ཨུ་རུ་སུ་དང་ཨེ་རན་རྒྱལ་ཁབ་གཉིས་ཕྱར་གྲུ་མཉམ་འདེགས་ཀྱིས་ཨ་རི་གཙོས་པའི་ནུབ་གླིང་རྒྱལ་ཁབ་ཁག་གིས་སེ་རི་ཡ་དང་དཀྱིལ་ཤར་ཡུལ་གྲུར་ཟིང་འཁྲུག་སློང་བཞིན་པར་ཁ་གཏད་གཅོག་དགོས་ཟེར།
དེ་རིང་རོའུ་ཌར་གསར་ཁང་གིས་གནས་ཚུལ་སྤེལ་དོན་ལྟར་ན། ཁ་སང་ཨུ་རུ་སུའི་སྲིད་འཛིན་པུ་ཊེན་(Putin) དང་ཨེ་རན་གྱི་དབུ་ཁྲིད་ཁ་མི་ནའི་(Khamenei)གཉིས་ཨེ་རན་གྱི་རྒྱལ་ས་ཊི་རན་ (Tehran) ནང་ཐུག་འཕྲད་བྱས་ཡོད་པ་དང་། སྐབས་དེར་ཨེ་རན་གྱི་དབུ་ཁྲིད་ཁ་མི་ནའི་ཡིས་ཨ་རིའི་གཞུང་གིས་དཀྱིལ་ཤར་ཡུལ་གྲུ་ཁག་ཏུ་འཛིན་པའི་སྲིད་ཇུས་ཀྱིས་ཨེ་རན་དང་ཨུ་རུ་སུ་རྒྱལ་ཁབ་གཉིས་ལ་ཕྱོགས་མང་པོ་ནས་འཇིགས་ཉེན་སློང་གི་ཡོད་སྟབས། ཨུ་རུ་སུ་དང་ཨེ་རན་རྒྱལ་ཁབ་གཉིས་སྔར་ལས་ལྷག་པར་ཕྱར་བ་གྲུ་འདེགས་དགོས་པའི་འབོད་སྐུལ་ཞུས་ཡོད་འདུག
ཨེ་རན་གྱི་དབུ་ཁྲིད་ཁ་མི་ནའི་ཡིས། ཨ་རིའི་གཞུང་གིས་དུས་ཡུན་རིང་བོར་སེ་རི་ཡའི་ནང་ཟིང་འཁྲུག་བསླངས་ཏེ་སེ་རི་ཡ་མངའ་འོག་ཏུ་བསྡུས་རྗེས། དཀྱིལ་ཤར་ཡུལ་གྲུ་ཁག་ཚང་མ་དབང་སྒྱུར་རྩིས་བྱས་ཡོད་སྟབས། འདི་ནི་ཨེ་རན་དང་ཨུ་རུ་སུ་གཙོས་པའི་རྒྱལ་ཁབ་ཁག་ཚང་མར་འཇིགས་ཉེན་བསླངས་པ་ཞིག་ཡིན་པ་དང་། ཨ་རིའི་གཞུང་གིས་ཆབ་སྲིད་ལ་ཁ་གཡར་ནས་དེང་སྐབས་སེ་རི་ཡའི་ནང་དམག་དཔུང་ཆེད་གཏོང་བྱས་ཏེ་དམིགས་འབེན་འགྲུབ་ཐབས་སུ་འབད་བརྩོན་བྱེད་ཀྱི་ཡོད། ཅེས་བརྗོད་ཡོད་པ་དང་། སྐབས་དེར་ཨུ་རུ་སུའི་སྲིད་འཛིན་པུ་ཊེན་གྱིས་གནད་དོན་འདི་སེ་རི་ཡའི་མི་མང་གིས་ཐག་གཅོད་དགོས་པ་ལས། ཁ་ནས་སེ་རི་ཡའི་མི་མང་གི་འཇིགས་ཉེན་གླེང་བཞིན་དུ་སེ་རི་ཡའི་སྲིད་གཞུང་ལ་བཙན་འཛུལ་བྱེད་པའམ་སེ་རི་ཡའི་མི་མང་ལ་དབང་སྒྱུར་བའི་ཐོབ་ཐང་སུ་ལའང་མེད་སྐོར་བརྗོད་འདུག
ཡིན་ན་ཡང་ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་པ་མར་ཁི་ཊོ་ནར་ (Mark Toner) ཟེར་བ་ཞིག་གིས། ཨ་རིའི་གཞུང་གིས་སེ་རི་ཡའི་རྒྱལ་ནང་གི་དུས་ཟིང་ཞི་འཇགས་སུ་གཏོང་ཐབས་སུ་ཕྱོགས་ཡོངས་ནས་རོགས་རམ་བྱེད་ཀྱི་ཡོད། ཅེས་བརྗོད་ཡོད་པ་རེད།
