སྔགས་ཀྱི་རྩོད་པའི་ཆོས་ཐོག་ཆེན་མོ།

དགེ་ལུགས་ཡོངས་ཀྱིས་༸རྒྱལ་བའི་བཀའ་དྲིན་རྗེས་དྲན་དང་འབྲེལ་ཏེ་གསང་ཆེན་སྔགས་ཀྱི་རྩོད་པའི་ཆོས་ཐོག་ཆེན་མོ་ཧུན་སུར་སྨད་རྒྱུད་གྲྭ་ཚང་དུ་དབུ་འཛུགས་གནང་ཡོད་འདུག
གནས་ཚུལ་བཏང་འབྱོར་བྱུང་བ་ལྟར་ན། ཁ་སང་གཟའ་ཉི་མའི་སྔ་དྲོར་རྒྱ་གར་ལྷོ་ཕྱོགས་ཧུན་སུར་རྒྱུད་སྨད་གྲྭ་ཚང་དུ། རྒྱལ་བའི་བཀའ་དྲིན་རྗེས་དྲན་དང་འབྲེལ་བའི་གསང་ཆེན་སྔགས་ཀྱི་རྩོད་པའི་ཆོས་ཐོག་ཆེན་མོ་དེ་དབུ་འཛུགས་གནང་ཡོད་འདུག

ཆོས་ཐོག་དེར་རྒྱུད་གྲྭ་སྟོད་སྨད་དང་། སྲད་རྒྱུད་གྲྭ་ཚང་། རྣམ་རྒྱལ་གྲྭ་ཚང་། གདན་ས་གསུམ་གྱི་དགེ་བཤེས་ལྷ་རམས་པ་དང་། གསང་སྔགས་དོན་གཉེར་བ་བཅས་དགེ་འདུན་པ་ ༤༠༠ ལྷག་མཉམ་ཞུགས་གནང་ཡོད་འདུག

མཛད་སྒོའི་སྐུ་མགྲོན་གཙོ་བོར་བྱང་རྩེ་ཆོས་རྗེ་མཆོག་དང་། དེ་མིན་རྒྱུད་གྲྭ་སྟོད་སྨད་དང་སེ་ར་བྱེས་སྨད། སྲད་རྒྱུད། བཀྲ་ཤིས་ལྷུན་པོ། རྫོང་དཀར་ཆོས་སྡེ་བཅས་ཀྱི་མཁན་པོ་དང་མཁན་ཚབ་རྣམ་པ། ཞོགས་བཞུགས་སྤྱི་འཐུས་དང་ལྷོ་སྤྱི། བདེ་སྐྱིད་སླར་གསོ་དང་ལུགས་ཟུང་། ཧུན་སུར་བཅས་ཀྱི་གཞིས་མགོ ཚོགས་སྡེ་ཁག་གི་འགན་འཛིན་བཅས་ཕེབས་ཡོད་འདུག

