ཞུ་གཏུག་བྱེད་མཁན་མེད་ན་འཇོག་རྐྱང་ཡིན།

དེ་རིང་ཉིན་རྒྱབ་ཆུ་ཚོད་ ༣།༣༠ སྟེང་། བོད་མིའི་སྒྲིག་འཛུགས་དབུས་འོས་བསྡུ་ལྷན་ཁང་གི་འགན་འཛིན་ཤོ་ཟུར་བསོད་ནམས་ཆོས་འཕེལ་མཆོག་དང་། འོས་བསྡུའི་འགན་འཛིན་ལས་འཕར་དགེ་བཤེས་བསྟན་པ་བཀྲ་ཤིས་དང་བསྟན་འཛིན་ཆོས་འཕེལ་གསུམ་དབུ་བཞུགས་ཐོག བཀའ་ཤག་སྐབས་བཅོ་ལྔ་པའི་སྲིད་སྐྱོང་དང་སྐབས་བཅུ་དྲུག་པའི་བོད་མི་མང་སྤྱི་འཐུས་ཀྱི་སྔོན་འགྲོའི་འོས་བསྡུའི་ཕྱོགས་བསྡོམས་འོས་གྲངས་གསལ་བསྒྲགས་གནང་སྐབས། འོས་བསྡུའི་འགན་འཛིན་མཆོག་ལ་དྲི་བ་བཏང་བ་ཁག་ཅིག་གཤམ་དུ་བཀོད་ཡོད།

དྲི་བ། དེ་རིང་གི་གསལ་བསྒྲགས་ནང་བལྟས་ཡོང་ན། འོས་ཤོག་མང་པོ་ཞིག་རྩིས་མེད་དུ་བཏང་འདུག་སྟབས། དེ་རྒྱུ་རྐྱེན་ག་འདྲ་ཞིག་གི་ཐོག་ནས་རྩིས་མེད་གཏོང་དགོས་བྱུང་ཡོད་དམ།

ལན། ས་གནས་ཁག་ནས་རྩིས་མེད་གཏོང་གི་ཡོད་པ་རེད། དཔེར་ན། འོས་ཤོག་ནང་ཁྱད་མིང་མ་བྲིས་ནས་བསོད་ནམས་ཆོས་འཕེལ་ཞེས་ལབ་པ་ཡིན་ན། བསོད་ནམས་ཆོས་འཕེལ་སུ་ཡིན་ངོས་འཛིན་བྱེད་ཐུབ་ཀྱི་ཡོད་པ་མ་རེད། དེ་འདྲའི་གནད་དོན་ཁ་ཤས་ཀྱི་ཐོག་ནས་འོས་ཤོག་གྲངས་བཤེར་སྐབས་རྩིས་མེད་དུ་འགྲོ་ཡི་ཡོད་པ་རེད། སྒྲིག་གཞིའི་ནང་དོན་ཚན་ཁ་ཤས་ཤིག་ཡོད་པ་དང་། འོས་ཤོག་གྲངས་བཤེར་བྱེད་སྐབས་འདི་དང་འདི་རིགས་ཡིན་ན་རྩིས་མེད་གཏོང་དགོས་པ་རེད་ཅེས་གསུངས་ཡོད་པ་གཞིར་བཟུང་ནས་ས་གནས་ཁག་ནས་རྩིས་མེད་བཏང་ཡོད་པ་ཞིག་ལ་ང་ཚོས་ངོས་འཛིན་བྱེད་ཀྱིན་ཡོད་པ་རེད། མང་ཚོགས་ལ་ལམ་སྟོན་ག་རེ་ཞུ་རྒྱུ་ཡོད་ཟེར་ན། དཔེར་ན། མིང་ཁེར་རྐྱང་བྲིས་ན་རྩིས་མེད་འགྲོ་ཡི་ཡོད་དུས་མིང་ཆ་ཚང་འབྲི་དགོས་ཀྱི་ཡོད་པ་རེད། ཡིན་ནའང་། སྔོན་འགྲོའི་ལས་རིམ་གྲུབ་ཚར་བ་རེད། དངོས་གཞིའི་སྐབས་སུ་མིང་དང་ད་ལྟའི་སྡོད་གནས་སོགས་འབྲི་དགོས་པ་མ་རེད་སོ་སོས་རྟགས་རྒྱག་རྒྱུ་ཡིན་སྟབས། དངོས་གཞིའི་སྐབས་ལ་སྐུ་ངལ་འཕྲད་ཀྱི་མ་རེད།

དྲི་བ། རྒྱ་གར་བྱང་ཕྱོགས་ཀྲུ་ཀྲིང་ཁུལ་གྱི་འོས་གྲངས་འབྱོར་བའི་ནང་། སྲིད་སྐྱོང་ལ་འོས་ཤོག་ཁྱོན་བསྡོམས་ ༤༠༠ ལྷག་བྱུང་ཡོད་པ་ཚང་མའི་སྟེང་གི་འོས་མི་གཅིག་རང་ཡིན་སྐོར་ཐོས་སོང་བས། གནས་སྟངས་དེའི་སྐོར་ལ་དབུས་འོས་བསྡུ་ལྷན་ཁང་གིས་ཞིབ་འཇུག་གནང་རྩིས་ཡོད་དམ།