ནེའུ་ཡོག་དུས་བབ་སོགས་རྒྱལ་སྤྱིའི་བརྒྱུད་ལམ་ཁག་ཏུ་ཐོན་པའི་གནས་ཚུལ་ལྟར་ན། ༢༠༡༡ ལོའི་ཕྱི་ཟླ་ ༣ ཚེས་ ༡༥ ཉིན་སེ་རི་ཡའི་སྲིད་འཛིན་བྷ་ཤཱར་ཨལ་ཨ་ས་ཌི་ (Bashar al-Assad) སྲིད་སྟེགས་ལས་འབབ་དགོས་པའི་མི་མང་གི་ཞི་བའི་རྔམ་སྟོན་ཁྲོམ་སྐོར་བྱུང་སྟེ་ད་ལྟའི་བར་དུས་ཟིང་ཁྲོད་ཡུལ་མི་འབུམ་གཅིག་ལྷག་ཤི་རྨས་བྱུང་བ་དང་ཡུལ་མི་ས་ཡ་མང་པོ་ཡུལ་ལུང་གཞན་ནང་གྱར་བཞིན་ཡོད་ལ། ཉེ་ལམ་ནས་ནུབ་གླིང་རྒྱལ་ཁབ་ཁག་གི་རམ་འདེགས་འོག ཏུར་ཀི་དང་ཨ་རབ་མངའ་སྡེ་ཁག་གིས་སེ་རི་ཡའི་སྲིད་འཛིན་བྷ་ཤཱར་ཨལ་ཨ་ས་ཌི་སྲིད་སྟེགས་ཕབ་ཀྱི་ཡོད་ལ། སུ་རུ་སུ་དང་ཨེ་རན་རྒྱལ་ཁབ་གཉིས་ནས་སི་རི་ཡའི་སྲིད་འཛིན་ལ་གཞོགས་སྐྱོར་བྱེད་ཀྱི་ཡོད་པ་དང་། འཇིགས་སྐུལ་དྲག་སྤྱོད་པས་ཉེ་སྔོན་ཧྥ་རན་སའི་ནང་བསླངས་པའི་དོན་རྐྱེན་ཐད་ནས་ཨ་རི་དང་ཨུ་རུ་སུ། ཡུ་རོབ་གླིང་། དེ་བཞིན་དཀྱིལ་ཡུལ་གྲུ་ཁག་བཅས་འཛམ་གླིང་ཤར་ནུབ་ཀྱི་རྒྱལ་ཁབ་ཚང་མ་མཉམ་འབྲེལ་གྱིས་འཇིགས་སྐུལ་དྲག་སྤྱོད་པར་འགོག་རྒོལ་བྱེད་པར་མོས་མཐུན་བྱུང་ཡོད་ནའང་། སེ་རི་ཡའི་ནང་གི་ཟིང་འཁྲུག་ཞི་འཇགས་གཏོང་ཐབས་ཐད་རྒྱལ་ཁབ་གཉིས་འགལ་ཟླར་གྱུར་ཡོད་སྐོར་སོགས་བཀོད་འདུག
འདི་ལོའི་ཕྱི་ཟླ་ ༦ པའི་ནང་ཨུ་རུ་སུ་དང་ཨ་རི་གཉིས་གཙོས་པའི་སྟོབས་ཆེན་རྒྱལ་ཁབ་དྲུག་མཉམ་འཛོམས་ཐོག ཨེ་རན་གྱི་རྡུལ་ཕྲན་ཚོན་ཆ་ཉོ་ཚོང་མི་ཆོག་པའི་གྲོས་ཆོད་ཅིག་བཞག་ཡོད་ནའང་། ཨུ་རུ་སུའི་ནང་ཡོད་པའི་ཨེ་རན་གཞུང་ཚབ་ཁང་གིས། ཨུ་རུ་སུས་ཨེ་རན་ལ་མེ་ཤུགས་འཕུར་མདེལ་འགོག་བྱེད་ཀྱི་མཚོན་ཆ་མཁོ་འདོན་བྱེད་ཀྱི་ཡོད་སྐོར་བརྗོད་འདུག་ལ། འདི་ལོའི་ཕྱི་ཟླ་ ༩ པ་ནས་ཨུ་རུ་སུ་དང་ཨེ་རན་གཉིས་ཀྱིས་སེ་རི་ཡའི་སྲིད་འཛིན་བྷ་ཤཱར་ཨལ་ཨ་ས་ཌིའི་སྲིད་དབང་རྩོད་ལེན་བྱེད་པའི་རྒྱབ་རོགས་སུ་ཨུ་རུ་སུའི་མཁའ་དམག་དང་ཨེ་རན་གྱི་དྲག་ཆས་དམག་དཔུང་འབོར་ཆེན་སེ་རི་ཡའི་ནུབ་ཁུལ་དང་བྱང་ཁུལ་ཁག་ཏུ་ཆེད་གཏོང་བྱེད་མུས་ཡིན་འདུག
གསར་འགོད་པ། པདྨ་རྒྱལ།
