ཁེ་ན་ཌའི་མཛངས་མར་ཐོངས་མཆན་སྤྲད་མི་འདུག

གཟའ་ཟླ་བའི་ཉིན་རྒྱ་ནག་སན་ཡ་གྲོང་ཁྱེར་དུ་འཛམ་གླིང་མཛངས་མ་འགྲན་བསྡུར་གྱི་མཛད་སྒོ་དབུ་འཛུགས་བྱས་ཡོད་ཀྱང་ཁེ་ན་ཌའི་མཛངས་མར་རྒྱ་ནག་གཞུང་གིས་ཐོངས་མཆན་སྤྲད་མི་འདུག

ཟླ་རྗེས་མའི་ཚེས་ ༡༩ ཉིན་སྐབས་ ༦༥ བའི་འཛམ་གླིང་མཛངས་མའི་མཇུག་མཐའི་འགྲན་བསྡུར་དེ་རྒྱ་ནག་ཧེ་ནན་ཞིང་ཆེན་སན་ཡ་གྲོང་ཁྱེར་དུ་འཚོགས་རྒྱུ་ཡིན་པ་ལྟར། ཟླ་འདིའི་ཚེས་ ༢༣ ཉིན་འཛམ་གླིང་མཛངས་མའི་འགྲན་བསྡུར་གྱི་མཛད་སྒོ་དབུ་འཛུགས་བྱས་ཡོད་པ་དང་། སྐབས་དེར་འཛམ་གླིང་གང་ས་ནས་མཛངས་མ་མང་པོ་ཞིག་ཕེབས་ཡོད་སྐོར་རྒྱ་གཞུང་གི་ཤིན་ཧྭ་དྲ་པས་གནས་ཚུལ་སྤེལ་ཡོད་འདུག་ཀྱང་། མི་རིགས་རྒྱ་རིགས་ཡིན་པའི་ད་ལོའི་ཁེ་ན་ཌའི་མཛངས་མ་ཨེན་སི་ཊ་སི་ལིན་ (Anastasia Lin) ལགས་སུ་རྒྱ་ནག་གཞུང་གིས་ཐོངས་མཆན་སྤྲད་མི་འདུག

རྒྱ་གཞུང་གི་བརྒྱུད་ལམ་དུ་ཁྱབ་བསྒྲགས་བྱེད་བཞིན་པའི་འཛམ་གླིང་ཡོངས་ཀྱི་མཛངས་མ་སན་ཡ་ལ་ཕེབས་ཡོད་ཟེར་བ་དེར། ཁེ་ན་ཌའི་མཛངས་མ་ཨེན་སི་ཊ་སི་ལིན་གྱིས། ཕྱིའི་བརྒྱུད་ལམ་ཁག་ཏུ་གླེང་སློང་བྱེད་བཞིན་པའི་གནས་ཚུལ་རྒྱ་ནག་གིས་སྣང་མེད་བཏང་པ་དང་། ཁོ་ཚོས་འགྲན་བཞུགས་བྱེད་མཁན་ཚང་མ་ཕེབས་ཡོད་པའི་ཁྱབ་བསྒྲགས་བྱེད་ཀྱི་ཡོད་ཀྱང་། ཁེ་ན་ཌའི་མཛངས་མ་འཛམ་གླིང་མཛངས་མའི་འགྲན་བསྡུར་ཁྲོད་ཀྱི་འགྲན་ཞུགས་པ་མ་རེད་དམ། དེ་རྩ་བ་ནས་དྲང་བདེན་མ་རེད། འཛམ་གླིང་རང་བཞིན་གྱི་འགྲན་བསྡུར་ཁྲོད་རྒྱལ་ཁབ་ཅིག་གི་ཚབ་མཚོན་མི་སྣ་སྣང་མེད་བཏང་བ་རེད། ཅེས་བརྗོད་འདུག ཁོ་མོས་མུ་མཐུད་དུ། རྒྱལ་སྤྱི་རང་བཞིན་གྱི་འགྲན་བསྡུར་འདིའི་རིགས་རྒྱ་ནག་ལྟ་བུའི་རྒྱལ་ཁབ་ནང་བསྐོང་མི་འོས་པ་ཞིག་དང་། ཁོ་ཚོར་རྒྱལ་སྤྱི་རང་བཞིན་གྱི་ཚད་གཞི་འཛིན་ས་མེད་སྐོར་སོགས་བརྗོད་འདུག

