གསར་འགྱུར་བརྒྱུད་ལམ་ ༢༠ ལྷག་ཉོས།

ཧོང་ཀོང་ནན་ཧྭ་ཞོགས་རེའི་ཚགས་པར་དང་དེའི་ཁྱབ་ཁོངས་སུ་ཡོད་པའི་དྲ་རྒྱ་དུས་དེབ་ཚང་མར་ཨ་སྒོར་དུང་ཕྱུར་ ༢.༦༦ བྱས་ཏེ་བཙོང་ཡོད་འདུག

རྒྱ་ནག་གི་ཨ་ལེ་བྷ་བྷ་དྲ་ཐོག་ཚོང་གཉེར་ཁང་གིས་ཧོང་ཀོང་གི་ནན་ཧྭ་ཞོགས་རེའི་ཚགས་པར་དང་། ཚགས་པར་ཁང་དེའི་ཁྱབ་ཁོངས་སུ་ཡོད་པའི་དྲ་རྒྱ་དང་དུས་དེབ་སོགས་ལ་ཁྱོན་ཨ་སྒོར་དུང་ཕྱུར་ ༢.༦༦ སྤྲད་དེ་ཉོས་ཟིན་ཡོད་པ་དང་། ཨ་ལི་བྷ་བྷ་དྲ་ཐོག་ཚོང་གཉེར་ཁང་གིས་ཉེ་བའི་ལོ་ཤས་ནང་བརྙན་འཕྲིན་དང་དྲ་རྒྱ་སོགས་ཁྱོན་གསར་འགྱུར་བརྒྱུད་ལམ་ཁག་ ༢༤ ལྷག་ཉོས་ཡོད་འདུག

ཟླ་འདིའི་ཕྱི་ཚེས་ ༡༡ ཉིན་ཨ་ལི་བྷ་བྷ་དྲ་ཐོག་ཚོང་གཉེར་ཁང་གིས་ནན་ཧྭ་ཞོགས་རེའི་ཚགས་པར་ཁང་ཉོས་པ་ཁྱབ་བསྒྲགས་བྱས་པ་དང་བསྟུན། ནན་ཧྭ་ཞོགས་རེའི་ཚགས་པར་གྱི་སྲོལ་རྒྱུན་དང་ཕུལ་དུ་བྱུང་བའི་གནས་ཚུལ་འཚོལ་སྒྲིག་གི་ནུས་པ་དང་། ཨ་ལི་བྷ་བྷའི་ཨང་རྩིས་དུས་རབས་ཀྱི་སྟོབས་ཤུགས་གཉིས་མཉམ་འབྲེལ་བྱས་ཏེ་རྒྱ་ནག་དང་ཧོང་ཀོང་གི་གནས་ཚུལ་མཁོ་སྤྲོད་བྱ་རྒྱུ་དང་། གོ་ལ་ཡོངས་ཁྱབ་ཀྱི་ལྟ་ཀློག་པའི་གྲངས་འབོར་མང་དུ་གཏོང་རྒྱུ་ཡིན་ལུགས་བརྗོད་ཡོད་པ་མ་ཟད། ནན་ཧྭ་ཞོགས་རེའི་ཚགས་པར་གྱི་དྲ་བ་རིན་མེད་ཀྱིས་ལྟ་ཀློག་ཐུབ་པ་བཟོ་རྒྱུ་ཡིན་སྐོར་སོགས་བརྗོད་འདུག ཡིན་ནའང་། ཉིན་དེར་ཧོང་ཀོང་གསར་འགོད་མཐུན་ཚོགས་ཀྱིས་མ་འོངས་པར་ཧོང་ཀོང་གི་གསར་འགྱུར་རང་དབང་ལ་སྔར་ལས་འགོག་རྐྱེན་ཐེབས་སྲིད་སྐོར་བརྗོད་ཡོད་པ་དང་། དེ་བཞིན་གནད་དོན་དཔྱད་ཞིབ་པ་མང་པོས་ལོ་ངོ་བརྒྱ་ལྷག་གི་ལོ་རྒྱུས་ལྡན་པའི་གསར་ཁང་དེའི་རྩོམ་སྒྲིག་རང་དབང་ལ་ཤུགས་རྐྱེན་ཐེབས་སྲིད་པའི་སེམས་འཚབ་བྱེད་བཞིན་འདུག

