ཨབ་གྷན་ནང་ས་ཡོམ་བརྒྱབ།

ཁ་སང་ཨབ་གྷན་དང་པ་ཀི་སི་ཐན་གྱི་ས་མཚམས་ཁུལ་དུ་ས་ཡོམ་བརྒྱབ་སྟེ་མི་རྒྱུ་གཉིས་ལ་གོད་ཆག་ཆེན་པོ་ཕོག་ཡོད་འདུག

ཁ་སང་ཉིན་རྒྱབ་ཨབ་གྷན་བྷ་དྷ་ཁཱ་ཤཱན་ (Badakhshan) མངའ་སྡེའི་ཧིན་དྷུ་ཁུ་ཤི་ (Hindu Kush) རི་ཁུལ་དུ་ས་ཡོམ་རིམ་པ་ ༧།༥ ཅན་ཞིག་བརྒྱབ་སྟེ། ད་བར་ཨབ་གྷན་དང་པ་ཀི་སི་ཐན་གྱི་ཡུལ་མི་ ༥༡༥ རྐྱེན་འདས་དང་། མི་ ༤༠༠༠ ལྷག་ལ་རྨས་སྐྱོན་ཕོག་ཡོད་པ་མ་ཟད། གཞན་མི་མང་པོ་ཞིག་ཁང་བརྡིབ་ས་ཉིལ་སོགས་ཀྱི་འོག་ཏུ་ཤོར་ཏེ་བོར་བརླག་ཕྱིན་ཡོད་འདུག

རྒྱ་གར་གྱི་བརྒྱུད་ལམ་འགའ་རེ་ཐོག་ས་ཡོམ་དེའི་ཤུགས་ཚད་ ༧།༧ ཡིན་པའི་གནས་ཚུལ་བཀོད་ཡོད་ཅིང་། ས་ཡོམ་དེའི་ཤུགས་ཚད་རྒྱ་གར་དང་བྷང་ལ་དྷེ་ཤི་སོགས་ཨབ་གྷན་གྱི་ཁྱིམ་མཚེས་རྒྱལ་ཁབ་ཁག་ཏུ་ཐེབས་ཡོད་པ་མ་ཟད། རྒྱ་གར་ཧི་མ་ཅལ་དང་ལྡི་ལི་སོགས་སུའང་ཁང་པ་ཞིག་རལ་སོགས་ཀྱི་གནས་ཚུལ་ཕྲན་བུ་རེ་བྱུང་ཡོད་འདུག

དེ་རིང་པ་ཀི་སི་ཐན་གྱི་མཐོ་རིམ་ལས་བྱེད་ཅིག་གིས་གསར་ལམ་ཐོག ཐེངས་འདིའི་ས་འགུལ་ཁྲོད་ད་ནང་ཞོགས་པའི་ཆུ་ཚོད་ ༧ པའི་བར་མི་ ༢༠༦ རྐྱེན་འདས་དང་མི་ ༡༣༠༠ ལ་རྨས་སྐྱོན་ཕོག་ཡོད་པ་མ་ཟད། ས་ཁུལ་མང་པོ་ཞིག་ནང་གནོད་སྐྱོན་ཆེན་པོ་བཏང་ཡོད་སྟབས། ད་ལྟ་གཞུང་གིས་རྒྱལ་ཡོངས་ནང་ཛ་དྲག་གི་བཀའ་རྒྱ་བསྡམས་ཏེ་མྱུར་སྐྱོབ་ལས་དོན་སྒྲུབ་བཞིན་ཡོད་ཅེས་དང་། ཡང་ཨབ་གྷན་གྱི་ལས་བྱེད་ཅིག་གིས་ད་རེབ་ཀྱི་ས་ཡོམ་དེས་མངའ་སྡེ་ཁག་ ༧ ནང་གཏོར་སྐྱོན་ཐེབས་ཡོད་སྟབས། ད་ལྟ་གཞུང་གིས་གནོད་འཚེ་ཕོག་ཁུལ་དུ་དམག་མི་དང་མྱུར་སྐྱོབ་མི་སྣ་བཏང་སྟེ་མང་ཚོགས་ཀྱི་དཀའ་ངལ་སེལ་བཞིན་ཡོད་ཅེས་བརྗོད་འདུག

