དེ་རིང་དྷ་སའི་བོད་མི་ཚོས་ཉེ་ལམ་རྒྱ་གར་བ་གསུམ་གྱིས་བོད་པའི་ཕོ་གསར་ཞིག་བསད་པ་དེར་ཞི་བའི་རྔམ་སྟོན་ལས་འགུལ་ཞིག་སྤེལ་ཡོད་འདུག
དེ་རིང་ཉིན་རྒྱབ་ཆུ་ཚོད་ ༡།༠༠ པའི་སྟེང་། དྷ་རམ་ས་ལའི་སྐྱེས་མ་སྐོར་ཞིག་གི་དང་བླངས་སྣེ་འཁྲིད་འོག མེག་གྷན་རླངས་འཁོར་འབབ་ཚིགས་སུ། བོད་རིགས་སེར་སྐྱ་མི་མང་ ༤༠༠ ལྷག་འདུ་འཛོམས་གནང་སྟེ། མ་ཎི་སྐྱོར་བཞིན་ལག་ཏུ་འཕྲད་དར་སྟེང་། “ ང་ཚོ་ལ་རྒྱལ་ཁབ་མེད་ཀྱང་། ཚེ་སྲོག་ལ་རིན་ཐང་འདྲ་མཉམ་སྤྲོད་དགོས།” ཞེས་པ་སོགས་ཀྱི་འབོད་ཚིག་འཁོད་དེ། ཉེ་ཆར་ཚེས་ ༣༠ ཉིན་གྱི་མཚན་མོར་རྒྱ་གར་ཡུལ་མི་གསུམ་གྱིས་བོད་པའི་ཕོ་གསར་ཞིག་ལ་གྲིས་བརྒྱབ་ནས་བསད་པའིན་གནད་དོན་དེར། རྒྱ་གར་གཞུང་གིས་དྲང་བདེན་གྱི་ཁྲིམས་ཐག་ནན་པོ་གཅོད་དགོས་པའི་ངོ་རྒོལ་ལས་འགུལ་ཞིག་སྤེལ་སོང་ལ། ཕྱི་དྲོའི་ཆུ་ཚོད་ ༤།༣༠ ཙམ་ལ་མེ་ཁྲོམ་སྐོར་ཞིག་རླངས་འཁོར་འབབ་ཚིགས་ནས་མགོ་བཙུགས་ཏེ། བོད་པ་དང་རྒྱ་གར་བ་དེ་དག་འཁྲུག་འཛིང་ཤོར་ཡུལ་དེར་ཞི་བའི་གོམ་བགྲོད་གནང་རྗེས། ཕྱིར་མེག་གྷན་ཁྲོམ་གཞུང་བརྒྱུད་གཙུག་ལག་ཁང་བར་ཞི་བའི་རྔམ་སྟོན་ཁྲོམ་སྐོར་ཞིག་གནང་སོང་།
སྐབས་དེར་དྷ་རམ་ས་ལའི་ས་གནས་མགོ་འཛིན་བསོད་ནམས་རྡོ་རྗེ་ལགས་ཀྱིས་མང་ཚོགས་ལ་གཏམ་བཤད་གནང་དོན། ད་རེབ་ཀྱི་གནས་ཚུལ་དེའི་བྱུང་རིམ་ག་རེ་རེད་ཟེར་ན། བོད་ནས་ཡོང་བའི་བོད་པའི་ཕོ་གསར་ཞིག་རྒྱ་གར་ཡུལ་མི་གསུམ་གྱིས་བསད་པ་དེ་ཚང་མས་མཁྱེན་གསལ་རེད། ང་ཚོས་གནས་ཚུལ་ཞིབ་འཇུག་བྱས་པ་ལྟར་ན། མི་དེ་གསུམ་གྱིས་ཉིན་དྲུག་བདུན་གོང་ལའང་བོད་པའི་ཕོ་གསར་གཉིས་ལ་ཉེས་རྡུང་བཏང་འདུག གནས་ཚུལ་དེ་དག་ཧ་ཅང་ཚབས་ཆེན་པོ་རེད། ཡིན་ནའང་ད་ལྟའི་ཆར་ང་ཚོ་ཚང་མའི་དམིགས་ཡུལ་གཙོ་བོ་དེ་གང་རེད་ཟེར་ན། སྤྱི་ཚོགས་དཀྲུག་ཤིང་རྒྱག་མཁན་དང་མི་གསོད་ཉེས་ཅན་དེ་གསུམ་ལ་ཁྲིམས་ཐོག་ནས་ཉེས་པ་ལྕི་མོ་ཞིག་གཅོད་དགོས་པ་དེ་རེད།
ད་ལྟའི་གནས་སྟངས་གང་རེད་ཟེར་ན། སྤྱིར་བཏང་ད་རེབ་མི་དེ་གསུམ་གྱི་ནག་ཉེས་དེ་རྒྱ་གར་གྱི་ཁྲིམས་ལྟར་བྱས་ན། ཉེས་ཁྲིམས་དོན་ཚན་ ༣༠༢ དང་ ༣༤ ཅན་དེ་ཕོག་ཡོད་པ་རེད། ༣༠༢ དེ་ཚེ་བཙོན་གྱི་ནག་ཉེས་ཆེན་པོ་ཞིག་རེད། ཀློད་གྲོལ་རྩ་བ་ཉིད་ནས་ཡོད་པ་མ་རེད། ལག་དམར་མི་གཅིག་ལས་མང་པ་ཡོད་ན་དེའི་ཉེས་ཆད་དོན་ཚན་ ༣༤ པ་དེ་ཆགས་ཡོད་པ་རེད། མི་གསོད་མཁན་གསུམ་དེ་ང་ཚོས་རྩ་བ་ནས་ཐར་བ་གཏོང་གི་མ་རེད། ང་ཚོས་དངོས་ཤུགས་བརྒྱུད་གསུམ་ནས་དཔལ་འབྱོར་གཏོང་དགོས་པ་དང་། དཔང་པོར་སྲུང་སྐྱོབ་བྱ་དགོས་པ་ཆ་ཚང་ང་གཅིག་པུའི་ལས་འགན་མ་རེད། ང་ཚོ་ཚང་མའི་ལས་འགན་ཡིན་སྟབས་ཚང་མས་ཧུར་ཐག་འབད་བརྩོན་གནང་རོགས་ཞེས་ནས་འབོད་སྐུལ་ཞུ་བཞིན་ཡོད།
ཁོས་མུ་མཐུད་དུ། ང་ཚོས་མཁྱེན་དགོས་པ་ཞིག་ལ་མེག་གྷན་ས་གནས་ཆེས་མཐོའི་ཉེན་རྟོག་པ་སུ་རེན་དྷར་ཊ་ཁོར་ (Surendar Takur) ལགས་ཀྱིས་ལས་ཀ་ཧ་ཅང་ཡག་པོ་བྱས་ཡོད་པ་རེད། ཁོ་རང་གིས་ཆུ་ཚོད་ ༡༢ ནང་ལ་རྒྱ་གར་མི་གསུམ་དེ་འཇུ་ཐུབ་ཡོད་པ་རེད། མི་གསུམ་དེ་ཐར་བ་གཏོང་ས་རྩ་བ་ནས་ཡོད་པ་མ་རེད། ཁ་སང་ཉིན་རྒྱབ་ཆུ་ཚོད་ ༤།༣༠ སྟེང་། བོད་པའི་བུ་མོ་ཁོ་རང་བཙོན་ཁང་དུ་སོང་སྟེ་རྒྱ་གར་ཁྲིམས་དཔོན་གྱི་མདུན་དུ། བོད་པའི་ཕོ་གསར་གསོད་མཁན་གྱི་རྒྱ་གར་བ་གསུམ་དེ་ངོས་འཛིན་བྱས་ཏེ་ངོ་རྟགས་ཆོད་ཡོད་པ་རེད། དེ་ལ་འགྱུར་བ་གཏོང་རྒྱུ་རྩ་བ་ནས་ཡོད་པ་མ་རེད། དེར་བརྟེན། གང་ལ་གང་ཙམ་ཁ་གསལ་བོ་ཆགས་ཚར་ཡོད་པ་རེད། ཁྲིམས་ཀྱི་ཐོག་ནས་ག་རེ་འགྲོ་དགོས་པ་དེ་འགྲོ་དགོས་པ་རེད། ང་ཚོའི་ངོས་ནས་སྤྱི་ཚོགས་ནང་ཟ་ངེ་ཟིང་ངེ་མི་བཟོ་རྒྱུ་ཧ་ཅང་གལ་ཆེན་པོ་རེད། འཛམ་གླིང་ཐོག་དྷ་རམ་ས་ལར་ག་རེ་བྱེད་ཀྱི་ཡོད་མེད་ལ་ལྟ་བསྡད་ཡོད་པ་རེད། དེ་རིང་ང་ཚོས་ཞི་བའི་རྔམ་སྟོན་ཁྲོམ་སྐོར་བྱས་པ་དེ་རྣམ་འགྱུར་ཞིག་ཆགས་ཡོད་པ་རེད། ང་ཚོས་ད་ལྟའི་བར་དུ་ཞི་བའི་ཐོག་བྱེད་བཞིན་པ་དེ་ང་ཚོ་༧གོང་མཆོག་གི་མི་མང་ཡིན་པས་རེད། ཡུལ་མི་རྣམས་ལ་ཚིག་སྡུག་ཅག་དང་རྣམ་འགྱུར་མི་ལེགས་པ་མ་སྟོན་རོགས་ཟེར་ནས་འབོད་སྐུལ་ཞུ་བཞིན་ཡོད།
ད་ལྟ་རྒྱ་གར་ཉེན་རྟོག་པ་གཉིས་ཀྱིས་བུ་མོ་དེར་སྲུང་སྐྱོབ་བྱེད་མགོ་བཙུགས་ཚར་པ་ཡོད་རེད། བོད་པའི་བུ་མོ་སུ་ཡིན་པ་མི་མང་ཆེ་བས་ཧ་གོ་ཡི་ཡོད་ཀྱི་རེད། ཡིན་ཡང་མོ་རང་གི་པར་དང་མིང་སོགས་ཡར་མར་གཏོང་བའི་རིགས་རྩ་བ་ནས་མ་གནང་རོགས། སྤྱི་ཚོགས་བརྒྱུད་ལམ་རེ་ཟུང་ནང་བོད་པའི་བུ་མོ་དེ་རྒྱ་གར་བ་ཚོར་འབྲེལ་བ་ཡོད་ཚུལ་དང་། བོད་པའི་བུ་མོ་དེ་དང་རྒྱ་གར་ཕོ་གསར་དེ་གཉིས་སྔོན་མ་དྷ་སྟེང་བོད་ཁྱིམ་གྱི་སློབ་མ་ཡིན་སྟབས་ཕན་ཚུན་ངོ་ཤེས་ཡིན་ཚུལ་སོགས་རྗོད་ཀྱི་འདུག་པ་དེ་རྩ་བ་ནས་བདེན་པ་མ་རེད། རྒྱ་གར་ཕོ་གསར་དེ་བོད་ཁྱིམ་སློབ་མ་ཡིན་ཡང་། བུ་མོ་དེ་སུ་ཇ་སློབ་གྲྭའི་སློབ་མ་རེད། ཁོ་གཉིས་ལ་འབྲེལ་བ་རྩ་བ་ནས་ཡོད་པ་མ་རེད། ཅེས་ངོ་སྤྲོད་གནང་སོང་།
གསར་འགོད་པ། འཇིགས་མེད་རྒྱ་མཚོ།
ཨོཾ་མ་ཎི་པདྨེ་ཧྰུཾ་ཧྲྰི་ ཨོཾ་མ་ཎི་པདྨེ་ཧྰུཾ་ཧྲྰི་ ཨོཾ་མ་ཎི་པདྨེ་ཧྰུཾ་ཧྲྰི།