མཛད་སྒོའི་སྟེང་རྒྱལ་བའི་བཀའ་དྲིན་རྗེས་དྲན་གྱི་རྒྱུན་ལས་ཚོགས་གཙོ་དགེ་ལུགས་སྤྱི་འཐུས་དགེ་བཤེས་རོང་པོ་བློ་བཟང་སྙན་གྲགས་ལགས་ཀྱིས་གོ་སྒྲིག་ཚོགས་ཆུང་གི་བྱུང་རིམ་དང་ད་ལྟའི་བར་མཛད་རིམ་གང་དག་སྤེལ་བ། མ་འོངས་པར་ག་རེ་སྤེལ་འཆར་ཡོད་པ། དེ་བཞིན། མདོ་སྔགས་གཉིས་ཀའི་ཐོག་ལ་བཤད་སྒྲུབ་གཉིས་ཀྱི་ལམ་ནས་རིས་མེད་ཆོས་བརྒྱུད་ཁག་དང་།   དགོན་སྡེ་ཁག་མཉམ་ཞུགས་ཀྱིས་༸རྒྱལ་བའི་བཀའ་གསུང་ཅི་སྒྲུབ་ཀྱི་ཐད་རྩོམ་ཤོག་ཐོག་བགྲོ་གླེང་དང་།  རྩོད་པའི་ཆོས་ཐོག་གསར་འཛུགས་སོགས་ཆོས་ཚོགས་ཐེངས་ ༡༡ པའི་ཐོག་བཀའ་སློབ་གནང་བའི་དགོངས་དོན་ལྟར་འབད་བརྩོན་ཞུ་བཞིན་ཡོད་པ་དང་། ད་རེབ་གསང་ཆེན་སྔགས་ཀྱི་རྩོད་པའི་ཆོས་ཐོག་འདིར་མཚོན་ན། གསང་ཆེན་རྒྱུད་གྲྭ་རྣམ་གཉིས་ཀྱི་ཁས་ལེན་འཛིན་མཚམས་ཙམ་མ་ཡིན་པར་ཉིན་རེའི་རྩོད་གཞུང་གི་སྐབས་མཚམས་སོ་སོར་སྒྲུབ་པ་ལྷུར་ལེན་ལ་ཉེ་བར་མཁོ་བའི་མན་ངག་དང་། ཕྱག་བཞེས་ག་རེ་ཡོད་པ་དོན་གཉེར་ཅན་ཚོའི་དགའ་སྟོན་དུ་གནང་དགོས་པའི་སྐོར། དེ་བཞིན་ཉི་མ་རེ་རེའི་རྩོད་པའི་འགྲོ་ཕྱོགས་བཅས་ཀྱི་སྐོར་ལ་གཏམ་བཤད་གནང་འདུག

རྒྱུད་སྨད་མཁན་རིན་པོ་ཆེ་མཆོག་གིས། ༸རྒྱལ་བ་ཐུགས་རྗེ་ཅན་གྱིས་སྐུ་ངལ་འཛེམ་མེད་དང་དཀའ་བ་བརྒྱ་ཕྲག་ཁྱད་དུ་བསད་དེ་ཆོལ་གསུམ་ཆོས་ལུགས་དང་བཅས་པ་རྡོག་རྩ་གཅིག་སྒྲིལ་བཟོས་གནང་བ་དང་།   མ་འོངས་པར་ཡང་ང་ཚོས་བོད་དོན་འཐབ་རྩོད་ཐད་ཆིག་སྒྲིལ་གལ་ཆེའི་སྐོར་དང་། ༸རྒྱལ་བ་ཐུགས་ཕམ་གྱི་ལས་དོན་ཆ་ཙམ་ཡང་སྒྲུབ་མི་རུང་བའི་སྐོར་དང་།   ད་རེབ་ཀྱི་ཆོས་ཐོག་འདི་ལ་ཐོག་མཐའ་བར་གསུམ་གྱི་ཀུན་སློང་ཀུན་སྤྱོད་ཁྱེར་ཕྱོགས་སྐོར་སོགས་གསུངས་ཡོད་འདུག

རྒྱུད་སྟོད་མཁན་རིན་པོ་ཆེ་མཆོག་ནས་༸རྒྱལ་བ་བཀའ་དྲིན་ཅན་གྱིས་བོད་པ་བཙན་བྱོལ་བ་ཚོས་ས་དང་གནམ་མ་གཏོགས་ངོ་ཤེས་པ་མེད་པའི་སྐབས་མཚམས་ནས་སྐུ་ངལ་བསྐྱོན་ཏེ་ད་ལྟའི་ཆར་འཛམ་གླིང་ཡུལ་གྲུ་གང་སར་གསུང་གི་ལེགས་བཤད་ཀྱི་སྣང་བས་ཁྱབ་སྟེ་བོད་བསྟན་པ་ཆབ་སྲིད་འདི་བཞིན་གསོན་ཤུགས་རྒྱས་ཡོད་སྐོར་དང་། དགོན་སྡེ་གྲྭ་ཚང་ཁག་དང་། སློབ་གྲྭ་དང་བཟོ་གཞིས་ཁག་སྔར་མེད་གསར་སྐྲུན་དང་བཅས་པའི་ཐད་སྐུ་ངལ་ཚད་མེད་བསྐྱོན་སྐོར་དང་།   ད་རེས་འདིར་ཕ་བླ་མའི་ཞབས་ཏོག་སྒྲུབ་པས་འཇལ་ཟེར་བ་ལྟར་གོ་སྒྲིག་ཚོགས་ཆུང་གི་ངོས་ནས་མཛད་རིམ་འདི་བཞིན་ཕྱག་བསྟར་གནང་བ་དུས་ཀྱི་དགོས་མཁོ་དང་འཚམས་ཤིང་།   ལོ་རྒྱུས་ཐོག་བཀོད་འོས་པའི་གསར་གཏོད་ཀྱི་ཆོས་ཐོག་འདི་བཞིན་མ་འོངས་པར་ཡང་རྒྱུན་མཐུད་དགོས་གལ་ཆེ་སྐོར་གསུངས་འདུག

སེར་བྱེས་མཁན་རིན་པོ་ཆེ་མཆོག་ནས་ཚང་མས་༸རྒྱལ་བ་རིན་པོ་ཆེའི་བཀའ་དྲིན་རྗེས་སུ་དྲན་དགོས་པ་དང་།   གསང་སྔགས་འདི་བཞིན་མང་པོ་ལས་ཐོས་པ་དང་། མང་པོ་ཐོས་རྒྱུ་གལ་ཆེ་བ་དང་། ཚང་མས་ཁུར་མཉམ་ལེན་གྱི་ཐོག་ནས་བསྟན་པ་ཉམས་ཆག་ཏུ་མ་འགྲོ་བའི་ཐབས་ཤེས་བསྟེན་དགོས་པ་དང་།   མ་འོངས་པ་ལ་ཡིན་ནའང་མུ་མཐུད་ཆོས་ཐོག་རྒྱུན་མཐུད་དགོས་སྐོར་གསུངས་ཡོད་དང་།   སྐུ་མགྲོན་གཙོ་བོ་བྱང་རྩེ་ཆོས་རྗེས་མཆོག་གིས། ༸སྐྱབས་མགོན་༸རྒྱལ་བ་རིན་པོ་ཆེ་ནས་དགུང་ལོ་ ༡༦ ནས་བཟུང་མི་ལོ་དྲུག་བཅུའི་རིང་སྐུ་ངལ་ཚད་མེད་བསྐྱོན་གནང་བ་དང་། ད་ལྟའི་ཆར་ཁོང་གི་བཀའ་དྲིན་གྱིས་ཕྱི་ནང་གི་མཐུན་རྐྱེན་ཕུན་སུམ་ཚོགས་པ་འཛོམས་པའི་སྐབས་འདིར་གུང་ཐང་རིན་པོ་ཆེས་གསུངས་པ་ལྟར། དེང་དུས་ཡབ་རྗེའི་སྲོལ་བཟང་ཡང་། །སྙིགས་མ་མུན་པའི་རྡུལ་གྱིས་ཁེབས། །དཔལ་དང་འབྱོར་བས་རབ་རྒྱས་ཀྱང་། །བཤད་དང་སྒྲུབ་པས་ཤིན་ཏུ་ཕྲ། །བསམ་གྱིན་ཤེས་པ་སྙིང་ནས་འཕྱོ། །ཞེས་པ་ལྟར་དེང་སང་ཆ་རྐྱེན་ཡོད་པའི་སྐབས་འདིར་བཤད་སྒྲུབ་ཟུང་འབྲེལ་གྱི་བསྟན་པ་འཛིན་རྒྱུ་གལ་ཆེ་སྐོར་དང་། ང་ཚོ་བཙན་བྱོལ་དུ་ཡོང་དོན་རང་མགོ་གང་ཐོན་གྱི་ཆེད་དུ་མིན་པར་བོད་བསྟན་པ་ཆབ་སྲིད་རང་དབང་ཕྲ་ཚུགས་པ་ཞིག་ཡོང་དགོས་རྒྱུ་གལ་ཆེ་བ་དང་། བོད་པའི་སྤྱི་ཚོགས་ནང་གང་བྱུང་མང་བྱུང་བཤད་ནས་༸རྒྱལ་བ་ཐུགས་ཕམ་གྱི་གནས་ཚུལ་མི་བཟོ་རྒྱུ་གལ་ཆེན་ཡིན་སྐོར་གསུངས་ཡོད་འདུག

