ཆབ་སྲིད་ནང་བགྲོ་གླེང་གལ་ཆེན་པོ་རེད། ང་ལ་འོས་མ་ཐོབ་པར་ཧང་སང་གི་མེད། ༼བཀྲ་ཤིས་དབང་འདུས།༽

བཀའ་ཤག་སྐབས་བཅོ་ལྔ་པའི་སྲིད་སྐྱོང་དང་སྐབས་བཅུ་དྲུག་པའི་བོད་མི་མང་སྤྱི་འཐུས་ཀྱི་འོས་བསྡུའི་ཆེན་མོའི་སྔོན་འགྲོའི་འོས་གྲངས་ཁྱབ་བསྒྲགས་དང་བསྟུན་ཏེ། འདི་གའི་གསར་འཁང་གིས་དབུས་འོས་བསྡུ་ལྷན་ཁང་གིས་གསལ་བསྒྲགས་གནང་བ་ལྟར། དངོས་གཞིའི་འོས་མིར་མ་ཚུད་པའི་སྲིད་སྐྱོང་འོས་མིར་བཞེངས་མཁན་དག་ལས་བཀྲ་ཤིས་དབང་འདུས་ལགས་སུ་དྲི་བ་ཁག་ཅིག་ཞུས་ཡོད།

དྲི་བ། ཁ་སང་སྲིད་སྐྱོང་དང་སྤྱི་འཐུས་ཀྱི་སྔོན་འགྲོའི་འོས་བསྡུའི་འོས་གྲངས་གསལ་བསྒྲགས་གནང་བའི་ཁྲོད་སྲིད་སྐྱོང་གི་འོས་མི་ ༦ གི་འོས་གྲངས་གསལ་བོ་ཆགས་སོང་། འོས་མི་རེ་རེའི་འོས་གྲངས་དང་འབྲེལ་ཏེ་ཁྱོད་རང་ལ་མཐོང་ཚོར་ག་རེ་བྱུང་སོང་།

ལན། ངས་མི་མང་གིས་གདམ་ཀར་ངོས་ལེན་དང་རྒྱབ་སྐྱོར་ཞུ་རྒྱུ་ཡིན། ད་ལྟའི་ཆར་མི་མང་གི་བསམ་ཚུལ་དེ་སྲིད་སྐྱོང་ལས་ཐོག་བློ་བཟང་སེང་གེར་ཡང་བསྐྱར་གོ་སྐབས་ཤིག་སྤྲོད་དགོས་ཀྱི་རེད་བསམས་ནས་འོས་འཕེན་ཀྱི་ཡོད་སྟབས། རྒྱལ་ཁ་ཐོབ་པ་རེད་བསམ་གྱི་འདུག ད་ལྟའི་ཆར་སྲིད་སྐྱོང་ལས་ཐོག་བློ་བཟང་སེང་གེ་ལགས་སུ་འོས་མང་ཤོས་རག་པ་དེ། མི་མང་པོ་ཞིག་གིས་ཁོང་ལ་གོ་སྐབས་གཉིས་པ་འབུལ་དགོས་ཀྱི་རེད་ཅེས་སྔོན་མ་ནས་བསམ་ཚུལ་ཤུགས་ཆེན་པོ་ཡོང་བསྡད་ཀྱི་ཡོད་པ་རེད། དེ་སྔོན་ཟམ་གདོང་རིན་པོ་ཆེ་མཆོག་ལའང་སྐབས་གཉིས་ཀྱི་གོ་སྐབས་གནང་ཡོད་པ་རེད། ཨ་རི་ལྟ་བུ་ཡར་ཐོན་ཅན་གྱི་རྒྱལ་ཁབ་ལ་ཆ་བཞག་པ་ཡིན་ན། སྤྱིར་བཏང་ལོ་རྒྱུས་ནང་སྲིད་འཛིན་ལ་ཐེངས་གཅིག་འཐོབ་པ་ཡིན་ན། ཐེངས་གཉིས་པ་དེ་ཡིན་ཤག་ཤག་འདྲ་པོ་བྱེད་ཀྱི་ཡོད་པ་མ་ཟད། འཛམ་གླིང་གི་འགྲོ་སྟངས་ཡིན་ཡང་དེ་རང་ཆགས་ཡོད་པ་རེད། དེ་ནས་སྤྱི་འཐུས་ཚོགས་གཙོ་ལྟ་བུ་ཡིན་ན། སྤྱི་འཐུས་ཚོགས་གཙོ་རྒྱུན་རིང་པོ་གནང་ཡོད་སྟབས། མི་མང་གིས་ཁོང་གི་མི་ཚེའི་ལོ་རྒྱུས་ཆ་ཚང་ངོ་ཤེས་ཏེ་འོས་འཕངས་པར་བརྟེན་འོས་འགྲན་ཁྲོད་ཨང་གཉིས་པའི་རྒྱལ་ཁ་ཐོབ་པ་རེད་བསམ་གྱི་འདུག