ཏྲེ་ཧོར་བྱམས་པ་ཡེ་ཤེས་ཀྱིས་གསུངས་པ་ལ་རྒྱབ་སྐྱོར་དང་སྦྲགས་ང་རང་བོད་རིགས་ཚོ་ཁ་མཁས་པོའི་ངང་མེག་གྷན་ཁུལ་སྡོད་བོད་རིགས་ལ་རྒྱུན་ཏན་མ་དགའ་བ་ལ་སོགས་རྙོགས་གླེང་ལངས་གྲབ་བྱས་མཁན་རིགས་ཀྱི་ཡོང་ཁུངས་ལ་དོགས་ཕོགས་དང་རྗེས་སོར་འགྱོད་པ་ཡོད་པ་ཞིག་བཟོ་ཐུབ་དགོས་རྒྱུ་དཔེ་གལ་ཆེན་པོ་མཐོང་གིས་འདུག གལ་ཏེ་ང་ཚོས་ངོས་ནས་འདི་འདྲ་ཞིག་བྱས་ཡོད་ན་ད་ག་བ་སླེབས་ཀྱི་རེད། ཚགས་པར་ད་ཧ་ཅང་ཅང་སྡུག་ངན་ན་ཕུང་པོ་ལམ་གཞུང་ལ་བཞག་སྟེ་ཡར་འགྲོ་མར་འགྲོ་ཡོངས་ལ་ངོ་སྤྲོད་བྱས་པ་སོགས་སྔོན་མ་ཅོང་ཏ་ར་ནང་ཆེན་གཞིས་ཆགས་ལ་ག་རེ་བྱས་སོང་དེ་ཡང་་ནག་ཉེ་བོད་པ་ལ་མེད་པ་ཡིན་ན་ཁོང་ཚོའི་རྒྱ་གར་ཁག་ཅིག་གི་གང་བྱས་སོང་། དེ་འདྲ་ཡིན་དུ་བོད་རིགས་རྣམས་ངེས་པར་དུ་ཐུགས་འཇགས་དང་སྦྲགས་ཡུལ་མི་མཉམ་མཐུན་པོ་དགོས་རྒྱུ་གལ་ཆེ་ན་ཡང་བོད་པ་ཁག་ཅིག་དཔེ་ཉེན་ཉེ་བོ་བྱས་པ་ནི་ཉིན་གཅིག་ཏག་ཏག་བཟོས་ཡོང་། ཁྱི་རྒྱ་གར་གཉིས་ལ་ངོ་ཚ་རྒྱུ་མེད་པ་གསལ་པོ་ཡིན་པ་ད་མི་ལོ་ལྔ་བཅུ་ལྷག་རྒྱ་གར་ལ་བསྡད་ཚར་དུ་ཉམས་མྱོང་ཡོད་དགོ་ཚོད་རེད། དེ་ལུགས་ཚང་མའི་བསམ་སྣོ་གཏོང་དགོས་ཡག་གལ་ཆེན་༷པོ་རེད་འདུག་བསམ།
“སྤྱིར་བཏང་ད་རེབ་མི་དེ་གསུམ་གྱི་ནག་ཉེས་དེ་རྒྱ་གར་གྱི་ཁྲིམས་ལྟར་བྱས་ན། ཉེས་ཁྲིམས་དོན་ཚན་ ༣༠༢ དང་ ༣༤ ཅན་དེ་ཕོག་ཡོད་པ་རེད།” དེ་ཙམ་མ་ཟད་བུ་མོར་བརྙས་བཅོས་དང་མ་རུང་བས་ཚིག་བེད་སྤྱད་ན་རྒྱ་གར་ཉེས་ཁྲིམས་ཨང་༢༩༤་དང་༥༠༩ ལ་སོགས་ཀྱང་ཕོག་དགོས་ངེས་ཡིན་པར་དེ་དག་ཐད་ཤུགས་སྣོན་རྒྱག་གལ་ཆེ།
ལས་ཀ་ཡག་པོ་འགྲུབ་འདུག་ཐུགས་རྗེ་ཆེ་ཞུ་བ་དང་།
ད་མི་དམངས་ཀྱིས་ལག་དམར་བ་དེའི་ཚང་གི་མགྲོན་ཁང་དང་ཚོང་ཁང་ནང་དུ་བོད་མི་དང་འབྲེལ་ཡོད་ཀུན་ལ་འགྲུལ་སྡོད་དང་ཉོ་འཚོང་བྱ་རྒྱུ་མཚམས་འཇོག་དགོས་རྒྱུ་ཧ་ཅང་གི་གལ་ཆེ་རེད། ཐབས་ཤེས་འཇམ་པོའི་བཟོ་ལྟ་སྤྲད་དགོས་རྒྱུ་གལ་ཆེ་བ་བཅས།