བསོད་ནམས་རྡོ་རྗེས་བརྩམས། བསོད་ནམས་རྡོ་རྗེས་བསྒྱུར།
༄༅།། ཕྱི་ལོ་ ༢༠༠༩ ལོ་ནས་བཟུང་། བོད་ནང་བོད་མི་ཚོས་གཅིག་མཇུག་གཉིས་མཐུད་ཀྱིས་ཆེས་དྲག་པོའི་ཐབས་ལམ་ལ་བརྟེན་ནས། རང་གི་གཅེས་པའི་ལུས་སྲོག་འུར་འུར་དུ་འབར་བའི་མེ་ཕུང་དཀྱིལ་ནས་རྒྱ་ནག་གཞུང་གིས་བོད་ཐོག་ལག་བསྟར་བྱེད་པའི་དྲག་པོའི་སྲིད་བྱུས་ལ་ཆེས་མི་རངས་བའི་ངོ་རྒོལ་བྱས་ཡོད། འཛམ་གླིང་མི་མང་གིས་བློ་ལ་བརྟན་པོར་ངེས་དགོས་པ་ཞིག་ནི། རང་ལུས་མེར་སྲེག་གནང་མཁན་གང་ཟག་སུ་རུང་ཞིག་གིས་རྒྱ་ནག་གི་མིའམ་རྒྱ་མི་རིགས་སུ་གཅིག་ལའང་འཚེ་བ་སྤུ་ཙམ་ཡང་བྱས་མེད། ཕྱི་ལོ་ ༢༠༡༢ ལོ་ནི་རང་ལུས་མེར་སྲེག་གནང་མཁན་མི་གྲངས་མང་ཤོས་ཀྱི་ལོ་ཞིག་ཡིན། ལོ་འཁོར་གཅིག་པུ་དེའི་ནང་བོད་ས་ཡོངས་ནས་ཁྱོན་བོད་མི་གྲངས་ ༨༤ ཡིས་རང་གི་གཅེས་པའི་ཚེ་སྲོག་བློས་གཏོང་གནང་ཡོད། རྒྱུ་རྐྱེན་དེ་ལ་བརྟེན་ནས་རང་ལུས་མེར་སྲེག་གི་དོན་རྐྱེན་ཐད། རྒྱ་ནག་སྐམ་ས་གཙོས་པའི་འཛམ་གླིང་གང་སར་གནས་པའི་རྒྱ་མི་རིགས་ཀྱིས་བོད་མིར་དོ་སྣང་དང་སེམས་ཁུར་ཐོབ་ཡོད་པ་མ་ཟད། ཐ་ན་གདུང་སེམས་མཉམ་སྐྱེ་མང་ཤོས་ཐོབ་པའི་ལོ་ཞིག་ཡིན། ལོ་འཁོར་དེའི་ནང་རང་ངོས་ནས་མཐོང་བའི་རྒྱ་ཡིག་རྩོམ་ཡིག་གྲངས་ ༦༠ ལྷག་སྤེལ་ཡོད་ཅིང་། རང་ངོས་ནས་མ་མཐོང་བའི་རྩོམ་ཡིག་གཞན་ད་དུང་ལྷགས་ཡོད་སྲིད། ཆ་སྙོམས་ལ་ཟླ་རེར་རྩོམ་ཡིག་གྲངས་ ༥ རེ་སྤེལ་ཡོད། རྩོམ་ཡིག་དེ་དག་གི་རྩོམ་པ་པོ་ཚང་མ་རྒྱ་མི་རིགས་ཡིན་པ་མ་ཟད། བརྗོད་བྱ་བོད་མིའི་རང་ལུས་མེ་སྲེག་གི་ནང་དོན་ཁོ་ན་ཡིན། དེས་རྒྱུ་དག་ཡོད་པའི་རྒྱ་མི་རིགས་ཚོས་མུ་མཐུད་ཁ་མི་གྲགས་པར་མི་སྡོད་པ་དང་། མུ་མཐུད་སྦས་སྐུང་བྱས་ནས་མི་སྡོད་པར། རྒྱ་རིགས་ཆེན་པོའི་རིང་ལུགས་ཀྱི་བསམ་བློ་དོར་ནས། བདེན་དོན་ལ་ངར་སྒྲ་སྒྲོག་པ་དང་། དོན་རྐྱེན་ལ་རྩོད་སྒྲུབ་བྱས་ཏེ། སྙོམས་ཆུང་མི་རིགས་ལ་ལག་གདང་སྦྲེལ་ནས་རོགས་སྐྱོར་བྱེད་པ་མཚོན།
བློ་ཡིད་ཕམ་དགོས་པ་ལ་ཞིག་ལ། རྒྱ་ནག་གཞུང་གི་དཔོན་རིགས་ཚོ་ད་དུང་རྨོངས་གཉིད་ལས་མ་བསད་པར། དེ་ལས་ལྡོག་སྟེ་ནོར་འཁྲུལ་ཤོར་བའི་སྲིད་བྱུས་མུ་མཐུད་ལག་བསྟར་དང་། ལྷག་པར་དུ་ཉེ་ཆར་(༢༠༡༥།༤།༡༥)རྒྱ་ནག་གཞུང་གིས་བོད་ཐོག་སྤེལ་བའི་རྒྱབ་ཤ་དཀར་པོ་ཟེར་བ་དེབ་གྲངས་ཐེངས་བཅུ་གསུམ་པ་སྟེ་ “བོད་ལྗོངས་འཕེལ་རྒྱས་བགྲོད་ལམ་གྱི་ལོ་རྒྱུས་ཀྱི་གདམ་ག་” ཟེར་བའི་གཞུང་འབྲེལ་ཡིག་ཆ་དེ་ཚོའི་ནང་། དུས་ད་ལྟ་བར་བདེན་མིན་རྫུན་སྒྲིག་ཁོ་ན་བྱས་ཏེ་བོད་མིའི་རང་ལུས་མེར་སྲེག་གི་རྐྱེན་རྩའི་མདུང་རྩེ་ཕྱི་རོལ་དུ་ཡོད་པའི་བཙན་བྱོལ་བོད་མིའི་སྒྲིག་འཛུགས་ལ་མགོ་ཞྭ་ནག་པོ་གཡོག་པ་དང་། ཤིན་ཏུ་ནས་དགོད་བྲོ་བ་ཞིག་ལ། རྐྱེན་རྩའི་མདུང་རྩེ་ཐད་ཀར་ནོ་བྷེལ་ཞི་བདེའི་གཟེངས་རྟགས་ཀྱི་དེད་དཔོན་ཆེན་པོ། བྱམས་དང་སྙིང་རྗེ་བརྒྱུད་སྤེལ་མཛད་མཁན་ཆོས་ཕྱོགས་ཀྱི་སློབ་དཔོན། གྷན་དྷིའི་འཚེ་མེད་ཞི་བ་རྒྱུད་འཛིན་གནང་མཁན། འཛམ་གླིང་མི་མང་གིས་ཆེས་དད་གུས་ཞུ་སའི་༸གོང་ས་ཏཱ་ལའི་བླ་མ་མཆོག་ལ་སྨྱོན་འཛུགས་དང་། ཁོང་ཉིད་གདོན་འདྲེའི་གཟུགས་སུ་སྒྲོ་སྐུར་བྱས་ཡོད། རྒྱ་ནག་གཞུང་གིས་མཐའ་གཅིག་ཏུ་རྫུན་གཏམ་ཁོ་ནས་རྒྱལ་སྤྱི་དང་རང་གི་སྤྱི་མང་མགོ་སྐོར་བཏང་སྟེ། ཏཱ་ལའི་རུ་ཚོགས་ཀྱིས་འཆར་གཞི་ལྡན་པའི་ཇུས་འགོད་བྱས་པ་དང་། རང་ལུས་མེར་སྲེག་གཏོང་མཁན་ཚོར་དངུལ་འབོར་མཁོ་སྤྲོད་བྱེད་པ་སོགས་ཁུངས་མེད་རྟོགས་བཟོ་བྱས་པ་ཚང་མ་དོན་དངོས་དང་རྒྱབ་འགལ་ཆགས་ཡོད།
དེར་བརྟེན། རང་ངོས་ནས་བོད་ནང་གི་ཤེས་ཡོན་ཅན་དང་། ས་གནས་བོད་མི་རང་གིས་བརྗོད་པའི་རྩོམ་ཡིག་གཞི་ལ་བཅོལ་ཏེ། བོད་མིའི་རང་ལུས་མེར་སྲེག་ངོ་རྒོལ་གྱི་རྐྱེན་རྩ་ལ་དཔྱད་ཞིབ་བྱ་རྒྱུ་ཡིན།
སྔོན་ལ་བོད་ནང་རང་ལུས་མེར་སྲེག་གནང་མཁན་གྱི་ས་ཁུལ་སྐོར་རོབ་ཙམ་ངོ་སྤྲོད་ཞུ་རྒྱུར། ཕྱི་ལོ་ ༢༠༠༩ ཟླ་ ༢ ཚེས་༢༧ ཉིན། ད་ལྟའི་རྒྱ་ནག་གཞུང་གི་ས་ཁུལ་དབྱེ་སྟངས་ལྟར་སི་ཁྲོན་ཞིང་ཆེན་རྔ་པ་བོད་རིགས་རང་སྐྱོང་ཁུལ་ཀིརྟི་དགོན་པའི་གྲྭ་བཀྲ་བྷེ་ཞུ་བས་ཐོག་མར་རང་ལུས་མེར་སྲེག་གནང་བ་ནས་བཟུང་། དུས་ད་ལྟ་(༢༠༡༥།༤།༡༧)བར། བོད་མི་གྲངས་ ༡༣༧ གྱིས་རྒྱ་ནག་གཞུང་གི་དབང་བསྒྱུར་འོག་ཚུད་པའི་བོད་མི་ཚོས་རང་ལུས་མེར་སྲེག་གནང་ཡོད། བོད་ཀྱི་བུད་མེད་རྩོམ་པ་པོ་འོད་ཟེར་ལགས་ཀྱི་གྲངས་འབོར་ལ་གཞི་བཅོལ་ཏེ་རྒྱ་ནག་གཞུང་གི་འཛིན་སྐྱོང་ས་ཁུལ་དབྱེ་སྟངས་ལྟར་ཕྱོགས་སྒྲིག་ཞུས་ཡོད།
༡༽ སི་ཁྲོན་ཞིང་ཆེན་ཁོངས་ཀྱི་བོད་མིའི་ས་ཁུལ་ནས་མི་གྲངས་ ༧༠ སྟེ། རྔ་པ་རྫོང་ནས་ ༤༠ ཛམ་ཐང་ནས་ ༦ འབར་ཁམས་ནས་ ༣ མཛོད་དགེ་ནས་ ༩ རྐ་ཁོག་ནས་ ༡ དཀར་མཛེས་རྫོང་ནས་ ༡ རྟའུ་ནས་ ༥ དར་རྩེ་མདོ་ནས་ ༢ གསེར་རྟ་ནས་ ༡ འབའ་ནས་ ༡ བྲག་མགོ་ནས་ ༡
༢༽ ཀན་སུ་ཞིང་ཆེན་ཁོངས་བོད་མིའི་ས་ཁུལ་ནས་མི་གྲངས་ ༣༠ སྟེ། རྨ་ཆུ་ནས་ ༡ བསང་ཆུ་ནས་ ༡༦ གཙོས་ནས་ ༧ ཀླུ་ཆུ་ནས་ ༦
༣༽ མཚོ་སྔོན་ཞིང་ཆེན་ཁོངས་ནས་མི་གྲངས་ ༢༩ སྟེ། དགའ་བདེ་ནས་ ༢ པདྨ་ནས་ ༢ སྒ་ཁྲི་འདུ་ནས་ ༢ སྐྱེ་རྒུ་མདོ་ནས་ ༡ ཆུ་དམར་ལེབ་ནས་ ༡ མཚོ་བྱང་ཐེམ་ཆེན་ནས་ ༡ རེབ་གོང་ནས་ ༡༡ གཅན་ཚ་ནས་ ༡ རྩེ་ཁོག་ནས་ ༦ ཡ་རྩེ་ནས་ ༡ དཔའ་ལུང་ནས་ ༡
༤༽ བོད་རང་སྐྱོང་ལྗོངས་ཁོངས་ནས་མི་གྲངས་ ༨ དེ། ཆབ་མདོ་རྫོང་ནས་ ༢ གཞིས་ཀ་རྩེ་གཉའ་ནང་ནས་ ༡ ལྷ་ས་འདམ་གཞུང་ནས་ ༡ ནག་ཆུ་འབྲི་རུ་ནས་ ༤ བཅས།
རྒྱ་ནག་གཞུང་གི་འཛིན་སྐྱོང་ས་ཁུལ་དབྱེ་སྟངས་བོད་རང་སྐྱོང་ས་ཁུལ་ཞེས་པ་གཞིར་བཞག་ལྟར། རྔ་པ་བོད་རིགས་རང་སྐྱོང་ཁུལ་ནི་རང་ལུས་མེར་སྲེག་གི་མི་འབོར་མང་ཤོས་དེ་ཆགས་ཡོད། ཁྱོན་མི་གྲངས་ ༥༩ ཡིས་རང་ལུས་བློས་གཏོང་གནང་ཡོད། (རྔ་པ་རྫོང་ནས་མི་གྲངས་ ༤༠ མཛོད་དགེ་ནས་ ༩ རྐ་ཁོག་ནས་ ༡ འཛམ་ཐང་ ༦ འབར་ཁམས་ནས་ ༣ ) རྒྱུ་རྐྱེན་གང་འདྲ་ཞིག་ལ་བརྟེན་ནས་རྔ་པ་ཁུལ་གྱི་མི་མང་གིས་རང་ལུས་མེར་སྲེག་བཏང་བ་ཡིན་ནམ། དེ་ནི་རང་ངོས་ནས་དེ་རིང་རྩོམ་ཡིག་འབྲི་བའི་བརྗོད་དོན་གཙོ་བོ་དེ་ཡིན།
