིག་མ་རེད། ཨ་རི་བ་ཇོན་གྱིས་སྤྲད་པ་རེད་འདུག རྩོམ་མཇུག་ཏུ་ཁ་གསལ་བཀོད་འདུག
གསལ་བཤད་ལེགས་པོ་གནང་འདུག་་བཀའ་དྲིན་ཆེ།
རོགས་རམ་འདི་བློ་སེང་གིས་སྤྲད་པ་ཁ་གསལ་མི་འདུག་གདའ།
འཚོ་སྣོན་གྱི་རོགས་རམ་འདི་བློ་སེང་བརྒྱུད་ལན་གཅིག་རག་པ་ཞིག་གི་སྐོར་བཤད་ཀྱི་ཡོད་པ་ཡིན་ནམ། ཡང་ན། ལོ་རྟག་པར་རག་གི་ཡོད་པ་ཞིག་ཡིན།