ཐེངས་འདིའི་ས་འགུལ་འདི་ནི་ཨབ་གྷན་དང་པ་ཀི་སི་ཐན་གྱི་ས་མཚམས་ཁུལ་དུ་བརྒྱབ་ཡོད་ཅིང་། ས་ཁུལ་དེ་དག་ནང་གཞུང་ལམ་བདེ་པོ་མེད་པ་དང་། མངའ་ཁུལ་གྱི་ས་ཆ་མང་པོ་ཞིག་ཏ་ལི་བྷན་དྲག་སྤྱོད་ཤོག་ཁག་གི་ལག་ཏུ་ཚུད་ཡོད་སྟབས། རྒྱལ་ཁབ་གཉིས་ཀྱི་ཉེན་སྐྱོབ་རུ་ཁག་ས་གནས་ས་ཐོག་ལ་དུས་ཐོག་འབྱོར་ཐུབ་ཀྱི་མེད་དཀའ་ངལ་འཕྲད་བཞིན་ཡོད་འདུག

ཨབ་གྷན་དང་དམིགས་བསལ་ཧིན་དྷུ་ཁུ་ཤི་ས་ཁུལ་ནི་ཡུ་ར་ཤན་དང་རྒྱ་གར་གྱི་ས་ཞོང་ནང་ཆགས་ཡོད་སྟབས། དུས་རྒྱུན་ས་ཁུལ་དེ་དག་ནང་ས་ཡོམ་ཡང་ཡང་རྒྱག་གི་ཡོད་པ་མ་ཟད། ཐེངས་འདིའི་ས་ཡོམ་གྱི་ས་འགུལ་ལྟེ་གནས་ནི་ ༢༠༠༥ ལོར་པ་ཀི་སི་ཐན་གྱི་མངའ་ཁུལ་ཀཱ་ཤི་མེར་ནང་ས་ཡོམ་རིམ་པ་ ༧།༦ ཅན་ཞིག་བརྒྱབ་སྟེ། མི་ ༧༥༠༠༠ ལྷག་འདས་གྲོངས་དང་མི་ས་ཡ་ ༣།༥ ལྷག་ཉེན་ཡོལ་འགྲོ་དགོས་ཁེལ་སའི་ས་ཁུལ་དང་ཐག་ཉེ་ཡིན་པ་མ་ཟད། འདི་ལོའི་བལ་ཡུལ་གྱི་ས་ཡོམ་བྱུང་སའི་ས་ཞོང་དང་གཅིག་པ་ཡིན་འདུག

ད་བར་ས་ཡོམ་གྱིས་ཨབ་གྷན་གྱི་ཡུལ་མི་ ༩༠ རྐྱེན་འདས་དང་མི་ ༣༠༠ ལྷག་ལ་རྨས་སྐྱོན། ཁང་པ་ ༤༠༠༠ ལྷག་གཏོར་སྐྱོན་བཏང་ཡོད་པ་དང་། པ་ཀི་སི་ཐན་གྱི་མངའ་སྡེ་ཀཱེ་བྷར་ (Khyber Pakhtunkhwa) གྱི་ཡུལ་མི་ ༢༡༤ དང་པན་ཇབ་མངའ་སྡེའི་མི་ ༥། ཀཱ་ཤི་མེར་མངའ་སྡེའི་མི་ ༩ ། དེ་མིན་ས་ཁུལ་ཁག་ཅིག་གི་ཡུལ་མི་འགའ་འདས་གྲོངས་སུ་འགྱུར་ཡོད་པ་དང་། མི་ ༡༦༤༢ ལྷག་ལ་རྨས་སྐྱོན་དང་སྡོད་ཁང་ ༡༠༠༠༠ ལྷག་ལ་གཏོར་སྐྱོན་ཐེབས་ཡོད་འདུག