རྔ་པ་བོད་རིགས་རང་སྐྱོང་ས་ཁུལ་ནི་རྒྱ་ནག་སི་ཁྲོན་ཞིང་ཆེན་ཁོངས་སུ་བཅུག་ཡོད་པ་དང་། བོད་མིའི་སྲོལ་རྒྱུན་ལྟར་ན་མདོ་སྨད་ཨ་མདོའི་ཁོངས་སུ་ཡིན། ས་གནས་དེའི་ནང་ཆགས་པའི་ཀིརྟི་དགོན་པ་ནི་ལོ་རྒྱུས་ཡུན་རིང་ལྡན་ཞིང་། གྲྭ་བཙུན་ཁོངས་ནས་རང་ལུས་མེར་སྲེག་གནང་མཁན་མང་ཤོས་དེ་ཀིརྟི་དགོན་པ་དེ་ཡིན། ཀིརྟི་དགོན་པ་ནི་ཕྱི་ལོ་ ༡༩༥༨ ལོའི་སྔ་རྗེས་ཙམ་ལ་རྒྱ་ནག་གུང་བྲན་ཏང་གིས་གཏོར་བཤིག་བཏང་སྟེ་དགོན་པ་ཤུལ་མེད་རྩ་ཐོར་དུ་སོང་། ༡༩༨༠ ལོ་ལ་གཞི་ནས་ཉམས་གསོ་བྱུང་། ༢༠༠༨ ལོ་ནས་བཟུང་རྒྱ་ནག་གཞུང་གིས་ཀིརྟི་དགོན་པར་དྲག་པོའི་དམ་བསྒྲགས་བྱས་པ་དང་། དགོན་པའི་ནང་རྒྱལ་གཅེས་རིང་ལུགས་ཀྱི་སློབ་གསོའི་ལས་འགུལ་སྤེལ་ནས། དགེ་འདུན་ཚོར་རང་གི་རྩ་བའི་བླ་མར་སྐྱོན་བརྗོད་བྱ་དགོས་པ་སོགས་བོད་མིའི་རྩ་བའི་ཡུལ་སྲོལ་གོམས་གཤིས་ལ་རྩིས་མེད་རྡོག་རོལ་དང་། དུས་མཚུངས་དབང་ཡོད་ཀྱིས་དྲག་པོའི་སྲིད་བྱུས་ལག་བསྟར་བྱས་པས། ས་གནས་བོད་མི་རྣམས་བཟོད་བསྲན་བྱ་ཐབས་བྲལ་བའི་གནས་སུ་གྱར་སྟབས། རྒྱ་ནག་གཞུང་གི་སྲིད་བྱུས་ལ་ཡིད་རངས་མེད་པའི་རྣམ་འགྱུར་སྟོན་ཆེད། ས་གནས་བོད་མིས་ཞི་བའི་ངོ་རྒོལ་གྱི་ལས་འགུལ་སྤེལ། ཞི་བའི་ངོ་རྒོལ་དེར་རྒྱ་ནག་གཞུང་གིས་དྲག་གནོན་དང་། རྔ་པ་ཡོངས་ལ་དྲག་པོའི་བཀག་རྒྱ་བདམས་ཏེ། དགོན་པ་ཕྱི་རོལ་དང་འབྲེལ་བ་རྦད་དེ་བཅད་ནས། དགོན་པའི་ནང་ཟ་འབྲུ་ཆད་པ་དང་། ཆུ་དང་གློག་བཀག་པ་སོགས་བྱས་པའི་རྐྱེན་གྱིས་ “རྔ་པའི་ ༣།༡༦ དོན་རྐྱེན་” དང་། རང་ལུས་མེར་སྲེག་གི་དོན་རྐྱེན་སོགས་གཅིག་མཇུག་གཉིས་མཐུད་ཀྱིས་ལོ་རྒྱུས་ཐོག་བྱུང་མྱོང་མེད་པའི་རྔ་པའི་དུས་ཟིང་དེ་དག་བྱུང་།
གཤམ་དུ་བོད་རྔ་པ་ཁུལ་ལ་རང་ལུས་མེར་སྲེག་དོན་རྐྱེན་གྱི་རྐྱེན་རྩ་གང་ནས་བྱུང་བ་དེ་གསལ་བཤད་བྱ་རྒྱུ་ཡིན་པས། རང་ངོས་བོད་ས་གནས་ས་ཐོག་ཏུ་བསྐྱོད་དེ་ཞིབ་འཇུག་བྱ་ཐབས་བྲལ་ཡང་། ས་གནས་བོད་མིས་སྤེལ་བའི་རྩོམ་ཡིག་ལ་གཞི་བཅོལ་ཏེ་རྔ་པའི་རང་ལུས་མེར་སྲེག་དོན་རྐྱེན་གྱི་འབྱུང་རྩ་ཐེར་འདོན་བྱ་རྒྱུ་ཡིན། ས་གནས་རྔ་པ་ཁུལ་གྱི་རྩོམ་པ་པོ་གསང་མིང་ལ་ཨ་ཁན་ཞེས་འབོད་པས་རྒྱ་ཡིག་ཐོག་སྤེལ་བའི་རྩོམ་ཡིག་གཅིག་དང་། གསང་མིང་ལ་ཨན་གཟབ་འབོད་པས་ཀིརྟི་དགོན་པའི་དགེ་འདུན་བཞི་ལ་བཅར་འདྲི་བྱས་པའི་རྩོམ་ཡིག་ཁག་གཉིས་ཀྱི་ནང་དོན་གཞིར་བཞག་སྟེ་བོད་མིས་རང་ལུས་མེར་སྲེག་གཏོང་དགོས་བྱུང་བའི་རྒྱུ་རྐྱེན་ངོ་སྤྲོད་ཞུ་རྒྱུ། (རྒྱ་ཡིག་ཐོག་བྲིས་པའི་གསང་མིང་ཚང་མ་སྒྲ་སྒྱུར་ཡིན།)
གཅིག
