འབར་མའི་འོས་བསྡུ་ཚོགས་ཆུང་ནས་འབར་མའི་རྒྱལ་ཡོངས་སྲིད་འཛིན་འོས་བསྡུའི་གྲུབ་འབྲས་ཕྱིར་བསྒྲགས་བྱས་པའི་ནང་། ཉིས་སྟོང་བཅུ་དྲུག་ལོའི་སྲིད་འཛིན་འོས་བསྡུའི་རྒྱལ་ཁ་དེ་འབར་མའི་རྒྱལ་ཡོངས་དམངས་གཙོ་ཡར་ཐོན་ཚོགས་པར་ཐོབ་འདུག
དེ་རིང་ནེའུ་ཡོག་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༨ ཉིན་འབར་མའི་རྒྱལ་ཡོངས་སྲིད་འཛིན་འོས་བསྡུ་ཆེན་མོ་བྱས་ཏེ། ས་གནས་ཁག་ཁྲི་ ༤ ལྷག་ནས་འོས་བླུགས་ཡོད་པ་དང་། ཕྱི་ཚེས་ ༡༣ ཉིན་འབར་མའི་གྲོས་ཚོགས་གོང་གཉིས་ཀྱི་སྲིད་སྟེགས་ ༤༩༨ ལས་འབར་མའི་རྒྱལ་ཡོངས་དམངས་གཙོ་ཡར་ཐོན་ཚོགས་པར་སྲིད་སྟེགས་ ༣༨༧ ཐོབ་ཡོད་དང་། འབར་མའི་དམག་གཞུང་གཞོགས་གཏོགས་ཚོགས་པར་སྲིད་སྟེགས་ ༤༢ ལས་ཐོབ་མེད་སྟབས། འབར་མའི་རྒྱལ་ཡོངས་སྲིད་འཛིན་འོས་བསྡུ་ཆེན་མོའི་རྒྱལ་ཁ་དེ་ལྕམ་ཨང་སན་སུའུ་སྐྱིད་ (Aung San Suu Kyi) མཆོག་གིས་སྣེ་ཁྲིད་པའི་འབར་མའི་རྒྱལ་ཡོངས་དམངས་གཙོ་ཚོགས་པར་ཐོབ་ཡོད་པ་དང་། ལོ་རྗེས་མའི་ཕྱི་ཟླ་ ༡ པའི་ནང་འཐུས་མི་གསར་བ་མཇལ་འཕྲད་དང་ཕྱི་ཟླ་ ༣ ནང་སྲིད་འཛིན་གསར་བ་བསྐོ་བཞག་བྱ་འཆར་ཡོད་ཅིང་། འདི་ནི་ལོ་ཕྱི་ ༡༩༦༢ ལོར་འབར་མའི་རྒྱལ་ཁབ་དེ་དྲག་པོའི་དམག་གཞུང་གིས་དབང་བསྒྱུར་བ་ནས་ད་ལོར་དམངས་གཙོའི་འོས་འདེམས་ཐུབ་པ་ཐོག་མ་དེ་ཆགས་ཡོད་འདུག
འོན་ཀྱང་རྒྱལ་སྤྱིའི་སྲིད་དོན་དབྱེ་ཞིབ་པ་ཚོས་འབར་མའི་རྩ་ཁྲིམས་ནང་བུ་དང་བུ་མོ་སུ་ཞིག་རྒྱལ་ཁབ་གཞན་པའི་མི་སེར་ཡིན་ཚེ། འབར་མའི་སྲིད་འཛིན་དུ་བསྐོ་བཞག་མི་ཆོག་པ་གཏན་འབེབས་བྱས་ཡོད་པ་ལྟར། ལྕམ་ཨང་སན་སུའུ་སྐྱིད་ལགས་ཀྱི་ཁྱོ་ག་དང་བུ་གཉིས་དབྱིན་ཇིའི་མི་སེར་ཡིན་སྟབས། ཁོང་མོ་འབར་མའི་སྲིད་འཛིན་དུ་བསྐོ་བཞག་གནང་རྒྱུ་ཁག་པོ་ཡིན་པའི་ཚོད་དཔག་བྱེད་ཀྱི་འདུག