ཁོང་གིས་མུ་མཐུད་དུ་ས་གནས་མགོ་འཛིན་རྣམ་པ་ཚོ་དང་དགོན་སྡེ་ཁག་གི་མཁན་རིན་པོ་ཆེ་རྣམ་པས་ཐུགས་འགན་རྐང་བཞེས་ཀྱིས་མང་ཚོགས་ནང་གོ་རྟོགས་སྤེལ་དགོས་པ་དང་། རིམ་ལྔ་གསལ་སྒྲོན་ལ་མཚོན་ན་རྗེ་རིན་པོ་ཆེར་གངས་ཅན་ཤིང་རྟའི་སྲོལ་འབྱེད་ཅེས་པའི་མཚན་འདོགས་གནང་སའི་བསྟན་བཅོས་འདི་དང་དྲང་ངེས་ལེགས་བཤད་སྙིང་པོ་ཆགས་ཀྱི་ཡོད་པ་དང་། དེ་ཡང་ཕྲ་ཞིང་མཛངས་ལ་ཞིབ་པའི་བློ་གྲོས་ཀྱིས་འཇུག་རྒྱུ་གལ་ཆེ་བ་དང་།   རྫོགས་རིམ་ཤེས་པ་ལ་བསྐྱེད་རིམ་ཤེས་དགོས་པ་དང་། དེ་ཡང་ཆོ་ག་བློ་འཛིན་གལ་ཆེ་བ།   གསང་ཆེན་རྒྱུད་གྲྭ་རྣམ་གཉིས་ཀྱི་མཐོང་བ་བརྒྱུད་པའི་ཕྱག་ལེན་ལ་ཐུགས་སྣང་དགོས་སྐོར་དང་། རྒྱ་གཞུང་གི་སློབ་ཚན་ཁག་ལ་ཤུགས་རྒྱག་དགོས།   དེ་ཡང་མདོ་ཕྱོགས་གདན་ས་ཁག་དང་། སྔགས་ཕྱོགས་གསང་ཆེན་རྒྱུད་གྲྭ་རྣམ་གཉིས་ནས་ཐུགས་འགན་བཞེས་དགོས་སྐོར་གསུངས་ཡོད་འདུག

དགོང་དྲོ་སྐུ་མགྲོན་གཙོ་བོ་དབུ་བཞུགས་ཐོག་སྔགས་ཀྱི་རྩོད་པའི་དམ་བཅའ་དངོས་སུ་མགོ་འཛུགས་ཞུས་ཡོད་པ་དང་། ཉིན་ལྟར་འཇང་དགུན་ཆོས་ནང་བཞིན་སྔ་དྲོ་རྩོད་ཟླ་དང་དམ་བཅའ། དགོང་དྲོ་དམ་བཅའ་ཆེན་མོ་དང་རྩོད་ཟླ་གནང་རྒྱུ་བཅས་ཉིན་གྲངས་ ༡༣ ལ་ཚོགས་འཆར་ཡོད་པ་དང་། ལུས་དབེན་སྟོད་སྨད་གཉིས་དང་། ངག་དབེན་དང་། སེམས་དབེན། སྒྱུ་ལུས་དང་འོད་གསལ། ཟུང་འཇུག་བཅས་ལམ་རིམ་པ་དྲུག་ལ་སྟོད་སྨད་གཉིས་རེ་བྱས་ཏེ་རྩོད་པ་གནང་འཆར་ཡོད་འདུག