ཀླུ་མཁར་བྱམས་ཡིན་ན་རང་རེའི་སྤྱི་ཚོགས་ནང་རང་བཙན་འཐབ་རྩོད་བྱེད་མཁན་གང་འཚམ་ཡོད་པར་བརྟེན་ཏེ། ད་ཐེངས་ལྟ་གྲུབ་གཅིག་པ་འཁྱེར་མཁན་ཚོས་རྣམ་པ་གསལ་སྟོན་གྱིས་མཉམ་རུབ་ཐོག་རྒྱབ་སྐྱོར་བྱས་ཡོད་སྟབས། ཁོང་ལ་འོས་བསྡུའི་རྒྱལ་ཁ་ཡིན་ཡང་གང་ལ་གང་འཚམ་ཐོབ་ཡོད་པ་རེད། ང་ལྟ་བུ་ཡིན་ན་བོད་པའི་སྤྱི་ཚོགས་ནང་རྒྱུན་རིང་ལས་ཀ་བྱས་མྱོང་ཡོད་ཀྱང་། གཞིས་ཆགས་ཁག་ཏུ་མ་གཏོགས་བོད་མིའི་སྒྲིག་འཛུགས་ཀྱི་ལྟེ་གནས་གངས་ཅན་སྐྱིད་གཤོངས་ནང་ལས་ཀ་བྱས་མེད་སྟབས། མི་མང་གིས་ང་སུ་ཡིན་མིན་ངོ་ཡག་པོ་ཤེས་ཀྱི་ཡོད་པ་མ་རེད། མི་མང་གིས་དེ་སྔོན་ང་ཧོབ་དེ་ཁ་ལ་མཐོང་ཡོད་སྟབས། ངས་གཏམ་བཤད་ཅིག་བྱས་པ་དང་ལམ་སེང་ཁོ་ཚོའི་བློ་འགུག་ཐུབ་རྒྱུ་ཁག་པོ་ཡིན་ཡང་། ད་ལྟ་མང་པོ་ཞིག་གིས་ངས་ད་བར་ལས་ཀ་གང་བྱས་ཡོད་མེད་ཧ་གོ་ཡོད་རེད་བསམ་གྱི་འདུག བཀྲ་ཤིས་སྟོབས་རྒྱལ་ལགས་ཆ་མཚོན་པ་ན། མི་མང་གིས་ངོ་ཡག་པོ་ཤེས་ཀྱི་མེད་པ་མ་ཟད། ཁོང་སྲིད་སྐྱོང་ལ་ལངས་སྐབས་ཁོང་གིས་མཉམ་ཞུགས་བྱ་རྒྱུ་ཙམ་ཡིན་སྐོར་བརྗོད་དེ་འོས་བསྡུའི་ལས་འགུལ་གང་ཡང་སྤེལ་མེད་སྟབས་ཕམ་ཁ་འདི་བྱུང་བ་རེད་བསམ་གྱི་འདུག