ལན། གནས་ཚུལ་དེའི་སྐོར་ལ་ད་བར་འོས་བསྡུ་ལས་ཁང་ལ་ཞུ་གཏུག་རྒྱག་མཁན་གང་ཡང་བྱུང་མ་སོང་། གལ་སྲིད་དེ་འདྲ་བྱུང་བ་ཡོད་ན་འགྲིག་ཡོད་པ་མ་རེད། ང་ཚོ་དབུས་འོས་བསྡུ་ལས་ཁུངས་ངོས་ནས་ས་གནས་འོས་བསྡུ་ལས་ཁུངས་ལ་འགན་སྤྲད་ཡོད་པར་བརྟེན། ས་གནས་འོས་བསྡུ་ལས་ཁང་གིས་ཆ་ཚང་གནང་དགོས་ཀྱི་ཡོད་སྟབས། ད་ལྟའི་ཆར་སྐྱོན་གནད་དེའི་སྐོར་ལ་དབུས་འོས་བསྡུ་ལས་ཁང་ལ་ཞུ་གཏུག་རྒྱག་མཁན་གང་ཡང་བྱུང་མ་སོང་།

དྲི་བ། སྔོན་འགྲོའི་འོས་བསྡུའི་སྐབས་འོས་བསྡུའི་སྤྱིལ་བུ་གཅིག་ནང་འོས་ཤོག་འཕེན་མཁན་ཚུད་པའི་མི་གསུམ་འཛུལ་བ་དེ་འདྲ་བྱུང་སོང་བས། དངོས་གཞིའི་འོས་བསྡུ་སྐབས་གནས་ཚུལ་དེ་རིགས་སྔོན་འགོག་བྱ་ཐབས་གང་འདྲ་ཡོད་དམ།

ལན། འོས་བསྡུའི་སྒྲིག་གཞི་ནང་ཡིག་རྨོངས་པ་གཅིག་ལ་མི་གཅིག་གིས་མ་གཏོགས་རོགས་པ་བྱེད་མི་ཆོག་ཅེས་གསལ་པོ་ཞེ་དྲགས་བཀོད་ཡོད་ཀྱང་། ཁྱིམ་ཚང་དང་ནང་མི་གཅིག་པ་ཡིན་ན་རོགས་པ་བྱས་པར་ཐལ་ཆ་གང་ཡང་འགྲོ་གི་མེད་ཅེས་གསལ་ཡོད་སྟབས། གཅིག་བྱས་ན་སྐབས་དེ་དུས་ནང་མི་གཅིག་པས་རོགས་པ་བྱས་ཡོད་པ་དེ་འདྲ་ཡོང་མི་སྲིད་པ་གང་ཡང་མ་རེད་བསམ་གྱི་འདུག ད་ལྟ་སྔོན་འགྲོའི་འོས་བསྡུ་བསྒྲུབས་ཚར་ཡོད་པ་རེད། དངོས་གཞིའི་འོས་བསྡུ་སྐབས་རོགས་པ་ཁྲིད་རྒྱུ་མེད་པ་རེད། གལ་སྲིད་མིག་འོང་བ་དང་ལག་པ་གཉིས་མེད་པ་ཡིན་ན་རྟགས་རྒྱག་དགོས་སྟབས་རོགས་པ་དགོས་ཀྱི་ཡོད་པ་རེད་མ་གཏོགས། གཞན་རོགས་པ་གང་ཡང་དགོས་ཀྱི་ཡོད་པ་མ་རེད།

དྲི་བ། ཐེངས་འདིར་བལ་ཡུལ་དང་འབྲུག་ནང་སྔོན་འགྲོའི་འོས་བསྡུ་གནང་ཐུབ་ཡོད་དམ།

ལན། འབྲུག་ནང་ད་ལོའི་སྔོན་འགྲོའི་འོས་བསྡུ་གནང་ཐུབ་ཡོད་པ་མ་རེད། གང་ཡིན་ཟེར་ན། འབྲུག་གཞུང་གིས་བོད་མི་འོས་འཕེན་པ་སུ་ཡིན་ཡང་འོས་འཕེན་པའི་གནས་སྟངས་ཆ་ཚང་ས་གནས་གཞུང་ལ་ཕུལ་དགོས་པའི་བཀོད་ཁྱབ་བཏང་ཡོད་སྟབས། འབྲུག་ནང་བཞུགས་མཁན་ཚོས་གནད་དོན་གཞན་པར་བསམ་བློ་བཏང་ནས་འོས་ཤོག་ལྡུག་པ་ཡིན་ན་མིང་གཞུང་ཡར་ཕུལ་བདེ་པོ་མེད་སྟབས། ཁོ་ཚོས་འདོད་པ་བྱེད་ཀྱི་མེད་པའི་རྒྱུ་མཚན་ལ་བརྟེན་ནས་འོས་ཤོག་བླུགས་ཡོད་པ་མ་རེད། བལ་ཡུལ་ནང་གསང་བའི་འོས་ཤོག་བླུགས་ཐུབ་པ་བྱུང་སྟེ། ང་ཚོར་དཀའ་ངལ་གང་ཡང་མེད་པའི་ཐོག་ནས་འོས་གྲངས་ཆ་ཚང་རག་ཐུབ་པ་བྱུང་ཡོད་པ་རེད།

གསར་འགོད་པ། དོན་གྲུབ།