སྤྱིར་བཏང་འབར་མའི་གྲོས་ཚོགས་གོང་མ་མཉམ་འབྲེལ་གྲོགས་ཚོགས་ (Assembly of the Union) ནང་སྲིད་སྟེགས་ ༢༢༤ དང་གྲོས་ཚོགས་འོག་མ་མི་མང་འཐུས་མིའི་གྲོས་ཚོགས་ (House of Representatives) ནང་སྲིད་སྟེགས་ ༤༤༠ ཡོད་ཅིང་། ལོ་ ༥ རེའི་ནང་ཐེངས་གཅིག་རེར་གྲོས་ཚོགས་གོང་འོག་གཉིས་ཀྱི་འཐུས་མི་འདེམས་རྗེས། མཉམ་འབྲེལ་གྲོས་ཚོགས་ནས་སྲིད་འཛིན་གསར་འདེམས་གནང་བ་དང་། སྲིད་འཛིན་གསར་པས་སྣེ་ཁྲིད་པའི་སྲིད་གཞུང་གསར་པ་འཛུགས་དགོས་ཀྱི་ཡོད་འདུག གཞན་ཡང་། ད་ལོའི་འབར་མའི་རྒྱལ་ཡོངས་སྲིད་འཛིན་འོས་བསྡུའི་ཁྲོད་ཡུལ་མི་ས་ཡ་ ༥༥ ལྷག་ཡོད་པའི་གྲས་ཀྱི་ཡུལ་མི་ས་ཡ་ ༣༠ ལྷག་མཉམ་ཞུགས་བྱས་ཡོད་ཀྱང་། རའོ་ཧེན་གྷ་ཁ་ཆེ་མི་མང་ས་ཡ་གཅིག་གི་གཙོས་གྲང་ཉུང་མི་རིགས་ས་ཁུལ་གྱི་གྲོང་སྡེ་བརྒྱ་ཕྲག་མང་པོ་འོས་བསྡུའི་ནང་ཞུགས་ཐུབ་མི་འདུག
ཨ་རི་དང་ཡུ་རོབ་གཙོས་པའི་ཤར་ནུབ་ཀྱི་དམངས་གཙོའི་རྒྱལ་ཁབ་ཁག་གིས་ད་ལོའི་འབར་མའི་རྒྱལ་ཡོངས་སྲིད་འཛིན་འོས་འདེམས་ཁྲོད་ལྕམ་ཨང་སན་སུའུ་སྐྱིད་མཆོག་གིས་སྣེ་ཁྲིད་པའི་འབར་མའི་རྒྱལ་ཡོངས་དམངས་གཙོ་ཚོགས་པར་རྒྱལ་ཁ་ཐོབ་པར་མཚམས་འདྲི་དང་རྟེན་འབྲེལ་ཞུས་ཡོད་པ་མ་ཟད། བོད་མིའི་སྐྱབས་མགོན་༧རྒྱལ་བ་རིན་པོ་ཆེ་མཆོག་གིས་ཀྱང་འཚམས་འདྲིའི་གསུང་འཕྲིན་བསྩལ་པའི་ནང་། ད་རེབ་ཀྱི་འོས་བསྡུའི་ཁྲོད་ལྕམ་ཨང་སན་སུའུ་སྐྱིད་མཆོག་གིས་སྣེ་འཁྲིད་པའི་དམངས་གཙོ་ཚོགས་པར་རྒྱལ་ཁ་ཆེན་པོ་ཐོབ་པར་དགའ་བསུ་ཡོད་ཀྱང་། དེ་སྔོན་ཁོང་མོས་ཁས་ལེན་གནང་བ་ལྟར་ཆོས་ལུགས་མཐུན་འབྲེལ་ཐོག་འབད་བརྩོན་གནང་དགོས་སྐོར་བཀོད་འདུག
གསར་འགོད་པ། པདྨ་རྒྱལ།
