ཧུའུ་ཡོ་པང་གིས་ནག་ཉེས་བཟོས་མྱོང་མེད།

རྒྱ་ནག་གི་སྲིད་འཛིན་ཞི་ཅིན་ཕིན་གྱིས་ཧུའུ་ཡོ་པང་སྐྱེས་ནས་ལོ་བརྒྱ་འཁོར་བའི་རྗེས་དྲན་སྟེང་ཧུའུ་ཡོ་པང་ལ་བསྟོད་བསྔགས་ཆེན་པོ་བྱས་པ་དེ་ཧུའུ་ཡོ་པང་གི་ནག་ཉེས་ལ་གཡོལ་བའི་ཆེད་དུ་རེད་ཟེར།

རེས་གཟའ་པ་སངས་ཉིན་རྒྱ་ནག་གི་སྲིད་འཛིན་ཞི་ཅིན་ཕིན་གཙོས་པའི་ཆབ་སྲིད་ལྷན་ཁང་གི་ཚོགས་མི་རྣམས་ལྷན་ཞུགས་ཐོག རྒྱ་ནག་གི་སྲིད་བློན་ཟུར་པ་འདས་པོ་ཧུའུ་ཡོ་པང་སྐྱེས་ནས་ལོ་ ༡༠༠ འཁོར་བའི་རྗེས་དྲན་གྱི་ཚོགས་འདུ་ཞིག་བསྐོངས་ཡོད་པ་དང་། སྐབས་དེར་ཞི་ཅིན་ཕིན་གྱིས་ཧུའུ་ཡོ་པང་ནི་ཏང་དང་རྒྱལ་ཁབ་ལ་དགའ་ཞེན་ཡོད་པའི་བསྔགས་བརྗོད་དང་ཧུའུ་ཡོ་པང་ལ་སློབ་སྦྱོང་བྱ་དགོས་པ་མ་ཟད། ཧུའུ་ཡོ་པང་གིས་རང་ཉིད་ཀྱི་མི་ཚེ་ཧྲིལ་བོ་ཏང་དང་མི་མང་ལ་བློས་གཏོང་བྱས་ཡོད་སྐོར་བརྗོད་འདུག

གོང་གི་གནས་ཚུལ་སྐོར་ནེའུ་ཡོག་དུས་བབ་གསར་ཁང་གིས་སྤེལ་བའི་ནང་། རེས་གཟའ་པ་སངས་ཉིན་རྒྱ་ནག་དམར་ཤོག་གི་རྒྱུན་སྲོལ་ལྟར་ཞི་ཅིན་ཕིན་གྱིས་ཧུའུ་ཡོ་པང་ལ་བསྔགས་བརྗོད་བྱས་ཡོད་ཀྱང་། མི་གཤིས་དང་ཆབ་སྲིད་ཀྱི་ལངས་ཕྱོགས་ཐད་ནས་ཧུའུ་ཞི་གཉིས་འགལ་ཟླ་ཡིན་པ་གསལ་བོ་རེད་འདུག ཅེས་དང་། ལོ་རབས་ ༨༠ པའི་ནང་ཧུའུ་ཡོ་པང་ནི་རང་དབང་ལ་དགའ་སྣང་ཡོད་མཁན་ཞིག་ཡིན་པ་དང་། ཁོས་མའོ་ཙེ་ཏུང་དུས་རབས་ཀྱི་གཙང་འཕྱག་གི་སྲིད་བྱུས་ཡོ་བསྲང་བྱས་པ་དང་། སྐབས་དེའི་ཆབ་སྲིད་ཀྱི་འདུ་ཤེས་འཛིན་སྟངས་ལ་འཕོ་འགྱུར་གཏོང་དགོས་པ་མ་ཟད། ཐ་ན་མི་མང་ལ་ཤིང་ཐུར་བཞག་ནས་གྲི་ཆུང་དང་ཚེབ་ཐུར་བེད་སྤྱོད་གཏོང་དགོས་པ་སོགས་ཀྱི་བསམ་ཚུལ་བཏོན་ཡོད་པ་རེད། ཅེས་སོགས་བཀོད་འདུག