གསང་མིང་ལ་ཨ་ཁན་ཞེས་འབོད་པའི་རྩོམ་པ་པོ་ཞིག་གིས་མགོ་བརྗོད་དུ་ “བོད་ཀྱི་དོན་རྐྱེན། ཨ་མདོ་ཨ་རྔ་པ་རྫོང་གི་ ༣།༡༦ དོན་རྐྱེན་གྱི་འབྱུང་རྐྱེན་” ཞེས་པའི་རྩོམ་ཡིག་ཅིག་སྤེལ་ཡོད། ཕྱི་ལོ་ ༢༠༠༨ ལོར་ལྷ་སའི་ “༣།༡༤ དོན་རྐྱེན་” ཟེར་བའི་ཞི་རྒོལ་འདི་བོད་ས་ཁྱོན་ཡོངས་ལ་ཁྱབ་པ་དང་། རྒྱ་ནག་གཞུང་ཕྱོགས་ནས་དེ་ནི་ཏཱ་ལའི་རུ་ཚོགས་ཀྱིས་ཞིབ་ཚགས་ཀྱི་སྒོ་ནས་ལྐོག་གཡོའི་ངན་བྱུས་བཤམས་པ་ཞིག་ཡིན་པར་སྐྱོན་བརྗོད་བྱེད་ཀྱི་ཡོད་ཀྱང་། འདིར་ས་གནས་བོད་མི་ཞིག་གིས་རྔ་པའི་ངོ་རྒོལ་དོན་རྐྱེན་གྱི་འབྱུང་རྐྱེན་སྐོར་ལ་བྲིས་པའི་རྩོམ་ཡིག་དེའི་ནང་དོན་ཐོག་ནས་དཔྱད་ཞིབ་ཞུ་རྒྱུ་ཡིན།
རྩོམ་པ་པོས་རྩོམ་ཡིག་ནང་ངོ་སྤྲོད་གནང་དོན། “རྔ་པ་རྫོང་དུ་འཚོ་བ་སྐྱེལ་བཞིན་པའི་བོད་མི་དང་རྒྱ་རིགས་གཉིས་རྒྱུན་དུ་ཕན་ཚུན་མཐུན་པོའི་ངང་མཉམ་གནས་ཡོད་པ་ལས། དབུས་གཙང་ཁུལ་གྱི་བོད་རྒྱ་མི་རིགས་གཉིས་དབར་ཡོད་པའི་འགལ་ཟླ་ལྟ་བུ་མེད། ་་་་་་རྫོང་འདིའི་དུས་ཡུན་རིང་པོའི་འགལ་ཟླ་གཙོ་བོ་ནི་མི་རིགས་བར་གྱི་འགལ་ཟླ་མིན་ཞིང་། མི་རིགས་སོ་སོའི་སྤྱི་དམངས་དང་། གཞུང་གི་དཔོན་རིགས་དང་ཉེན་རྟོག་མི་སྣའི་བར་གྱི་འགལ་ཟླ་ཡིན། དེ་ནི་རྒྱ་ནག་གི་རྫོང་ཁག་ཆུང་ཆུང་གཞན་ཁག་ནང་རྒྱུན་དུ་ལྷགས་པའི་གནད་དོན་དང་གཅིག་མཚུངས་རེད།” ཅེས་དང་། རྩོམ་པ་པོས་མུ་མཐུད་ངོ་སྤྲོད་གནང་དོན། “ཕྱི་ཟླ་ ༣ ཚེས་ ༡༡ ཉིན་མོར། རྫོང་ཨུ་ཡོན་ལྷན་ཁང་དང་རྫོང་སྲིད་གཞུང་གི་དཔོན་རིགས་ཚོས་ས་གནས་དགོན་པ་ཁག་ལ་བརྡ་ཁྱབ་ཅིག་སྤེལ་བ་སྟེ། དགོན་པ་ཚང་མའི་ལྷ་ཁང་གི་ཡང་སྟེང་དུ་རྒྱ་ནག་གི་རྒྱལ་དར་བསྒྲེངས་འཛུགས་དགོས་པ་དང་། དུས་མཉམ་དགོན་པ་ཚང་མར་རྒྱལ་དར་བཀྲམས། རྫོང་འདིའི་དགོན་པ་གཅིག་གི་དགོན་པ་བདག་གཉེར་ཨུ་ཡོན་ལྷན་ཁང་གི་འགན་ཁུར་བ་ཞིག་གིས་ཐད་ཀར་ཁས་ལེན་མ་བྱས་པ་དང་བསྒྲགས་བཤད་དོན། ཡང་ན། དོ་བདག་ད་ལྟ་རང་རྩ་དགོངས་གཏོང་རོགས་དང་། དེ་མིན་ན་རྫོང་གི་དཔོན་རིགས་ཚོས་རྒྱལ་དར་ད་ལྟ་རང་ཕྱིར་འཁྱེར་རོགས། གང་ལྟར་ཁོང་གིས་རྒྱལ་དར་རྩ་བ་ཉིད་ནས་བསྒྲེངས་འཛུགས་བྱ་རྒྱུ་མིན་པ་བརྗོད། ཟླ་བ་གཅིག་ཙམ་གོང་རྫོང་གི་ལས་དོན་མི་སྣ་དགོན་པའི་ནང་གནས་སྡོད་བྱ་རྒྱུ་བརྗོད་ཡོད་ཀྱང་། དགོན་པ་བདག་གཉེར་འགན་ཁུར་བས་མཐའ་གཅིག་ཏུ་ངོས་ལེན་གནང་མེད་ཅིང་། ཐེངས་འདིར་ལྟ་བ་མཁྲེགས་པོའི་ངང་ནས་ངོས་ལེན་མ་བྱས། ཕྱི་དྲོར་རྒྱལ་དར་རྫོང་སྲིད་གཞུང་ལ་སྐྱེལ་བར་ཕྱིན། ཡིན་ཡང་གཞུང་གི་དཔོན་རིགས་ཀྱིས་གསལ་བསྒྲགས་ནན་པོ་སྤེལ་དོན། ཕྱི་ཟླ་ ༣ ཚེས་ ༡༣ གོང་རྒྱལ་དར་ངེས་པར་དུ་བསྒྲེངས་འཛུགས་དགོས་པ་དང་། དེ་མ་ཐུབ་ན་མཇུག་འབྲས་ངན་པ་ཡོང་རྒྱུར་བཤད། དགོན་པ་བདག་གཉེར་འགན་ཁུར་བས་བཤད་དོན། མཇུག་འབྲས་གང་ཡིན་དོ་བདག་མི་གཅིག་གིས་འགན་ཁུར་བླངས་རྒྱུ་ཞེས་བརྗོད་ཡོད་པ་རེད།” རྩོམ་པ་པོས་མུ་མཐུད་ངོ་སྤྲོད་བྱེད་དོན། “དེ་ནས་ཉིན་གྲངས་གཉིས་ཀྱི་དུས་ཡུན་ནང་། དགོན་པ་ཁག་ཚང་མས་ཕན་ཚུན་བལྟ་རེས་བྱེད་ཅིང་། དགོན་པ་གང་ཞིག་གིས་ཀྱང་རྒྱལ་དར་བསྒྲེངས་འཛུགས་བྱས་མེད། ཚེས་ ༡༣ སླེབས་པའི་ཉིན་མོར་དགོན་པ་གཅིག་ནས་ཀྱང་རྒྱ་ནག་གི་རྒྱལ་དར་བསྒྲེངས་འཛུགས་བྱ་མཁན་མེད་ལ། སྔོན་དུ་སྲིད་གཞུང་གིས་བརྗོད་པ་ལྟར་མཇུག་འབྲས་ངན་པ་གང་ཡང་མཐོང་རྒྱུ་མེད། དེ་ནི་སྲིད་གཞུང་གིས་དགོན་པ་མང་པོ་ཞིག་དང་ཕན་ཚུན་གདོང་གཏུག་གི་འཁྲུག་ཟིང་མི་ཡོང་ཆེད་ཡིན་སྲིད། འོན་ཀྱང་། དུས་ཡུན་དེའི་རིང་རྫོང་ནང་དམག་སྡོད་མི་གྲངས་མང་དུ་ཕྱིན་པ་དང་། རྫོང་གི་སྲང་ལམ་ཐོག་སྲུང་དམག་བཀོད་སྒྲིག་བྱས་ཡོད།”
རྩོམ་པ་པོས་བཤད་དོན་ལ། “ཕྱི་ཟླ་ ༣ ཚེས་ ༡༤ ཉིན་ལྷ་སར་དྲག་པོའི་འཐབ་རྩོད་ལངས་པ་དང་། གནས་ཚུལ་དེ་མ་ཐག་ཏུ་བོད་ཀྱི་ས་ཁུལ་ཡོངས་ལ་ཁྱབ། རྔ་པ་རྫོང་ས་ཁུལ་གཞན་དང་བསྡུར་ན་ཅུང་ཞི་འཇགས་རེད། དེ་ནི་ཧ་ལས་དགོས་དོན་མེད། ལོ་བཅུ་གྲངས་རིང་རྔ་པའི་མི་མང་གིས་ཆབ་སྲིད་ཐོག་དེ་ཙམ་ཐེ་བྱུས་བྱེད་ཀྱི་མེད། ཕྱི་ཟླ་ ༣ ཚེས་ ༡༥ ཉིན་མོར། ཕལ་ཆེར་གོང་རིམ་ནས་ལམ་སྟོན་ནན་པོ་ཕབ་པ་ཡིན་སྲིད། དེར་བརྟེན་རྔ་པ་རྫོང་སྲིད་གཞུང་གིས་སླར་ཡང་དགོན་པའི་ཡང་སྟེང་དུ་རྒྱལ་དར་བསྒྲེངས་འཛུགས་དགོས་པའི་བཀའ་རྒྱ་བཏང་། ཚེས་ ༡༥ ཞོགས་པར་རྫོང་སྲིད་གཞུང་དང་འཐབ་ཕྱོགས་གཅིག་གྱུར་ཁང་གི་དཔོན་རིགས་རྫོང་གྲོང་ཁྱེར་ལྟེ་བའི་ས་ཆ་ནས་འགྱངས་ཐག་སྤྱི་ལེ་བཅུ་ཙམ་ཕྱོགས་སུ་ཡོད་པའི་སྒོ་མང་དགོན་པར་འབྱོར་ནས། དགོན་པ་བདག་གཉེར་ཨུ་ཡོན་ལྷན་ཁང་གི་འགན་འཛིན་ལ་བཙན་བཀའ་བཏང་སྟེ་རྒྱལ་དར་བསྒྲེངས་འཛུགས་བྱེད་བཅུག དགོན་པའི་དགེ་འདུན་ཚོས་རྒྱལ་དར་འཛུགས་རྒྱུའི་གནས་ཚུལ་དེ་ཡལ་བ་རེད་བསམ་ཡང་། བསམ་ཡུལ་ལས་འདས་པར་ད་ཐེངས་རྒྱལ་དར་བསྒྲེངས་འཛུགས་ཀྱི་བཙན་བཀའ་བཏང་ནས་དགོན་པའི་ཡང་སྟེང་དུ་བསྒྲེངས་འཛུགས་བྱས་པ་དེ་ནི་ཆོས་ལུགས་ཀྱི་དམའ་མཐའི་ཚད་གཞི་ལ་ཕོག་ཐུག་བཏང་བས། ཁོང་ཁྲོ་རབ་ཏུ་འབར་བའི་དགེ་འདུན་པ་འགའ་ཞིག་གིས་བཙུགས་མ་ཐག་གི་རྒྱལ་དར་དེ་མར་ཕབ་པས། སྐབས་དེར་སྲིད་གཞུང་དང་འཐབ་ཕྱོགས་གཅིག་གྱུར་གྱི་དཔོན་རིགས་དང་དགེ་འདུན་དབར་འགལ་ཟླ་བྱུང་། ཁོང་ཁྲོ་ལངས་བའི་དགེ་འདུན་པ་ཚོས་དཔོན་རིགས་ཚོའི་སྣུམ་འཁོར་གཏོར་བཅག་དང་། དེ་རྗེས་དགེ་འདུན་མང་པོ་ཞིག་གིས་༸གོང་ས་མཆོག་གི་སྐུ་པར་མཐོན་པོར་བསྒྲེངས་ཏེ་རྫོང་གྲོང་ཁྱེར་ནང་བསྐྱོད་ནས་རྔམ་སྟོན་ཁྲོམ་སྐོར་གྱི་ངོ་རྒོལ་བྱས། དུས་མཚུངས་དགོན་པའི་ཕྱི་ལ་ཡོད་པའི་སྒོ་མང་གྲོང་ཁུལ་གྱི་ཡུལ་མི་མང་པོས་ཀྱང་རྔམ་སྟོན་ཁྲོམ་སྐོར་ནང་མཉམ་ཞུགས་བྱས། ཐེངས་འདིའི་ཁྲོམ་སྐོར་ནི་ཞི་བའི་ངོ་རྒོལ་ཡིན་པ་དང་། སེར་སྐྱ་མི་མང་གིས་རྫོང་ནང་སྐོར་བ་ཐེངས་གཅིག་བརྒྱབ་རྗེས་དགོན་པར་ཕྱིར་ལོག་བྱས་པས། དམག་མི་དང་ཉེན་རྟོག་མི་སྣ་དབར་ཕན་ཚུན་འཁྲུག་རྩོད་གང་ཡང་བྱུང་མེད།”
