ཉེ་ལམ་ཧྥ་རན་སིའི་རྒྱལ་སར་འཇིགས་སྐུལ་དྲག་སྤྱོད་པས་དོན་རྐྱེན་བཟོས་པ་དང་བསྟུན་ཏེ་རྒྱ་ནག་གཞུང་གིས་ཤིན་ཅང་ཡུ་གུར་ས་ཁུལ་གྱི་བརྡ་འཕྲིན་བརྒྱུད་ལམ་དང་ཁ་པར་སོགས་ལ་དམ་དྲག་ཆེ་རུ་བཏང་ཡོད་འདུག
དེ་རིང་ནེའུ་ཡོག་དུས་བབ་ཀྱིས་གནས་ཚུལ་སྤེལ་པའི་ནང་། རྒྱའི་འོག་ཏུ་ཡོད་པའི་ཤིན་ཅང་ཡུ་གུར་བ་ཁག་ཅིག་གིས་རྒྱ་ནག་གི་དྲ་རྒྱ་བཀག་སྡོམ་ར་བ་གཏོར་བྱེད་ཀྱི་མཉེན་ཆས་ཤིག་བེད་སྤྱོད་གཏོང་གི་ཡོད་པ་རྒྱ་ནག་དྲ་ཐོག་ཉེན་རྟོག་པས་ཤེས་རྟོག་བྱུང་སྟེ་ཁོ་ཚོའི་ཁ་པར་བཀག་འགོག་བྱས་ཡོད་པ་དང་། དེ་ནི་རྒྱ་ནག་གཞུང་གིས་ནུབ་ཕྱོགས་མཐའ་མཚམས་ས་ཁུལ་སྟངས་འཛིན་བྱེད་པའི་ཐབས་ཤེས་གསར་བ་ཞིག་ཡིན་ཞིང་། བདུན་ཕྲག་སྔོན་མར་ཧྥ་རན་སིའི་རྒྱལ་ས་ཕ་རེ་སི་ལ་འཇིགས་སྐུལ་དྲག་སྤྱོད་པའི་གནས་ཚུལ་བྱུང་རྗེས། ཤིན་ཅང་ས་གནས་སྲིད་གཞུང་བྱེད་ཐབས་གསར་བ་དེ་དངོས་སུ་ལག་བསྟར་བྱས་ཏེ། ཉེན་རྟོག་པས་ཡུ་གུར་བ་མི་ལྔ་ཡི་ཁ་པར་ཨང་གྲངས་བཀག་སྡོམ་བྱས་འདུག ནག་ཉེས་བཙུགས་ཡོད་མཁན་དེ་དག་གིས་ཕྱི་ཕྱོགས་ཀྱི་བརྒྱུད་ལམ་ལ་འབྲེལ་བ་བྱས་ཡོད་ཀྱང་ཁོ་རང་ཚོའི་མིང་དངོས་སུ་བཏོན་མི་འདུག ཅེས་སོགས་བཀོད་འདུག
གནས་ཚུལ་ནང་མུ་མཐུད་དུ་བསྟན་དོན། ཐེངས་འདིར་ནག་ཉེས་བཙུགས་ཡོད་པའི་ཤིན་ཅང་གི་རྒྱལ་ས་ཝོ་ལོ་མོ་ཆེའི་ནང་སྡོད་མཁན་ཞིག་གི་ཁ་པར་སྟེང་༼ཉེན་རྟོག་པའི་བརྡ་ཡིག་འབྱོར་བ་ལྟར། ཆུ་ཚོད་གཉིས་ཀྱི་ནང་དུ་ང་ཚོས་ཁྱེད་ཀྱི་ཁ་པར་ཨང་གྲངས་སྒོ་བརྒྱག་རྒྱུ་ཡིན། གལ་སྲིད་ཁྱེད་རང་ལ་དོགས་འདྲི་ཡོད་ན། རང་ཉིད་སྡོད་སའི་ས་གནས་ཉེན་རྟོག་ཀྱི་དྲ་རྒྱའི་སྟེང་འབྲེལ་བ་བྱོས།༽ ཞེས་འཕྲིན་ཐུང་ཞིག་འབྱོར་ཡོད་པ་དང་། འཕྲིན་ཐུང་དེ་འབྱོར་རྗེས་ཁོ་མོས་ཉེན་རྟོག་པར་ཁ་པར་བཏང་སྟེ་ཁོ་མོའི་ཁ་པར་སྒོ་རྒྱག་དགོས་དོན་སྐོར་དྲིས་སྐབས། ཁྱོད་རང་གི་ཐོབ་ཐང་ལག་འཁྱེར་གྱི་ཨང་གྲངས་དང་ཁ་པར་མཐུད་མི་འདུག