ནེའུ་ཡོག་དུས་བབ་ཀྱིས་མུ་མཐུད་དུ་བཀོད་དོན། ༡༩༨༧ ལོར་ཧའུ་ཡོ་པང་གོ་གནས་ནས་ཕྱིར་འཕུད་བཏང་རྗེས་གླེང་སློང་འདྲ་མིན་བྱུང་པ་དང་ལོ་གཉིས་ཀྱི་རྗེས་སུ་ཁོང་འདས་གྲོངས་སུ་ཕྱིན་སྟབས། མང་ཚོགས་ཀྱིས་གཞི་རྒྱ་ཆེ་བའི་མྱ་ངན་རྗེས་དྲན་ཞུས་པ་དང་བསྟུན་ཏེ་གནམ་བདེ་སྒོ་མོ་ཆེའི་མདུན་ཐང་ཆེན་དུ་ངོ་རྒོལ་གྱི་ལས་འགུལ་སྤེལ་བ་རེད། ཡིན་ནའང་ད་རེབ་ཧུའུ་ཡོ་པང་སྐྱེས་ནས་ལོ་བརྒྱ་འཁོར་བའི་རྗེས་དྲན་གྱི་ཚོགས་འདུའི་སྟེང་ཞི་ཅིན་ཕིན་གྱིས་ཚོར་ཤུགས་ཅན་གྱི་དྲན་གསོར་གཡོལ་ཐབས་བྱས་ཡོད་ཀྱང་། རྒྱ་ནག་དམར་ཤོག་གི་འགྲོ་སྟངས་ཤིག་གི་དབང་གིས་དམར་དམག་རྒྱང་སྐྱོད་ནང་འཛུལ་བཞུགས་བྱས་མྱོང་པའི་གུང་ཁྲན་ཏང་ཡོན་རྒན་པ་ཁོར་བསྟོད་བསྔགས་བྱས་ཡོད་འདུག ཧུའུ་ཡོ་པང་གིས་སྔོན་ཆད་ཞི་ཅིན་ཕིན་གྱི་ཨ་ཕ་ཞི་ཀྲོང་ཞོན་(Xi Zhongxun) ལ་རོགས་སྐྱོར་བྱས་ཏེ། མའོ་ཙེ་ཏུང་གི་ཆབ་སྲིད་འདམ་རྫབ་ལ་རྒོལ་རྡུང་ཁྲོད་ཞི་ཀྲོང་ཞོན་ཐར་ཐབས་སུ་ཧུའུ་ཡོ་པང་གིས་ནུས་ཤུགས་ཆེན་པོ་བཏོན་ཡོད་པ་རེད། ཅེས་སོགས་བཀོད་འདུག

དེ་རིང་ཞིན་ཐང་རིན་ཞེས་པའི་དྲ་རྒྱའི་སྟེང་། རྒྱ་ནག་གཞུང་གིས་རྒྱ་ནག་གི་སྲིད་འཛིན་ཟུར་བ་ཧུའུ་ཡོ་པང་སྐྱེས་ནས་ལོ་ ༡༠༠ འཁོར་བའི་རྗེས་དྲན་ཆེད་དཔེ་དེབ་ཞིག་དཔར་བསྐྲུན་བྱས་ཡོད་ཀྱང་། དཔེ་དེབ་དེའི་ནང་དོན་ལ་རྩོད་གླེང་འདྲ་མིན་བྱུང་སྟེ། ཧུའུ་ཡོ་པང་གི་ནང་མི་ཚོ་ཁོང་ཁྲོ་ལངས་པའི་གནས་ཚུལ་ཡང་བྱུང་ཡོད་སྐོར་བཀོད་འདུག

ཝ་ཤིན་ཊོན་གྱི་སི་མེ་ཌི་ལྟེ་གནས་ཁང་གི་སློབ་སྟོན་པ་རྒན་པ་རའོ་བྷོར་ཊི་(Robert L. Suettinger) ཡིས་ (ཧུའུ་ཡོ་པང་གི་མི་ཚེ་ལོ་རྒྱུས་སྐོར་གྱི་དེབ་ཅིག་འབྲི་བཞིན་ཡོད་འདུག) ཞི་ཅིན་ཕིན་སོགས་རྒྱ་ནག་གི་མགོ་ཁྲིད་ཚོས་ཧུའུ་ཡོ་པང་སྐྱེས་ནས་ལོ་བརྒྱ་འཁོར་བའི་རྗེས་དྲན་ལ་གོ་སྒྲིག་ཚགས་ཚུད་བྱས་ཡོད་པ་དེ། ༡༩༨༧ ལོ་ཟླ་ ༡ པའི་ནང་ཧུའུ་ཡོ་པང་གནས་དབྱུང་བཏང་བ་དང་སྐབས་དེའི་ཁོ་རང་གི་སྲིད་བྱུས་གུ་ཡངས་སོགས་ལ་གཡོལ་བའི་ཆེད་ཧུའུ་ཡོ་པང་གི་སྐྱེས་སྐར་རྗེས་དྲན་བྱེད་ཀྱི་ཡོད་པ་རེད། དེར་བརྟེན། ང་རང་གི་ལྟ་ཚུལ་ལ་ཧུའུ་ཡོ་པང་རྗེས་དྲན་བྱེད་པ་སྟེ། གུང་ཁྲན་ཏང་ལ་ཆབ་སྲིད་ཀྱི་གནོན་ཤུགས་མི་ཐེབས་པའི་ཆེད་དུ་དམར་ཤོག་ཚོགས་པས་འཆར་གཞི་ཡོད་པའི་སྒོ་ནས་གྲ་སྒྲིག་བྱས་པ་ཞིག་ལ་མཐོང་གི་འདུག ཅེས་ཁོ་རང་གི་དཔྱད་བརྗོད་ནང་བཀོད་འདུག

གསར་འགོད་པ། འཇིགས་མེད་རྒྱ་མཚོ།