རྩོམ་པ་པོས་རྔ་པའི་ ༣།༡༦ དོན་རྐྱེན་སྐོར་ངོ་སྤྲོད་གནང་དོན། “ཕྱི་ཟླ་ ༣ ཚེས་ ༡༦ ཉིན་མོ་དེར། རྫོང་གྲོང་ཁྱེར་གྱི་དབུས་སུ་ཆགས་པའི་ཀིརྟི་དགོན་པའི་ནང་ཆོས་ཕྱོགས་ཀྱི་ལས་འགུལ་སྤེལ་བའི་སྐབས། ཀིརྟི་དགོན་པའི་ཉེ་འགྲམ་དུ་རྟེན་གཞི་བྱས་པའི་དམག་སྒར་ནང་སྐད་ཤུགས་ཆེས་དྲག་པོ་བསྒྲགས་ཏེ་དམག་སྦྱོང་བྱས་པ་དེས། ཟང་ཟིང་བྲལ་བའི་དབེན་གནས་ཆོས་ཕྱོགས་ཀྱི་བྱེད་སྒོར་ཚབས་ཆེའི་སུན་གཙེར་བཟོས་པའི་ཐོག ཉིན་ཤས་ནང་ཁོང་ཁྲོའི་མེ་ལྕེ་རབ་ཏུ་འབར་བ་སེམས་ནང་མནན་པའི་སེར་སྐྱ་མི་མང་རྣམས་མུ་མཐུད་བཟོད་བསྲན་བྱ་ཐབས་བྲལ་བར་གྱུར། ་་་་་་རྫོང་སྲིད་གཞུང་དང་འཁྲུག་ཟིང་བྱུང་བའི་སྐབས། ཉེན་རྟོག་དམག་གིས་བོད་མི་ཚོར་མེ་མདའ་བརྒྱབ་ཅིང་། དགེ་འདུན་པ་འགའ་ཤས་ཀྱིས་ལག་ཏུ་༸གོང་ས་མཆོག་གི་སྐུ་པར་ཐོགས་ཏེ་རྫོང་སྲིད་གཞུང་གཞུང་ལས་ཁང་ཕྱོགས་སུ་ངོ་རྒོལ་བྱེད་པར་བསྐྱོད་པས། ཉེན་རྟོག་དམག་གིས་༸གོང་ས་མཆོག་གི་སྐུ་པར་འཁྱེར་མཁན་གྱི་དགེ་འདུན་ལ་མེ་མདའ་བརྒྱབ། མེ་མདའི་མདེའུ་ཕོག་པའི་དགེ་འདུན་དེ་ས་ལ་མ་འགྱེལ་བར་མུ་མཐུད་སྐུ་པར་མཐོན་པོར་བསྒྲེངས་ཏེ་མདུན་བསྐྱོད་བྱས་པས། ཉེན་རྟོག་དམག་གིས་མུ་མཐུད་མེ་མདའ་འཕངས་པས་མཐའ་མ་དགེ་འདུན་པ་དེ་ས་ལ་འགྱེལ། ཁོང་ཉིད་སྲོག་གི་དབུགས་མ་ཆད་བར་ལག་ཏུ་བཟུང་བའི་༸གོང་ས་མཆོག་གི་སྐུ་པར་མཐོན་པོར་བསྒྲེངས།” གོང་གསལ་རྩོམ་ཡིག་ནང་དོན་གནད་བསྡུས་ཞུས་པ་དེ་དག་ཐོག་ནས་གསལ་པོ་ར་སྤྲོད་བྱེད་ཐུབ་པ་ཞིག་ནི། རྔ་པའི་མི་མང་རྣམས་བཟོད་ཐབས་བྲལ་བའི་གནས་སྟངས་འོག དུས་དེ་ནས་བཟུང་རྒྱ་ནག་གཞུང་ལ་ཆེས་མི་འདོད་པའི་རྣམ་པ་སྟོན་ཆེད་ངོ་རྒོལ་གྱི་ལས་འགུལ་འགོ་བརྩམས་ཡོད་པ་རེད།
གཉིས།
གཞན་ཡང་། གསང་མིང་ལ་ཨན་གཟབ་ཅེས་འབོད་པའི་བོད་མི་རྩོམ་པ་པོ་ཞིག་གིས་ཕྱི་ལོ་ ༢༠༡༡ ཟླ་ ༡༢ ཚེས་ ༡ ནས་ཚེས་༡༥ བར། རྔ་པ་དགོན་ཀྱི་དགེ་འདུན་བཞི་ལ་བཅར་འདྲི་ཞུས་པའི་ནང་དོན་སྙིང་བསྡུས་རེ་ཟུར་འདོན་ཞུ་རྒྱུར། བཅར་འདྲི་ཞུ་ཡུལ་གྱི་གང་ཟག་རྣམས་རྔ་པ་ས་ཁུལ་དུ་ཡོད་པས། རྩོམ་པ་པོས་གསང་མིང་བཀོལ་སྤྱོད་གནང་འདུག
༡༽ གསང་མིང་ལ་ངག་གཟབ་ཁ་བ་འབོད་པའི་དགེ་འདུན་གྱིས་ལན་འདེབས་གནང་དོན། “ང་ཚོ་དྲག་པོའི་བརྙས་བཅོས་འོག་འཚོ་བ་སྐྱེལ་བཞིན་ཡོད། དྲང་པོ་ཞུས་ན་བཟོད་སྒོམ་བྱ་ཐབས་བྲལ་བའི་གནས་ལ་གྱར། འོན་ཀྱང་དེ་རིང་ཁྱེད་ཉིད་ལ་སེམས་ནང་གི་སྐད་ཆ་བཤད་རྒྱུ་བྱུང་བར་སེམས་ལྷོད་པོ་བྱུང་།”
༢༽ གསང་མིང་ངག་གཟབ་དགའ་བ་ཞུ་བས་བཤད་དོན། “བདེན་པ་རེད། དེང་སང་ང་ཚོ་ཀིརྟི་དགོན་པའི་དཔའ་བོ་མང་པོ་ཞིག་གིས་བོད་ཀྱི་ཆོས་སྲིད་བྱ་གཞག་ཆེད་དུ་རང་གི་གཅེས་པའི་ལུས་སྲོག་བློས་གཏོང་གནང་ཡོད། ང་ཚོས་འཇིག་རྟེན་འདིའི་ཐོག་སེམས་ཀྱི་དཀའ་སྡུག་དང་གོད་ཆགས་མྱོང་བཞིན་ཡོད་པ་དེ་དག་རེ་བར་འཛམ་གླིང་མི་མང་ལ་ཤོད་རོགས་གནང་། ང་ཚོ་ཀིརྟི་དགོན་པའི་མ་དགོན་སྟག་ཚང་ལྷ་མོ་ཀིརྟི་དགོན་པར་དགུན་ཆོས་ཀྱི་ཆོས་གྲྭར་སླེབས་ཡོད་རུང་། ཡིན་ནའི་ང་ཚོ་དགེ་འདུན་པ་མི་རེ་ངོ་རེའི་རྒྱབ་ལ་རྒྱ་མིའི་ལས་བྱེད་དང་དམག་མིས་གསོ་མྱུལ་བྱེད་བཞིན་ཡོད། ང་ཚོའི་ཁ་པར་ཚང་མ་རྒྱ་ནག་གཞུང་གིས་ལྐོག་ཉན་བྱེད་ཀྱི་ཡོད།”