ཁེ་ན་ཌའི་མཛངས་མ་ཨེན་སི་ཊ་སི་ལིན་ལ་རྒྱ་ནག་གིས་ཐོངས་མཆན་སྤྲད་མེད་ནའང་ཁོ་མོས་སྟེང་རྩོད་འགྲན་བསྡུར་ལ་མཉམ་བཞུགས་བྱ་རྒྱུའི་འབད་བརྩོན་ད་དུང་མཚམས་འཇོག་བྱ་རྒྱུ་མིན་སྐོར་བརྗོད་ཡོད་འདུག དེ་དང་མཉམ་དུ་འཛམ་གླིང་མཛངས་མའི་གོ་སྒྲིག་ཚོགས་པས་འགན་ལེན་འོག་ཨེན་སི་ཊ་སི་ལིན་གྱིས་ཆབ་སྲིད་ཀྱི་ལས་དོན་གང་ལའང་ཐེ་གཏོགས་མི་བྱེད་རྒྱུའི་ཁས་ལེན་བྱས་ཚེ་རྒྱ་ནག་གི་ཐོངས་མཆན་སྤྲོད་པའི་རེ་བ་ཏོག་ཙམ་ཡོད་སྐོར་བརྗོད་ཡོད་ཀྱང་། ཁོ་མོས་གལ་སྲིད་ང་རྒྱ་ནག་ལ་འགྲོ་ཐུབ་པ་ཡིན་ན་ངས་རྒྱུ་མཚན་མེད་པའི་ལས་འགུལ་གང་ཡང་སྤེལ་འདོད་མེད་ཀྱང་ཉིད་ཀྱི་འདོད་ཚུལ་གླེང་སློང་བྱ་རྒྱུ་སུས་ཀྱང་འགོག་ཐུབ་རྒྱུ་མ་རེད། དེ་བཞིན། ཕྱི་ཕྱོགས་ཀྱི་ཆོས་འཁོར་རྩ་རླུང་སྒོམ་སྒྲུབ་པའི་རང་དབང་འཐབ་རྩོད་བྱེད་མཁན་ཚོའི་མངོན་འདོད་ཁོ་ཚོར་ཧ་གོ་གི་འཇུག་རྒྱུ་ཡིན། པེ་ཅིན་སྲིད་གཞུང་ཆེས་ཞེད་སྣང་སྐྱེས་སའང་རེད་བསམ་གྱི་ཡོད། ཅེས་བརྗོད་འདུག

ཟླ་འདིའི་ཚེས་ ༢༠ ཉིན་ཨ་རིའི་དྲ་རྒྱའི་དུས་དེབ་ (NextShark) ཀྱིས་ཨེན་སི་ཊ་སི་ལིན་ལ་བཅའ་འདྲི་ཞིག་བྱས་སྐབས་ཁོ་མོས། རྒྱ་ནག་གིས་ལོ་ངོ་ ༡༣ རིང་ངའི་ཀླད་པ་བཀྲུས་ཡོད་ཀྱང་ད་ལྟ་ང་ལ་ནུབ་ཕྱོགས་ཀྱི་སློབ་གསོ་ཐོབ་ཡོད། ཐོག་མར་ང་ཁེ་ན་ཌར་འབྱོར་རྗེས་ངའི་ཨ་མ་ལགས་ཀྱིས། ཁྱེད་རང་གི་བསམ་བློ་གཏོང་ཕྱོགས་འགྱུར་བ་དགོས་པ་དང་། བསམ་བློ་རྒྱ་ཆེན་པོ་གཏོང་དགོས། གལ་སྲིད་དེ་ལྟར་མ་བྱས་ཚེ་རྒྱལ་ཁབ་འདིའི་ནང་སྡོད་རྒྱུ་འོས་འཚམས་མིན་སྐོར་བརྗོད་མྱོང་། དེར་བརྟེན། ད་རེབ་གལ་སྲིད་ང་རྒྱ་ནག་ལ་འགྲོ་ཐུབ་ཚེ་ངས་བརྩི་བཀུར་དང་ཞི་བའི་སྒོ་ནས་རྒྱ་ནག་མི་མང་གི་བློ་སྒོ་འབྱེད་ཐབས་ལ་འབད་བརྩོན་བྱེད་རྒྱུ་ཡིན།  ཞེས་བརྗོད་འདུག

༢༠༡༥ ལོའི་ཁེ་ན་ཌའི་མཛངས་མ་ཨེན་སི་ཊ་སི་ལིན་ལགས་ནི། ༡༩༩༠ ལོའི་ཟླ་ ༡ ཚེས་ ༡ ཉིན་རྒྱ་ནག་ནས་སྐྱེས་ཤིང་། ཁོ་མོ་ལོ་ ༡༣ ཐོག་ཨ་མ་དང་མཉམ་དུ་ཁེ་ན་ཌར་བསྐྱོད་དེ་གནས་སྡོད་བྱས་ཡོད་འདུག ད་ལྟ་རྒྱལ་ཁབ་དེའི་མི་སེར་ཆགས་ཡོད་པ་མ་ཟད། ཐོན་གསར་ལ་བ་འགྲེམ་སྟོན་གཟུགས་བཟང་མ་དང་གློག་བརྙན་འཁྲབ་སྟོན་མ་སོགས་ཡིན་འདུག ད་ལོའི་ཕྱི་ཟླ་ ༥ ཚེས་ ༡༦ ཉིན་ཁེ་ན་ཌའི་ ༢༠༡༥ ལོའི་འཛངས་མའི་བྱ་དགའ་ཨང་དང་པོ་ཐོབ་ཡོད་འདུག ཁོ་མོའི་ཨ་ཕ་དང་གཉེན་ཉེ་དག་ད་དུང་རྒྱ་ནག་ཏུ་གནས་སྡོད་བྱས་ཡོད་འདུག

གསར་འགོད་པ། འཇིགས་མེད་རྒྱ་མཚོ།