དྲི་བ། ཁྱེད་རང་དབུ་མའི་ལམ་གྱི་ལངས་ཕྱོགས་འཁྱེར་མཁན་ཞིག་རེད། ལྷག་པར་དུ་སྲིད་སྐྱོང་འོས་བསྡུའི་འགྲན་རྩོད་ཁྲོད་ཞུགས་མཁན་ཐོག་མ་ཡིན་པ་མ་ཟད། ཁྱོད་རང་གིས་(SEEN)ཞེས་པའི་གླེང་གཞི་ཞིག་གི་ཐོག་ནས་ཁྱབ་བསྒྲགས་མང་ཤོས་གནང་མཁན་ཡང་ཆགས་ཡོད། ཡིན་ནའང་ད་རེབ་སྔོན་འགྲོའི་འོས་བསྡུའི་ཁྲོད་ཁྱེད་རང་གི་འོས་གྲངས་ ༡༨༨༠ རེད། གནས་སྟངས་འདི་ལ་ཁྱོད་རང་གིས་ངོས་འཛིན་ག་རེ་གནང་གི་ཡོད།

ལན། ༢༠༡༡ ལོའི་སྲིད་སྐྱོང་གི་འོས་བསྡུའི་སྐབས་ད་ལྟའི་སྲིད་སྐྱོང་ལས་ཐོག་བློ་བཟང་སེང་གེ་ལགས་སུ་འོས་ཤོག་མང་ཤོས་དང་། དེའི་རྗེས་བཀྲས་མཐོང་བསྟན་འཛིན་རྣམ་རྒྱལ་ལགས་ཨང་གཉིས་པ་ཐོབ་ཡོད་པ་རེད། སྐབས་དེ་དུས་བཀྲ་ཤིས་དབང་འདུས་ལགས་ལ་ཆ་བཞག་ན། བོད་པའི་སྤྱི་ཚོགས་ནང་ལོ་ ༤༠ ལྷག་ཕྱག་ལས་གནང་མྱོང་ཡོད་པ་མ་ཟད། སྐབས་དེ་དུས་འོས་བསྡུའི་ཁྱབ་བསྒྲགས་ཀྱང་མང་པོ་གནང་ཡོད་ཀྱང་། ཁོང་ལ་འོས་གྲངས་ ༢༠༠༠ ལྷག་ཙམ་མ་གཏོགས་རག་ཡོད་པ་མ་རེད། དེ་བཞིན། རྒྱ་རི་སྒྲོལ་མ་དང་སྤྱི་འཐུས་ཚོགས་གཙོ་སྤེན་པ་ཚེ་རིང་ལགས་བཅས་ཀྱིས་ཀྱང་སྐབས་དེ་དུས་ཀྱི་སྲིད་སྐྱོང་གི་འོས་བསྡུའི་བགྲོ་གླེང་ནང་ཞུགས་པ་མ་ཟད་ལས་འགུལ་མང་པོ་སྤེལ་ཡོད་ཀྱང་། ཁོང་གཉིས་ལ་འོས་ཤོག་ ༢༠༠༠ མ་ཟིན་ཙམ་རེ་ལས་རག་མེད་སྟབས། ད་ཐེངས་ང་ལ་འོས་ཤོག་ཆིག་སྟོང་ལས་ལྷག་ལས་རག་མེད་ཀྱང་། ཕམ་ཁ་དེ་ལ་ཧང་སང་ཧོན་འཐོར་དགོས་དོན་གང་ཡང་ཡོད་མ་རེད་བསམ་གྱི་འདུག ངས་གཙོ་བོ་དེ་ཆབ་སྲིད་ནང་བགྲོ་གླེང་གནང་དགོས་པ་དེ་གལ་ཆེན་པོ་ཞེ་དྲགས་རེད་བསམ་གྱི་འདུག ད་ཐེངས་ང་ཡར་ལངས་ནས་འཁྲུག་ཆ་དོད་པོ་འདྲ་པོ་ཞིག་བཟོས་པ་རེད་མ་གཏོགས། འོས་བསྡུ་འདི་ཧ་ཅང་འཇམ་ཐིང་ཐིང་ངང་འགྲོ་གྲབས་བྱས་སོང་བ་མ་ཟད། མཐའ་མར་ཟ་ངེ་ཟིང་ངེ་ཆགས་ཏེ་སྲིད་སྐྱོང་གི་འོས་མིའི་བར་ལ་བགྲོ་གླེང་གཅིག་རྐྱང་བྱུང་ཐུབ་མ་སོང་། ཨ་རི་ལྟ་བུ་ཡིན་ན་ལོ་གཉིས་གསུམ་གོང་ནས་འོས་མི་ཕན་ཚུན་བགྲོ་གླེང་བྱེད་དགོས་པ་ལས་བགྲོ་གླེང་མ་བྱས་པར་འཇམ་ཐིང་ཐིང་བྱས་ནས་འགྲོ་རྒྱུའི་ལམ་ཀ་ཡོད་པ་མ་རེད། སྤྱིར་བཏང་ང་ཚོའི་ཆབ་སྲིད་འདི་ཁྱད་མཚར་པོ་ཞིག་རེད། སྐབས་སྔོན་མའི་སྲིད་སྐྱོང་གི་འོས་བསྡུའི་སྐབས་ད་ལྟའི་སྲིད་སྐྱོང་ལས་ཐོག་གིས་སྲིད་སྐྱོང་གི་བགྲོ་གླེང་ ༡༣ ཙམ་ནང་མཉམ་ཞུགས་བྱས་ཡོད་པ་རེད། ཡིན་ཡང་ད་ཐེངས་ང་ཚོའི་བར་ལ་བགྲོ་གླེང་གཅིག་ཀྱང་བྱུང་ཐུབ་མེད་པ་དེ་དམངས་གཙོའི་འཕེལ་རིམ་ནང་ནས་ཡག་པོ་ཞིག་མ་རེད་བསམ་གྱི་འདུག ངས་མ་འོངས་པར་འོས་མི་ཕན་ཚུན་བར་བགྲོ་གླེང་བྱེད་དགོས་པ་གལ་ཆེན་པོ་ཞེ་དྲགས་རེད་བསམ་གྱི་ཡོད།

དྲི་བ། ད་རེབ་ཀྱི་སྔོན་འགྲོའི་འོས་བསྡུའི་གནས་སྟངས་ལ་བལྟས་ཡོང་ན། བཀའ་ཤག་སྐབས་བཅོ་ལྔ་པའི་སྲིད་སྐྱོང་དེ་སླར་ཡང་སྲིད་སྐྱོང་ལས་ཐོག་བློ་བཟང་སེང་གེ་འཁེལ་རྒྱུ་ཡིན་པ་འདྲ་བོ་འདུག ད་ལྟའི་སྲིད་སྐྱོང་བློ་བཟང་སེང་གེ་མཆོག་གི་ལས་ཡུན་རིང་འཐུས་ཤོར་ཆེ་ཤོས་གསུམ་གང་ལ་ངོས་འཛིན་གནང་གི་ཡོད་པ་དང་། གལ་སྲིད་ཁོ་རང་ཕྱིར་སྲིད་སྐྱོང་ལ་ཕེབས་པ་ཡིན་ན། ཁོ་རང་གིས་ཁ་ཡོད་ལག་ཡོད་ཀྱིས་བསྒྲུབ་དགོས་པའི་ལས་འགན་གཙོ་བོ་གསུམ་གང་དག་ལ་ངོས་འཛིན་གནང་གི་ཡོད་དམ།