༣༽ དེ་བཞིན་གསང་མིང་ངག་གཟབ་ངག་དབང་འབོད་པས་བཤད་དོན། “ཐོག་མའི་འཆར་གཞི་ནི་ང་ཚོ་ཀིརྟི་དགོན་པའི་དགེ་འདུན་པ་ཆིག་སྟོང་ཙམ་དགུན་ཆོས་ལ་མཉམ་ཞུགས་བྱ་རྩིས་ཡོད་རུང་། ཡིན་ནའི་དགེ་འདུན་པ་མང་པོ་ཞིག་གི་བསམ་བློའི་ནང་རྒྱ་ནག་གཞུང་གིས་ང་ཚོར་བལྟ་ཞིབ་དང་། གནས་བཟོད་མི་བདེ་བ་བཟོ་བ། དྲག་གནོན་ཁོ་ན་བྱེད་པའི་འོག་ལ། དགུན་ཆོས་སུ་བསྐྱོད་པ་ལས་མ་བསྐྱོད་པ་དགའ་བར་སྙམ་ནས་མང་པོ་ཞིག་སླེབས་མེད། ད་ཆ་ང་ཚོ་ཀིརྟི་དགོན་པའི་དགེ་འདུན་དང་། དགོན་པའི་གཡས་གཡོན་ལ་ཤིན་ཏུ་ཛ་དྲག་གི་གནས་སྟངས་ཆགས་ཡོད། རང་ལུས་མེར་སྲེག་གནང་མཁན་གྱི་གྲྭ་ཤག་ནང་རྒྱུན་དུ་ལས་བྱེད་པ་བསྡད་ཡོད་པ་དང་། འཇབ་རྒོལ་བཀག་འགོག་ཆེད་སྒོ་དང་སྒེའུ་ཁུང་ཚང་མར་ལྕགས་དྲ་བཙུགས་ཡོད། ང་ཚོ་དང་རྒྱ་ནག་གཞུང་གི་དཔོན་རིགས་དབར་གྱི་འགལ་ཟླ་ཉིན་རེ་བཞིན་ཛ་དྲག་ཏུ་འགྲོ་བ་དང་། བཟང་ཕྱོགས་ཀྱི་འབྲེལ་བ་དང་ཕན་ཚུན་ཡིད་ཆེས་སླེབས་ཐབས་ནི་རྩ་བ་ནས་རེ་བ་མེད་པར་གྱུར།”
༤༽ གསང་མིང་ངག་གཟབ་སྒ་བ་འབོད་པས་ལན་འདེབས་གནང་དོན། “བློ་བཟང་ཕུན་ཚོགས་འཚོ་ཞུགས་རིང་རྟག་ཏུ་བོད་མི་རིགས་ཀྱི་གནས་སྟངས་སྐོར་གླེང་བ་དང་། ལྷག་པར་དུ་ཕྱི་ལོ་ ༢༠༠༨ ཟླ་ ༣ ཚེས་ ༡༦ ཉིན་མོར། རྒྱ་ནག་གཞུང་གིས་རྔ་པའི་མི་མང་དམར་གསོད་བཏང་བའི་ཁྲག་དྲི་བྲོ་བའི་དོན་རྐྱེན་སྐོར་རྒྱུན་དུ་གླེང་བ་དང་། ཁོང་པས་རྒྱུན་དུ་སྡུག་བསྔལ་ཆེན་པོའི་ངང་ནས་བརྗོད་དོན། ༢༠༠༨ ལོ་ནས་བཟུང་། རྔ་པའི་མི་མང་ལ་གཞན་ལ་མེད་པའི་སྡུག་བསྔལ་གསར་པ་ཞིག་ཡོད་པ་ནི། དམར་གསོད་ཆེན་མོ་དེ་ནི་བཟོད་ཐབས་བྲལ་བ་ཞིག་རེད།”
རྒྱ་ནག་གཞུང་གིས་མཐའ་གཅིག་ཏུ་ཁྱབ་བསྒྲགས་བྱེད་དོན། ཀྲུང་གོ་མི་དམངས་བཅིངས་འགྲོལ་དམག་བོད་ལ་བསྐྱོད་ནས། ཞིང་བྲན་ཁྲི་ཚོ་བརྒྱ་བཅིངས་བཀྲོལ་བཏང་བ་དང་། སྤྱི་ཚོགས་རིང་ལུགས་ཀྱི་ལམ་ལུགས་གསར་པའི་འོག་བོད་མི་དམངས་ཀྱི་འཚོ་བ་གནམ་ས་བླ་འོག་གི་འགྱུར་ལྡོག་ཕྱིན་ཡོད་པ་དང་། བདེ་སྐྱིད་ཕུན་སུམ་ཚོགས་པའི་མི་ཚེ་སྐྱེལ་བཞིན་ཡོད་པ་རེད་སོགས་བརྗོད་ཀྱི་ཡོད། འོན་ཀྱང་། དོན་དངོས་སུ་དེ་ལས་ལྡོག་སྟེ། བོད་ནང་གི་བོད་མི་རྣམས་ཀྱིས་རྒྱ་ནག་གཞུང་གིས་བོད་ཐོག་འཛིན་པའི་སྲིད་བྱུས་ལ་མི་འདོད་པའི་རྣམ་པ་ཤུགས་ཆེ་རུ་འགྲོ་བཞིན་ཡོད་པ་མ་ཟད། རྒྱ་ནག་གཞུང་ལ་ངོ་རྒོལ་གྱི་བསམ་བློ་ཤུགས་ཆེ་རུ་འགྲོ་བཞིན་ཡོད། རྒྱ་ནག་གཞུང་ལ་ངོ་རྒོལ་གྱི་རྣམ་པ་མི་འདྲ་བ་མང་པོའི་ཁྲོད་ནས་རང་ལུས་མེར་སྲེག་གི་ངོ་རྒོལ་ནི་ཆེས་དྲག་པོ་དང་། ཆེས་ཡ་ང་ཡིད་སྐྱོ་ཡིན་པ་མ་ཟད། དེ་བས་འ་ཆད་འུ་ཐུག་ཅིག་ཀྱང་ཡིན། གོང་གསལ་བོད་ནང་ནས་སྤེལ་བའི་རྩོམ་ཡིག་གི་ནང་དོན་ལས་གསལ་པོ་ར་སྤྲོད་བྱེད་ཐུབ་པ་ཞིག་ནི། བོད་ནང་གཏན་ལྷིང་མེད་པའི་རྒྱུ་རྐྱེན་གཙོ་བོ་དེ་རྒྱ་ནག་གཞུང་གིས་ལག་བསྟར་བྱེད་བཞིན་པའི་སྲིད་བྱུས་དེ་དག་དོན་དངོས་དང་མི་མཐུན་པའི་ནོར་འཁྲུལ་གྱི་ལམ་ཕྱོགས་ཤིག་རེད།