རྒྱ་ནག་དྲ་རྒྱའི་སྟངས་འཛིན་ལས་བརྒལ་ཏེ་དངོས་ཡོད་སྒེར་གཉེར་དྲ་རྒྱ་(VPN) ། ཕྱི་རྒྱལ་གྱི་འཕྲིན་ཐུང་མཉེན་ཆས་རིགས་དཔེར་ན་ (WhatsApp) དང་ (Telegram) སོགས་བེད་སྤྱོད་བྱས་པ་ཡིན་ན་ཁ་པར་ཨང་གྲངས་བཀག་སྡོམ་བྱེད་ཀྱི་ཡོད་པ་རེད། ཅེས་ཉེན་རྟོག་པས་བརྗོད་འདུག
ཤིན་ཅང་ནི་ས་ཆ་རྩུབ་པོ་དང་མི་མང་ཁ་ཐོར་དུ་གནས་པའི་རྒྱ་ནག་གི་ནུབ་ཕྱོགས་སུ་ཡོད་སྟབས་སྲིད་གཞུང་གིས་དྲ་རྒྱ་ལ་སྟངས་འཛིན་དང་རྟོག་ཞིབ་བྱེད་ཡུལ་ལྟ་བུ་ཞིག་ཆགས་ཡོད་འདུག ༢༠༠༩ ལོར་ཊོར་ཁེ་ (Turkic) སྐད་ཤོད་མཁན་ཡུ་གུར་གྲངས་ཉུང་མི་རིགས་དང་རྒྱ་མི་རིགས་བར་ལ་རྙོག་འཛིང་བྱུང་རྗེས་རྒྱ་ནག་གཞུང་གིས་ལོ་ཕྱེད་ལྷག་རིང་ས་གནས་དེའི་དྲ་རྒྱ་བཀག་འགོག་བྱས་པ་ནས་བཟུང་། སྲིད་གཞུང་དང་ཡུ་གུར་བའི་མི་མང་བར་ལ་འཁྲུག་འཛིང་ཤོར་རྒྱུ་མང་དུ་འགྲོ་བཞིན་ཡོད་འདུག
བདུན་ཕྲག་སྔོན་མའི་ནང་ཨི་རེག་དང་སེ་རི་ཡའི་ཁ་ཆེ་དྲག་སྤྱོད་མཉམ་འབྲེལ་ཤོག་ཁག་ (IS) ཟེར་བས་རྒྱ་ནག་མི་སེར་ཞིག་དམར་གསོད་བཏང་པ་རྒྱ་ནག་གི་བརྒྱུད་ལམ་ཁག་ཏུ་ཁྱབ་བསྒྲགས་བྱས་རྗེས། ཉེ་ཆར་རྒྱ་ནག་གཞུང་གིས། མི་ཁག་ཅིག་གིས་དྲ་རྒྱའི་ཁེ་དབང་བེད་སྤྱོད་བཏང་ནས་ཆོས་ལུགས་ཁྱབ་བསྒྲགས་ཤུགས་ཆེན་བྱེད་བཞིན་པའི་སྐྱོན་བརྗོད་བྱས་ཡོད་ཀྱང་། འགྲོ་བ་མིའི་ཐོབ་ཐང་ཚོགས་པའི་ལས་འགུལ་བས། ཤིན་ཅང་ས་ཁུལ་གྱི་མི་མང་ཚོས་ཡུ་གུར་བའི་རང་དབང་ཐོག་དམ་དྲག་བྱས་པ་དེར་རྒོལ་རྡུང་གཏོང་བཞིན་ཡོད་སྟབས། དེ་ཕྱི་རྒྱལ་ཁབ་ལ་འབྲེལ་བ་ཡོད་པའི་ངེས་པ་མི་འདུག ཅེས་བརྗོད་འདུག
ཧོང་ཀོང་ནང་ཡོད་པའི་ཤར་ཨེ་ཤ་ཡའི་རྒྱལ་སྤྱིའི་ཉེས་ཡངས་ཚོགས་པའི་འགན་འཛིན་ནེ་ཁུ་ལ་སི་ (Nicholas Bequelin)ཡིས། དྲག་སྤྱོད་པའི་རྩོད་རྙོག་དང་ཛ་དྲག་གི་དཀའ་རྙོག་འབྱུང་བཞིན་པའི་རྐྱེན་གྱིས་རྒྱ་ནག་གིས་ཤིན་ཅང་གི་དྲ་ལམ་ཁག་ཞིབ་བཤེར་ནན་མོ་བྱེད་ཀྱི་ཡོད་པ་རེད། ཅེས་བརྗོད་འདུག
གསར་འགོད་པ། འཇིགས་མེད་རྒྱ་མཚོ།