ལན། ངས་སྔོན་མ་ནས་ཞུས་པ་ལྟར་ད་ལྟའི་སྲིད་སྐྱོང་ལས་ཐོག་མཆོག་གི་ལས་ཡུན་རིང་འཐུས་ཤོར་ཆེ་ཤོས་གསུམ་ཤོར་ཡོད་པ་ནི། དང་པོ། ཆབ་སྲིད་ཀྱི་ཐོག་ནས་བོད་རྒྱ་ཞི་མོལ་བྱེད་དགོས་པ་དེ་གལ་ཆེན་པོ་ཆགས་ཡོད་ཀྱང་ད་བར་ཅི་གང་གནང་ཐུབ་མེད་སྟབས། དེ་གནང་དགོས་པ་རེད་བསམ་གྱི་འདུག གཉིས་པ། བོད་མི་བསམ་ཤེས་མཁན་མང་པོ་ཞིག་གིས་ང་ཚོའི་ཤེས་ཡོན་སྲིད་བྱུས་འདི་བསམ་པ་ནང་བཞིན་ལག་བསྟར་བྱེད་ཀྱི་མེད་པའི་བསམ་ཚུལ་བྱུང་ཡོད་པ་མ་ཟད། དེའི་ཐོག་གྲོས་ཚོགས་ཀྱིས་ཚོགས་ཆུང་ཡང་བཙུགས་ཡོད་སྟབས། ད་ལྟ་ཤེས་ཡོན་སྲིད་བྱུས་ཚུལ་བཞིན་ལག་བསྟར་མ་ཐུབ་པ་དེ་ཐུབ་ཐབས་བྱ་དགོས་པ་རེད། གསུམ་པ། སྔོན་མ་ཟམ་གདོང་རིན་པོ་ཆེའི་སྐབས་སྐྱེ་ལྡན་སོ་ནམ་འདེབས་ལས་སོགས་གཞིས་ཆགས་སྲ་བརྟན་ཆེད་ཐབས་ཤེས་མང་པོ་གནང་ཡོད་ཀྱང་། སྲིད་སྐྱོང་བློ་བཟང་སེང་གེས་སྣེ་ཁྲིད་པའི་ད་ལྟའི་བཀའ་ཤག་གིས་གཞིས་ཆགས་བརྟན་ལྷིང་ཆེད་དམིགས་བསལ་ཕྱག་ལས་གནང་བ་དེ་འདྲ་གང་ཡང་སྟོན་རྒྱུ་མེད་སྟབས། ངས་གཞིས་ཆགས་སྲ་བརྟན་ཡོང་དགོས་པ་དེ་གལ་ཆེན་པོ་རེད་བསམ་གྱི་ཡོད། ལྷག་པར་དུ་༧གོང་ས་མཆོག་ལོ་རེ་ལས་ནས་ལོ་རེར་བགྲེས་པོ་ཆགས་ཀྱི་ཡོད་པ་མ་ཟད། ད་ལྟ་བོད་མི་མང་པོ་ཞིག་ཕྱི་རྒྱལ་ལ་འགྲོ་བཞིན་པའི་ཛ་དྲག་གནས་སྟངས་ཆགས་ཡོད་སྟབས། ངས་བཀའ་ཤག་གིས་གཞིས་ཆགས་སྲ་བརྟན་ཆེད་གཟེངས་སུ་ཐོན་པའི་ཕྱག་ལས་གནང་ཡོད་པ་གང་ཡང་མཐོང་མ་བྱུང་། མ་འོངས་པར་ད་ལྟའི་སྲིད་སྐྱོང་ལས་ཐོག་སྲིད་སྐྱོང་ལ་ཕེབས་པ་ཡིན་ན། བོད་དོན་བདེན་མཐའ་གསལ་ཐབས་ལ་(SEEN) མཐོང་དགོས་པའི་དོན་གནད་བཞི་སྟེ། བོད་མིའི་གཞིས་ཆགས་སྲ་བརྟན་དང་ཤེས་ཡོན་གོང་འཕེལ། དཔལ་འབྱོར་རྒྱུན་གནས། བོད་རྒྱ་གྲོས་མོལ་ཡོང་ཐབས་བཅས་ཀྱི་ཐོག་ཤུགས་བརྒྱབ་པ་ཡིན་ན། ང་ཚོའི་སྤྱི་ཚོགས་འདི་ཚགས་ཚུད་དུ་འགྲོ་རྒྱུའི་རེ་བ་ཡོད་པ་རེད་བསམ་གྱི་འདུག

དྲི་བ། སྐུ་ཉིད་བཙན་བྱོལ་བོད་མིའི་ཆབ་སྲིད་ཀྱི་སྡིངས་ཆ་མཐོ་ཤོས་དེར་རེ་བ་རྒྱག་མཁན་གྱི་མི་སྣ་ཞིག་ཆགས་ཡོད་པ་རེད། གནས་སྟངས་འདིའི་ཐད་ནས་མ་འོངས་པར་ཁྱོད་ཀྱིས་བོད་པའི་སྤྱི་ཚོགས་ནང་ཕྱག་ལས་དང་བསམ་སྤྱོད་གང་འདྲ་ཞིག་འཁྱེར་རྒྱུའི་འཆར་གཞི་དང་དམ་བཅའ་ཡོད་དམ།