ངོས་རང་གསང་མིང་ངག་གཟབ་ངག་དབང་འབོད་པས་བཤད་པའི་སྐད་ཆའི་ནང་དོན་ལ་མཐའ་གཅིག་ཏུ་ངོས་ལེན་དང་སྦྲགས། ངོས་རང་གི་རྩོམ་ཡིག་འདི་མཇུག་མ་སྒྲིལ་གོང་། ཁོང་གི་སེམས་ནང་གི་སྐད་ཆའི་ནང་དོན་དེ་དག་གིས་རྒྱ་ནག་གཞུང་ལ་དྲན་སྐུལ་དང་འབྲེལ་བོད་མིའི་སེམས་གཏིང་གི་སྐད་ཆ་ཉན་རོགས་ཞུ་རྒྱུ་ཡིན།
“ཁོང་ཚོའི་(རྒྱ་ནག་གཞུང་)བསམ་པར་ང་ཚོ་མཚོན་ཆས་དྲག་གནོན་བྱེད་པར་སྐྲག་གི་ཡོད་རེད་སྙམ་སྲིད། ཁོང་ཚོ་དངོས་གནས་ནོར་འཁྲུལ་རེད། རྒྱ་ནག་གཞུང་གིས་ ༢༠༠༨ ལོ་ནས་བཟུང་ད་བར་ང་ཚོར་ཆེས་དྲག་པོའི་དབང་བསྒྱུར་དང་། གཞི་རྒྱ་ཆེ་ཆུང་མི་འདྲ་བའི་ཞི་བའི་ཞུ་འབོད་ཅི་འདྲ་ཞིག་ཡིན་རུང་། ཡོངས་རྫོགས་མཚོན་ཆས་དྲག་གནོན་བྱས་ཡོད། ཡིན་ན་ཡང་། ང་ཚོ་ནི་རྒྱ་ནག་གཞུང་གི་དེ་འདྲའི་དྲག་སྤྱོད་དེར་སྐྲག་རྒྱུ་ལྟ་ཅི། དེ་ལས་ལྡོག་སྟེ་ང་ཚོའི་སྙིང་སྟོབས་དང་། ཡིད་ཆེས། དེ་བཞིན་རྒྱ་ནག་གཞུང་ལ་འཁོན་འཛིན་སྔར་ལས་ཤུགས་ཆེ་རུ་འགྲོ་རྒྱུ་རེད། བོད་མི་སུ་འདྲ་ཞིག་འཇིགས་སྣང་ལ་བརྟེན་ནས་ངོ་རྒོལ་མཚམས་འཇོག་གམ་འདོར་རྒྱུའི་བསམ་བློ་ནམ་ཡང་ཡོད་མི་སྲིད་པ་རེད། རྒྱ་ནག་གཞུང་གི་ནོར་འཁྲུལ་ཆེ་ཤོས་ནི། དོན་ངོ་མར་རྒྱུས་ལོན་མི་བྱེད་པ་དང་། དེ་བས་བོད་ལ་འཛིན་པའི་དྲག་པོའི་སྲིད་བྱུས་འགྱུར་བ་མི་གཏོང་བ་དེ་རེད། ང་ཚོར་ཡག་པོ་བྱས་ན། ང་ཚོ་ཡང་མི་རེད། ང་ཚོས་བསམ་གཞིགས་བྱེད་ཐུབ། ཡིན་ཡང། ང་ཚོར་དྲག་གནོན་ལག་བསྟར་བྱས་པས། ང་ཚོས་ངོ་རྒོལ་བྱེད་རྒྱུ་ཡིན་ཡིན་པ་རེད། གལ་སྲིད་གཞུང་གིས་ང་ཚོར་བསམ་ཤེས་ཐུབ་པའི་སྲིད་བྱུས་ཤིག་མེད་པ་དང་། དམག་དཔུང་ཀིརྟི་དགོན་པ་ནས་ཕྱིར་འཐེན་མ་བྱས་ཚེ། ངོ་རྒོལ་གྱི་ལས་འགུལ་ནམ་ཡང་མཚམས་འཇོག་བྱ་རྒྱུ་མིན་པ་དང་། ང་ཚོ་ཀིརྟི་དགོན་པའི་ན་གཞོན་དགེ་འདུན་ཚོ། རྒྱ་ནག་གཞུང་ལ་འཛིན་པའི་དགྲ་ཁ་གཏད་ཀྱི་བསམ་བློ་ད་དུང་ཡང་འདོར་མེད། གྲྭ་ཕྲུག་ཆུང་ཆུང་ཚོས་རྒྱུན་དུ་རྩེད་མོ་རྩེད་པའི་སྐབས་སུ་ཡང་། རང་ལུས་མེར་སྲེག་གི་བྱ་སྤྱོད་ཐོག་ནས་ངོ་རྒོལ་གྱི་རྣམ་པ་སྟོན་གྱི་ཡོད།”
ཟུར་མཆན།
(བོད་མིའི་སྒྲིག་འཛུགས་ཕྱི་དྲིལ་རྒྱ་ཡིག་སྡེ་ཚན་གྱི་འགན་འཛིན་བསོད་ནམས་རྡོ་རྗེ་ལགས་ཀྱིས་ ༢༠༡༥ ཟླ་ ༤ ཚེས་ ༢༧ ཉིན་ཨ་རིའི་རྒྱལ་ས་ཝ་ཤིང་ཊོན་དུ་ “མི་རིགས་གཞོན་སྐྱེས་མགོ་ཁྲིད་སྦྱོང་བརྡར་ཚོགས་འདུ་”ཞེས་པའི་ཚོགས་ཆེན་ཐོག་རྒྱ་ཡིག་ཐོག་སྤེལ་བའི་རྩོམ་ཡིག་ཉེ་ལམ་ཁོང་གིས་བོད་བསྒྱུར་ཞུས།)
ད་ལས་འགུལ་འདི་ཡང་སྐྱར་མ་གླེང་ན་དགའ། ལས་འགུལ་འདིས་བོད་མི་དམངས་ལ་ཁྱེར་ཡོང་བ་ནི་འཇགས་སྐྲག་དང་སྡུག་བསྔལ། ཞེ་འཁོན་དང་ཁོང་ཁྲོ་མ་གཏོགས་ཅི་ཡང་མེད། མི་མང་པོ་ཞིག་”མེར་སྲེག་སྟོང་ཁར་ལོངས་ན་མཉམ་འབྲེལ་རྒྱལ་ཚོགས་དང་ཨ་རིས་རོགས་སྐྱོར་ག་གེ་མོ་བྱེད་རྒྱུ་རེད”་ཟེར་བའི་དཀྲོགས་གཏམ་ལ་མགོ་འཁོར་ནས་དལ་འབྱོར་མི་ལུས་ཆུད་ཟོས་སུ་བཏང་བ་རེད།