མདང་དགོང་ཨབ་གྷན་དང་པ་ཀི་སི་ཐན་མགོ་ཁྲིད་རྣམ་གཉིས་ཀྱིས་རྒྱལ་ཡོངས་ཀྱི་བརྙན་འཕྲིན་བརྒྱུད་ས་ཡོམ་ཁྲོད་རྐྱེན་འདས་ཕྱིན་པའི་ནང་མི་ཉེ་འདུ་ཚོར་ཐུགས་གསོ་དང་། མྱུར་སྐྱོབ་ལས་དོན་གང་མགྱོགས་སྒྲུབ་རྒྱུ་ཡིན་པའི་གཏམ་བཤད་སྤེལ་ཡོད་པ་མ་ཟད། རྒྱ་གར་གྱི་སྲིད་བློན་དང་ཨ་རིའི་སྲིད་འཛིན། རྒྱ་ནག་གི་སྲིད་འཛིན། ཡུ་རོབ་མཐུན་ཚོགས་ཀྱི་ཚོགས་གཙོ་དང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ། རྒྱལ་སྤྱིའི་ཉེས་ཡང་ཚོགས་པ་དང་རྒྱ་གྲམ་དམར་པོ་སོགས་རྒྱལ་སྤྱིའི་རྒྱལ་ཁབ་དང་སྒྲིག་འཛུགས་ཁག་གི་མགོ་ཁྲིད་ཚོས། ཨབ་གྷན་གྱི་སྲིད་འཛིན་དང་པ་ཀི་སི་ཐན་གྱི་སྲིད་བློན་ལ་ཁ་པར་བཏང་སྟེ། གདུང་སེམས་མཉམ་སྐྱེད་ཞུས་པ་དང་འབྲེལ་རོགས་རམ་གང་དགོས་ཀྱང་ཞུ་རྒྱུ་ཡིན་སྐོར་བརྗོད་པ་དང་། དེ་རིང་ཉིན་རྒྱབ་ཏ་ལི་བྷན་དྲག་སྤྱོད་ཤོག་ཁག་ནས་ཀྱང་གནོད་འཚེ་ཕོག་ཡུལ་དུ་ཉེན་སྐྱོབ་མི་སྣ་གཏོང་རྒྱུ་མ་ཟད། རྒྱལ་སྤྱི་རྒྱལ་ནང་གི་རོགས་སྐྱོར་བར་གནོད་འཚེ་གཏོང་རྒྱུ་མིན་པ་ཕྱིར་བསྒྲགས་བྱས་འདུག

རྒྱ་གར་ཧིན་རྡུ་སི་ཐན་དུས་བབ་ཐོག་པ་ཀི་སི་ཐན་གྱི་དྲིལ་བསྒྲགས་བློན་ཆེན་པར་ཝེ་སི་ར་ཤེ་ཌི་ (Pervez Rashid) ཡིས། ད་ལྟ་གཞུང་གིས་ཐོན་ཁུངས་ཡོད་ཚད་བཏང་སྟེ། མང་ཚོགས་ཚོའི་དཀའ་ངལ་སེལ་རྒྱུ་དང་ཚེ་སྲོག་སྐྱོབ་ཐབས་བྱེད་བཞིན་ཡོད་སྟབས། རྒྱལ་ཡོངས་ཀྱི་མི་སྣ་དང་ཚོགས་པ་སྒྲིག་འཛུགས་ཁག་གིས་ཀྱང་མཉམ་རུབ་ཀྱི་ནུས་པ་ སྤུངས་དགོས་པ་རེད། ཅེས་བརྗོད་འདུག

གསར་འགོད་པ། དོན་གྲུབ།