འདས་པའི་བདུན་ཕྲག་གསུམ་ནང་ཨེ་རན་ནང་དུ་ཕག་པའི་ཆམ་ནད་ཁྱབ་གདལ་ཕྱིན་ཏེ་ཡུལ་མི་ ༣༣ རྐྱེན་འདས་དང་ཡུལ་མི་ ༦༠༠ སྨན་ཁང་དུ་སྡོད་དགོས་བྱུང་ཡོད་འདུག
དེ་རིང་བྷེ་བྷེ་སེས་གནས་ཚུལ་སྤེལ་བ་ལྟར་ན། ཨེ་རན་ལྷོ་ཤར་ཞིང་ཆེན་ཁིར་མན་ (Kerman) དང་སེ་སི་ཊན་བྷ་ལུ་ཆེ་སི་ཊན་ (Sistan-Baluchistan) གཉིས་ནང་ཕག་པའི་ཆམ་ནད་ (swine flu) ཁྱབ་གདལ་ཕྱིན་ཏེ་འདས་པའི་གཟའ་འཁོར་གསུམ་ནང་ཡུལ་མི་ ༣༣ རྐྱེན་འདས་དང་ཡུལ་མི་ ༦༠༠ སྨན་ཁང་ནང་སྡོད་དགོས་བྱུང་ཡོད་པ་མ་ཟད། མི་འགྱང་བར་ཨེ་རན་རྒྱལ་ཁབ་ཀྱི་ཞིང་ཆེན་ཁག་ཡོངས་ལ་ཁྱབ་གདལ་འགྲོ་རྒྱུའི་ཉེན་ཁ་ཆགས་ཡོད་འདུག
ཨེ་རན་འཕྲོད་བསྟེན་ལྷན་ཁང་གི་བློན་ཆེན་གཞོན་པ་ཨ་ལེ་ཨ་ཁི་བྷར་སེ་ཡ་རེ་ (Ali Akbar Sayyari) ཡིས་ཨེ་རན་ལྷོ་ཤར་ཞིང་ཆེན་ཁིར་མན་ནང་ཕག་པའི་ཆམ་ནད་བྱུང་སྟེ་ཡུལ་མི་ ༢༨ དང་། སེ་སི་ཊན་བྷ་ལུ་ཆེ་སི་ཊན་ཞིང་ཆེན་ནང་ཡུལ་མི་ ༥ བཅས་ཁྱོན་ཡུལ་མི་ ༣༣ འདས་གྲོངས་ཕྱིན་ཡོད་པ་དང་། མི་འགྱང་བར་ཨེ་རན་རྒྱལ་ས་ཊི་རན་ (Tehran) ཚུད་པའི་ཞིང་ཆེན་གཞན་ཁག་ནང་ཕག་པའི་ཆམ་ནད་མུ་མཐུད་ཁྱབ་གདལ་འགྲོ་ཡི་ཡིན་པའི་སྐོར་ལ། ང་ཚོ་འཕྲོད་བསྟེན་ལྷན་ཁང་གིས་བརྟག་དཔྱད་ཞིབ་འཇུགས་བྱས་པ་ལྟར་ན། མི་འགྱང་བར་ཨེ་རན་རྒྱལ་ས་ཊི་རན་དང་ཤར་ནུབ་རྒྱུད་ཀྱི་ཨ་ཙིར་བྷ་ཡ་ཇེན་ (Azerbaijan) དང་ཁིར་མན་ཤཱ་ཧ་ (Kermanshah) ཞིང་ཆེན་ཁག་ནང་ཕག་པའི་ཆམ་ནད་ཁྱབ་གདལ་འགྲོ་རྒྱུ་ཡིན་ཚུལ་བརྗོད་འདུག
ཁིར་མན་ཞིང་ཆེན་དུ་ཡོད་པའི་གསོ་རིག་གཙུག་ལག་སློབ་ཆེན་གྱི་འགན་འཛིན་ཨ་ལེ་ཨ་ཁི་བྷར་ཧག་ཌོ་སི་ཊི་ (Ali Akbar Haghdoost) ཟེར་བ་ཞིག་གིས། འདས་པའི་གཟའ་འཁོར་གསུམ་ནང་ཁིར་མན་ཞིང་ཆེན་དུ་གཉན་སྲིན་ (H1N1) ཁྱབ་གདུལ་ཕྱིན་ཏེ་ཡུལ་མི་ ༦༠༠ སྨན་ཁང་ནང་སྡོད་དགོས་བྱུང་ཡོད་སྟབས། དེ་རིང་ང་ཚོས་ཕག་པའི་ཆམ་ནད་སྔོན་འགོག་སྨན་ཁབ་ ༥༠༠༠ མཁོ་འདོན་བྱས་ཟིན་པ་དང་། སང་ཉིན་འགོག་ཁབ་ ༡༥༠༠༠ མཁོ་འདོན་བྱ་འཆར་ཡོད་སྐོར་བརྗོད་འདུག
འཛམ་གླིང་འཕྲོད་བསྟེན་ལྷན་ཚོགས་ཀྱི་དཔྱད་གཞི་ལྟར་ན། ཕག་པའི་ཆམ་ནད་འདིའི་རིགས་བྱིས་པ་དང་རྒན་པ། བུད་མེད་སྦྲུམ་མའི་རིགས་ལ་གཅིན་སྲི་དང་ཁྲག་རྩའི་ནད། མཁལ་མའི་ནད། གློ་བའི་ནད། སྙིང་ཁམས་ཀྱི་ནད། ལྷག་པར་དུ་འབྲས་ནད་སོགས་བསྐྱེད་ཀྱི་ཡོད་པ་དང་། སྤྱིར་ཕག་པའི་ཆམ་ནད་ཀྱི་བསྐྱེད་པའི་གཉན་སྲིན་ (H1N1) འདིའི་རིགས་དང་ཐོག་ཕྱི་ལོ་ ༢༠༠༩ ལོའི་ཕྱི་ཟླ་ ༦ པའི་ནང་ཨ་རི་དང་ཨུ་རུ་སུ་གཉིས་ནས་ཁྱབ་གདལ་ཕྱིན་ཏེ། ཕྱི་ལོ་ ༢༠༡༠ ལོའི་བར་འཛམ་གླིང་ཤར་ནུབ་ཀྱི་རྒྱལ་ཁབ་ ༢༡༤ ནང་ཁྱབ་སྟེ་མི་ ༡༨༥༠༠ ལྷག་རྐྱེན་ལམ་དུ་ཤོར་བ་དང་། སྐབས་དེར་ཨེ་རན་པའི་བྱིས་པ་ལོ་ ༡༦ ཅན་ཞིག་ཨ་རིར་ཕྱིན་སྐབས་ཁོ་ལ་ཕག་པའི་ཆམ་ནད་འགོས་པ་དང་། ཁོ་ཕྱིར་ཨེ་རན་རྒྱལ་ཁབ་ཏུ་ལོག་ཡོང་བ་དང་ཆབས་ཅིག ཕག་པའི་ཆམ་ནད་དེ་རིམ་བཞིན་ཨེ་རན་རྒྱལ་ནང་དུ་ཁྱབ་གདལ་ཕྱིན་པ་ཞིག་ཡིན་འདུག
གསར་འགོད་པ། པདྨ་རྒྱལ།