དེ་ཡང་ནན་ཧྭ་ཞོགས་རེའི་ཚགས་པར་ཁང་གི་འཛིན་སྐྱོང་འགན་འཛིན་ཧུ་ཡས་ཆིན་གྱིས། ཨ་ལི་བྷ་བྷས་ཚན་རྩལ་ལ་བརྟེན་ནས་ནན་ཧྭ་ཞོགས་རེའི་ཚགས་པར་གྱི་ནང་དོན་སྔར་ལས་མང་པོ་འཛམ་གླིང་ཡོངས་སུ་སྤེལ་ཐབས་བྱེད་དགོས་ལ། མ་འོངས་པར་གསར་འགྱུར་འཚོལ་སྒྲིག་དང་ཞབས་ཞུའི་ཁྱབ་ཁོངས་ཇེ་མང་དུ་གཏང་སྟེ། ནན་ཧྭ་ཞོགས་རེའི་ཚགས་པར་གཏན་ལྷིང་ངང་འཕེལ་རྒྱས་ཡོང་ཐབས་བྱེད་པར་དགའ་བསུ་བྱེད་བཞིན་ཡོད་སྐོར་བརྗོད་འདུག

ཕྱི་ལོ་ ༢༠༡༣ ཟླ་ ༧ ནང་ནན་ཧྭ་ཞོགས་རེའི་ཚགས་པར་གྱི་གསར་འགོད་པས་ཨ་ལི་བྷ་བྷ་དྲ་ཐོག་ཚོང་གཉེར་ཁང་གི་འགན་འཛིན་མཱ་ཡེན་ལ་བཅར་འདྲི་བྱེད་སྐབས། ཁོས་ཕྱི་ལོ་ ༡༩༨༩ ལོར་གནམ་སྡེ་སྒོ་མོ་ཆེའི་ཐང་ཆེན་དུ་ཞི་རྒོལ་བྱས་པ་དེ་སྐབས་དེའི་ཆེས་ཡང་དག་པའི་ཐག་གཅོད་ཅིག་རེད་ཅེས་བཤད་ཡོད་པ་དང་། ཁོའི་སྐད་ཆ་དེ་རྒྱ་ནག་གི་བརྒྱུད་ལམ་ཁག་ཏུ་ཁྱབ་རྗེས་ཁ་རྡུང་དྲག་པོ་བཏང་བར་བརྟེན། ཕྱིས་སུ་མཱ་ཡེན་གྱིས་ཁོས་ཆེས་ཡང་དག་པའི་ཐག་གཅོད་ཅིག་རེད་ཟེར་བ་དེ་ཁོ་རང་གི་ཁེ་ལས་ཐག་གཅོད་ལ་ཟེར་གྱི་ཡོད་པ་ལས། གནམ་སྡེ་སྒོ་མོ་ཆེའི་དྲུག་བཅུའི་དོན་རྐྱེན་ལ་ཟེར་གྱི་མེད་པའི་ཁ་མཆུ་བཙུགས་ཏེ། ནན་ཧྭ་ཞོགས་རེའི་ཚགས་པར་གྱི་གསར་འགོད་པས་མཱ་ཡེན་ལ་དགོངས་དག་ཞུས་ཡོད་པ་མ་ཟད། ཁོའི་སྐད་ཆའི་ནང་ནས་ཚིག་ཁ་ཤས་ཤིག་ཀྱང་བསུབས་དགོས་བྱུང་ཡོད་འདུག ཉེ་སྔོན་ཨ་ལི་བྷ་བྷའི་ཉེ་འབྲེལ་མི་སྣ་ཞིག་གིས་ཚོང་གཉེར་ཁང་དེ་དང་ནན་ཧྭ་ཞོགས་རེའི་ཚགས་པར་ཁང་གི་འབྲེལ་བ་ད་དུང་ཡང་ཡག་པོ་མེད་ཚུལ་བརྗོད་འདུག