ལན། ང་ཚོས་སྤྱི་ཚོགས་འདི་དོར་རྒྱུ་གང་ཡང་མེད་པ་མ་ཟད། སྤྱི་ཚོགས་དང་མཉམ་དུ་བསྡད་དེ། དཔུང་པ་ས་འོག་ཏུ་བསྒྲིལ་ནས་ད་ལྟ་བར་དུ་འདིར་བསླེབས་ཡོད་པ་རེད། ང་ལོ་བཅོ་ལྔའི་སྔོན་ནས་ཕྱི་རྒྱལ་ལ་འགྲོ་ཚར་ཡོད་པ་མ་ཟད། རྒྱལ་ཁབ་ཁག་ ༡༥ ནས་ ༡༦ ཙམ་ཞིག་ནང་ཕྱིན་པ་ཡིན་ཡང་ད་ལྟ་རྒྱ་གར་ནང་བསྡད་དེ་༧གོང་ས་མཆོག་གི་དབུ་འོག་དཔུང་འདེགས་སོ་སོས་ག་ཚོད་ཐུབ་ཚོད་ལས་ཀ་ཅིག་བྱེད་ཀྱི་ཡིན་བསམ་གྱི་ཡོད་ལ། ཚང་མས་མུ་མཐུད་བྱེད་དགོས་པ་རེད་བསམ་གྱི་ཡོད། དེ་བཞིན་ང་རང་ལ་མཚོན་ནའང་མུ་མཐུད་དུ་རྒྱ་གར་ནང་བསྡད་དེ་ཤུགས་རྒྱག་དགོས་བསམ་ཡོད། ང་རང་སྐྱིད་སྐྱོང་ལ་ཁྱབ་བསྒྲགས་སྐབས་ངས་ (SEEN མཐོང་།) ཟེར་བ་དེ་ང་སྲིད་སྐྱོང་ཆགས་པ་ཡིན་ན། སྲིད་སྐྱོང་གི་འགན་ཁུར་བའི་ཐོག་ནས་དེའི་ཐོག་ལས་ཀ་བྱ་རྒྱུ་ཡོད་པ་དང་། ཡང་མི་སྒེར་དང་ཚོགས་པ་སྒྲིག་འཛུགས་ནང་ལས་ཀ་བྱེད་མཁན་ཞིག་ཆགས་པ་ཡིན་ན། ཆབ་སྲིད་ལས་དོན་གྱི་བོད་རྒྱ་གྲོས་མོལ་ཕུད་དེ་བྱིངས་ལྟ་གྲུབ་དེའི་འོག་ལས་ཀ་ག་ཚོད་ཅིག་བྱེད་ཐུབ་ཀྱང་བྱ་རྒྱུའི་ཆོད་སེམས་བརྟན་པོ་ཡོད་ལ་བྱ་རྒྱུ་ཡང་ཡིན། དེ་ནས་མ་འོངས་པར་མཚོན་ན། ང་ལ་ད་ལྟའི་ཆར་ ༢༠༢༠ ལོའི་སྲིད་སྐྱོང་གི་འོས་འགྲན་ཁྲོད་ཞུགས་རྒྱུའི་འཆར་གཞི་གང་ཡང་མེད་ཀྱང་། མ་འོངས་པར་སྐབས་དེ་དུས་ཀྱི་གནས་སྟངས་ལ་བལྟ་རྒྱུ་ཆགས་ཡོད་སྟབས། ད་ལྟ་ངས་དེའི་ཐོག་སྐད་ཆ་བཤད་རྒྱུ་ཏོག་ཙམ་སྔ་དྲགས་པ་རེད་བསམ་གྱི་འདུག

གསར་འགོད་པ། དོན་གྲུབ།