རྒྱ་ནག་མི་མང་ཉིན་རེའི་ཚགས་པར་ཐོག་དཔྱད་རྩོམ་ཞིག་སྤེལ་བའི་ནང་། ད་ལོར་ཨ་ལི་བྷ་བྷས་རྒྱ་སྒོར་དུང་ཕྱུར་ ༩༡༢ ལྷག་གིས་ཉོ་ཚོང་བྱས་ཡོད་པ་དང་། དེ་ནི་ཚོང་གཉེར་ཁང་དེ་བཙུགས་ནས་ལོ་ངོ་ ༡༦ རིང་གི་མཐོ་རླབས་རང་བཞིན་གྱི་འཕེལ་རྒྱས་གསར་པ་ཞིག་ཡིན་ལ། གོ་ལ་ཧྲིལ་པོའི་ཉོ་ཚོང་རྣམས་མ་འོངས་ལོ་ ༡༠ ནས་ ༢༠ ནང་ཨ་ལི་བྷ་བྷའི་ཚོང་སྟེགས་སུ་འཛེགས་ཐུབ་ཚེ། ས་ཆ་གང་ཞིག་ཏུ་ཡོད་ཀྱང་འཛམ་གླིང་ཡོངས་ཀྱི་ཐོན་རྫས་ཉོ་ཐུབ་ལ། སོ་སོའི་ཐོན་རྫས་འཛམ་གླིང་ཡོངས་སུ་ཕྱིར་ཚོང་བྱེད་ཐུབ་སྐོར་སོགས་བརྗོད་འདུག

ལན་ཧྭ་ཞོགས་རེའི་ཚགས་པར་ཕྱི་ལོ་ ༡༩༠༣ ཟླ་ ༡༡ པའི་ནང་རྒྱ་ནག་གི་གསར་བརྗེ་བ་ཞེ་ཀྲན་ཐའེ་(謝纘泰)དང་། ཨ་རི་བ་ཨལ་ཧྥར་ཌི་ཀོན་ནིན་ཧམ་( Alfred Cunningham)ཟེར་བ་གཉིས་ཀྱིས་གསར་དུ་པར་སྐྲུན་བྱས་ཤིང་། ད་ལྟའི་ཆར་འདོན་ཐེངས་རེར་ཚགས་པར་གྲངས་འབུམ་གཅིག་ལྷག་རེ་འགྲེམས་སྤེལ་བྱེད་བཞིན་ཡོད་པ་དང་། གསར་ཁང་གི་ཡོང་འབབ་ཀྱི་བརྒྱ་ཆ་ ༦༨ ཚགས་པར་གྱི་རིན་འབབ་ནས་ཡོང་བཞིན་ཡོད་འདུག གསར་ཁང་དེའི་ཁོངས་སུ་ནན་ཧྭ་ཞོགས་རེའི་ཚགས་པར་དང་གཟའ་ཉི་མའི་ནན་ཧྭ་ཞོགས་རེའི་ཚགས་པར། དེ་བཞིན་དུས་དེབ《HK Magazine》དང་《Harper’s BAZAAR)སོགས་དང་། གཞན་ཡང་། ནན་ཙོ་(Nanzao.co )དང་( SCMP.com)ཟེར་བའི་རྒྱ་ཡིག་དང་དབྱིན་ཡིག་གསར་འགྱུར་དྲ་བ་གཉིས་དང་། ནན་ཧྭ་ཕྱོགས་སྟོན་( Nanzaozhinan.com) ཟེར་བའི་འཚོ་བའི་རྒྱུན་ཤེས་སྐོར་གྱི་དྲ་རྒྱ་ཞིག་བཅས་ཡོད་ཅིང་། དྲ་རྒྱ་ཁག་ལ་ཟླ་རེར་ལྟ་ཀློག་པ་ཁྲི་ ༤༠༠ ཙམ་རེ་ཡོད་པའི་ཁྲོད་ནས་གསུམ་ཆ་གཉིས་ཙམ་ཧོང་ཀོང་དང་རྒྱ་ནག་སྐམ་ས་ཆེན་མོ་ནས་ཡིན་འདུག

གསར་འགོད་པ། པདྨ་མཚོ།